In 1923, da hui wen change tings up an dat wen help make da unity of da Bible Students moa strong. The Watch Tower started fo explain da scripcha dey would talk about ery week at da Prayer an Praise Meeting. On top of dat, da Bible Students wen make one calenda dat had one scripcha fo ery week an one song dey could sing wen dey study on dea own o during dea ohana worship.

At dea meetings, da Bible Students wen share someting dat wen happen wen dey was preaching, dey wen tell how come dey tankful to Jehovah, sing one song, o even say one prayer. Eva Barney was ony 15 in 1923 wen she wen get baptize. She wen say, “If you wanted fo share someting, you would jus stan up an say someting like, “I like tank God fo all da good tings he wen do fo me.”” Some braddahs wen love fo share dose kine tings. Sistah Barney wen tell, “Good old Braddah Godwin wen have choke tings he wanted fo tank God fo. But wen his wife wen see da braddah who was running da meeting getting all futless, she would pull on her husband’s jacket an he would stop talking an sit down.”

Once a month, ery hui had one spesho Prayer an Praise Meeting. The Watch Tower April 1, 1923 wen tell, “Half da meeting should be wat erybody like share about preaching an giving good kine words to da braddahs. . . . Dese kine meetings going make erybody come moa tight wit each odda.”

One 19 year old braddah, Charles Martin from Vancouver, Canada, sed da meetings was good fo him. Layta on he tell, “Dis wea I firs wen learn wat fo say wen I go house to house. Plenny times somebody would tell wat wen happen while dey was preaching. Dat wen help me figga out wat fo say an how fo ansa wen somebody no agree.

Da braddahs had moa unity cuz dey wen make “service days” wea erybody would go out preach togedda. Da April 1, 1923 issue of The Watch Tower wen tell, “So we all doing um da same way. . . . Tuesday, May 1,  1923 is going be service day fo erybody. Afta dat, ery firs Tuesday of da month going be one service day. Erybody in da hui should go out if dey can.”

Even da Bible Students dat was young wen go preach. Hazel Burford was ony 16 years old dat time. She wen say, “Da Bulletin had talk story sampos fo us use. a Me an my granfaddah wen work hard fo go preach.” But Sistah Burford neva expeck how one braddah was going ack cuz she was preaching. She tell, “One olda braddah really neva like me talk to peopo. Dat time some guys neva undastan dat “young guys an wahines” was Bible students an had da kuleana fo preach to peopo.” (Songs 148:12, 13) Sistah Burford neva stop. End up she wen go da numba two class of da Gilead School, an she was one missionary in Panama. Bumbye dose braddahs wen change how dey tink about young kids going preaching.

Big kine meetings wen help da braddahs fo stick togedda. Plenny of dese had days wea dey would go out field service, like da one dey had in Winnipeg, Canada. Erybody dat went to da big kine meeting wen get invited fo go preach in dat city on March 31. Cuz of dat, plenny peopo wen get preach to an had good kine tings dat wen happen. On August 5, aroun 7,000 peopo wen go to anodda big kine meeting in Winnipeg. Dat time, was da mos peopo dat eva wen go to one big kine meeting in Canada.

In Los Angeles, California on August 18-26, 1923 had one supa importan big kine meeting. Da weeks befoa da ting wen start, newspaypas wen tell about um an da Bible Students wen give out moa den 500,000 invites fo go. Had banners all ova da trolleys an cars.

On Saturday, August 25, Braddah Rutherford wen give da talk “Sheep and Goats,”  wea he wen make um clear dat da “sheeps” is da peopo dat get da right kine attitude fo get da real kine life on one paradise earth. An he wen give one talk an read one resolution called “A Warning.” Dis resolution wen tell how bad Christendom was, an wen try get da guys wit one good heart fo get outa “Babylon da Great.” (Jesus Show 18:2, 4) Layta, da Bible Students all aroun da earth wen go all out fo give out uku millions of tracks telling about dis resolution.

On da las day of da big kine meeting, had ova 30,000 guys dat wen hear Braddah Rutherford give da talk, “All Nations Marching to Armageddon, but Millions Now Living Will Never Die.” Cuz da Bible Students wen expeck plenny peopo fo come, dey wen rent da brand new Coliseum in Los Angeles. Da braddahs wen use da stadium’s loudspeaka system, dat was new technology dat time, fo make shua erybody could hear. Plenny moa peopo wen lissen to um on top da radio.

In 1923, da preaching work wen spread all ova Africa, Europe, India, an South America. In India, A.  J.  Joseph wen help fo make books an odda stuff in Hindi, Tamil, Telugu, an Urdu, same time he wen take kea his wife an six keiki.

Alfred Joseph an Leonard Blackman who was in Sierra Leone, wen write to da world headqwatahs in Brooklyn, New York fo ask fo help. On April 14, 1923 dey wen get da help. Alfred wen say, “Real late one Saturday night I wen get one phone call.” Somebody wit one real loud voice wen ask him, “You da guy who wen write to da Watch Tower Society an ask fo preachas?” Alfred wen tell, “Yeah.” Da guy wit da loud voice wen tell um, “Well, dey wen send me.” Da loud voice was William R. Brown. He wen get dea dat day wit his wife, Antonia, an dea young girls, Louise an Lucy. Dey wen come from da Caribbean. Da braddahs neva need wait long fo meet dem.

Alfred wen say, “Da nex morning me an Leonard was talking about da Bible like  we wen do ery week. Den we wen see dis tall guy at da door. Was Braddah Brown. He wen go all out fo da trut an wanted fo give one talk fo erybody da nex day. In less den one month, Braddah Brown wen place all da books an odda stuff he wen bring wit him. Ony fas he wen get 5,000 moa books, an still yet litto while afta, he wen need some moa. But peopo neva know Braddah Brown az one guy dat sell books. Thru all da years he was going all out fo Jehovah, he wen use da Bible in his talks plenny an dass why peopo wen call him Bible Brown.

Same time, in Germany, da braddahs wen decide fo move outa da branch office in Barmen cuz was too small, an dey wen hear da French army was going come an take ova. Da Bible Students wen find some buildings in Magdeburg dat was going be perfeck fo do da printing. On June 19, da braddahs wen pau pack up all da printing stuffs an odda furniture an wen move um to da new Bethel in Magdeburg. Da day afta world headqwatahs wen find out da move was pau, da newspaypas wen say dat France wen take ova da city of Barmen. Da braddahs wen tank Jehovah fo protecking dem an helping dem move.

In Brazil, George Young, one braddah who wen go all ova fo preach, wen set up one new branch an wen start fo print The Watch Tower in Portuguese. In ony few months he wen pass out moa den 7,000 magazines an odda stuff. Sarah Ferguson was real excited wen Braddah Young wen visit her an her ohana. She was reading The Watch Tower since 1899, but neva have chance fo her get baptize yet. Few months layta, Sistah Ferguson an her four kids wen finally get baptize.

At da end of da year, The Watch Tower Decemba 15, 1923 wen tell about how all da changes to da meetings, field service, an big kine meetings had affeck da Bible Students. It sed, “Az easy fo see dat da local huis get strong faith . . . dis nex year we gotta get ready fo do moa work, be happy, an go all out fo serve God.”

1924 was anodda exciting year fo da Bible Students. Da braddahs at Bethel was working hard fo months on one piece land in Staten Island, dat was close to da world headqwatahs in Brooklyn. Da new buildings ova dea was pau da early part of 1924 an wen help bring da braddahood togedda an spread da trut moa den eva.