1. Mang e ba t’uf ni ngad rin’ed ya nge yag nda mu’naged fare sagreng ko yafos nrogon ni be yog e Hebrews 12:1?

 BE TAAREBROGONNAG e Bible e yafos rodad e piin Kristiano ko sagreng. Piin yad ra mu’nag e re sagreng ney e ra yag e yafos ni manemus ngorad. (2 Tim. 4:7, 8) Ba t’uf ni ngad rin’ed urngin e tin nrayog rodad ni ngad ululgad ko re sagreng ney ya kari chugur ni ngad mu’naged. Apostal Paul e yag ni nge mu’nag fare sagreng ko yafos, miki yog e n’en nra ayuwegdad ni ngad mu’naged e re sagreng ney. I yog ni ngad “paged urngin ban’en ni be magawon ngodad . . . ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg.”​—Mu beeg e Hebrews 12:1.

2. Mang e be yip’ fan ni ngad “paged urngin ban’en ni be magawon ngodad”?

² Nap’an ni yoloy Paul nthingar da “paged urngin ban’en ni be magawon ngodad,” ma gur, be yip’ fan nsusun e nge par e piin Kristiano ndariy e gilab rorad? Gathi aram e n’en be yog, ya be yip’ fan nib t’uf ni ngad chuweged urngin ban’en nde ga’ fan ni gad be fek ni be tomalnagdad. Tiney e gilab e rayog ni nge magawonnagdad me k’aringdad ni nge aw parowdad. Ra ngad athamgilgad, ma aram e thingar da gurgad ngad guyed ko bay boch e gilab ni gad be fek ni aray rogon fa dariy, ma gad chuweg ni ka chingiyal’ nem. Machane ku dab da chuweged boch e gilab nsusun e ngad feked. Ya faan gad ra chuweg, ma rayog ni nge dab kud ululgad ko sagreng ni gad be tay. (2 Tim. 2:5) Ere mang boch e gilab nthingar da feked?

3. (a) Mang e thingar da feked nrogon ni be yog e Galatia 6:5? (b) Mang e gad ra weliy ko re article ney, ma mang fan?

³ Mu beeg e Galatia 6:5. Bay ban’en ni yog Paul nthingar da feked. I yog nra “be’ ma ba’ gilban ni be fek.” Ere be yog Paul u roy murung’agen e n’en ni baadag Got ni ngad rin’ed ni be’ nge be’, ma re n’ey e ban’en ndabiyog ni nge rin’ be’ ni fan ngodad. Re article ney e gad ra weliy riy e n’en nib muun ko ‘gilab ni gad be fek’ nge  rogon nrayog ni ngad feked. Ku gad ra weliy murung’agen boch e gilab ni gad be fek nrayog nde ga’ fan nge rogon nrayog ni ngad chuweged. Faanra be’ me fek e gilab rok me chuweg e tin nde ga’ fan, ma aram e ra ayuwegdad ni ngad mu’naged fare sagreng ko yafos.

4. Mang fan ni n’en nda micheged u nap’an nda ognaged gadad ngak Got e gathi ban’en ni be tomalnagdad? (Kum guy e sasing.)

⁴ N’en nda micheged u nap’an nda ognaged gadad ngak Got. Nap’an nda ognaged gadad ngak Jehovah, ma aram ma gad micheg ni ngad liyorgad ngak ma gad rin’ e n’en nib m’agan’ ngay. Ere thingar da ted u gil’ e n’en kad micheged. Re n’ey ni ngad ted u gil’ e n’en kad micheged e ban’en nib milfan ngodad nib ga’ fan, machane gathi ban’en ni be tomalnagdad. Ya bin riyul’ riy e ke sunmiydad Jehovah ni ngad rin’ed e n’en nib m’agan’ ngay. (Rev. 4:11) I sunmiydad ni gad baadag ni ngad nanged murung’agen ma gad liyor ngak, miki sunmiydad ni gad bod yaan. Aram fan nrayog ni ngad chugurgad ngak ma gad felfelan’ ni ngad rin’ed e n’en nib m’agan’ ngay. (Ps. 40:8) Maku reb e, faan gad ra rin’ e n’en nib m’agan’ ngay ma gad lek Fak, ma aram e gad ra “pirieg e toffan.”​—Matt. 11:28-30.

5. Mang e rayog ni nge ayuwegem ni ngam tay u gil’ e n’en nim micheg u nap’an nim ognagem ngak Got? (1 John 5:3)

 ⁵ Uw rogon ni ngam fek e re gilab ney? L’agruw ban’en nrayog ni nge ayuwegem. Bin som’on e ngaum gelnag e t’ufeg rom ngak Jehovah. Rayog ni ngam rin’ e re n’ey ni faan ga ra fal’eg i lemnag urngin ban’en nib manigil ni ke rin’ ni fan ngom nge pi tow’ath nra pi’ ngom boch nga m’on. Ra be gel e t’ufeg rom ngak Got, ma aram e ra mom ngom ni ngam fol rok. (Mu beeg e 1 John 5:3.) Bin migid e ngam folwok rok Jesus. I yag ni nge rin’ e n’en nib m’agan’ Jehovah ngay ni bochan e meybil ngak ni nge ayuweg mi i par ni be lemnag e tow’ath ni yira pi’ ngak. (Heb. 5:7; 12:2) Ere mmeybil ngak Jehovah ni nge pi’ gelngim mu um par ni ga be lemnag e athap rodad ko yafos ni manemus ni bod ni rin’ Jesus. Ra gel feni t’uf Got rom mag folwok rok Fak, ma aram e rayog ni ngam tay u gil’ e n’en nim micheg u nap’an nim ognagem ngak Got.   

6. Mang fan nthingar da rin’ed e pi n’en nib milfan ngodad u lan e tabinaw? (Kum guy e sasing.)

⁶ Pi n’en nib milfan ngodad u lan e tabinaw. Nap’an ni gad be un ko fare sagreng ko yafos, ma thingari gel e t’ufeg rodad ngak Jehovah nge Jesus ko t’ufeg rodad ko girdi’ rodad. (Matt. 10:37) Machane re n’ey e gathi be yip’ fan nrayog ni ngad digeyed e pi n’en nib milfan ngodad u lan e tabinaw ni gowa aram e n’en be talegdad ndarud rin’ed e n’en nib m’agan’ Got nge Kristus ngay. Ya bin riyul’ riy e faanra ngad fel’gad u wan’ Got nge Kristus, mab t’uf ni ngad rin’ed e n’en nib milfan ngodad u lan e tabinaw. (1 Tim. 5:4, 8) Faan gad ra rin’ e re n’ey, ma aram e ra gel e felfelan’ rodad. Bin riyul’ riy e manang Jehovah nra felfelan’ e tabinaw ni faanra i dag e en figirngiy nge en leengiy e t’ufeg ngorow ma yow be tay farow, ma be t’ufeg e piin gallabthir pi fakrad ma yad be skulnagrad, ma be fol e piin bitir ko gallabthir rorad.​—Efe. 5:33; 6:1, 4.

7. Uw rogon nrayog ni ngam rin’ e n’en nib milfan ngom u lan e tabinaw?

⁷ Uw rogon ni ngam fek e re gilab ney? Demtrug ko gur mini’ u lan e tabinaw, ma nge pagan’um ko fonow nu Bible ni bay e gonop riy ko bin ngam taga’ ko n’en ga be lemnag, ara yalen ko nam rom, ara n’en ma yog e piin yima lemnag ni boor ban’en ni yad manang. (Prov. 24:3, 4) Um beeg e pi babyor rodad nib puluw e thin riy ko Bible. Pi babyor ney e bay boch e fonow riy nib manigil ni be weliy rogon ni ngad folgad ko pi kenggin e motochiyel u Bible. Bod ni fapi article ni bay u tan fare thin ni “Help for the Family” e bay boch ban’en ni be weliy ni bay rogon ko pi magawon ni ma mada’nag e piin mabgol, nge piin gallabthir, nge piin fel’ yangaren e ngiyal’ ney. b Mu dugliy u wan’um ni ngam fol ko n’en be yog e Bible ni mus ni faanra bay boch e girdi’ u tabinaw rom nder fol riy. Nap’an ni ga ra rin’ e re n’ey, ma aram e ra yib angin ko tabinaw rom miki tow’athnagem Jehovah.​—1 Pet. 3:1, 2. 

8. Mang e rayog ni nge buch rodad ni bochan e pi n’en kad dugliyed?

⁸ N’en nib milfan ngodad ni bay rogon ko pi n’en gad ma dugliy. Ke pi’ Jehovah e puf rogon ngodad nib tow’ath, ma baadag ni ngad dugliyed boch ban’en nib fel’ nra yib angin ngodad. Machane nap’an ni gad ra dugliy boch ban’en nde fel’ ma der ma yororiydad u wenegan ni ma yib ngodad. (Gal. 6:7, 8) Ere aram fan ni ma m’agan’dad nga wenegan ni ma yib ngodad ni bochan e de puluw e n’en kad mel’eged, nge thin ni ka dogned, ara ban’en ni kad rin’ed ndad lemgad u m’on riy. Rayog ni nge magawon e nangan’ rodad ni bochan ban’en ni kad rin’ed. Machane bochan ni gad manang ni gadad e ba kireb e rodad ko n’en kad dugliyed ma rayog ni nge k’aringdad  ni ngad wenignaged e denen rodad, ma gad yal’uweg e tin kad olobochgad riy, ma dab kud sulod ngay bayay. Gad ra rin’ e pi n’ey ma rayog ni nge ayuwegdad ni ngad ululgad ko fare sagreng ko yafos.

9. Mang e rayog ni ngam rin’ ni faanra kam dugliy ban’en nde puluw? (Kum guy e sasing.)

⁹ Uw rogon ni ngam fek e re gilab ney? Faanra dabiyog ni ngam thilyeg e n’en nde puluw ni kam dugliy, ma nge m’agan’um nga wenegan ni ke yib ngom. Ngam nang ndabiyog ni ngam thilyeg e n’en ke thumur. Dab mu adbey e tayim rom nge gelngim ni bochan e ga be guy rogon ni ngam micheg nib fel’ e rom ara ga be yon’ e kireb nga daken yugu boch e girdi’ ko n’en nde puluw ni kam dugliy. Ya n’en ngam rin’ e nga mog e kireb rom mag rin’ e tin nrayog rom e chiney. Faanra be magawon lanin’um ni bochan ban’en nib kireb ni kam rin’, mag sobut’nag lanin’um ngam meybil ngak Jehovah ni nge ayuwegem, mag weliy e kireb rom ngak, ma gog ngak ni nge n’ag fan. (Ps. 25:11; 51:3, 4) Mu wenig ngak e piin kam kirebnag lanin’rad, ma faanra ba t’uf mag ning e ayuw ko piin piilal. (Jas. 5:14, 15) Mu fil ban’en ko oloboch rom mag guy rogon ndab kum rin’ bayay. Faan ga ra rin’ e re n’ey, ma rayog ni nge pagan’um ngay nra runguyem Jehovah me ayuwegem.​—Ps. 103:8-13.

10. Mang fan ni faanra ud lemnaged ni ngad rin’ed boch ban’en ndabiyog rodad ma ra tomalnagdad? (Galatia 6:4)

¹⁰ Gad be lemnag ni ngad rin’ed boch ban’en ndabiyog rodad. Faanra ud taareb rogonnaged gadad ngak yugu boch e girdi’, ma rayog ni ngad tomalnaged gadad ni bochan e gad be lemnag ni ngad rin’ed boch ban’en ndabiyog rodad. (Mu beeg e Galatia 6:4.) Faanra gubin ngiyal’ ni gad ma taareb rogonnaged gadad ngak yugu boch e girdi’, ma rayog ni nge awan’dad mu ud tagenginggad ngorad. (Gal. 5:26) Rayog ni ngaud guyed rogon ni ngad rin’ed e n’en be rin’ yugu boch e girdi’ ni bochan e gad baadag ni ngad rin’ed e tin be yag ni ngar rin’ed ni yugu aram rogon ndabiyog rodad. Ma faanra riyul’ ni ma mulan’uy u nap’an nra “l’agan’uy nga ban’en me kireb fare n’em,” me ere kub gel e kireban’ ni gad ra tay ni faanra ud lemnaged ni ngad rin’ed boch ban’en ndabiyog rodad! (Prov. 13:12) Faan gad ra rin’ e re n’ey, ma rayog ni nge aw parowdad me sagaalnagdad ko sagreng ni gad be un ngay ni fan ko yafos.​—Prov. 24:10.

11. Mang e rayog ni nge talegem ndab um lemnag ni ngam rin’ boch ban’en ndabiyog rom?

¹¹ Uw rogon ni ngam chuweg e biney e gilab u pom? Dab um lemnag ni ngam rin’ boch ban’en nder lemnag Jehovah ni ngam rin’. Der ma lemnag ni ngam pi’ ban’en ndariy rom. (2 Kor. 8:12) Nge pagan’um ngay nder ma taarebrogonnag Jehovah e n’en ga ma rin’ ko n’en ma rin’ yugu boch e girdi’. (Matt. 25:20-23) Ba ga’ fan u wan’ e pigpig ni ga ma tay ngak u polo’ i gum’irchaem, nge yul’yul’ rom ngak, nge athamgil ni ga ma tay. Ngam sobut’nag lanin’um ngam nang ni bay boch ban’en nsana dabkiyog ni ngam rin’ e chiney ni bochan yangarem, ara m’ar rom, ara rarogon e par rom. Nge m’agan’um ngay ni ngam siyeg boch e maruwel ni yibe pi’ ngom ni bochan e m’ar rom ara yangarem ni bod e n’en ni rin’ Barzillai. (2 Sam. 19:35, 36) Nge m’agan’um ko ayuw ni yibe ognag ngom mag pi’ boch e maruwel rom nge rin’ yugu boch e girdi’ ko ngiyal’ nib puluw ni ngam rin’ riy ni bod ni rin’ Moses. (Ex. 18:21, 22) Faanra ga manang e gin ngam mus riy, ma aram e ra talegem ndab um lemnag ni ngam rin’ boch ban’en ndabiyog rom me aw parwom ko fare sagreng ko yafos.

12. Faanra ke dugliy yugu boch e girdi’ ban’en nde fel’, ma gadad e kireb rodad, fa? Mu tamilangnag.

¹² Ngam lemnag ni gur e ba kireb e rom ni bochan e n’en nde fel’ ni ke dugliy yugu boch e girdi’. Dabiyog ni ngad dugliyed e n’en nge rin’ yugu boch e girdi’; maku gathi gubin ngiyal’ nrayog ni ngad ayuweged yad ndabi yib wenegan ngorad e  n’en nib kireb ni kar mel’eged. Bod nrayog ni nge munmun me dugliy reb e bitir ndab ki pigpig ngak Jehovah. Re n’ey e rayog ni nge k’aring e kireban’ nib gel ko gallabthir rok. Machane piin gallabthir ni yad ma lemnag nn’en nde fel’ ni ke dugliy fakrad e yad e kireb rorad e yad ma tomalnaged yad. Ma gathi ireray ban’en ni baadag Jehovah ni ngaur lemnaged.​—Rom. 14:12.

13. Mang e rayog ni nge rin’ reb e gallabthir ni faanra ke dugliy fak ni nge rin’ ban’en nde fel’?

¹³ Uw rogon ni ngam chuweg e biney e gilab u pom? Ngam nang ni gad gubin ni ke pi’ Jehovah e puf rogon ngodad. Ke pag ni nge bagadad me mel’eg e n’en nge rin’. Re n’ey e ba muun ngay ni ngad dugliyed ko ngad pigpiggad ngak fa danga’. Manang Jehovah ni gathi gur reb e gallabthir ni kam flont, ma kemus ni baadag ni ngam rin’ e tin th’abi fel’ nrayog rom. N’en ke mel’eg fakam ni nge rin’ e ir e ba milfan ngak, ma gathi gur. (Prov. 20:11) Yugu aram rogon ma rayog ni nga i magafan’um ko pi n’en nder yag ni ngam rin’ nib fel’ rogon ni gur reb e gallabthir. Faanra arrogon, mag weliy lanin’um ngak Jehovah ma gog ngak ni nge n’ag fan rom. Manang ndabiyog ni ngam sul nga tomur ngam thilyeg e tin ke thumur. Ku der lemnag ni ngam taleg fakam ndabi yib wenegan ngak e n’en ke rin’. Dab mu pagtalin ni faanra athamgil fakam nge sul ngak Jehovah, ma ra ayuweg Jehovah ni nge sul ngak.​—Luke 15:18-20.

14. Mang fan nsusun e dab ud pared ni gad be lemnag e kireb ni kad rin’ed?

¹⁴ Ngaum par ni ga be lemnag e kireb ni kam rin’. Nap’an ni gad ra denen mab puluw ni nga i magawon lanin’dad. Machane dabun Jehovah ni ngaud pared ni gad be lemnag e kireb ni kad rin’ed. Ireray reb e ban’en ni ma tomalnagdad nthingar da paged. Uw rogon ma gad nang ni kaygi pag rogon ni gad be lemnag e kireb ni kad rin’ed? Faanra ka dogned e denen rodad, ma kad kalgadngan’dad, ma gad be rin’ urngin ban’en nrayog rodad ndab kud sulod ngay bayay, ma rayog ni nge pagan’dad ngay ni ke n’ag Jehovah fan rodad. (Acts 3:19) Tomuren ni kad rin’ed e pi n’ey, ma dabun Jehovah ni ngaud pared ni gad be lemnag e kireb ni kad rin’ed. Ya manang nra yib wenegan ngodad. (Ps. 31:10) Faanra kireban’dad nib pag rogon, ma rayog ni ngad talgad  ko sagreng ni gad be un ngay ni fan ko yafos.​—2 Kor. 2:7.

15. Mang e rayog ni nge ayuwegem ni faanra damur tal i lemnag e kireb ni kam rin’? (1 John 3:19, 20) (Kum guy e sasing.)

¹⁵ Uw rogon ni ngam chuweg e biney e gilab u pom? Faanra damur tal i lemnag e kireb ni kam rin’, ma ngam lemnag rogon ni ma ‘n’ag Got fan’ e kireb. (Ps. 130:4) Nap’an nra n’ag fan e kireb rok e piin nriyul’ ni kar kalgadngan’rad, ma ma gaar: “Dab ku gu lemnag e kireb ni kar ngongliyed.” (Jer. 31:34) Re n’ey e be yip’ fan ndakuriy ba ngiyal’ nra lemnag Jehovah e denen rom u tomuren ni ke n’ag fan. Ere dab mu lemnag ni wenegan e denen rom ni be yib ngom e chiney e aram e mich riy ndawori n’ag fan rom. Ku dab mu damumuw ngom ni bochan e sana bay boch ban’en ndabkiyog ni ngam rin’ ko pigpig rom e chiney ni bochan e kireb ni kam rin’ ni ke thumur. Der ma par Jehovah ni yugu be lemnag e denen ni kam rin’, maku arrogon nsusun e ngam rin’.​—Mu beeg e 1 John 3:19, 20.

16. Gadad e piin gad be un ko sagreng e mang e thingar da nanged?

¹⁶ Nap’an ni gad be un ko fare sagreng ko yafos, ma thingar da milgad u reb e kanawo’ nra ‘yog puluwon ngodad.’ (1 Kor. 9:24) Rayog ni ngad rin’ed e re n’ey ni faan gad ra nang e n’en nib thil u thilin e pi gilab nthingar da feked nge boch ban’en ni be tomalnagdad nthingar da paged. Kemus ni in ban’en e kad weliyed ko re article ney nthingar da feked nge tin thingar da paged. Machane ku bay boch ban’en. I yog Jesus nrayog ni ngaud pared ‘nib ga’ ni mur ni ke pag rogon nge muun rrum e gad be muruwliy, nge pi n’en ni ma magafan’uy ngay ko biney e tamilang.’ (Luke 21:34) Rayog ni nge ayuwegem e gal thin nu Bible ney nge ku boch e thin nu Bible ni ngam nang e n’en nrayog nib t’uf ni ngam thilyeg u rarogom u nap’an ni ga be un ko fare sagreng ko yafos.

17. Mang fan nrayog ni nge pagan’dad ngay ni gad ra mu’nag fare sagreng ko yafos?

¹⁷ Rayog ni nge pagan’dad ngay ni gad ra mu’nag fare sagreng ko yafos ni bochan e ra pi’ Jehovah gelngidad. (Isa. 40:29-31) Ere dabi aw parwom ngam sagaal ko sagreng ni ga be un ngay! Mu folwok rok apostal Paul ni athamgil u rogon nrayog rok ni nge yag puluwon ngak. (Fil. 3:13, 14) Dariy be’ nrayog ni nge un ko re sagreng ney ni fan ngom, machane rayog ni nge ayuwegem Jehovah ni ngam mu’nag. Rayog ni nge ayuwegem Jehovah ni ngam fek e gilab rom mag pag e tin be tomalnagem. (Ps. 68:19) Ra ayuwegem ni ngam athamgiliy e gin ka bay ni ngam mil riy ngam mu’nag e sagreng ni ga be un ngay!