Maʉ̃ poagade Jeowa organizasionba nekʼãrẽ awuruta ojʉ̃drʉsi, naʉ̃ba kʼarebasi Daizeze Bedʼea Kʼawuabarirãra audre ãbapanamarẽã. The Watch Tower kartaba jara ũrĩbisi testo Daizeze Bedʼeadebemata. Naʉ̃ iyabaʉ testota kʼawuasida Reunión de Oración, Alabanza y Testimonione. Maʉ̃ reunionʼra ãyara semanaza opanasi. Daizeze Bedʼea Kʼawuabarirabara osida kartata, nama jara ũrĩbibasi semanaza kʼãrẽ testo akʉita akʉza yi trãbita. Maʉ̃ra jõma dobaʉba akʉseabasi, mawũã ẽ bʉrʉ mebẽrãbawara ãbabʉde.

Ãba yi jʉrebʉdera, Daizeze Bedʼea Kʼawuabarirabara, jara ũrĩbipanasi ãya Daizeze Bedʼea jaradiabʉrʉde kʼãrẽ berabaridata. Mõbe biga diapanasi Jeowaʼa, trãpanasi akʉza yiwidʼipanasi. Eva Barneyʼra, 1923de buru kʼoesi, maʉ̃nera iyira 15 poagabasi. Iya jarabʉ: «Ẽbẽra abaʉba iyi kʼãrẽ berabaridata jara ũrĩbikĩrãbasibʉrʉ piradrʉibarabasi, mõbe jara ũrĩbibasi iyi sãwũã jʉ̃ẽnata, jarabasi mʉ̃a biga diakĩrãbʉ Daizezeʼa iya nebia diada kʼarea». Ʉ̃kʉrʉ mebẽrãbara mejãcha kãgabasi jara ũrĩbita ãyi sãwũã jʉ̃ẽnata, bari jaraita mebẽã Godwinba. Naʉ̃ mebẽã kimaba ũdubaside iyira mejãcha bedʼeabʉta, iyi wuama jidibaribasi mawũã jewedamarẽã.

Jedekoza, ãba yi jʉrepanasi oita Reunión de Oración, Alabanza y Testimonionebemata, maʉ̃ra jipade yibiabasi. The Watch Tower kartaba 1 abril 1923debemaba jara ũrĩbisi maʉ̃ reunionʼra kʼãrẽa audre yibiabasita: «Maʉ̃ reunionera mebẽrãbara jara ũrĩbiseabasi ãyi sãwũã jʉ̃ẽsita Daizeze Bedʼea jaradiabʉde akʉza so zarea diapanasi yi wuabemara Daizeze Bedʼea jaradiapanʉrabida [ . . . ]. Krĩchapanʉ mawũã opanʉba kʼarebabʉta audre ãbapanaita».

Naʉ̃ kʼãwũã ãba yi jʉrebʉra jipade yibiabasi Charles Martinʼita, iyira Vancouver Canadádebemabasi, 19 poagabasi, adewara jaradiabaribasi. Iya jarabʉ: «Naʉ̃ kʼãwũã ãba yi jʉrebʉdeba mʉ̃a kʼawuasi sãwũã bedʼeaita ẽbẽrarã deza deza jaradia wãbʉrʉde, nama mebẽrãba badua jara ũrĩbibasi baera ãyi sãwũã jʉ̃ẽsita deza deza jaradiabʉde, naʉ̃ba mejãcha kʼarebasi biʼia jara ũrĩbita ẽbẽra abaʉba ũrĩkĩrã ẽãne».

Deza deza jaradiabʉbida kʼarebasi mebẽrã audre ãbapanamarẽã. The Watch Tower kartaba 1 abril 1923debemaba jarasi: «Jõmaʉ̃ba iyabaʉ trajo oita [ . . . ], martes 1 mayo 1923de, ãbaʉba jaradia wãnañi Daizeze Bedʼeata deza deza, maʉ̃ra odayi jedekoza yi nããbema martesde [ . . . ]. Akʉza naʉ̃ ewaridera jõmaʉ̃ta wãibara».

Daizeze Bedʼea Kʼawuabarira warrarabida jaradiapanasi Daizeze Bedʼeara. Mebẽã aba yi trʉ̃ Hazel Burford, maʉ̃ ewade 16 poaga badaba jarasi: «Bulletin kartaba jara ũrĩbibasi sãwũã jaradiaibarata ẽbẽrarã deza deza jaradia wãbʉrʉde (maʉ̃ra idi ewade ũdukʼawuapanʉ Yiza sãwũã bedʼea kʼawuaita). a Mʉ̃ara mʉ̃ zezonaʉ̃mebara mejãcha kãga Daizeze Bedʼea jaradiaira, mamina mebẽã abaʉba kãga ẽ basi mʉ̃a Daizeze Bedʼea jaradiaira. Maʉ̃ ewadedera mejãchaʉba biʼia ũrĩna ẽ basi kʼãrẽaba yibiata warraraba Daizeze Bedʼea jaradiaira» (Sal. 148:​12, 13). Mamina Hazelbara idubʉ ẽ basi Daizeze Bedʼea jaradiabʉra. Poaga bio berabarida tẽã iyira wãsi Eskuela Galaad yi klase ũmema. Tẽã iyira zokʼa bʉesida Panamáena. Tẽã bʼai maʉ̃ra mebẽrãbara biʼia ũrĩsida kʼãrẽaba yibiata warraraba Daizeze Bedʼea jaradia wãira.

Asamblearaba mejãcha kʼarebasi mebẽrã ãbapanaita. Maʉ̃ asamblea zei nãã, krĩchasida Daizeze Bedʼea jaradia wãita ẽbẽrarã. Bari jaradaita asamblea Winnipeg, Canadáde odapeadade, mebẽrã jõmaʉ̃ʼa jarasida Daizeze Bedʼea jaradia wãmarẽã 31 marzo ewaride. Maʉ̃ ewaride mawũã odara jipade yibiabasi, kʼarebasi baera awuru asambleade abarika oita. Bari jaradaita Winnipegde osida asambleata 5 agostode, maʉ̃ ewaridera ẽbẽrarãra 7.000 jʉ̃ẽsi asambleaedara. Asamblea Canadáde obʉrʉdera ẽbẽrarãra mejãcha jʉ̃ẽkabasi maʉ̃ ewaride jʉ̃ẽna kĩrãkʼara.

Los Ángeles Californiane osida asamblea yi audre yibiata, maʉ̃ra poaga 1923de  18deba-26 agostobayeda osida. Maʉ̃ asamblea oda tẽã periodikorane jara ũrĩbisi maʉ̃ ʉ̃rʉ akʉza Daizeze Bedʼea Kʼawuabarirabida 500.000 kartara dedekasida maʉ̃ ʉ̃rʉ bedʼeabʉta. Adewara karrurane akʉza busʼrane bʉesida letrerora maʉ̃ ʉ̃rʉ bedʼeabʉta.

Sabado 25 agostode mebẽã Rutherfordba diasi diskurso yi trʉ̃ «Ovejas y cabras». Iya jara ũrĩbisi obejarabara jarakĩrãbʉta ẽbẽrarã jõma aripe okĩrãpanʉrata akʉza naʉ̃rarã nama egorode ewari jõmaʉ̃nẽ bʼaita. Adewara jara ũrĩbisi diskurso yi trʉ̃ «Amonestación». Nama jarabasi yi ẽbẽrarã nebia okĩrãpanʉra ãĩ wãibarata Babilonia Zromaneba (Apoc. 18:​2, 4). Tẽã karta aba ʉ̃tʉ zebisida naʉ̃ diskurso ʉ̃rʉ bedʼeabʉta akʉza Daizeze Bedʼea Kʼawuabibariraba maʉ̃ kopiata naʉ̃ drʉa jõmaʉ̃mae dedekasida.

Maʉ̃ asamblea jõbodo ewaride, ẽbẽrarã 30.000 jʉ̃ẽsida ũrĩne mebẽã Rutherfordba diskurso diadata, maʉ̃ diskurso trʉ̃ra naʉ̃ «Todas las naciones están marchando hacia el Armagedón, pero millones que ahora viven no morirán jamás». Mebẽrãba kʼawuapanasi baera maʉ̃ ewaride ẽbẽrarã mejãcha jʉ̃ẽita alkilasida estadio Los Ángelesdebemata. Naʉ̃ estadiora dããraba ẽ basi maodapeadata akʉza mebẽrã jõmaʉ̃ba bia ũrĩnamarẽã zokʼasida yi mikropono akʉza parlantera maʉ̃ estadiode badata. Adewara wuabema ẽbẽrabara naʉ̃ diskursora radiodeba ũrĩsida.

Poaga 1923de, Daizeze Bedʼeara audre jaradiasida Áfricade, Europade, Indiade akʉza Sudaméricade. Mebẽã Adavimannathu Josephʼra juwa jidabasi akʉza iya wũãwũãra 6 erbasi. Mamina iya kʼarebasi kartara tradusita naʉ̃ra bedʼea eda hindi, tamil, telugu, akʉza urdu.

Sierra Leonane, Alfred Joseph akʉza Leonard Blackmanba bʉsida sentral mundial Brooklynebema, kʼareba widita. 14 abril 1923de panʉsida ãya wididara. Alfredba jarabʉ: «Ãya mʉ̃ trʉ̃sidadera sábado kewararebasi. Maʉ̃ne mebẽã abaʉba mʉ̃aʼa widisi, ¿bʉa bʉsika widita ẽbẽrarã kainʉ jaradia wãita? Mʉ̃a iyaʼa mawũã aside mebẽãba jarasi iyita zokʼa bʉesidata mama jaradia wãmarẽã». Maʉ̃ mebẽã trʉ̃ra William Brown basi, iyira Caribedeba zesi yi kima Antoniaʉ̃me akʉza ãyi kaura, Louise akʉza Lucyʼʉ̃me.  Naʉ̃ra mebẽrã ũdukʼawuaira mejãcha jʉ̃ãibara ẽ basi.

Alfredba jarabʉ: «Nrʉema diapeda mʉ̃a Leonardʼʉ̃meba Daizeze Bedʼea akʉnʉmʉne zesi mebẽã William Brownta. Iyara Daizeze Bedʼeara mejãcha jaradiakĩrã baera, jarasi nrʉema diaita diskursota». Jedeko abaʉde mebẽã Brownbara jõma dedekasi librora iya ededara akʉza 5.000 libro audre dedekasi. Mamina iya librora mawũã mejãcha dedekabada kʼarea ẽbẽrarãbara iyira ũdukaʉde ẽ basi mawũã librora nẽdobarita, awuarabʉrʉ iyara diskurso diabʉde Daizeze Bedʼeadeba jara ũrĩbibasi baera, ẽbẽrarãbara iyira ũdukaʉdebasi Daizeze Bedʼea ʉ̃rʉ bedʼeabari.

Maʉ̃ne Betel Barmen, Alemanianebemane, mejãcha basi betelitarata, maʉ̃ba ãyi jõmaʉ̃ra ara ẽ basi mamara. Adewara maʉ̃ daucha gorogorora Franciadebemarãra yõne wãkĩrãpanasi Alemanianebemarabawara. Daizeze Bedʼeara Kʼawuabariraba Magdeburgode ũdusida deta aba, maʉ̃ra jipade yibiabasi kartara ʉ̃tʉ zebita. 19 junione, mebẽrãba makina erbadara jõma edesida Betel Magdeburgoʼeda. Mebẽrã mama wãnata ewari aba berabarida tẽã periodikorane jarasida gorogorora Franciadebemaraba ãyi juwa edre baebisita pʉwʉrʉ Barmenʼra. Mebẽrãba nama kʼawuasida ãyira Jeowaba kʼarebasita.

Brasilde, George Youngba, jaradia jʉ̃drʉsi Daizeze Bedʼeata akʉza osi Betel yiwidita mama. Adewara The Watch Tower kartata portugue bedʼeade ojʉ̃drʉsi. Jedeko bio berabari ẽ nãã iyara 7.000 kartara dedekasi. Akʉza iyi kʼãwũã Brasilʼeda jʉ̃ẽnara jipade yibiabasi Sarah Fergusonʼita. Sarahbara The Watch Tower karta lebʉta dããrabasi 1899deba. Mamina iyira waidide buru kʼoe ẽ basi. George mainʉ jʉ̃ẽnata jedeko bio berabari ẽ nãã Sarahra buru kʼoesi akʉza yi wũãwũãra kimarepanʉrasida.

The Watch Tower karta 15 diciembre 1923debemaba jara ũrĩbisi Daizeze Bedʼea Kʼawuabariraba kʼãrẽ nebiata ũdusidata, jarabʉ: «Atiara kongregasionʼrãra [ . . . ], audre zareapanʉ [ . . . ]. Audre zarea trajadadrʉ akʉza soiduba odadrʉ Jeowaba zokʼabʉta, adewara naʉ̃ta odadrʉ poaga 1924itabida».

Poaga 1924ra jipade yibiabaibasi Daizeze Bedʼea Kʼawuabariraita. Mebẽrã sentral mundialdebemara jedeko biobasi de parãpanʉta pʉwʉrʉ Staten Islandne, ãya maʉ̃ de parãbʉra maparãsida poaga 1924 jʉ̃drʉbʉrʉde, naʉ̃ba kʼarebasi mebẽrã audre ãbapanaita akʉza Daizeze Bedʼea jaradiapanʉta audre jaradiaita.