Vbe ukpo 1923 nii, otu keghi fi emwi eso werriẹ nọ gha ru iyobọ ne etẹn ya gha mwẹ akugbe zẹvbe ne iran ya ga Osanobua. Ukpo nii ẹre The Watch Tower suẹn gha rhan otọ ako ebe nọhuanrẹn na ghaa tie vbe iko ọghe Prayer, Praise, and Testimony, na do vbe uzọla uzọla. Vbe deba ọni, avbe Bible Student na print e kalẹnda ladian, emwi ne iran ghaa gbẹnnẹ ye avbe kalẹnda nii ọre, ako ọghe ebe nọhuanrẹn ne iran khian gha tie vbe iko uzọla uzọla kevbe ihuan ne iran khian gha so vbe iran ghaa ruẹ ne egbe iran ra vbe iran ghaa ruẹ emwi kugbe zẹvbe ẹgbẹe.

Iran ghaa rre iko, avbe Bible Student ghi ta emwi nọ sunu vbe ikporhu, iran ghi kpọnmwẹ e Jehova, iran ghi so ihuan, iran ghi vbe na erhunmwu. Ọtẹn nokhuo ọkpa na tie ẹre Eva Barney, nọ dinmwiamẹ vbe ukpo 1923 vbe ọ rre ukpo 15, khare wẹẹ: “Deghẹ u khian ta emwi nọ sunu vbe ikporhu, u ghi kpaegbe mudia, u ghi kha wẹẹ, ‘I hoo ne I kpọnmwẹ Enọyaẹnmwa ye emwi hia fẹẹrẹ nọ he ru mẹ.’” Ọ wa yẹẹ etẹn nibun ne iran gha ta emwi nọ sunu vbe ikporhu. Ọtẹn Nokhuo Barney na vbe kha wẹẹ: “Ọtẹn nokpia ọkpa na tie ẹre Godwin nọ khian enọwanrẹn nẹ, mobọ wa gha mwẹ emwi nibun nọ kpọnmwẹ e Nọyaẹnmwa yi. Sokpan ọvbokhan rẹn gha bẹghe ẹre wẹẹ, egbe fẹko wọọ ọmwa nọ siẹnro iko nii nẹ, vbe ọdafẹn ọnrẹn gha zẹ guan, ọ ghi ya obọ si e coat ọghe ọdafẹn ọnrẹn, ọdafẹn ghi tota.”

Uhukpa vbe uki, etẹn ghi do iko ne kpataki ọghe Prayer, Praise, and Testimony. The Watch Tower ọghe April 1, 1923, ghi gie iko na, ọ wẹẹ: “A gha fian ẹghẹ na ya do iko nii ye ihe eva, ọ khẹke na ya obọ ọkpa vbọ guan kaẹn emwi nọ sunu vbe ikporhu, a ghi vbe rhie igiọdu ne etẹn. . . . Ma rẹnrẹn wẹẹ, iko na gha ya etẹn sikẹ egbe sayọ.”

Iko na wa vbe ru iyobọ ne ọtẹn nokpia ọkpa na tie ẹre Charles Martin nọ ya iyẹn wewe (na ghaa tie ẹre class worker) nọ ghaa rre ukpo 19, nọ ke Vancouver vbe Canada rre. Vbene ẹghẹ ya khian, ọ keghi kha wẹẹ: “Iko na ẹre I na ruẹ vbe na ya kporhu hẹ. Ẹghẹ hia ẹre emwa ya ta emwi nọ sunu vbe ikporhu ọghe ke owa ya sẹ owa. Ọna ẹre ọ ghi ru iyobọ mẹ ya rẹn emwi nọ khẹke ne I ta vbe ikporhu, kevbe vbe na ya zẹ ẹmwẹ wanniẹn emwa ni gbodan.”

Ne etẹn na gha mwẹ ẹdẹ ne iran ya yo ikporhu vbe ya iran gha mwẹ akugbe. The Watch Tower ọghe April 1, 1923, keghi yae wewe ma etẹn wẹẹ: “Ne etẹn mieke na gha mwẹ akugbe . . . , ma zẹ ẹdẹ Tiuzde, May 1, 1923, nọ gha re ẹdẹ ne etẹn hia khian ya yo ikporhu. Deba ọni, e Tiuzde nokaro vbe uki uki ghi gha re ẹdẹ ne etẹn khian ya gha yo ikporhu . . . Ọ khẹke ne etẹn hia vbe iko gha mwẹ obọ vbe iwinna ikporhu.”

Uhiẹn, etẹn ni re igbama vbe gha mwẹ obọ vbe iwinna na. Ọtẹn Nokhuo Hazel Burford nọ ghaa rre ukpo 16 vbe ẹghẹ nii khare wẹẹ: “E Bulletin na ghaa print vbe ẹghẹ nii ru iyobọ ne ima ya rẹn vbene ima khian ya gha mu ẹmwẹ so vbe ikporhu, ma ghi vbe hia ne ima rẹn ọnrẹn ye uhunmwu. a I wa deba erha mwẹ nọkhua rhiegba ye iwinna ikporhu.” Vbọrhirhighayehẹ, ọ mwẹ iziro ne ọtẹn nokpia ọkpa ghaa mwẹ nọ wa kpa Ọtẹn Nokhuo Burford odin. Ọtẹn nokhuo na khare wẹẹ: “Ọtẹn nokpia ọkpa nọ khian enọwanrẹn nẹ na wa gha mu ohu, ọ na we ọ ma khẹke ne I gha kporhu. Vbe ẹghẹ nii, etẹn eso na gha roro ẹre wẹẹ, ọ ma khẹke ne avbe igbama gha kporhu, ọre ikpia ẹre iran khin ra ikhuo.” (Psm 148:​12, 13) Sokpan Ọtẹn Nokhuo Burford na ye gha kporhu. Vbe ọ ghi yo Owebe Nogieva Ọghe Gilead nẹ, ọ na ghi ya ga zẹvbe arọndẹ na gie yo isi vbe Panama. Vbe ne ẹghẹ ya khian etẹn na ghi fi iziro nọ ma gba ne iran te gha mwẹ vbekpa avbe igbama werriẹ.

Asikoko vbe ya etẹn gha mwẹ akugbe. Vbe enibun vbe uwu avbe asikoko na, iran kegha mwẹ ẹdẹ ọkpa ne iran mwamwa yọ ne iran ya kporhu, ọkpa vbe avbe asikoko vbenian ọre na do vbe Winnipeg vbe Canada. Vbe March 31, a na wẹẹ ne etẹn hia ni yo asikoko na ladian, ne iran do kporhu vbe ẹvbo nii. Ikporhu vbenian wa gha biẹ ọmọ esi, iran wa vbe gha miẹn emwa nibun kporhu ma. Vbe August 5, emwa ni rrie odẹ 7,000 ẹre ọ yo asikoko ọvbehe na do vbe Winnipeg. Vbe ẹghẹ nii, ọna ọre asikoko na do vbe Canada ne emwa na ghi bun sẹ.

Asikoko nọ ghi ru ekpataki sẹ ne etẹn do vbe 1923, ọre na do vbe August 18-26, vbe Los  Angeles, California. Vbọ ghi rre uzọla eso a ke do asikoko na, ebe iyẹn nibun na gha yae wewe, ebe itie ne etẹn vbe ghae ne emwa gberra 500,000. A na vbe gha mu e banner lele okotọ nibun, na ya gi emwa rẹn vbekpa asikoko na.

Vbe ẹdẹ Satọde, August 25, Ọtẹn Nokpia Rutherford keghi ya ọta ọkpa guan, uhunmwuta ọghe ọta na ọre, “Sheep and Goats.” Vbe ọta na, ọ keghi kha wẹẹ, “ohuan” mudia ye ihe emwa esi ni khian yin uhunmwu otagbọn na vbe etẹbitẹ. Ọ na vbe ya ọta ọvbehe guan nọ khare wẹẹ, “A Warning.” Vbe ọta na, ọ keghi gbodan ghee ugamwẹ okeke, ọ na vbe rhie igiọdu ne emwa ni mwẹ ekhọe ata, ne iran ladian vbe “Babilọn Ne Okpẹvbo.” (Arhie 18:​2, 4) Vbene ẹghẹ ya khian, etẹn nibun na vbe gha ghae asobọrhie ne ẹbo emwa nibun, emwi ne Rutherford tae vbekpa ugamwẹ okeke kevbe emwi nọ khẹke ne emwa ni mwẹ ekhọe ata ru, ẹre ọ ghaa rre asobọrhie nii.

Vbe ẹdẹ okiekie ọghe asikoko na, emwa ni gberra 30,000 ẹre ọ danmwehọ vbe Ọtẹn Nokpia Rutherford ya ọta na guan, nọ khare wẹẹ, “All Nations Marching to Armageddon, but Millions Now Living Will Never Die.” Rhunmwuda wẹẹ, etẹn rẹnrẹn wẹẹ emwa nibun gha rre, iran na ya hire ọgbẹlẹzẹ ọkpa na da bọ vbe Los Angeles. Ne emwa hia mieke na gha họn ẹmwẹ na ta, etẹn keghi loo e loudspeaker nọ ghaa rre ọgbẹlẹzẹ nii, te loudspeaker da ladian vbe ẹghẹ na kha na. Emwa nibun vbe ya radio danmwehọ emwamwa asikoko na.

Vbe ukpo 1923, alaghodaro nọkhua kegha rre iwinna ikporhu vbe Africa, Europe, India, kevbe South America. Ọ ghaa mwẹ ọtẹn nokpia ọkpa na tie ẹre A. J. Joseph nọ ghaa rre India, agharhemiẹn wẹẹ, ọ ghaa gbaroghe ọvbokhan rẹn kevbe emọ ehan nọ mwẹ, ọ na vbe gha siẹnro emwamwa ebe na print vbe urhuẹvbo Hindi, Tamil, Telugu, kevbe Urdu.

Vbe Sierra Leone, Ọtẹn Nokpia Alfred Joseph kevbe Leonard Blackman keghi gbẹn gie igiogbẹ nọ rre Brooklyn, New York, wẹẹ, iran gualọ iyobọ. Vbe April 14, 1923, igiogbẹ keghi rhie ewanniẹn ne iran. Ọtẹn Nokpia Alfred keghi kha wẹẹ, “Vbe ogiasọn vbe ẹdẹ Satọde, a keghi tie mwẹ vbe efoni, I ma te zẹdẹ ya aro yọ.” Nene ọmwa na ya urhu nọ la nọ rẹn wẹẹ, “Uwẹ ẹre ọ gbẹn gie Watch Tower Society, wẹẹ uwa gualọ iyobọ ọghe emwa ni khian gha kporhu ra?” Ẹre Alfred na wẹẹ, “Ẹn.” Nene ọmwa na ghi kha wẹẹ, “Iran gie mwẹ gha dee.” E William R. Brown ẹre ọ ghaa guan. Ẹdẹrriọ ẹre irẹn vbe ọvbokhan rẹn ighẹ Antonia ke Caribbean rre, ke iran kevbe ivbi iran nikhuo eva na tie ẹre Louise kevbe Lucy. Vbe nẹi khian  ghi kpẹẹ gbe etẹn ni rre evba gha miẹn ọtẹn nokpia na kevbe ẹgbẹe ọghẹe.

Alfred khare wẹẹ: “Vbe ẹghẹ owiẹ, vbe ẹdẹ nọ ghi lelẹe, mẹ vbe Leonard ghi guan kaẹn e Baibol zẹvbe ne ima ru ẹre vbe uzọla uzọla, ma ghi wa ghee, okpia ọkpa nọ taẹn wa mudia ye ọkpẹn ẹkhu. Ọtẹn Nokpia Brown ghaa nọ. Te ọ wa rhiegba ye ugamwẹ e Jehova sẹrriọ wẹẹ, ọ na wa gha hoo ne irẹn ya ọta azagba guan vbe ẹdẹ nọ lelẹe.” Ọ ma he sẹ uki ọkpa, vbe Ọtẹn Nokpia Brown ghae ebe hia fẹẹrẹ nọ mu lele egbe gha dee. Ẹre a na ghi viọ ebe ni sẹ 5,000 gie ẹre, vbọ ma he kpẹẹ vba, vbe na te rẹn nene ebe vbe fo nẹ. Sokpan emwa ma rẹn Ọtẹn Nokpia Brown zẹvbe ọmwa nọ khiẹn ebe. Vbe uwu ẹghẹ nọ ya rhiegba ye ugamwẹ e Jehova, ẹghẹ hia ẹre ọ ya gha so unu ye ako ughughan vbe Baibol zẹvbe nọ ya gha ya ọta guan, ọna ẹre ọ si ẹre ne emwa na gha tie ẹre Bible Brown.

Vbe ẹghẹ na kha na, abotu nọ rre Barmen, vbe Germany ma ghi mobọ gua etẹn ni rre evba, rhunmwuda ọ kherhe gbe, yevbesọni, iran na vbe họn wẹẹ, ivbiyokuo ọghe France khian mu okuo la ẹvbo nii. Avbe etẹn keghi miẹn owa ọvbehe vbe Magdeburg, ne iran gha na sẹtin gha print avbe ebe. Vbe June 19, etẹn mu avbe emwi ne iran ya print kevbe emwi nikẹre hia gha rhie abotu ọghe ọgbọn vbe Magdeburg nẹ. Vbe ẹdẹ ne iran gi igiogbẹ rẹn wẹẹ iran si kpa fo nẹ, ebe iyẹn keghi yae wewe wẹẹ, e France khọnmiotọ yan e Barmen nẹ. Etẹn na do bẹghe ẹre wẹẹ, e Jehova ẹre ọ ru ẹre ne iran si hin evba nii rre, ne emwi rhọkpa ghẹ mieke na sunu daa iran.

Ọtẹn Nokpia George Young, nọ wa mu otuẹ yo ehe nibun ya kporhu iyẹn nọ maan, keghi mu abotu gbọ vbe Brazil, ọ na suẹn gha print e The Watch Tower vbe urhuẹvbo Portuguese. Vbọ ghi rre uki eso vba, ọ keghi ghae ebe nọ gberra 7,000 ne emwa. Rhunmwuda ne ọtẹn na na gha die Brazil, ẹre ọ si ẹre ne ẹkpotọ nọ hin usi na kie ne Sarah Ferguson. Ukpo 1899 ẹre ọtẹn na ke tie The Watch Tower, ọrheyerriọ, ẹkpotọ ma kie nẹẹn ya dinmwiamẹ. Sokpan vbe uki eso ghi gberra nẹ, Ọtẹn Nokhuo Ferguson vbe ivbi ẹre enẹ na dinmwiamẹ.

Vbọ ghi rre ufomwẹ ukpo 1923, The Watch Tower ọghe December 15, 1923 ghi guan kaẹn vbene akugbe ne etẹn ghaa mwẹ ya ru iyobọ ne iran hẹ, ọ na kha wẹẹ: “Ọ vẹ na rẹn wẹẹ, te avbe iko ni rrọọ . . . wa mwẹ amuẹtinyan nọ wegbe . . . Gi ima hia ne ima rhiegba ye iwinna ugamwẹ sayọ vbe ukpo ne ima khian ghi la na, ne ima gha ya ọyẹnmwẹ ru iwinna na.”

Ukpo ne kpataki ẹre ukpo 1924 wa vbe gha khin ne etẹn. Uki nibun ẹre etẹn ni rre Bẹtẹl ya gha winna vbe ihe ọkpa vbe Staten Island, ọ ma vbe rree gbe ne igiogbẹ ọghe iran nọ ghaa rre Brooklyn. Ukpo 1924 ẹre iran bọe fo, ọna keghi ru iyobọ ne iran ya gha mwẹ akugbe, iran na vbe sẹtin gha kporhu iyẹn nọ maan vbe odẹ ne iran ma te ya aro yi.