Lidan irumu ligía, adügatu lóundarun Heowá asansiruni le ídehabei lun háhuduragun Aturiahatiña Bíbülia lun Heowá lídantima aban. Gumesetu garüdia The Watch Tower afuranguagüda ariñahani luáguti kada bérusu tídangiñeti Bíbülia le lunbei burí lakutihóun lidan adamuridaguni lánina Furíei luma Lalawahóun Heowá le adügǘbei sagü dimaasu. Lanwoun lira, adügatiña meha Aturiahatiña Bíbülia aban kalendáriu le ñein lubéi ladarirúa aban bérusu lánina sagü weyu, lúmati aban uremu lun kada weyu lun lalawahóun Heowá, le gayaraabei heremuhani lidan háhuduragun lun Bungiu hábuguarügü o lidan háhuduragun keisi iduheñu.

Tidan meha adamuridaguni ligía, ayanuhatiña meha Aturiahatiña Bíbülia ha luagu somu “sügǘ” le asuseredubei houn lidan apurichihani, rútiña meha seremei lun Heowá, eremuhatiña meha aban uremu o ábaha hadügün aban furíei. Ariñagatu Eva Barney, to abadiseiruboun lidan irumu 1923 dan meha le 15 lubéi irumu tau: “Anhein meha busén lubéi somu gürigia layanuha lidan adamuridaguni le, aba meha lararamun ani ábaha lagumeserun ariñageina aban katei kei le: ‘Busentina níchugun seremei lun Aburemei luagu sun katei buiti le adüga laalibei nuagu. . . ’”. Hínsiñeti meha houn saragu íbirigu ayanuha luagu le ásügürübei houn lidan apurichihani. Ariñagayatu íbiri Barney: “Kei meha wábiri Godwin aban íbiri hínsiñewati ani derebuguhali, súnwandan meha anihein lan saragu katei luma lun líchugun eteingiruni lun Wabureme. Gama lumoun, dan meha le tarihini lani weiriou ladiheriduña lan le alidihabalin adamuridaguni, ábaha tachawahanu labiite íbiri Godwin ani ábaha lámanichun ani aba lañuurun”.

Aban wéiyaasu luagu hati, adügati kada külase (o damuriguaü) aban adamuridaguni espechaliti lánina Furíei luma Lalawahóun Heowá. Afuranguagüda tumuti garüdia The Watch Tower lánina 1 lidan gádürü-hati, irumu 1923, le meha adügübei ñein: “Lunti layusurún lamidan dan le ladurarubei adamuridaguni lun layanuhóun luagu ida liña lan lidin woun lidan apurichihani luma lun wíchugun dǘgüdaguaü houn apurichihatiña […]. Afiñetiwa lau lan wadügüni ligiaméme súngubei wagía, ábatimaame lan hóundaragun sun wamadagu lidan aban”.

Wéiriti meha lahuudun damuriguaü burí le lun Charles Martin, aban apurichihati le meha gúnfulihalibei 19 irumu, le meha awinwandubei (Kanadá). Ariñagati: “Ñein nafurendeirei kaba lan nariñaga houn gürigia dan le nachülürün hábiñe. Liibe-agei dan, abahüdahatiña íbirigu luagu ida liña lan lidin houn lidan hapurichihan tidan burí muna. Íderagua lumutina meha le asubudirei ka lan gayaraabei nariñaguni lidan apurichihani luma lun nasubudiruni kaba lan nariñaga dan le lálugun somu gürigia lararamunina luéi napurichihan nun”.

Ídehati meha luéyuri apurichihani lúntima lidan hamá aban íbirigu. Fuati aban awisahani tidan The Watch Tower to lánina 1 lidan gádürü-hati, irumu 1923, ariñagati: “Lúntima lidan wamá aban lidan ligiaméme dasi […], anuadirúati weyu luagu-biama 1 lidan seingü-hati, irumu 1923 lun wáfuridun súngubei apurichiha. Ani ítara luba lidan furumiñeti luagu-biama sagü hati […]. Mósume gafanran hama sun lílana damuriguaü lidan dasi le”.

Apurichihatiña meha giñe hátima ñǘbürigiña. Ariñagatu aban íbiri gíritu Hazel Burford, to meha disisiboun irumu tau lidan irumu 1923: “Fuati meha le gayaraabei wariñaguni lidan apurichihani tidan agumeiraguagüdüni to gíriboun Bulletin le meha gayaraabei wafurendeiruni lun wapurichiha. a Ídehatina meha lau ubebeni úara luma náruguti lidan sun dasi le”. Lau sun lira, dúnguatu Hazel luma aban katei le magurabun tumuti: “Máhati meha aban íbiri derebuguhali lun nayanuhan hama amu luagu nafiñen. Lidoun meha dan ligía, añahein meha íbirigu úati gunfuranda hamani íbini lan ‘nibureintiña’, mosu halawahani Bungiu le Adügübaliwa” (Sal. 148:​12, 13). Íbini ítara, mígirun tumuti Hazel tapurichihan. Saragu irumu lárigiñe agunbirahouatu lidan libiaman Külase le íchugubei tidan Leskuela Galaadü ani seriwitu kei misionéra Panamá. Lau lásügürün dan, aba hasansiruni íbirigu hagía ligaburi hasaminan hawagu nibureintiña luma apurichihani.

Adügati meha giñe adamurini lun lídantima hamá aban íbirigu. Anihein meha giñe apurichihani lidan saragu lídangiñe adamurini burí ligía kéiburi le adügübei uburugu Winnipeg (Kanadá). Agunbirahouatiña sun ha achülürübaña lidoun adamurini ligía lun háfuridun apurichiha weyu 31 lidan ǘrüwa-hati. Buiti meha lidin woun lidan luéyuri apurichihani burí le. Lidan amu adamurini le adügǘbei Winnipeg weyu 5 lidan widü-hati lídanmeme irumu ligía, chülütiña 7,000 gürigia. Machülüñahagiña meha saragu gürigia ítara lidoun aban adamurini Kanadá.

Adügǘwati aban adamurini wéiriti lisudinin uburugu Los Ángeles (Kalifornia) lúmagiñe 18 darí 26 lidan widü-hati, irumu 1923. Fiu dimaasu lubaragiñe fuati awisahani tidan burí periodiku luagu adamurini ligía ani afanreinhatiña íbirigu tóugiñe 500,000  agunbirahagülei. Fiditiña giñe awisahani luáguti adamurini ligía tuagu burí hakarün luma tuagu ámuñegueinarügü ugunei.

Weyu samudi 25 lidan widü-hati, ruti íbiri Rutherford aban yanu gíriti “Mudún hama gabara”, le ídanbei lafuranguagüdei ítara haña lan gürigia ha buídubaña igaburi kei “mudún” ani hawinwanduba lan lidan Ubóu danme le paraísuhali. Aliihati giñe aban dugumedu gíritu “Eweridihani”, to ídanboun layanuhóua luagu burí katei wuribati le hadügübei kristiánugu mama inarünitiña ani ínchahouatiña gürigia haruma tanigi lun hafanreinragun tídangiñe “Babilónia to Wéiriboun” (Aruf. 18:​2, 4). Dan lárigiñe, fuati ariñahani le tídanbei dugumedu to tidan aban tratadu ani afanreinhatiña Aturiahatiña Bíbülia saragu míñunu tídangiñe lau saragu ubebeni lidan sun ubóu.

Lidan lagumuhóun weyu le lánina adamurini, aganba hamuti hóugiñe 30,000 gürigia yanu le líchugubei íbiri Rutherford, le gíribei “Hawanseruña sun néchanigu lidoun Arümahedón ani Míñunu ha awinwandubaña guentó móunwendügaña”. Kei meha subudi hamaali lubéi íbirigu gíbebaña lan achülürütiña lidoun adamurini ligía, ábaha háhayahan aban fulasu wéiriti, aban iseri estadiu le adügǘbei Coliseo uburugu Los Ángeles. Lun meha hachoururuni íbirigu haganbubei lan sun lílana adamurini programa, aba hayusuruni amuri le lídanbei estadiu le meha iseritimagilibei lidan dan ligía. Lanwoun lira, gíbetimatiña meha gürigia ha aganbubalin programa ligía tuéigiñe radiu.

Lidan irumu 1923 wéiriti lawanserun apurichihani Áfürika, Yuropa, India luma Suedi Meriga. Yágüta meha India, ídehati íbiri Adavimannathu Joseph, le meha maríeihalibei ani sísiñanu lirahüñü lidan tásügürawagüdün agumeiraguagüdüni lidoun indi, tamil, telugu luma urdu.

Aba labürühan Alfred Joseph luma Leonard Blackman ha awinwandubaña Sierra Leona, tidoun Beteli to ñéingiñe lubéi Larihúa lau Arufudahani lidan sun Ubóu to Brooklynboun (Newayóru) lun hamuriahan ídemuei. Óunabuatiña Aturiahatiña Bíbülia ha weyu 14 lidan gádürü-hati, irumu 1923. Ariñagati Alfred: “Dárühali weyu samudi guñoun ligía neresibirun aban aguarúni le magurabahan numuti”. Aba laganbun aban umalali hǘrüti ani aba lálügüdüni: “Huguya san gürigia le ábürühabei tidoun Sociedad Watch Tower amuriahei apurichihatiña?”. “Anha”, liña lounabún Alfred. “Aba nounahóun ñahoun”. Ka meha san umalali le laganbubei? Lumalali William Brown. Ligía meha weyu ligía lachülürün lídangiñe ubouhu Karibe úara tuma Antonia to lani weiriou hama bián lisaanigu ñǘbürigiña, Louise tuma Lucy. Magurabahantiña íbirigu saragu dan lun hasubudiruniña íbirigu Brown.

Ariñagayati Alfred: “Larugan binaafin, dan le awanha lan akutihoun Bíbülia luma Leonard kei wechun  adügei sagü dimaasu, ligía lachülaagun William Brown wábiñoun aban íbiri gágubuti. Wéiriti meha ubebeni le lasandirubei luagu inarüni darí lun busén lan líchugun aban yanu larugan weyu ligía”. Lubaragiñe lagumuchun hati dan ligía, afanreinha laru meha íbiri Brown sun agumeiraguagüdüni to lanügüboun lúmagua. Murusun dan lárigiñe, ounahóuatu 5,000 líburu lun ani lau lóufudagun aba lemegeirun tounahóun tanwoun lun. Lau sun lira, marihin hamuti meha gürigia íbiri Brown kei aban alugurahati líburu. Lidan sun irumu le laubei íbiri Brown eseriwida lau úaraguni lun Heowá súnwandan meha layusurunu Bíbülia lidan líchugun yanu, ligía subudiwa lubéi meha kei Brown le héchubei ayusuroun Bíbülia.

Sun meha anihán lan katei le asusereda, aba háguyun íbirigu tídangiñe sukursáli to uburugu Barmen (Yámani) ladüga ñǘraüharu lan meha ani aganbaña meha hábürüha lan súdaragu faransuna luagun uburugu ligía. Aba hadarirun Aturiahatiña Bíbülia fiu muna lidan uburugu Magdeburgo le ídanbei gayara lan imprimírü hama agumeiraguagüdüni. Weyu 19 lidan sisi-hati hasürei íbirigu hapakuhani burí máhina le aubei imprimírua lan, ábati háguyun tidoun iseri Beteli to uburuguboun Magdeburgo. Aban weyu lúmagiñe lasubudirawagüdün tun Beteli to Merigaboun águyaaña lan íbirigu, ligía lawisahóun tidan burí periodiku ragǘ hama lan faransuna uburugu Barmen. Ariha hamuti íbirigu góunigi lániña Heowá ani biní lani háfaagun.

Lidan ageiraü Bürasíli, áfayahati íbiri George Young lidan sun ageiraü ligía lun lapurichihani uganu buiti. Ñein ladaara aban sukursáli ani gumese ligía ásügüragüdoun garüdia The Watch Tower lidoun iñeñein portugési. Lídanrügü fiu hati, deregeti tóugiñe 7,000 agumeiraguagüdüni. Adügati giñe lachülürün íbiri Young Bürasíli lun tadarirun Sarah Ferguson aban lubuidun chansi. Lau sun barüharu lan meha saragu irumu aliihoun garüdia The Watch Tower lúmagiñe irumu 1899, siñagili meha tabadiseirún lun tarufuduni deregeguaaru lan tungua lun Heowá. Fiu hati lárigiñe lachülürün íbiri George Young, ligía tádaruni pasu súdiniti le tuguya habu sun gádürü tisaanigu.

Dan le agumucheina lubéi irumu ligía, ariñagatu The Watch Tower to lánina 15 lidan duusu-hati, irumu 1923 luagu lubuidun lidin houn lau asansiruni le adügübei lidan burí adamuridaguni, apurichihani luma adamurini. Ariñagatu: “Ménrengunti larihiniwa hawanseruña lan lílana burí damuriguaü […] lidan hamadagua luma Bungiu […]. Daü wamoun sun daüguaü lánina asudarahani ani sigí wama eseriwida lun Bungiu lau ubebeni luma ugundani lídanme irumu le gumesemémeelibei”.

Ábanbei meha irumu le wéiriti lubuidun irumu 1924 houn Aturiahatiña Bíbülia. Barühaña meha íbirigu ha tídanbaña Beteli to Brooklynboun saragu hati awadigimarida lidan aban fulasu le yarafabei houn le gíribei Staten Island. Lidan lagumeseha irumu 1924 hagumuchei hábunagun. Ídehatu meha muna burí to ábunawaguboun lúntima ñein lan úarani hadan íbirigu luma lun lapurichihóun uganu buiti lidan burí igaburi le madügǘnwañahagili.