Unai lagani ai, orea be senisi haida ia karaia, bona unai ese Bible Student taudia ia durua edia lalotamona karana idia hagoadaia totona. The Watch Tower ese wiki ta ta ai “Guriguri Bona Iehova Hanamoa Hebou” ai do idia herevalaia siri edia anina ia herevalaia. Kalenda ta idia karaia danu. Unai kalenda ai wiki ta ta ai do idia duahia siri bona sibona edia stadi bona ruma bese tomadiho ai do idia gaukaralaia ane edia lista ia noho.

Edia hebou ai, Bible Student taudia ese haroro gaukara ai idia davaria ekspiriens bona Iehova dekenai idia moale ena badina idia gwauraia, ane idia abia eiava idia guriguri. Lagani 1923 ai, taihu ladana Eva Barney, ena mauri lagani be 15 neganai ia bapatiso, ia gwau: “Bema oi ura ekspiriens ta oi gwauraia, do oi toreisi bona inai bamona oi gwau, ‘Lau ura Lohiabada lau tanikiu henia, ena kara namodia dainai.’” Tadikaka haida be edia ekspiriens gwauraia karana idia ura henia. Taihu Barney ma ia gwau: “Madi tadikaka buruka ladana Godwin be gau momo dainai ia ura Lohiabada ia tanikiu henia. To, bema ena hahine ia itaia hebou ia naria tadikakana be ia hesiku, ena tau ena kouti ia veria, ia helai totona.”

Kongrigeisen ta ta ese Guriguri Bona Iehova Hanamoa Hebouna be hua ta ta ai, nega tamona idia karaia. The Watch Tower, April 1, 1923 gauna ese unai hebou ia herevalaia, ia gwau: “Namona be hebou ena kahana ta be haroro gaukara ai idia davaria ekspiriens do idia herevalaia bona ma haida do idia hagoadaia. . . . Ai laloa inai bamona hebou ese tadikaka taihu edia hetura karana do ia hagoadaia.”

Canada ai, Charles Martin, ena mauri be lagani 19 pablisa ta, be unai hebou ese ia durua. Ia gwau: “Unai hebou ai haroro gaukara ai do lau gwauraia herevadia lau dibaia. Nega momo, haida ese edia ruma-ta-ruma-ta haroro gaukara ena ekspiriens idia herevalaia. Unai ese lau ia durua, dahaka do lau gwauraia bona koua herevadia lau haerelaia totona.”

Danu tadikaka taihu ia hatamonaia gauna ma ta be “haroro gaukara dinadia” ai, ibounai idia hagoadaia idia haroro hebou totona. The Watch Tower, April 1, 1923 gauna, ia gwau: “Unai gaukara ai ita lalotamona totona . . . , Tuesday, May 1, 1923 ai makaia haroro gaukara dinana. Unai murinai, hua ta ta ena Tuesday ginigunadia idia makaia  haroro gaukara ena dina . . . Kongrigeisen lalonai pablisa ta ta ese unai gaukara idia durua be namo.”

Matamata taudia be unai gaukara idia karaia danu. Hazel Burford, unai nega ai ena mauri lagani be 16, ia gwau: “Bulletin lalonai haroro herevadia idia noho ai laloatao totona. a Egu tubuna tau ida unai gaukara lau karaia goadagoada.” To, taihu Burford ia hoa badina tadikaka ta ese ena haroro gaukara dalana ia maumauraia. Ia gwau: “Buruka tadikaka ta be mai badu ida lau ia hamaoroa, taunimanima do lau haroro henia lasi. Unai nega ai, haida idia laloparara lasi Bible Student taudia ibounai, ‘tatau matamata bona hahine matamata’ danu, be iseda Havaraia Tauna hanamoa gaukarana idia karaia diba.” (Sal. 148:​12, 13, King James Version) To, Taihu Burford be haroro ia hadokoa lasi. Gabeai, Gilead Sikuli klas namba 2 dekenai ia lao bona Panama ai misinari gaukara ia karaia. Gabeai, unai tadikaka ese matamata taudia edia haroro gaukara dekenai edia lalohadai idia hamaoromaoroa.

Sekit bona rijinol hebouhebou ese tadikaka ia hatamonaia danu. Unai hebouhebou momo ai dina ta idia makaia haroro gaukara totona. Hegeregere Winnipeg, Canada ena hebouhebou ai idia mai taudia ibounai idia boiria March 31 ai haroro gaukara idia karaia totona. Unai bamona dinadia ai taunimanima momo idia haroro henia bona momo idia kamonai. August 5 ai, Winnipeg ai hebouhebou ma ta idia karaia neganai, taunimanima 7,000 bamona idia lao. Unai be nega ginigunana, Canada ena hebouhebou ai idia lao taudia ena namba be ia bada momokani.

Lagani 1923, August 18-26 ai, Iehova ena taunimanima ese Los Angeles, California dekenai mai anina bada hebouhebou ta idia karaia. Hebouhebou be do lasi neganai, wiki haida lalonai, niuspepa ai hadibaia hereva idia halasia bona Bible Student taudia ese pepapepa 500,000 mai kahana idia hariharilaia. Motuka idauidau dekenai pousta badadia amo unai hebouhebou idia advatais.

Saturday, August 25 ai, Tadikaka Rutherford ese tok ta ladana “Mamoe bona Nanigosi” ia  henia. Unai tok lalonai ia hahedinaraia “mamoe” be tanobada paradaisona ai do idia noho kudou-maoro taudia. Danu, tok ta ia henia bona gwaubou herevana ta ladana “Hadibaia Hereva” ia duahia. Unai hereva ese Kerisendom ia gwauraia dika bona kudou-maoro taudia ia hagoadaia “Babulonia Badana” amo idia gini siri totona. (Apok. 18:​2, 4) Gabeai, tanobada hegegemadai Bible Student taudia be mai lalotamona ida gwaubou pepapepa ena kopi milioni momo idia hariharilaia.

Hebouhebou ena dina ginigabena ai, helai taudia 30,000 mai kahana ese Tadikaka Rutherford ena pablik tok ladana, “Bese Ibounai be Aramagedono Dekenai Idia Raka Lao, to Hari Idia Noho Taudia Milioni Momo Do Idia Mase Lasi,” idia kamonai. Idia laloa hutuma bada do idia mai dainai, Bible Student taudia ese Los Angeles Coliseum matamatana idia rentaia. Taunimanima ibounai idia kamonai namonamo totona, tadikaka ese steidiam ena spika badadia idia gaukaralaia, unai nega ai unai be teknoloji matamatana. Taunimanima momo ese unai program be reidio amo idia kamonai danu.

Lagani 1923 ai, Africa, Europe, India, bona South America ai haroro gaukara ia bada ia lao. India dekenai, A. J. Joseph be ena adavana bona natudia 6 ia naria totona moni gaukara ia karaia, to Hindi, Tamil, Telugu, bona Urdu gado edia pablikeisen halasia gaukara ia naria danu.

Sierra Leone amo Bible Student taudia Alfred Joseph bona Leonard Blackman be heduru totona New York hedikwota dekenai revareva idia siaia. Bona April 14, 1923 ai, edia haere idia abia. Alfred ia gwau “Saturday hanuaboi ta ai, ta be lau ia rini henia.” Gado badana ta ese lau ia nanadaia: “Oi be Watch Tower Society oi tore henia bona haroro taudia totona oi noinoi, a?” Alfred ia haere, “Oibe.” Ia rini tauna ia gwau, “Lau idia siaia.” Ia be Tadikaka William R. Brown. Unai dina ai, ia bona ena adavana Antonia, bona edia natudia kekeni, Louise bona Lucy be Caribbean amo idia ginidae. Sierra Leone tadikaka be idia naria daudau lasi tadikaka Brown bona ena famili idia hedavari totona.

Alfred ma ia gwau: “Daba ai, lau bona Leonard ese emai wiki ena Baibel stadi ai karaia noho lalonai,  tau latana ta be iduara dekenai ia hedinarai. Ia be Tadikaka Brown. Ia be gaukara goadagoada tauna dainai, ia ura kerukeru pablik tok do ia henia.” Hua ta ia do ore lasi lalonai, Tadikaka Brown be ia mailaia pablikeisen ibounai ia hariharilaia. Ia ese ma buka 5,000 ia abia, to ibounai ia hariharilaia dainai, buka ma haida ia ura. To, Tadikaka Brown be buka hoihoilaia tauna bamona idia laloa lasi. Iena hesiai gaukara ibounai lalonai, nega ibounai ena tok lalonai Baibel ia gaukaralaia, unai dainai ena ladana idia hatoa, Bible Brown.

Unai lagani ai, Germany dekenai Barmen ai ia noho brens ofesi be ia honu, bona idia kamonai France ena ami taudia idia ura unai siti idia abia. Bible Student taudia ese Magdeburg ai bildin ta idia davaria bona unai be gabu namona pablikeisen idia printaia totona. June 19 ai, tadikaka be edia printa kohudia bona kohu ma haida idia haboua bona idia hanaia lao Betele matamata Magdeburg dekenai, bena hedikwota idia hadibaia. Unai dina murinai, niuspepa ese idia halasia France ena ami ese Barmen siti ia abia. Tadikaka ese Iehova idia tanikiu henia badina idia ia hanamoa bona gimaia.

Brazil ai, tadikaka George Young be gabu momo ai sivarai namona ia harorolaia, brens ofesi matamata ia haginia bona Portuguese gado ai Gima Kohorona ia halasia. Hua haida sibona murinai, ia ese pablikeisen 7,000 bamona ia hariharilaia. Brazil dekenai ia ginidae neganai, Sarah Ferguson ia moale bada, badina Tadikaka Young ese edia ruma bese ia vadivadi. Taihu Ferguson be lagani 1899 amo The Watch Tower ia duahia matamaia, bona gwauhamata ia karaia Iehova ia tomadiho henia totona to ia do bapatiso lasi. Hua haida murinai, Taihu Ferguson bona ena natudia foa be bapatiso idia abia.

Lagani ena dokona ai, The Watch Tower, December 15, 1923 gauna ese Bible Student taudia be mai lalotamona ida Dirava idia tomadiho henia karana ia herevalaia. Ia gwau: “Ita itaia diba, kongrigeisen lalonai tadikaka taihu . . . edia abidadama be ia goada . . . Namona be gaukara momo totona ita hegaegae bona vaira laganina ai mai moale ida Iehova do ita hesiai henia noho.”

Bible Student taudia dekenai lagani 1924 danu be gaukara momo laganina. Betele tadikaka be hua haida lalonai Staten Island dekenai idia gaukara, unai motumotu be Brooklyn hedikwota kahirakahira ia noho. Unai gabu matamata dekenai idia haginia ruma be lagani 1924 ai idia haorea. Bona unuseniai idia karaia gaukara ese tadikaka ia hatamonaia bona guna idia laloa lasi daladia ai sivarai namona idia harorolaia.