Long yia ya, oganaesesen i mekem plante jenis we i halpem ol Baebol Studen blong oli joen gud. Wajtaoa, i stat blong eksplenem ol vas we oli stap tokbaot evri wik long ol Prea, ol Singsing, mo ol Toktok we i kamaot long miting. Antap long hemia, ol Baebol Studen oli wokem wan kalenda we i gat wan vas blong evri wik, wetem wan singsing we oli save singsing long hem long taem blong pesnel stadi o famle wosip.

Long ol miting blong olgeta, ol Baebol Studen bambae oli talemaot tingting blong olgeta long saed blong wan ekspiriens long wok blong prij, oli tokbaot from wanem oli wantem talem tangkiu long Jehova, oli singsing, o mekem wan prea. Eva Barney, we i baptaes long 1923 taem i gat 15 yia, i talem se: “Sipos yu wantem talemaot tingting blong yu, bambae yu stanap mo yu statem toktok blong yu olsem se, ‘Mi wantem talem tangkiu long Masta from evri gudfala samting we hem i mekem blong mi.’” Sam brata oli laekem tumas blong talemaot bilif blong olgeta. Sista Barney i gohed se: “Olfala Brata Godwin i gat plante samting blong talem tangkiu long Masta from. Be taem waef blong hem i luk se brata we i lidim miting i stat blong wari, bambae hem i pulum en blong kot blong hasban blong hem blong i stop toktok, mo i sidaon.”

Wan taem long wan manis, wanwan kongregesen i mekem wan spesel Prea, Singsing, mo Tokbaot wan ekspiriens long miting. Wajtaoa blong 1 Eprel 1923, i tokbaot miting ya se: “Long haf blong miting, bambae oli tokbaot ol ekspiriens we i joen wetem wok blong prij, mo enkarejem olgeta we oli stap prij. . . . Mifala i sua se miting ya bambae i mekem se ol brata mo sista oli joen gud moa tugeta.”

Charles Martin,wan yangfala pablisa we i gat 19 yia mo i joen long kongregesen blong Vancouver, Kanada, i kasem gudfala samting from ol miting ya. Samtaem biaen, hem i talem se: “Long ol miting ya, hemia nao faswan taem we mi lanem ol toktok we mi mas talem taem mi stanap long doa blong man. Plante taem, wan brata o sista bambae i tokbaot wan ekspiriens blong wok blong prij. Mo hemia i givhan long mi blong save wanem blong talem, mo olsem wanem blong ansa long ol defren tok we man i talem blong blokem mi.”

Mo tu, ol brata mo sista oli joen gud moa taem oli gat “ol dei blong prij.” Wajtaoa blong 1 Eprel  1923, i bin talemaot se: “Blong mekem se yumi evriwan i joen blong mekem sem wok . . . , oli jusum Tusde 1 Mei 1923, olsem dei blong go prij. Afta long hemia, long evri faswan Tusde blong manis, bambae i kam dei blong prij . . . Evri memba blong kongregesen oli mas gat sam haf blong mekem long wok ya.”

Ol yangfala Baebol Studen tu oli joen long wok ya. Hazel Burford, we i gat 16 yia nomo long taem ya, i talem se: “Long Bulletin, i gat sam isi fastok we mifala i save lanem baehat. a Mi wetem Abu man i wok strong long ol wok ya.” Be, Sista Burford i sapraes taem i harem tingting blong wan brata long wok blong prij we hem i stap mekem. Sista ya i talem se: “Wan olfala brata i no glad nating, i talem se mi no sud toktok long ol man. Long taem ya, samfala oli no kasemsave se ol Baebol Studen, hemia i inkludum ‘ol yang man mo ol yang woman,’ evriwan i mas joen blong presem Bigfala Krieta blong yumi.” (Sam 148:​12, 13, King James Version) Be Sista Burford i gohed blong prij. Ale samtaem biaen, hem i go joen long seken klas blong Gilead Skul mo hem i go mekem wok olsem wan misinari long Panama. Sloslo ol brata ya oli jenisim tingting we oli gat long ol yangfala we oli stap prij.

Ol asembli tu oli halpem ol brata mo sista blong oli joen gud moa. Long taem blong ol asembli ya, i gat wan dei we oli makemaot blong prij. Eksampol, long wan asembli long Winnipeg, Kanada, oli talem long evri man we oli kam long asembli ya se oli welkam blong prij long taon, long Maj 31. Long ol spesel dei ya blong prij, oli kasem plante moa man, mo i gat plante gudfala frut i kamaot from. Long 5 Ogis i gat klosap 7,000 man oli kam joen long wan narafala asembli long Winnipeg. Long taem ya, namba blong ol man i bigwan moa i bitim ol nara asembli we oli bin mekem long Kanada.

Wan impoten asembli blong ol man blong Jehova, oli holem long Los Angeles, Kalifonia, long 18-26 Ogis 1923. Long ol wik bifo long asembli ya, oli advetaesem long ol niuspepa, mo ol Baebol Studen oli givimaot bitim 500,000 smosmol pepa blong advetaesem asembli ya. Mo oli putum ol  posta blong asembli ya tu long ol pablik transpot mo ol praevet trak.

Long Sarede 25 Ogis, Brata Rutherford i givim tok ya “Ol Sipsip mo Ol Nani,” we i tokbaot “ol sipsip” olsem ol stret man we bambae oli laef long paradaes long wol. Mo tu, hem i givim wan tok mo i ridimaot wan desisen we oli kolem “Wan Woning.” Desisen ya, hemia blong tok agensem Krisendom mo talem long ol man we hat blong olgeta i stret, blong oli kamaot long “Bigfala Babilon.” (Rev. 18:​2, 4) Samtaem biaen, ol Baebol Studen raon long wol oli joen blong seremaot plante milian traket we i tokbaot desisen ya.

Long laswan dei blong asembli, ol 30,000 man we i stap long asembli ya oli harem Brata Rutherford i givim pablik tok ya “Olgeta Nesen Oli Stap Maj i Go From Amagedon, Be Ol Milian Man We Oli Laef Naoia Bambae Oli Neva Ded.” Blong mekem se bigfala hip blong ol man ya oli lesin gud, ol Baebol Studen oli rentem wan niufala bilding long Los Angeles Coliseum, mo oli yusum ol laodspika blong stadium ya, we long taem ya hemia i niufala teknoloji. Mo plante moa man oli lesin long program ya tu tru long radio.

Long yia 1923, wok blong prij i go antap bigwan long Afrika, Yurop, India, mo Saot Amerika. Long India, A. J. Joseph i stap lukaot long waef mo ol sikis pikinini blong hem, mo long semtaem, hem i givhan blong wokem ol buk long lanwis Hindi, Tamil, Telugu, mo Urdu.

Long Sierra Leone, tu Baebol Studen, hemia Alfred Joseph mo Leonard Blackman, tufala i raet i go long hedkwota long Brooklyn, Niu Yok, blong askem help. Ale long 14 Eprel 1923, oli ansa long tufala. Alfred i talem se: “Long wan Sarede naet, mi kasem wan fon kol.” Hem i harem wan bigfala voes i askem long hem se: “?Yu nao yu raet i go long Watch Tower Society, mo yu askem blong oli sanem sam man blong prij i kam?” Nao Alfred i ansa se: “Yes.” Nao man ya long telefon i talem se: “Mi ya nao oli sanem mi.” Voes ya hem i voes blong William R. Brown. Hem i kamtru long Karibin long dei ya, wetem waef blong hem Antonia, mo tufala gel blong tufala, hemia Louise mo Lucy. Mo ol brata oli wantem tumas blong mitim olgeta.

Alfred i gohed i talem se: “Long nekis moning, mi mo Leonard i stap stadi Baebol olsem we mitufala i stap mekem evri wik, be wantaem nomo mitufala i sek long wan longfala man i stanap long doa. Hemia Brata Brown. Hem i wan man we  i strong long trutok, taswe hem i wantem tumas blong givim wan pablik tok long nekis dei.” I no wan manis yet, be Brata Brown i givimaot olgeta buk we hem i karem wetem hem i kam. I no longtaem afta, hem i kasem 5,000 buk bakegen, be afta i no longtaem mifala i nidim plante moa buk bakegen. Be ol man oli save se Brata Brown i no stap salem ol buk. Long olgeta taem ya we oli stap wok strong long wok blong Jehova, oltaem hem i yusum Baebol taem hem i storian, taswe ol man oli singaot hem se Baebol Brown.

Long Jemani, ol brata oli disaed blong muvaot long branj ofis we i stap long Barmen from we i smol tumas, mo tu from we oli harem se i no longtaem ami blong Franis bambae i kam atakem taon ya. Ol Baebol Studen oli faenem wan bilding long Magdeburg we oli luk se oli save yusum blong mekem ol printing. Ale long 19 Jun, ol brata oli pakemap ol tul blong mekem printing mo ol narafala samting, mo oli muv i go long niufala Betel long Magdeburg. Long nekis dei, afta we wol hedkwota i kasem nius se mifala i muvaot, ol niuspepa oli talemaot se Franis i holem taon blong Barmen. Ol brata oli luksave se desisen ya blong muvaot, i olsem wan pruf se Jehova i stap blesem mo i lukaot gud long olgeta.

Long Brasil, George Young, we i stap travel i go olbaot blong talemaot gud nius, i stanemap wan niu branj ofis, mo i stat blong wokem Wajtaoa long lanwis blong Potugal. Long sam manis nomo, hem i givimaot bitim 7,000 buklet mo magasin. Taem hem i kasem Brasil, hem i go visitim Sarah Ferguson mo famle blong hem, mo hemia i mekem oli glad tumas. Sarah i stap ridim ol Wajtaoa stat long yia 1899 finis, be hem i neva gat jenis blong baptaes blong soemaot se hem i givim laef blong hem long Jehova. Sam manis afta, Sista Ferguson mo ol fo pikinini blong hem oli naf blong tekem impoten step ya blong baptaes.

Klosap long en blong yia, Wajtaoa blong 15 Disemba 1923, i tokbaot olsem wanem ol jenis long ol miting, wok blong prij, mo ol asembli, i bin gat paoa long ol Baebol Studen. Wajtaoa ya i talem se: “I isi blong luksave se ol kongregesen oli gat strong bilif . . . I gud yumi rere blong mekem plante moa wok mo yumi gohed blong gat strong tingting mo yumi mas glad taem yumi stap gohed blong mekem wok blong God long yia 1924.”

Yia 1924, hem i wan spesel yia long ol Baebol Studen. Ol brata long Betel oli bin wok had blong plante manis long wan graon long Staten Aelan, we i klosap nomo long hedkwota blong Brooklyn. Ol bilding we oli wokem long niufala ples ya, i finis long stat blong yia 1924, mo tu ol bilding ya i givhan long ol brata blong oli joen gud mo blong oli mekem bes blong olgeta blong mekem gud nius i kasem plante moa ples.