Lón ena ier, ewe mwicheich a féri ekkóch siwil mi álisaatá tipeeúin ekkewe Chón Káé Paipel. The Watch Tower a poputá le peresei ekkewe pwóróus mi áweweei ewe wokisin ra káé lón ar mwiich a fis iteiten wiik mi iteni Prayer, Praise, and Testimony Meeting (Mwiich Ar Repwe Iótek me Mwareiti Jiowa). Pwal och, ekkewe Chón Káé Paipel ra peresei ewe calendar mi makketiw ekkewe wokisin fán iten eú me eú wiik me pwal ekkewe kél fán iten eú me eú rán repwe tongeni eáni atun ar pwisin káé are famili káé.

Atun ar mwiich ekkena Chón Káé Paipel ra kan uwawu “ar memmeef” ussun minne a fis ngeniir lón ewe angangen afalafal, ar kapasen kilisou ngeni Jiowa, kél, are pwal mwo nge iótek. Iei met Eva Barney a chemeni, ewe a papatais lón 1923 atun a 15 ierin: “Iká emén a mochen uwawu meefian epwe útá me poputá le fós, áwewe chék epwe erá, ‘Úa mochen kilisou ngeni ach Samol ren an kirekiréch ngeniei.’” Ekkóch pwiich kewe ra mochen uwawu meefier. Chienach na a sópweeló le erá: “Pwiich we chinnap itan Godwin a chómmóng met a mochen kilisou ngeni ach Samol ren. Nge atun pwúlúwan we a kúna pwe ewe chónemmweni ewe mwiich a lólilen iká epwele luló ewe kulók, a weiti lesopwun úfen pwúlúwan na iwe a kaúló le fós me mwootiw.”

Fán eú iteiten maram, lón eú me eú mwichefel epwe kkóló aúchean ar féri ena Mwiich Ar Repwe Iótek me Mwareiti Jiowa. Iei met ewe Watch Tower minen April 1, 1923 a erá ussun met a kan fis lón ena mwiich: “Esopwun ena mwiich epwe fán iten án chón mwichefel uwawu meefier ussun ar angangen afalafal me apéchékkúla ekkewe chón afalafal. . . . Áúa lúkú pwe ekkena mwiich mi apéchékkúl epwe eririéchúeló pwiich kewe.”

Charles Martin, emén chón afalafal 19 ierin seni Vancouver, Canada a kúna watteen álillis seni ekkena mwiich. A erá: “Lón ena mwiich úa kerán silei met úpwe erá lón ewe angangen afalafal imw me imw. Fán chómmóng emén epwe apwóróusa minne a fis ngeni atun a fiti imw me imw. Ena a áiti ngeniei met úpwe apasa me ifa ussun úpwe pélúweni ekkewe sókkopaten kapasen eppet.”

“Ekkewe ránin afalafal” ra pwal álisaatá tipeeúin ewe mwicheich. Iei met The Watch Tower minen April 1, 1923 a esilesil: “Ren oukich meinisin epwe wor ach tipeeúfengen lón eú chék  angang . . . , iwe a kkótoló pwe lón Oruu May 1, 1923 epwe eú ránin afalafal. Seni ena atun, ewe áeúin Oruu iteiten maram epwe ina ránin afalafal . . . Emén me emén chón afalafal itá epwe fiti ena angang.”

Pwal mwo nge ekkewe Chón Káé Paipel mi chék kúkkún ieriir ra fiti ena angang. Iei met Hazel Burford a chék 16 ierin lón ena atun, a chemeni: “Ewe Bulletin a awora ekkóch afalafal áúa tongeni pwóróus ngeni aramas ussun nge áúa tongeni akkamwéchú. a Ngang me papachi, áúa fókkun achocho le fiti meinisin ekkena angang.” Iwe nge, Pwiich Burford a máirú ren meefien emén pwiich ren an fiti ena angang. A erá: “Emén pwiich áchengicheng chinnap ese fókkun sani ái afalafal ngeni aramas. Lón ena atun, ekkóch pwiich kewe rese weweiti pwe itá meinisin Chón Káé Paipel kapachelong ‘alüal me föpwül’ repwe fiti ena angangen mwareiti ach we Chón Féraatá.” (Kölf. 148:​12, 13) Nge chienach Burford a chék sópweeló le afalafal. Ló, ló, ló, a fiti ewe sukulen Gilead ewe oruuen class me a misineri lón Panama. Mwirin och fansoun, pwiich kana ra ekkesiwili ar ekiek ussun án ekkewe kúkkún me sáráfé fiti ewe angangen afalafal.

Ekkewe mwichelap ra pwal etipeeúfengeni pwiich kewe. Chómmóng lón ekkena mwichelap ra isettiw eú ránin ar repwe afalafal. Áwewe chék, lón ewe mwichelap lón Winnipeg, Canada, meinisin chón fiti ra ketiw ar repwe afalafal lón ena telinimw lón March 31. Ra chuuri chómmóng aramas lón ena rán mi kkóló aúchean me a uwaéch ar angang. Lón August 5, ina epwe 7,000 aramas ra fiti pwal eú mwichelap lón Winnipeg. Ena úkúúkún chóchó a kon chómmóng seni meinisin mwichelap a fis lón Canada lón ena atun.

Lón ewe ier 1923 ewe mwichelap mi fókkun lamot án Chón Pwáraatá Jiowa a fis lón August 18-26 lón Los Angeles, California. Fitu wiik me mwen ena mwichelap, ekkewe simpúng ra esilei ussun ena, me ekkewe Chón Káé Paipel ra einetifetálei lap seni 500,000 ekkewe chékúkkúnún taropwe. Ra pwal pacheetá wóón ekkewe sein public me  pwisin wáán ekkewe aramas ekkewe chémmóngun taropween esilesil.

Lón Ammól August 25, Pwiich Rutherford a eáni eú afalafal itelapan “Siip me Siike,” mi affata pwe ekkewe “siip” ikkena iir chókkewe mi letipwenechar repwe kúna manaw lón paratis wóón fénúfan. A pwal fós ussun eú pwóróus itelapan “Kapasen Éúréúr.” Ena pwóróus a apwúngú ekkewe tipitipin lamalamen Chón Kraist me a pesei chókkewe mi letipwenechar ar repwe towu seni “Papilon mi lapalap.” (Pwär. 18:​2, 4) Ekiseló mwirin, ekkewe Chón Káé Paipel mi tinikken ra einetifetálei wóón unusen fénúfan fite million kapiin ena pwóróus.

Lón ewe sáingoon ránin mwichelap, lap seni 30,000 chón fiti ra rongorong án Pwiich Rutherford eáni ewe afalafal itelapan “Meinisin Ekkewe Mwú Ra Feffetál Ngeni Armaketon, nge Fite Million mi Manaw Iei Resap Máló.” Ekkewe Chón Káé Paipel ra meefi pwe chómmóng repwe fiti, ina popun ra rent ewe Los Angeles Coliseum a kerán fférútá. Pokiten ra nochchei án meinisin repwe rongorong, iwe pwiich kana ra néúnéú án ena stadium kewe speaker nge ekkena esin pisek a kerán wor. Pwal chómmóng ra rongorong ena afalafal wóón reitio.

Lón ewe ier 1923, sia kúna kalapólóón ewe angangen afalafal lón Afrika, Iurop, India, me South America. Lón India A. J. Joseph a túmúnú pwúlúwan we me néún kewe wonomén, nge a pwal túmúnú fférún néúch kewe puk lón fósun Hindi, Tamil, Telugu, me Urdu.

Lón Sierra Leone ekkewe Chón Káé Paipel Alfred Joseph me Leonard Blackman ra mak ngeni ewe ofesilap lón New York me ra tingor álillis. Lón April 14, 1923, a pélú ar na tingor. Alfred a erá: “Lón eú pwinin Ammól emén a kériei nge úse pwal ekieki an epwe wor ena kékké.” A rong eú méngúngú mi leúpwong mi eisini, “En ewe ka mak ngeni Watch Tower Society me tingor chón afalafal?” Alfred a erá, ewer. Iwe ena chón kékké a erá: “Iwe ngang ena.” Ena ngiingi mi leúpwong ina ngingiin William R. Brown. Iwe lón chék ena rán Pwiich Brown me pwúlúwan we Antonia me néúr kewe nengngin Louise me Lucy ra waroto seni Caribbean ngeni ena leeni. Ese mmang mwo mwirin nge pwiich kana repwele chuuri ekkena chón waroto.

Alfred a sópweeló le apasa: “Lesossorusichin chék ena rán ngang me Leonard áúa pwóppwóróusfengen wóón ewe Paipel ussun met áúa kan féfféri iteiten wiik. Nge mwittir chék áúa kúna  emén mwán mi útá ppen ewe asam nge a mmen ttam. Ina i Pwiich Brown. A fókkun tinikken fán iten ewe enlet pún a mochen eáni eú afalafal sorotáán ena rán.” Ese mwo tori eú maram nge a fen anéúnéú meinisin ekkewe puk mi wor ren. Ekiseló mwirin a pwal angei 5,000 puk, nge pwal ekiseló a pwal need chómmóng puk. Nge Pwiich Brown ese sill me ren aramas pwe i chón amémé puk. Lón unusen manawan ussun emén chón angang ngeni Jiowa mi tinikken, iteitan a kan aloni ekkewe wokisin lón an kewe afalafal, iwe pokiten ena aramas ra eita ngeni Bible Brown.

Lón Tois pwiich kewe ra filaatá ar repwe mwékút seni ewe keangen ofesilap lón Barmen pún a kon kúkkún. Pwal och, ra pwal rongorong pwe ewe mwichen soufiun France repwele tééki ena telinimw. Ekkena Chón Káé Paipel ra kúna eú watteen imw lón Magdeburg ussun a fókkun éch fán iten ewe angangen peresei néúch kewe puk. Iwe lón June 19, pwiich kewe ra wes le pwóruni ewe mwesinen print me pwal ekkewe ekkóch pisek, iwe ra mwékút ngeni ena mineféén Bethel lón Magdeburg. Lón ewe rán ewe ofesilap lón New York a silei pwe ra fen wes le mwékút, iwe lón chék pwal ena rán a esilesil lón simpúng pwe ewe fénú France a fen tééki ewe telinimwen Barmen. Pwiich kewe ra fen esilla pwe ar na mwékút, a ánneta án Jiowa efeiéchúúr me túmúnúúr.

Lón Brazil, George Young, a sáifetál ekis meinisin ren an epwe esilefeili ewe kapas allim, a pwal poputááni ewe mineféén keangen ofesilap me poputááni ewe angangen peresei ewe Watch Tower lón fósun Portuguese. Mwirin chék fitu maram, a fen anéúnéú lap seni 7,000 néúch kewe puk. Sarah Ferguson a fókkun pwapwa atun Pwiich Young a chuuri an we famili. A fen piin ákkálleani ewe Watch Tower seni ewe ier 1899, nge ese tongeni papatais pwe ese wor emén epwe álisi. Iwe, fitu maram mwirin chienach Ferguson me néún kewe fémén ra tongeni papatais.

Lesópwólóón ewe ier, The Watch Tower minen December 15, 1923 a áweweei ifa ussun ekkewe siwil lón ar kewe mwiich, angangen afalafal, me ekkewe mwichelap ra fen álisi ekkewe Chón Káé Paipel. Iei met a erá: “A ffat pwe chón ekkewe mwichefel a péchékkúl ar lúkú . . . Sipwe mmólnetá ngeni an epwe pwal lapóló ach angang me sópweeló le angang ngeni Kot fán tinikken me pwapwa atun ewe ier 1924.”

Ewe ier 1924 a pwal eú ier mi fókkun ámmeseik fán iten ekkewe Chón Káé Paipel. Pwiich kewe lón Bethel ra fen angang weires ren fitu maram wóón ewe leeni lón Staten Island, mi kkan ngeni ewe ofesilap lón Brooklyn. Ekkewe imw ra kaú lón ena mineféén leeni ra wes lepoputáán chék 1924, me ra álisaatá tipeeúin pwiich kewe me álisiir le esilefetálei ewe kapas allim lón sókkopaten napanap ese fen tufich ngeniir me mwan.