1. Ringbisihe kuti AEbere 12:1, ginipai si aida ani mangihe tipa ka nyasa gu oto abaangirã nga ga unga?

 BAIBIRI naringbisa gaani raka nga ga aKristano kuti oto abaangirã. Agu aboro nika nyasa gu oto abaangirã re, i nika fu gu mosoro nga ga nyenye unga fuyo. (2 Tim. 4:7, 8) Si naida ani mangi gupai rengbe omerani na ni tipa ka aaora aora kindi, mbiko ani ima mbeda gbe kuti digido gu oto abaangirã re. Gu mokedi nangia Pauro nga gu boro na oro oto abaangirã nga ga unga ki nyasihe ape gupai rengbe ka undo rani ani oro oto abaangirã kidu na diabese. Ko ape gupai furani nga “ani mói rõrõi he ku sa yo dunduko. . . ani ki oro gu oto du fu rani ku mbata yo kindi.”—Oni gedi AEbere 12:1.

2. Rogo gupai yo nga “ani mói rõrõi he ku sa yo dunduko” nga gine?

² Ho Pauro ake gupai ni nga ‘ani mói rõrõi he ku sa yo dunduko,’ ya mo ko aaida ka ya he ho si aida Kristano tindihe te? Oó, anga gure nga gupai ko aaida ka pehe te. Ono gupai ko aaida ka pehe nga, si naida ani mbu tinda gu rõrõi ahe si aidanga ani tindi he ya. Ngbatunga agi atindiro re ima rengba ka sa rani ka ani ndunga ni ipo ya watadu si ima rengba ka sa rani omerani bati. Tipa ka hipai, si naida ani mangipai niipo ka bihe singia ngbatunga agu ahe re ho berani na ki baha kusayo. Ti kina gu bangisa regbo re a, si aidanga ani ba agu ahe kusayo nga gu si aida ani tindihe te. Ka ani mbu tinda agi re ani nyenga tingba oto abaangirã te. (2 Tim. 2:5) Gini ahe si aida ani tindihe?

3. (a) Ringbisihe kuti AGaratio 6:5, ginihe si aida ani tindihe? (b) Ginipai ani nika sakapai tipaha rogo gi kekeapai re, na tipagine?

³ Oni gedi AGaratio 6:5. Pauro afura tipa guhe si aida ani tindihe. Ko ake gupai nga “boro nakpida kina gani pai.” Herẽ, Pauro aafura tipa gu tindiro boro atinda ha barabangiri Mbori, nga gu tindiro kina boro atinda ha, ka kura boro aatindanga ha fu kurani  ya. Rogo gi kekeapai re, ani nika sakapai tipa guhe nga gaani “pai” watadu gaani tindiro na wai rengbe ani ka tindaha. Na ani nika asada ka ino guhe si aidanga ani tindihe ya nga gu ani naima tindaha na ki bi wai rengbe ani ka baha kusayo. Tinda gaani tindiro na ki ba guhe kusayo si aidanga ani tindihe ya nika undo rani ani nyasi gaani oto abaangirã nga ga unga.

4. Tipagine adu ngaha ti ni ni kpakarapai ka digiso gu mokido ani amangihe tipa ka iriso Yekova nyeanye kindi ya? (Oni bi sura a.)

⁴ Gu kidohe ani amangihe ka iriso Yekova nyeanye kindi. Ho ani akpara gaani raka ni fu Yekova, ani amangi kidohe nga ani nika manga gupai ko akpinyemuhe. Si naida ani banda gu kidohe re. Manga gupai ani akidohe ka mangaha fu Yekova nga nyanyakipa tindiro, ono si akpakaranga furani te. Si wo bambiko gupai nga, Yekova ambakadi rani na gupai nga ani mangi gupai ko akpinyemuhe. (Yugo. 4:11) Ko ambakadi rani na gupai rogo rani yo nga ka ino ko na kini irisi ko na ko ambakadi rani rogo kpiako yo. Ni sangbana gipai re, ani na rengba ka mbeda na ko na kini gbia ngbarago ti manga gupai ko akpinyemuhe. (Tam. 40:8) Na berewe a, ho ani amanga gupai ni Mbori akpinyemuhe na kini pekefuo  Wiriko ani ‘nabi ongoda’ tipa tirani.—Mt. 11:28-30.

5. Ginipai nika undo ro mo mangi agu apai dunduko mo akidohe fu Yekova tipaha? (1 Yoane 5:3)

⁵ Waigu rengbe mo ka tinda gamo tindiro? Apai ue rengbe ka undo. Ni bambatapai, mo nindu kumbatayo kaa nyakasa gamo nyemuse tipa Yekova. Mo rengbe ka manga gipai re ni berã mo dudunguro kurii gu wene apai ko namangihe foro na gu wene apai ko nika mangaha foro kumbatayo. Kina wai gamo nyemuse nikaa kio tipa Mbori, mo nika bihe abi nga gako arugute asusanga omerani te. (Oni gedi 1 Yoane 5:3.) Uepai nga, mo wiriki Yesu. Yesu adu na diabese ka manga gupai Mbori akpinyemuhe bambiko ko akpari fu Yekova tipa undo na ki moiberãko tipa gako mosoro. (Eb. 5:7; 12:2) Wakina Yesu, mo kpari fu Yekova tipa ome, na ki banda gu maabangirise nga ga nyenye unga barabangiro na ku berãro yo. Wa gamo nyemuse tipa Mbori nikaa sona na mo kini wiriki Wiriko, mo nika du na rengba ka manga gupai mo akido pa mangaha fu Yekova.

6. Tipagine si aida ani ngere ti ni fuo gaani sunge nga ga aborokporo? (Oni bi sura a.)

⁶ Agu atindiro du berani wangia ani aborokporo. Rogo gaani oto abaangirã nga ga unga, si naida ani kpinyemu Yekova na Yesu susi wai ani akpinyemu agumerani. (Mt. 10:37) Gere ayugongo gupai nga si naida ani mbu ngerafuo gaani aborokporo si ki du wa ka i ya si nga gupai na ká na ani ti manga gupai Mbori gbiati Kristo akpinyemuhe te. Tipa ka sa ngbarago ti Mbori na Kristo, si naida ani ngerefuo gaani sunge nga ga aborokporo. (1 Tim. 5:4, 8) Ho ani amanga gipai re ni, ani nika du na bakere ngbarago. Yekova ima ino gupai nga aborokporo rengbe kadu na ngbarago ka si du nga kumbakudee na diakumba nakpinyemu gayo abadiarogatise na kini irisi yo, avunguagudee kini kpinyemu awiriyo na kini raba yo, na agude kini giasangba avungu yo.—Ef. 5:33; 6:1, 4.

7. Waigu rengbe mo ka manga gupai fu gamo aborokporo Yekova akpinyemuhe bero?

⁷ Waigu rengbe mo ka tinda gamo tindiro? Si ngia mo nga kumbakudee, diakumba, watadu gude, mo mangipai kuti agu arugapai nga ga Baibiri, ka mo mangingo kina gupai gbua mo abihe nga si du ni ruruhe watadu gupai dungu aboro amangaha rogo gu ba mo araka rogoyo ya singia gupai abangbasia abainipai apehe ya. (Snz. 24:3, 4) Mo mangisunge wenengai na gu gaani awaraga du mburuhe rii Baibiri. Si na agu aberãpai rogoyo du tipa wai rengbe boro ka mangapai kuti gu bangua arengo nga ga Baibiri. Ni kpiapai, gu burosua nga Oni Rengbe Arengba ka Gbia Ngbarago Rogo Gaoni Ramukporo gbiati gu buku nga Mo Raki Nyeanye Kindi na Ngbarago! wirikapai 49 na 50 na agu arugute rogoyo rengbe ka undo arogotise, avunguagude, paranga agude. b Mo diberã tipa ka manga gupai Baibiri agumbaha, ka si vura du vurũ nga kura gamo aborokporo amanganga ha te. Ho mo nika mangaha ni, gamo aborokporo nika gbia undo agbia, na mo nika gbia ngbarago ti ga Yekova amaku.—1 Pet. 3:1, 2.

8. Waigu rengbe gaani adiaberã kadu na maapai kurirani?

⁸ Gu tindiro du kurirani nibipa agu adiaberã ani amangaha. Yekova ima fu gu ranirii furani nga ga manga diaberã, na ko naida ani gbia ngbarago ti agu aundo naye ti manga wene adiaberã. Ka ani mangi gbegberẽ diaberã ko nambu rani ambu ani gbia sangbana gaani diaberã. (Gara. 6:7, 8) Mbiko gi ndupai re, ani nika dia ai gu sangbanapai kugume nika manga mbiko ani amangi gbegberẽ siapai watadu ani ape  gupai du ni irairaha watadu ka manga gupai du ni irairaha. Nibi pa gupai ani amangihe, sangbakpotoraniyo ima rengba ka mbusa rani. Ono tie, pa ino ani gupai nga ani nika dia gupai kugume nika ye mbiko gu sangbanapai ani amangihe nika sarani ani kusi gaani aingapai ki mbakadi gu ingahe ani amangihe na ki ne manga ngbatunga gu ingahe re berewe. Ngbatunga gi diandue re nika undo rani ani nye kuti ngba oto abaangirã nga ga unga.

9. Ginipai rengbe mo ka mangaha ka si du nga mo ima manga gbegberẽ diaberã? (Oni bi sura a.)

⁹ Waigu rengbe mo ka tinda gamo tindiro? Ka si du nga mo aima manga gbegberẽ diaberã, ginipai rengbe mo ka mangaha? Si naida mo ini gupai nga ka mo arianga gupai naima manga te. Ka mo gberesinga gamo regbo na ome ka asada ka yugoho nga mo aduadu na rengo bero watadu ka bira gu kura aboro tipa gamo ingahe ya. Kuba gure, mo idi pa gamo ingahe na ki mangi ome ka manga gupai du ni ruruhe awere. Ka si du nga sangbakpotoroyo na mbusa ro tipa gupai mo amangihe ni irairaha, mo du na umbasitise na ki kpari fu Yekova na ki idi pa gamo ingahe na ki sanako ko mbupai foro. (Tam. 25:11; 51:3, 4) Mo hõmbupai be agu aboro ka si du nga mo aingipai kutiyo, na mo gbata gu undo nga ga abaakumba ka si aaida ha wo. (Yak. 5:14, 15) Mo wirikipai ti gamo aingahe, na ki mangi ome ka zanga mangaha berewe. Wa mo nikaa mangaha wo, mo ima rengba kadu na gu kido nga Yekova nika yugo inopai foro na ki fu gu undo foro mo aida na ni.—Tam. 103:8-13.

10. Tipagine pa berã ani agu apai ani arengbanga ka mangaha ya narengbe kadu ti ni ni rõrõi tindiro? (AGaratio 6:4)

¹⁰ Gu bipai nga si naida ani naamanga bakere apai ti aregbo dunduko. Ani ima rengba ka tinda rõrõi tindiro ho ani aringbisa tirani ni na kura aboro. (Oni gedi AGaratio 6:4.) Ka si du nga ani naringbisa tirani ti aregbo dũ na kura aboro, si ima rengba ka sa rani ani naakpi yo na ani ki tona ka manga abaangirã na yo. (Gara. 5:26) Ka si du nga ani naˈasada ka manga agu apai nga gu kura aboro amangaha si ki vura du vurũ nga ani arengbanga ka mangaha te, ani ima rengba ka imisa tirani. Na berewe, oni berẽnga kurii gipai re: Baibiri nape gupai furani nga ani ima rengba kadu na gberãrago ho ani asungudo he ni. (Snz. 13:12) Sidu, oni berẽnga pa gu gberãrago tie ka ani du na ni ka si du nga ani nasungudo guhe ani nikaa gbianga ha ya! Ka ani mangi gipai re ani ima rengba kadu na bakere mbugo na omerani ki bati ti gu oto abaangirã nga ga unga.—Snz. 24:10.

11. Ginipai rengbe ka undo roni oni ne gu bipai nga si naida oni mangi gu bakereapai nga gu arengbanga na omeroni ya?

¹¹ Waigu rengbe mo ka ba gu tindiro re kusayo? Ka mo naabingo ho nga si naida mo mangi bakere apai susi gu Yekova aida mo mangihe ya. Ko aidanga gupai nga mo fu guhe fuko nga gu adu nga bero ya te. (2 Kor. 8:12) Mo du na gu kido nga Yekova aringbisanga gupai mo amangaha na ga gu kura aboro te. (Mt. 25:20-23) Ko nabi gu sunge mo amangaha fuko na kpotoro yo dũ, gamo idapase, na gamo hipai na nyanyakipaha. Mo du na umbasitise na ki ini gupai nga mo arengbanga ka manga gupai mo aida ka mangaha awere te mbiko pa garãro, wai du kpotoro na agu api du tipa ro. Wakina Baruzirai, mo mbu pa kura amamu ka si du nga kpoto ro arengbanga ka mbu ro mo mangi kura asunge te. (2 Sam. 19:35, 36) Wakina Moize, mo idi na undo na ki fu kura asunge fu kura aboro ho rẽhe arẽ ni. (Gate 18:21, 22) Ho du mo ni na umbasitise, mo aberãnga pa manga agu pai nga gu rengbe ka sa ro mo du na bakere mbugo ti ngba gu oto abaangirã nga ga unga te.

12. Ya mo si naida i bira rani tipa gu iraira adiaberã kura aboro amangaha? Oni sakingo rogoyo.

 ¹² Ka mo naabingo tiro nga mo du nasa gupai nga kura aboro mangi iraira adiaberã ya. Ani arengbanga ka manga adiaberã fu kura aboro te; na ani arengbanga ka banda yo a ti sangbana gupai rengbe ka manga mbiko gayo gbegberẽ asiapai te. Ni kpiapai, gude ima rengba ka diaberã ka mbu iriso Yekova. Gu diaberã re ima rengba ka ba bakere gberãrago ti avungugude. Ono tie, agu avunguagude na bira tiyo tipa gu gbegberẽ diaberã nga ga awiriyo natinda rõrõi tindiro. Anga si nga gu tindiro Yekova aida i tindihe te.—Rom. 14:12.

13. Waigu rengbe vungugude ka mangapai kuti gu diaberã nga ga wirini?

¹³ Waigu rengbe mo ka ba gu tindiro re kusayo? Mo tingidi gupai nga Yekova ima fu ranirii furani dunduko. Ko nambu ai boro nimangi gani siapai nisani. Gipai re na koda si ngia ni nika iriso ko. Yekova ima ino gupai nga rengberengbe vungugude nga mo te; ko naida mo mangi gupai rẽ na omero. Gu siapai wiro amangaha gani tindiro du, angianga gamo ya. (Snz. 20:11) Wa vura duhe wo, mo ima rengba kaa ndu kumbatayo kindi kaa bakabangiro tipa gu ingahe mo amangihe wa ngia mo vungugude. Kangia wo duhe, mo pepa wai fu Yekova mo abi apai na mo ki sanako tipa gako mbupai. Ko ima ino gupai nga ka mo arianga agu apai namangi kusayo te. Na ti kina gu bangisa regbo re ko abingo ho nga si naida mo banda wiro ti sangbana gupai naye mbiko gani mangapai te. Mo moi gupai ku berãro yo nga, ka wiro mangi ome tipa ka karaga ti ni fuo Yekova, ko nika dia ni adia kugume.—Rk. 15:18-20.

14. Tipagine du bakere gberãrago ti ni ni gu tindiro si aida ani baha kusayo?

¹⁴ Du na gberãrago ti aregbo dunduko. Ho ani amanga ingapai ni, si rẽarẽ ani du na gberãrago. Ono tie, Yekova aidanga gupai berani nga ani nye kaa du na bakere gberãrago kindi te. Si nga gu tindiro si aida ani baha kusayo. Waigu rengbe ani ka ino gupai nga ani ima du na bakere gberãrago nikerehe? Ka si du nga ani kusi gaani ingapai, ki saberã rani na ki mangi  agu adiandue si aidaha tipa ka zanga manga gu ingapai re berewe, ani ima rengba kadu na gu kido nga Yekova ima mbupai furani. (Amo. 3:19) Ka si du nga ani ima manga agi adiandue re, Yekova aidanga gupai nga sangbakpoto rani yo nye kaa fuda rani kindi te. Ko ima ino gupai nga ka sangbakpoto rani yo nye kindi kaa fuda rani si ima rengba ka imisa rani. (Tam. 31:10) Ka ome bakere gberãrago fu rii ome rani ima rengba ka mbu oto abaangirã nga ga unga.—2 Kor. 2:7.

15. Ginipai rengbe ka undo ro ka si du nga sangbakpotoroyo nambusa ro? (1 Yoane 3:19, 20) (Oni bi sura a.)

¹⁵ Waigu rengbe mo ka ba gu tindiro re kusayo? Ka bakere gberãrago aamanga ro kindi tipa gupai mo amangihe, mo moiberãro kuti gu “pa vuboro ti ingapai” Mbori afuhe. (Tam. 130:4) Ho ko ambupai ni fu agu aboro mangi ndikidi saberã, ko nakidohe nga: “Ka mi atíngida nga pa gayo ingapai berewe ya.” (Yere. 31:34) Gere nayugo gupai nga Yekova atingidanga pa agu aingapai ko aima mbupai foro tini te. Sidu, ka mo naabingo ho nga agu akpakarapai mo agbia tiro na mbiko sangbana gu ingapai mo amangihe nayugo gupai nga ko ata mbunga pai foro ya te. Na ka rago gberẽnga tiro mbiko gupai nga mo zanga bete agu amamu mo adu na ni rogo dungurati ya. Yekova andunga kindi kumbatayo kaa berã tipa gamo aingapai te, na si aidanga mo naaberãha wo a te.—Oni gedi 1 Yoane 3:19, 20.

16. Wangia ani agu aboro na ora oto, ginipai si aida ani inihe?

¹⁶ Wa ani nikaa ora oto abaangirã nga ga unga, si naida ‘ani óro wa ka ani da ada.’ (1 Kor. 9:24) Ani rengbe ka manga gipai re ka ani inipa gu tindiro si aida ani tindihe na gu si aida ani baha kusayo. Rogo gi kekeapai re, ani sakipai tipa bete agu akpiapai nga ga agu ahe si aida ani tindihe na gu si aida ani baha kusayo. Ono agu akuraha kinaho ani naima rengba ka fura tipaha. Yesu ape gupai nga ani ima rengba ‘ka hisa kpotorani yo na bakere riahe, na kpibuda, na berã pa gi unga re.’ (Rk. 21:34) Gi veresi re na agu akuraha ima rengba ka undo ro mo ini pa gu ariapai si aida mo mangihe tipa ka ora gu oto abaangirã nga ga unga.

17. Tipagine rengbe ani kadu na gu kido ti ni nga ani nika duadu na diabese tingba oto abaangirã nga ga unga?

¹⁷ Ani ima rengba kadu na gu kido nga, ani nika duadu na diabese rogo gu oto abaangirã nga ga unga bambiko Yekova nika fu gu ome furani ani aidaha. (Yes. 40:29-31) Sidu tie, ka omeroni batingo ya! Oni wiriki gu mokedi nangia Pauro nga guko naoro nyanyaki tipa ka gbia gu mosoro naadu barabangiriko. (Frp. 3:13, 14) Boro ho rengbe ka ora gi oto abaangirã re foro te, ono mbiko gu undo nga ga Yekova mo ima rengba kadu na diabese. Yekova ima rengba ka undo ro mo tindi gamo atindiro na ki ba agu atindiro kusayo mo aidanga na ni ya. (Tam. 68:19) Na ga Yekova undo, mo nika du na rengba ka ora oto abaangirã na ki nyasihe!