Siphẹ alhạ phọ aḍiphẹ phọ, oḍighom mọ uuḅenhion ni raraạr dị eghị ghisigh elhọgh ephophe muḅọph siphẹ igbo Anmụny Askul ABaibul phọ. AWatch Tower phọ amhiigh ogbạ ghan omiteom riisi aBaibul phọ ooḅeghiọn ghan bọ siphẹ ituughạ Iiḅereghị r’Iiseeny atorobọ awiki phọ. Kụ oḅarạm isiphẹ, Anmụny Askul ABaibul phọ umiteom ni aKalandạ dị amhoọgh riisi aBaibul ilọ atorobọ awiki ḅilhẹ r’asuọr omhoọr ghan mem ituughạ ilọ oginha oye phọ r’isiphẹ iiseeny eghunotu phọ.

Siphẹ ituughạ phọ, Anmụny Askul ABaibul phọ ughaạph ghan ni raraạr dị “emitenhaan bidị” epẹ erugh phọ, oghaạph ghan riphigh dị bidị omhoọgh osẹph aZihova, omhoọr ghan ḍuọr, obobọ eeni kẹn ooḅereghị. Eva Barney, dị aḍiiny muụm lhạ phọ 1923 mem dị odị amhạn 15 asiạ aḅẹm mọ: “Eḍighi iyaạr dị nạ rawạ oghaạph ilọ iyaạr dị emitenhaan nyinhạ, pọ nạ kameerạ kụ eeni amiighom mọ, ‘Mị rawạ osighẹ eepoogh phọ ephẹn phọ osephọm Uw-emhoọgh phọ esi imạ araraạr phọ odị muḍighinhaan bọ imhị.’” Abuniin abumor ukạr kụ osereghiạn ghan ophinhom aani abin gạ phọ ophọn phọ. Umaranhi phọ Barney aḅilhẹ alhoghọm mọ: “Ooḅi okumoor onyọ umor phọ Godwin amhoọgh ghan ni ibadị araraạr otuạn osẹph Uw-emhoọgh phọ. Kuolọ mem dị anhịr phọ odị amhiịn mọ otolhọm agadạ phọ mamhiigh ramoọgh ooḅaghamhiạn aloor ilọ amem mọ araghaạph phọ odị mesighẹ bọ, odị aḍur ghan ni asuomạ odị enụm. Ipẹ phọ iḍighi ghan idị Umor phọ Godwin akureri raghaạph phọ arọl ude.”

Mem torobọ unwanyụ, abumor r’abumaranhi phọ uḅarạm ghan siphẹ edeọm ituughạ phọ Iiḅereghị dị egbatanhaạn, Iiseeny, ḅilhẹ r’oghaạph ilọ emitenhaan bidị. AWatch Tower April 1, 1923, aghaạph ilọ apakirị ituughạ phọ iphẹn phọ mọ: “Isighẹ ghan egbem apakirị ituughạ phọ eghaạph ghan ilọ araraạr dị emite epẹ erugh phọ kụ eḅilhẹ ekparamhị buọ oḍighi phọ. . . . Yoor oḍuom ni olhoghi mọ iphẹn phọ kelọgh ni epophe siya arighirị phọ edi bọ igbo abumor phọ.”

Okaaphọm dị amhạn 19 asiạ dị oghol mọ Charles Martin, olạ aVancouver, Canada, amhooghọm ni suọ agey ituughạ phọ iphẹn phọ. Odị aghaạph mọ: “Ipạ kụ esi dị mị atuughạ ilọ iyaạr oghaạph epẹ erugh phọ. Awe ugbor ghan ni oghaạph idị emitenhaan bidị epẹ erugh phọ. Iphẹn phọ ilhoghonhaạn ni imhị ḍighaạgh olhegheri iyaạr oghaạph ḅilhẹ r’eten ongọ ophagharanhaạn asipuru kirokirọ.”

“Asiḍio omite epẹ erugh phọ” ilhọgh ni kẹn ephophe muḅọph phọ arọl bọ igbo abumor phọ. AWatch Tower  April 1, 1923, agbeelhom mọ: “Pidị yira omhoọgh muḅọph siphẹ oḍighi phọ . . . , moselẹ Tuesday, May 1, 1923, idiphọ aḍio dị oomo ayira komite epẹ erugh phọ. Kụ esighẹ rekị kụ oḍighi ghan iduọn phọ oḅẹl aTuesday atorobọ unwanyụ . . . Torobọ oye siphẹ ookpomhoghan phọ amhiịn ni mọ odị apinhom aani ni bin oḍighi phọ.”

Ghalhamọ r’Anmụny Askul ABaibul dị oḍighi iḍoọgh bịn uphinhom aani ghan ni bin oḍighi phọ ophọn phọ. AHazel Burford, dị amhạn 16 asiạ mem mọ amuphẹ phọ aḅẹm mo: “ABulletin amhoọgh ghan ni reḍeenhaan ilọ oghaạph dị kotue okpạph opạm. a Mị r’ogbogh Odẹ amhị, ulhọgh ghan ni iboom inyaạm ophinhom aani abin iiḍighi phọ ipẹ phọ.” Toroboiperolbọ, Umaranhi phọ Burford asoman isophoghom esi dị odị u/seere olhoghi, mem dị oniin okumoor onyọ umor u/wạ mọ ibạm anmụny odạph ghan bidị omite epẹ erugh phọ . Odị aḅẹm mọ: “Oniin okumoor ooḅi onyọ umor o/wạ mọ mị ukaaphạn aani we. Mem mọ opọ phọ, abuniin awe u/naghanhạn mọ oomo Anmụny Askul ABaibul phọ, emhiigh ugheel kụ esi risinha, kụ umhoọgh bọ oḍighi ooseeny ghan Ogbogh Olemhiạ phọ ayira.” (Ps. 148:12, 13) Kuolọ Umaranhi phọ Burford aghiọm ni ghisigh. Kụ esighẹ rekị kụ odị aghị omhunhenhiom iyạl ekụ askul aGilead phọ, kụ aḅilhẹ akumuan idiphọ onyọ amisonarị epẹ Panama. Idiphọ amem mọ rekị bọ, abumor phọ abuphẹ phọ uru ni onhaghanhạn mọ iḍoọgh kotue ni opinhom aani bin oghaạph iiḅi iinhaghạn phọ.

Ibạm r’igbogh arookpomhoghan eephugh ikparamhị kẹn muḅọph abumor phọ. Ibadị arookpomhoghan eephugh phọ iphẹn phọ imhoọgh ghan ni siḍio dị omite ghan epẹ erugh phọ. Esi omaạm, umhạgh ni oomo abuphẹ oghị aani bọ ookpomhoghan eephugh phọ epẹ Winnipeg, Canada, ophinhom aani abin omite aani epẹ erugh phọ ḍughulotu aMarch 31. Uteẹny ghan ni ibadị awe siḍio phọ iphẹn phọ egbatanhaạn bọ, kụ imạ iḍuạ ghan ni emite. Kụ August 5, uphạm ni onhọn ookpomhoghan eephugh epẹ Winnipeg, kụ awe dị romạn ni 7,000 kụ ughị. Kekulha ko/mhiịn ghan onhụ awe dị olheeny idiphọ ookpomhoghan eephugh epẹ Canada.

Ookpomhoghan eephugh awe aZihova dị akạr agbatanhaạn dị ophạm lhạ phọ 1923, pọ opọ ophạm bọ August 18-26, epẹ Los Angeles, California. Kụ egbi  bọ oteẹny ookpomhoghan eephugh phọ, Asinewspaper igbeelhom ni ḅilhẹ Anmụny Askul ABaibul phọ ungooghị ni we rinyạ aḍimhạgh dị epel 500,000. Udapharị yogh kẹn igbogh arinyạ aḍimhạgh phọ simoto.

Ḍughulotu aSaturday, August 25, Umor phọ Rutherford angọ ni oghaạph dị emhuoghaạph phọ eḅẹm mọ “Sheep and Goats.” Siphẹ oghaạph phọ, odị agbạ ni eten dị eegholhaan mọ “iyool” phọ pọ abuọ elhiom eḍighinhom iyaạr phọ kokelhọm bọ paradais siẹn ade phọ. Odị aḅilhẹ ni angọ onhọn oghaạph r’osopha dị aḅẹm mọ “A Warning.” Osopha phọ ophọn phọ ayegherọn ni Kristẹn Uḅeenheẹn phọ kụ aromha buọ iiḅi arokpom ogbatạn aloor abidị esi ABabilọn Ogbogh phọ. (Ogan. 18:2, 4) Onyebel roten, r’oophugh Anmụny Askul ABaibul phọ udiighi ni irubal arinyạ ilọ osopha phọ opọ phọ.

Ḍio ookpomhoghan eephugh phọ esughanham bọ omhạn phọ, aḍita dị opel 30,000 kụ unhaghạn oghaạph ogbo phọ Umor phọ Rutherford angọ bọ, aḅẹm bọ mọ “All Nations Marching to Armageddon, but Millions Now Living Will Never Die.” Loor iduọn olhegheri bọ mọ aḍiboom aḍita kụ kotu ookpomhoghan eephugh phọ ophọn phọ, Anmụny Askul ABaibul phọ ughị ni olhọm ogbogh astadium mọ oghol bọ mọ Coliseum epẹ Los Angeles. Orue oḍighi idị torobọ oye kanaghạn ipẹ rokaạph bọ, abumor phọ usighẹ ni oḍighinhom igbogh aspika astadium mọ, eḍighi bọ omhoom olhẹm dị purukụ amite mem mọ amuphẹ phọ. Aḍita abunhọn unhaghạn oghaạph phọ loor aradio.

Lhạ phọ 1923, umhiịn ni oghị aghisigh dị aḍighan elhegh ilọ oghaạph iiḅi iinhaghạn phọ epẹ Africa, Europe, India, r’aSouth America. Epẹ India, umor phọ A. J. Joseph dị amhoọgh anhịr r’oḍiiny ibạm anmụny, kụ alhoghonhaạn ghan ḍighaạgh ogẹ omiteom arinyạ phọ ilọ Hindi, Tamil, Telugu, r’Urdu.

Epẹ Sierra Leone, Anmụny Askul ABaibul phọ Alfred Joseph r’aLeonard Blackman ugẹ ni ḍinyạ oghiọm emhụ agadạ phọ epẹ Brooklyn, New York, olhọm olhoghonhaạn aḍighaạgh. Kụ April 14, 1923, uphagharanhaạn ni ilọm mọ abidị. Kụ Alfred aḅẹm mọ, “ogbo aḍughul oniin aSaturday, umhạgh ni imhị fon, dị olhoghi mị u/seere, kụ upuru imhị mọ: Nạ kụ ugẹ bọ Watch Tower Society ḍinyạ phọ aḅenhị mọ ingọ inyinha bukaaphọm?” Kụ Alfred aphagharanhaạn mọ: “Ii,” kụ eḍọgh phọ eḅẹm mọ: “Mị kụ oye phọ orom bọ mọ aru.” Ephẹn phọ eḍọgh aWilliam R. Brown. Aḍio phọ aḍiphẹ phọ kụ edị odị, anhịr odị, Antonia, r’anmanyaạn abidị, Louise r’aLucy oḍuạ epẹ Caribbean osi.  Abumor phọ ukori ni omhiịn umor phọ Brown r’eghunotu odị.

Kụ Alfred aghị ghisigh aḅẹm mọ: “Ḍieriphọ aḍiroọr phọ, aLeonard r’amhị odi rotuughạ ghan ituughạ aBaibul awiki ayoor, kụ oye dị amite agey ḍimite arelhe aru uteẹny iyoor. Oye phọ opọ phọ pọ Umor phọ Brown. Odị amhoọgh agey oophugh ilọ igey phọ dị tutụ odị awạ ongọ oghaạph ogbo ḍieriphọ aḍio phọ.” I/mạn r’omhạn unwanyụ bịn Umor phọ Brown angọ amhạn oomo arinyạ phọ odị aphạm bọ arumom. Kụ i/bia bịn oḅilhẹ oruom nyodị 5,000 inhọn arinyạ, kụ moọny amem bịn arinyạ phọ ipẹ phọ eḅilhẹ emhinheen. Kuolọ u/legheriom Umor phọ Brown idiphọ oye dị aal ghan rinyạ. Siphẹ oomo asiạ phọ odị akuọm bọ loor okumu aZihova, odị agbor ghan ni asighẹ Baibul phọ aḍighinhom mem dị odị rangọ oghaạph dị tutụ omhạgh ghan nyodị mọ Bible Brown.

Epẹ Germany, abumor phọ usopha ni osighẹ olạ agadạ phọ arọl bọ epẹ Barmen, oghimọm enhọn ekpisi loor iduọn esi phọ eghom bọ, ḅilhẹ kẹn loor iduọn onhaghạn bọ mọ awe eghạm aFrance rokolhobian ghan ozuom emhạ phọ epẹ phọ. Anmụny Askul ABaibul phọ uru ni omhiịn esi dị ekạr ekasiạn epẹ Magdeburg dị kotue osighẹ oḍighinhom esi oprint ghan arinyạ. June 19 kụ edị abumor phọ omhạn osigheọgh oomo araraạr phọ oghimọm epẹ omhoom aBethel phọ epẹ Magdeburg. Aḍio phọ oḅenhị bọ emhụ agadạ phọ mọ oomo phọ araraạr phọ mesi epẹ Magdeburg, kụ edị arinyạ iinhaghạn phọ egbeelhom mọ aFrance mozuom emhạ phọ aBarmen. Abumor phọ usẹph ni aZihova esi oghoph phọ ḅilhẹ r’olhoghonhaạn aḍighaạgh phọ odị.

Epẹ Brazil, George Young, aghiighị ni ibadị arikpisi ogbeelhom iiḅi iinhaghạn phọ, odị aḅilhẹ kẹn aghughuron olạ agadạ aḅilhẹ amhiigh oprint aWatch Tower omiteom onhụ aPortuguese. Esi iyạl ikpo arunwanyụ, odị angooghị ni rinyạ dị epel 7,000. Eru aBrazil phọ odị ingọ ni Sarah Ferguson emạ eepoogh. K’a1899 kụ edị odị amhiigh aạl aWatch Tower phọ, kuolọ odị ko/rue oḅọgh loor phọ odị ongọ aZihova esi oḍiiny amuụm. Iyạl arunwanyụ reten, Umaranhi phọ Ferguson r’inya anmụny odị uru ni oḍiiny muụm eekunha phọ.

Idiphọ alhạ phọ retu bọ osi eekunha, AWatch Tower phọ aDecember 15, 1923 aghaạph ni idị amuḅọph phọ arọl bọ igbo Anmụny Askul ABaibul phọ etir iiḅereghị phọ abidị, AWatch Tower aḅẹm mọ: “Egananani mọ arookpomhoghan phọ . . . Emoon ni eten aruwaloor . . . Ookolhobian obughẹ arukumuan phọ ayira r’oghị aghisigh okumu ghan aZihova r’oophugh ḅilhẹ r’ibo lhạ phọ aḍiẹn kodạgh bọ.”

Ibadị imạ araraạr imitenhaan ni kẹn Nmụny Askul ABaibul phọ lhạ phọ 1924. Esi ibadị arunwanyụ abumor phọ epẹ Bethel uphạm ni rukumuan odoghoḍi arutu de dị edi epẹ Staten Island, ekpisi dị i/kạr ikelhạn emhụ agadạ phọ epẹ Brooklyn. Umhadạn oḍighi odoghoḍi aruutu phọ ipẹ phọ emhiighom alhạ phọ 1924, kụ ipẹ phọ ilhoghonhaạn ni ḍighaạgh olhọgh ophophe amuḅọph phọ kụ oraramhị iiḅi iinhaghạn phọ eten dị ke/rọl ghan igbaany.