Kä ye ngwane, juta Ngöbökwe käkwe kukwe ükaninte jene ye köböire Nitre Ja Tötikaka Bibliabätä jatani Ngöbö mike täte bäri keteitibe. Täräkwata The Watch Tower nämäne texto keteitibätä kukwe mike gare, yebätä ja tötika nämäne gätä nuain nämäne Ngöbö mikakäre täte, yete kanta nämäne, ora nämäne aune kukwe drie nämäne, ye nuain nämäne bämän kratire kratire. Aune Nitre Ja Tötikaka bibliabätä ye nämäne calendario känti texto bämän kratire kratire kräke aune kantiko mike, ne kwe ja tötikadre kwe kaibe o ja mräkäbe ye ngwane nuaindre kwetre.

Gätä nuain nämäne ye ngwane Nitre Ja Tötikaka Bibliabätä yebätä “dre nämäne nemen bare” kukwe driebätä ye nämäne täin, nämäne debe bien Jehovai, arato nämäne kantare aune orare. Eva Barney, ja ngökani ñöte kä 1923 kä namani 15 biti ngwane, niarakwe niebare: “Ni iti tö nämä kukwe kwin namani barebätä kukwe driebätä ye tänbätä nitre madai ngwane, nämä nüke krö, ‘nämä debe bien Ngöböi nämä ja ngwen mantiame ben yebätä’”. Ja mräkätre ruäre bätä kukwe nämäne nemen bare kukwe driebätä ye tö nämäne nemen bälen kädriebätä. Barney kukwe ne niebare: “Godwin ye ja mräkä umbre ie kukwe nämäne kwen krubäte debe biankäre Ngöböi. Akwa, niara nämä comentario bien ngwane, nämä blite ere krubäte yebätä, ja mräkä gätä jie ngwanka ye nämä kite nainte. Ye nämäne tuin Godwin muko ie ngwane, nämä niara täke jondronbiti abrigobätä ye ngwane Godwin nämä täke tibien”.

Bati sö kratire kratire konkrekasion keteiti nämä gätä ye nuainne: Yete ora nämäne, kanta nämäne aune dre nämä nemen bare ye mika nämä gare. Gätä ye ütiäte krubäte. Dre nuain nämä gätä yete ye mikani gare tärä The Watch Tower 1 abril kä 1923 yebätä: “Gätä ötare ye bitikäre dre tä nemen bare kukwe driebätä ye mikadre gare aune nitre sribikä ye dimikadre ja ngwen dite. Kukwe ja erebe nuaindre gwairebe ye raba ni dimike nemen bäri keteitibe ye ruin nunye”.

Charles Martin, ni sribikä o kukwe driekä, nünanka Vancouver (Canadá), biti kä nämäne 19, ye dimikani krubäte gätä ne kwe. Niebare kwe: “Gätä ye köböire kukwe driedre ño jukwebätä ye rababa gare tie. Bäsi käre dre nämä nemen bare kukwe driebätä ye mika nämä gare yete, ye köböire tikwe dre niedre kukwe driebätä ye nämä nemen gare tie aune nitre ñaka tö rabadre ti kukwe nuai ye ie tikwe dre niedre ye nämä nemen gare tie”.

“Kä dianka nämäne jai “kukwe driekäre” ye käkwe ja mräkätre dimikani nemen bäri keteitibe. Täräkwata  The Watch Tower 1 abril 1923 käkwe kukwe ne mikani gare: “Ni tädre keteitibe kukwe driebätä yekäre köbö marte 1 mayo 1923 ni jökrä rabadre kukwe driere köbö ye ngwane. Aune ye erere rabadi bare marte kena sö kratire kratire ye ngwane. Yete nitre jökrä kukwe driekä konkrekasionte rabadre kukwe driere”.

Monso bati ja tötikaka Bibliabätä ye nämäne kukwe driere arato. Meri testiko kädeka nämäne Hazel Burford, biti kä nämäne 16 kä 1923, käkwe niebare: “Täräkwata Bulletin yebätä kukwe driedre ño ye nämäne mikani ye mikadre gare jai ja töibiti. a Kukwe jökrä ne ererebiti ti aune ti ruai nun nämä kä jutobiti kukwe driere”. Akwa köböiti Hazel käkwe ja tuani kukwe ñan ngüba nämäne kukwe yebe. “Ja mräkä iti umbre ñan tö nämäne niara tuai blite tödeka kwe yebätä nitre madabe. Kä ye ngwane, Nitre Ja Tötikaka Bibliabätä, ‘monso bati jökrä’, rabadre kukwe driere ni jondron jökrä Dätekä ye käikitakakäre ye ñan nämäne nüke gare ja mräkätre ruäre ie” (Sal. 148:​12, 13). Akwa Hazel kukwe driebare jankunu. Bitikäre niara jananbare kwela ketebukäre Galaad yete aune kädekani misionera juta Panamá. Ja känenkäre mada monsotre bati nämäne kukwe driere yebätä ja mräkätre ruäre töi nämäne ño yekwe ja töi kwitani.

Gätä kri nuain nämäne ye käkwe ja mräkätre dimikani nemen bäri keteitibe. Ñodre, gätä kri ye nuain nämäne ngwane, köbö dian nämäne kukwe driekäre, ñodre, namani bare Winnipeg Canadá ye ngwane. Köbö 31 marzo ye ngwane kukwe ükaninte kukwe driekäre Winnipeg, nitre jökrä rikadre gätä kribätä ye rabadre kukwe driere köbö yete. Kukwe driebare ye köböire kukwe kwin namani bare. Gätä kri mada nuainbare Winnipeg, köbö 5 agosto kä ye arabe ngwane, nitre 7,000 näre nükani gätäbätä. Gätä kri nuain nämäne Canadá ye ngwane nitre ñan nämäne kwen jire chi ye näre.

Köbö 18 nemen 26 agosto 1923 ye ngwane, gätä ütiäte nuainbare Los Ángeles (California). Gätä nuaindre ye känenkri gätä ye mikani gare periódico yebätä aune Nitre Ja Tötikaka Bibliabätä käkwe täräkwata nitre nübaikäre ye döräibare  quiniento mil jire. Ne madakäre, täräkwata nitre nübaikäre ye ketaninkä kwetre carro kwetre aune carro pasajero aune bus yebätä, gätä ye mikakäre gare nitre ie.

Sábado 25 agosto, ja mräkä Rutherford kukwe kädriebare kadeka nämäne “Oveja aune cabra”, yete “oveja” ye abokän nitre töi kwin aune nitre ye käkwe nünandi kä tibien kwitai bä nuäre yete. Arato kukwe ükateba kädekaba “Mäträkäre”, yebiti kukwe ngwarbe ye ñaka kadre ngäbiti aune nitre töi nämäne kukwe mike gare jai aune brukwä kwin yekwe kämikadrekä “Juta kri Babilonia” yebätä nieba kwe (Apoc. 18:​2, 4). Ye bitikäre täräkwata kia bätä kukwe ye nämä tikani ye imprimibare aune nitre ja tötikaka Bibliabätä kä jökräbiti tibien tärä ye döräibare kä jutobiti.

Köbö mrä te gätä kri nuainba ye ngwane nitre 30.000 kwanba. Kukwe kädeka nämä “Juta jökrä tä näin rü armagedón ye kokwäre, akwa nitre millon kwati ñan krütai jire” ye kukwe nuaba. Nitre rükai kwati ye nämäne gare nitre ja tötikaka Bibliabätä ie, yebätä estadio kri sribebare mrä Los Ángeles, ye alquilabare kwetre. Nitre jökrä ie kukwe kädrie nämäne ye kukwe juruadre yekäre ja mräkä käkwe, jondron ni kukwe mikakäre kri o bocina nämäne estadio yete yebiti blitabare, jondron ye mrä. Ne madakäre nitre kwati mada käkwe, kukwe kädriebare ye kukwe nuani radiote ta.

Kä 1923 ye ngwane kukwe driebare bäri África, Europa, India aune Sudamérica yete. Kä India yekänti, Adavimannathu Joseph, nämäne ja mäkäninte aune monso ni ti kwe. Niarakwe sribibare täräkwata kwitabätä kukwe hindi, tamil, telugu aune urdu yebiti.

Sierra Leona yete, Alfred Joseph aune Leonard Blackman kukwe tikani central mundial Brooklyn (Nueva York), niaratre dimikadre yekäre. 14 abril 1923 ye ngwane, Nitre Ja Tötikaka Bibliabätä ja di ribebare ye dimikani. Alfred käkwe kukwe niebare: “Sabadote deu kä rababara raire ti nämä jäme batibe teléfono ngö rabakaba”. Ni kukwe ñan chi kukwe juruaba telefononte ta Alfred ie, käkwe niebare ie: “¿Mä ai käkwe ni kukwe driekä ribebare bäri Sociedad Watch Tower ye ie?”. Niarakwe “Jän” niebare. “Ti ara juni”, niebare ie. ¿Nire kukwe juruabare ie raba ruin mäi? William Brown ye ara. Niaratre nämäne kä Caribe yekri akwa krire nükani kä yekänti, muko Antonia aune ngängän chi nibu kwe Louise aune Lucy yebe. Ñan kä juani kwe raire ta ja tuakäre ja mräkätre yebe.

Alfred tä mike gare: “Dekä Leonard aune ti nun nämä ja tötike Bibliabätä, nun nämä nuainne käre  bämän kratire kratire erere ngwane, ni ñan chi aune jürä ngwane jabätä rükaba jukwebätä ye abokän William Brown ara. Niara ye töi nämä kwatibe kukwe ja üaire nuainbätä ye medenbätä krire rükaba ngwane tö rababara kukwe kädriei nitre kräke”. Sö jämi niken krati ta ngwane, täräkwata jä nikani kwe jai krütani jökrä kän. Biti mada jänükani mil krärike jire ie aune kä braibe te täräkwätä ye döräibare jökrä kwe. Akwa, nitre ñaka nämäne niara mike tuin jai ni tärä rürübäinkä ye erere. Köbö jökrä te sribibare kwe Jehová kräke ye ngwane, käre nämäne kukwe kädriere Biblia yebiti. Yebätä Brown ni Biblia ngwanka nie nämäne ie.

Sukursal Barmen Alemania, yete ju namanina chi krubäte sribikäre aune nitre rükä frances ye tö namani rü gaikä juta yebe. Nitre Ja Tötikaka Bibliabätä yekwe ju känänbare Magdeburgo, aune kä yekänti namani kwin krubäte tärä imprimikäre. Kä 19 junio ye ngwane jondron ükani jökrä ngwäte aune imprenta o jondron imprimikäre ye ükani ngwäte arato. Biti ja kwitani kwetre Betel mrä yekänti kä Magdeburgo, krire köbö nikani köböite ta Betel kwitani mikani gare sukursal ie ngwane nitre rükä frances yekwe juta Barmen ye diani jai mikani gare periodicobätä. Kukwe kwin namani bare ja mräkätre kräke aune Jehovakwe jie ngwani bätä kriemikani nükani gare ietre.

George Young kukwe driebare kä jökrä känti Brasil yete. Yete sukursal kömikani keteiti kwe aune täräkwata The Watch Tower ye döräibare kwe kukwe portugués yebiti. Sö nikani ruäre ta aibe ye ngwane, täräkwata döräibare kwe 7,000 näre. George Young namani krire Brasil ye ngwane namani kwin krubäte Sarah Ferguson kräke, ñobätä ñan aune kä 1899 ye ngwane niara nämänena ñäke tärä The Watch Tower yebätä. Akwa ñaka nämäne nemen nuäre niara kräke ja diankakäre mento aune ja ngökakäre ñöte. Sö nikani ruäre aibe ta George Young namani ye bitikäre niara aune ngobo nibokä kwe yekwe ja dianinkä mento aune ja ngöka ñöte.

Kä 1923 ye jatanina krüte ngwane kukwe kwitani jene gätä, kukwe drie, aune gätä kri nuainkäre yebätä dre namani bare ye mikani gare, täräkwata The Watch Tower 15 diciembre kä 1923 yekwe. Yete mikani gare: “Konkrekasion tä kwin kukwe ja üairebiti ye tuin nie, yebätä jondron rükäre ye kitadre jabätä, ja töi mikadre kwatibe kukwe driere kä jutobiti kä kite ye kräke”.

Kä 1924 yete köbö namani ütiäte krubäte ja mräkätre ja tötikaka Bibliabätä ye kräke. Ñobätä ñan aune ja mräkätre nämäne central mundial Brooklyn, ye nämäne sribire sö kabre te kä nemenkä sukursal ye ken, kädeka nämäne Staten Island yete. Kä 1924 ye ngwane sribi krütani. Ju sribebare ye köböire ja mräkätre namani bäri keteitibe aune ñan kukwe drie bare jire ye erere kukwe driebare aune kukwe drie täbe nengwane.