Ta dagun 1923, egga ira i panguli nga kingngua na organisasion nga nakaduffun tapenu mattaradday i paddayaw na Estudiante ira na Biblia. Namegafu nga nipublisa na The Watch Tower i komento ira nga mangiyesplika ta teksto nga gigiammuadda ta linigguan nga Study nga Paddayaw, Pakimallo, anna Testimonia. Nangiyimprenta gapa i Estudiante ira na Biblia tu tadday nga kalendariu nga mangipasingan nu anni ira nga teksto i magigiammu kada ligguan ta study da kunne na gapa i kansion nga awayya da kansionan kadaggaw ta personal onu family study da.

Ta study da ira, egga i makagi tu “testimonia ira” na Estudiante ira na Biblia. Puede ira nga magistoria tu ekspiriensa da ta pallayyagayya, mangikagi tu gannug nga ipappabalo da kani Jehova, makkansion, onu makimallo paga lagu. Kunnaw bi i nanono uli ni Eva Barney nga na-baptize ta 1923 ta edad nga 15: “Nu kayà mu i mattestimonia, tumaddag ka tapus igafum i kagiammu ta kagitta na kunnaw: ‘Kayà ku i mappabalo ta Yafu ta ngamin nga kinapia na ta nio.’” Kakayà na karuan nga brother i mattestimonia. Istorian paga ni Sister Barney: “Kekkaru i kayà na meddu anna lakay ngana nga si Brother Godwin nga ipappabalo ta Yafu. Ngem nu mapansin na atawa na nga ari ngana mapakali i brother nga makkondukta, guggunan na i amerikana ni Brother Godwin tapus magimmang ngana yayya nga mabbida anna magitubang.”

Mittan kada vulan, egga i espesial nga Study nga Paddayaw, Pakimallo, anna Testimonia na kada class (kongregasion). Kunnaw i kagian na The Watch Tower nga Abril 1, 1923 meyannung tatun: “Gaddua natun nga study ay mawag tu meyusa ta testimonia ira nga meyannung ta pallayyagayya anna pamagaram ta wawwaragi. . . . Mangurug kami nga megafu taw ira nga study nga makapasikan ta nono, mas maddukko i wawwaragi ta kataggi-tadday.”

Aru i nammakapian ni Charles Martin, 19-anios nga class worker (publisher ta kongregasion) ta Vancouver, Canada tatun ira nga study. Kunnaw bi i nanono na: “Tatukku nga ollu nga nagigiammu nu anni i ikagì ta pa-house-to-house. Kanayun nga egga i mangistoria tu ekspiriensa na. Yatun i nangiyawa nio tu ideya ira nu anni i ikagì anna nu kunnasi ngà tubbag ta nadduruma nga pangokkontra ta mensahè.”

Mas gapa nga nattaradday i wawwaragi megafu ta egga i makagi tu “service days” onu aggaw ira nu sitaw  magalan i ngamin nga wawwaragi nga mallawan. Kunnaw i niyanunsio na Abril 1, 1923 nga isyu na The Watch Tower: “Tapenu mattaradday ittam ngamin ta tattadday nga trabahu . . . , i Martes, Mayo 1, 1923 i napili nga general service day. Tapus ta ollu gapa nga Martes na kada vulan kabalin natun . . . Mawag tu makilawan i ngamin nga wagi ta ngamin nga kongregasion.”

Nanguffun gapa ta trabahu nga pallayyagayya maski i abbing ira nga Estudiante na Biblia. Kunnaw i istorian ni Hazel Burford nga 16 anios laman tatun nga tiempo: “Egga ta Bulletin i canvass ira (kaparehu na sampol ira nga pakiyuvovug) nga i-memorize mi. a Nevulu-vulu ngà kani kakè anna ke-ayayya ku nga makipartisipa tatun ira nga aktibidad.” Ngem kakkadda-kaddag ta egga i nangontra ta pallayyagayya ni Sister Burford. Istorian na: “Egga i meddu anna manakam ngana nga brother nga talaga manaki na nga layyagayyakku i totolay. Tatun nga tiempo, egga ira i ari makalippawa nga mawag tu makipartisipa i ngamin nga Estudiante na Biblia, nelagum i ‘babbagitolay anna mammaginganay ira’ ta pangidayaw ta Kadakallan nga Namaratu ta nittam.” (Sal. 148:12, 13) Ngem ari lagapa nga nagimmang si Sister Burford. Turi kua, nagatende yayya ta mekadua nga klase na Gilead School tapus nammisionera yayya ta Panama. Pappasa na tiempo, inuli danatun nga brother i pagimamma da meyannung ta pallayyagayya na abbarabbing.

Mas gapa nga nattaradday i wawwaragi megafu ta lokal anna rehional ira nga kombension. Egga i service days na aru tatun ira nga kombension, kagitta na nesimmu ta Winnipeg, Canada. Ta Marso 31, egga i “Special Bombardment of Winnipeg” nu sitaw nagalan nga makiparte i ngamin nga nagatende ta kombension. Mas aru nga totolay i nakibbida da tatun ira nga espesial nga aggaw na pallayyagayya anna makasta ira i resulta na. Turi ta Agosto 5, ma-7,000 i nagatende ta tadday paga nga kombension ta Winnipeg. Yatun ngana i katannangan nga attendance para ta kombension ta Canada tatun nga tiempo.

I tadday ta pinaka-ari makattaman nga kombension na totolay ni Jehova ta 1923 ay nesimmu turi ta Agosto 18-26 ta Los Angeles, California. Piga ligguan nige natun, nallawan ta diariu ira i anunsio  para tatun nga kombension anna naketaneg i Estudiante ira na Biblia tu maturu tu 500,000 nga imbitasion. Egga ira i nedikke nga banner ta pampubliko ira nga pattakayan anna ta pribadu ira nga kotche nga mangiyanunsio ta kombension.

Turi ta Sabadu, Agosto 25, nipalappa ni Brother Rutherford i “Karneru anna Kanzing Ira,” nu sitaw manawag nga niyesplika na nga kasali ta “karneru” danuri matalo anna mepangngo nga mattolay tu mannanayun ta paraiso nga davvun. Niyarubang na gapa i resolusion nga “A Warning.” Kinondena natun nga resolusion i Kakristianuan anna pinagaram na danuri mapia i giffutuadda nga panawan i ‘Madumu-rumug nga Babilonia.’ (Nep. 18:2, 4) Turi kua, nitaneg na matalikarag nga Estudiante ira na Biblia ta interu mundo i minillion nga kopia natun nga resolusion.

Ta ultimu nga aggaw na kombension, maturu tu 30,000 i nakaginna ta pangipalappa ni Brother Rutherford ta “Mammarcha i Ngamin nga Nasion Mappange ta Armagedon, Ngem Minillion nga Matolay Sangawe i Ari Ngana Vuluvuga Matay.” Inekspekta na Estudiante ira na Biblia nga aru i umay magginna, yayya nga nirentadda i bagu pataddag nga Los Angeles Coliseum. Tapenu masiguradu na brother ira nga maginna ta interu istadium i palappa ira, inusa da i loudspeaker system nga bagu nga teknolohia tatun nga tiempo. Aru gapa i nagginna ta programa ta radio.

Ta dagun 1923, minalawa i trabahu nga pallayyagayya ta Africa, Europe, India, anna South America. Ta India, nanguffun si A. J. Joseph ta pangipublisa tu literatura ira ta Hindi, Tamil, Telugu, anna Urdu, maski nu egga i tangngawan na nga atawa na anna annam nga ána.

Ta Sierra Leone, nattura i Estudiante ira na Biblia nga da Alfred Joseph anna Leonard Blackman ta world headquarters ta Brooklyn, New York tapenu makkiddaw tu uffun. Turi ta Abril 14, 1923, nalawa da i uffun. Istorian ni Alfred, “Tadday nga gabi na Sabadu, egga i ari ku inekspekta nga nattawag nio.” Egga i ngaral nga masikan nga nakkiavu nisa, “Siko kari i nattura ta Watch Tower Society tapenu makkiddaw tu kavulu nu ira nga mallayyagayya?” “Wan,” kunni Alfred. “Bueno, sakan i nidog da.” Ngaral yatun ni William R. Brown. Zimittal yayya tatun nga aggaw maggafu ta Caribbean kavulu i atawa na nga si Antonia anna i ána da nga da Louise anna Lucy. Ari nabbayag, nammammu na wawwaragi yatun ira nga bagu nga dattal.

Istorian paga ni Alfred: “Ta tumunug nga umma, maddaggukkami nga maggigiammu ni Leonard tu Biblia, gitta na kukukuammi kada ligguan, turi ta  egga gavva nga atannang nga tolay nga agga-taddag ta puerta. Yayya si Brother Brown. Fermi i talikarag na para ta kinakurug gafu ta kayà na nga mappalappa insigida ta publiko ta tumunug nga aggaw.” Awan paga tu tanga-vulan i nappasa, nepalima ni Brother Brown i ngamin nga literatura nga agga-vulu na. Turi kua, nakalawa yayya tu 5,000 paga nga libru, anna ari nabbayag, aru mana nga libru i kawagan. Ngem ari tu nakilala si Brother Brown nga gumallaku tu libru. Ta interu nga apaddu nga tiempo nga matalikarag nga pinasserbi na, kanayun na nga usan i Biblia ta palappa na ira, yatutta agalan yayya na totolay tu Bible Brown.

Ta Germany, nadesision na brother ira nga panawan i branch office ta Barmen megafu ta baddi ngana yatun anna nadumug da nga aranni ngana nga sakupan na suddalu ira nga taga-France yatun nga siudad. Egga i nalegan na Estudiante ira na Biblia nga building complex ta Magdeburg nga sassakto ta kawagadda nga pagimprentan nga lugar. Turi ta Hunio 19, nabalin na wawwaragi nga iyempake i equipment ira nga pagimprentan anna karuan paga tu gamit tapenu magali ngana ira ta bagu nga Bethel ta Magdeburg. Ta tumunug laman nga aggaw kabalin nga napakammuan i headquarters nga nabalin ngana i pagali, nallawan ta diariu ira i balita nga nasakup ngana na France i siudad na Barmen. Napakurug na wawwaragi ira nga binendisionan anna prinotektan ira ni Jehova.

Ta Brazil, si Brother George Young, nga napakaru i inangngayan na tapenu ilayyagayya i mapia nga dumug, i nangirollu ta kepataddag na bagu nga branch anna ta pangipublisa tu The Watch Tower ta Portuguese. Piga vulan laman i nappasa, nakepalima yayya tu maturu tu 7,000 nga magazina anna bukleta. Fermi gapa i ayayya ni Sarah Ferguson turi ta binisita ni Brother Young i familia da. Namegafu gare turi ta 1899, mabbibbibbig ngana yayya tu The Watch Tower, ngem ari na paga vuluvuga na-baptize tapenu isimbolo i dedikasion na. Piga vulan i nappasa, na-baptize balaman da Sister Ferguson anna i appa tu ana na.

Ta ultimu na dagun, mabibbig ta The Watch Tower nga Disiembre 15, 1923 i efekto na ta Estudiante ira na Biblia na panguli ira ta unnug na study, pallayyagayya, anna kombension. Kagian natun: “Manawag nga masingan nga i kongregasion ira . . . ay mapia i paddia-paddiadda ta espiritual . . . Mas paga gafu nga mapprepara ittam para ta mas aru nga trabahu anna ari magimmang nga matalikarag anna magayayya nga passerbian i Dios tam.”

Kappagayayya gapa i tumunug nga dagun 1924 para ta Estudiante ira na Biblia. Piga vulan ngana nga as-asikasuan na wawwaragi ta Bethel i tadday nga lote ta Staten Island nga aranni laman ta headquarters ta Brooklyn. Nakumpleto nga nepataddag i fasilidad ira tatun nga bagu nga lote ta gafu ira nga vulan na 1924. Nakaduffun yatun tapenu egga i pattaradday na wawwaragi anna mewara i mapia nga dumug gukaban na metodo ira nga dati ay ari tu posible.