Evaọ ukpe yena, ukoko u te mu eware ekpokpọ jọ họ eru ze nọ o wha riẹ ze nọ Emọ-Uwuhrẹ Ebaibol na a je ro ru eware oghẹrẹ ọvona evaọ akpọ na soso. A jẹ hae jọ Uwou-Eroro Na ta ẹme kpahe eria Ebaibol nọ a ti wuhrẹ evaọ ewuhrẹ nọ a jẹ hai ru koka koka. A jẹ hae jọ iwuhrẹ rai lẹ, jiri Ọghẹnẹ, jẹ ta eware nọ Ọghẹnẹ o ru kẹ ae. A te je ru ekalẹnda ze nọ a kere oria Ebaibol nọ a re se koka koka fihọ, gbe ihimu nọ ohwo ọ rẹ sae so nọ o te bi ru uwuhrẹ omobọ riẹ hayo egagọ uviuwou.

Nọ Emọ-Uwuhrẹ Ebaibol na a te kpohọ ewuhrẹ, ohwo kpobi ọ sae ta emamọ oware jọ nọ o via nọ o kpohọ usi uwoma, ọ sae ta ẹme jọ ro yere Jihova, ọ sae so ole, hayo ọ vẹ lẹ. Oniọvo jọ nọ a re se Eva Barney nọ ọ họ-ame evaọ ukpe 1923 okenọ ọ jọ ikpe ikpegbisoi, ọ ta nọ: “Oke yena who te kpohọ ewuhrẹ, whọ tẹ gwọlọ ta oware jọ nọ Ọghẹnẹ o ru kẹ owhẹ, whọ rẹ kpama, whọ vẹ kake ta nọ, ‘Mẹ gwọlọ yere Olori na rọkẹ eware iwoma nọ o ru kẹ omẹ no.’” Oware yena o jẹ hae were inievo jọ gaga. Sista Barney ọ ta nọ: “Ẹsikpobi oniọvo jọ nọ ọ kpako no nọ a re se Godwin ọ jẹ hai gbiku eware nọ Ọghẹnẹ o ru kẹe no. Ẹsenọ ọ tẹ kpama muhọ ẹta no, nọ aye riẹ ọ jẹ ruẹ nọ oniọvo nọ o bi ru ewuhrẹ na o thihakọ bẹ no yọ ẹme na o bi wo ere he, o ve si ewu ọzae riẹ, ọzae na o ve ku ẹme na họ, ọ vẹ keria.”

A jẹ hai ru ewuhrẹ obọdẹ jọ ẹsiẹvo evaọ amara kpobi. A rẹ jariẹ lẹ, so ile, yọ ahwo a rẹ ta eware nọ Ọghẹnẹ o ru kẹ ae. Uwou-Eroro Ane 1, 1923 o ta oghẹrẹ nọ u fo nọ ewuhrẹ na ọ rẹ jọ. O ta nọ: “A rẹ kuvẹ re ahwo a ta emamọ eware nọ e via nọ a kpohọ usi uwoma, a vẹ jẹ tuduhọ inievo na awọ. Oware nọ a rẹ rọ abọvo oke nọ a ti ro ru ewuhrẹ na ru oye. . . . Ma riẹ nọ oware nana o te lẹliẹ inievo na kẹle ohwohwo.”

Ewuhrẹ yena u fiobọhọ kẹ Brọda Charles Martin gaga. Ikpe ikpegbizii ọ jọ oke yena. Oniọvo na yọ ohwo ẹwho nọ a re se Vancouver evaọ obọ Canada. Uwhremu na ọ ta nọ: “Ewuhrẹ yena mẹ jọ kake riẹ ẹme nọ mẹ rẹ ta nọ me te kpohọ usi uwoma. Inievo na a jẹ hae ta eware nọ e via nọ a kpohọ usi uwoma. Mẹ jẹ hae rọ ere riẹ ẹme nọ mẹ rẹ ta nọ mẹ tẹ nyaku ahwo nọ a gwọlọ yo ho hayo enọ e rẹ vro avro.”

A fi edẹ jọ họ nọ Emọ-Uwuhrẹ Ebaibol nọ e rrọ akpọ na soso a re ro kpohọ usi uwoma. Uwou-Eroro Ane 1, 1923 o ta nọ: “Re mai kpobi  ma kuobọgbe ru iruo Ọghẹnẹ . . . evaọ akpọ na soso, ma ti kpohọ usi uwoma evaọ Edivẹ-Oka nọ o kiefihọ ẹdẹ ọsosuọ Asoi, 1923. No umuo oke yena vrẹ, ma te hae rọ Edivẹ-Oka ọsosuọ amara kpobi kpohọ usi uwoma evaọ akpọ na soso. . . . Jọ ọmọ eklase [koyehọ owhowho-uvie] kpobi ọ daoma kpohọ usi uwoma.”

Emaha nọ e jọ Emọ-Uwuhrẹ Ebaibol oke yena a jẹ hai kpohọ usi uwoma gaga. Sista Hazel Burford nọ ọ jọ ikpe ikpegbezeza oke yena ọ ta nọ: “Obe nọ a re se Bulletin ma jẹ hai ro ru ewuhrẹ. Yọ a jẹ hai fi izoẹme jọ họ iẹe nọ ma re fihọ uzou rọ ta usi uwoma (nwane wọhọ enọ e rẹ jọ obe ewuhrẹ Uzuazọ Oleleikristi gbe Usi Uwoma Ota Mai na). a Mẹ avọ ọsẹ ologbo mẹ ma jẹ hai kpohọ usi uwoma gaga.” Rekọ oware jọ o via. Sista na ọ ta nọ: “Oniọvo-ọmọzae jọ nọ ọ kpako no ọ jẹ hae rọwo vievie he re mẹ ta usi uwoma kẹ ahwo. Oke yena inievo jọ a re riẹ nọ u fo nọ izoge na omarai, te ‘emezae’ te ‘emetẹ’ a re jiri Ọghẹnẹ ologbo mai na ha.” (Ol. 148:12, 13) Sista Burford ọ siọ usi uwoma ba ha. Uwhremu na, o kpohọ Isukulu Giliad, yọ eklase avọ ivẹ ọ jọ. A te vi ei kpobọ Panama re ọ jọ imishọnare. Nọ oke o be nya na, inievo na a tẹ te ruẹ nọ u fo re emaha na a ta usi uwoma re.

Ikokohọ ilogbo gbe esese e jẹ hai ru nọ inievo na a re ro kuobọgbe ru iruo Ọghẹnẹ. Ẹsibuobu, a jẹ hai kpohọ usi uwoma nọ a te kpohọ okokohọ ologbo. Nwanọ ere o jọ nọ a ru okokohọ jọ evaọ Winnipeg nọ ọ rrọ Canada. Evaọ edẹ ọgbagbọvo Asa, a jọ okokohọ yena ta nọ, jọ ahwo nọ a ziọ okokohọ na kpobi a nyae ta usi uwoma evaọ ẹwho na. A jẹ hae ruẹ ahwo buobu nọ a rẹ ta usi uwoma kẹ nọ a te kpohọ okokohọ, yọ Ọghẹnẹ ọ ghale rai. Evaọ edẹ isoi Aria nọ a ru okokohọ ọfa jọ evaọ Winnipeg, ahwo nọ a jariẹ a bu te enwenọ idu ihrẹ (7,000). Re oke yena o te ti te, ahwo a re ziọ okokohọ ologbo bu te ere he evaọ Canada.

A ru okokohọ ologbo jọ nọ ọ rẹ thọrọ ẹro ho evaọ edẹ ikpegberee rite edẹ udhegbezeza Aria evaọ 1923. Ẹwho nọ a re se Los Angeles, evaọ California a jọ ru ei. Eka jọ taure okokohọ na o  te ti te, a jẹ jọ ebe-usi zizie ahwo. Yọ Emọ-Uwuhrẹ Ebaibol na a ghale ebe uzizie nọ i bu vi idu egba isoi (500,000). A jẹ ta ebe mu imoto, te enọ a be rọ dhẹ ofa re a ro zizie ahwo.

Evaọ Ẹdẹ-Ọmaha nọ ọ jọ edẹ udhegbisoi Aria, Brọda Rutherford o ru ẹme jọ evaọ okokohọ yena nọ uzoẹme riẹ o ta nọ, “Igodẹ gbe Ewe.” Ọ jọ ẹme na ta nọ igodẹ na họ ahwo nọ i kiẹrẹe nọ a te jọ aparadase evaọ otọakpọ na. Ọ tẹ jẹ ta ẹme kpahe ọtamuo jọ nọ a gwọlọ ru evaọ okokohọ na. Uzoẹme ọtamuo na họ “Unuovẹvẹ,” yọ a jariẹ ta nọ uye u ti te egagọ Kristẹndọm, fikiere jọ ahwo kpobi nọ a gwọlọ gọ Ọghẹnẹ a kẹnoma kẹ “Babilọn Ologbo na.” (Evia. 18:2, 4) Nọ a ru okokohọ na no, Emọ-Uwuhrẹ Ebaibol nọ i se usi uwoma gboja gaga a tẹ jẹ ghale ebe ọtamuo na kẹ ahwo buobu evaọ akpọ na soso.

Evaọ ẹdẹ urere okokohọ na, Brọda Rutherford ọ kẹ ovuẹ ogbotu nọ uzoẹme riẹ o ta nọ “All Nations Marching to Armageddon, but Millions Now Living Will Never Die.” Ahwo nọ a gaviezọ kẹ ovuẹ na a bu vi idu ọgba (30,000). Emọ-Uwuhrẹ Ebaibol na a riẹ no vẹre inọ ahwo a ti zurie ze ti yo ovuẹ na. Fikiere a tẹ haya istediọmo ologbo jọ nọ a bọ obọ evaọ Los Angeles. A te ru re ẹme na o do fihọ ọgba ologbo nọ ọ jọ etẹe. U ri kri nọ a ro ku ọgba otiọye na ze he evaọ oke yena. Amọfa buobu a rọ iredio gaviezọ kẹ ovuẹ na.

Evaọ ukpe 1923, usi uwoma na u te ti te eria buobu evaọ Africa, Europe, India, gbe South America. Brọda A. J. Joseph nọ ọ jọ obọ India o wo aye gbe emọ ezeza. Avọ ere ghele na, ọye họ ohwo nọ ọ jẹ hai printi ebe evaọ ẹvẹrẹ Hindi, Tamil, Telugu, gbe Urdu.

Emọ-Uwuhrẹ Ebaibol jọ nọ a re se Alfred Joseph avọ Leonard Blackman evaọ obọ Sierra Leone a kere kpobọ ehri ukoko evaọ Brooklyn, nọ ọ rrọ New York inọ jọ a vi ahwo ze nọ a rẹ ta usi uwoma. A te gine vi ahwo kpohọ obei evaọ edẹ ikpegbene Ane 1923. Brọda Alfred ọ ta nọ: “Evaọ aso Ẹdẹ-Ọmaha jọ, ohwo jọ nọ mẹ riẹ hẹ ọ tẹ rọ ifonu se omẹ.” Ohwo na ọ tẹ rọ urru ulogbo nọe nọ, “Whẹ họ ohwo nọ o kere se Watch Tower Society inọ jọ a vi ahwo ze oborai nọ a rẹ ta usi uwoma na?” Brọda Alfred o te yo kẹe nọ, “Ee.” Ohwo na ọ tẹ ta nọ, “Ukoko u vi omẹ ze no.” Brọda William R. Brown họ ohwo nọ o se rie na. Ẹdẹ yena ọye avọ aye riẹ Antonia gbe emetẹ ivẹ rai Louise avọ Lucy a ro no obọ Caribbean ze. U kri re a te ti te amọ Brọda Alfred oma ha.

 Brọda Alfred ọ ta nọ: “Okiokiọ riẹ nọ mẹ avọ Brọda Leonard ma je ru ewuhrẹ nọ ma re ru koka koka, ọzae jọ nọ ọ rrọ goba ọ tẹ nyaze. Brọda Brown họ ọzae na. O make rọnọ ọ nyaze obọ na, ọ gwọlọ nọ okiokiọ riẹ, ọ rẹ nwane kẹ ovuẹ ogbotu evaọ oria nọ ahwo a kokohọ. Oniọvo na ọ rọ Ẹme Ọghẹnẹ zaro vievie he.” Ebe nọ Brọda Brown ọ wha ze kpobi, ọ ghale rai kẹ ahwo no, yọ u ri te amara dede he. U kri hi, a te vi ebe efa nọ i bu te idu isoi (5,000) sei. U ri kri hi na, ọ tẹ jẹ ghale ae kpobi no. O make rrọ ere na, orọnikọ ọzae nọ ọ rẹ zẹ ebe na a je se Brọda Brown ho. Brọda Brown ọ tẹ be ta ẹme, ọ rẹ nwani dhesẹ oria nọ ẹme na o no ze evaọ Ebaibol. Fikiere a te je sei “Bible Brown.” Ọ rọ ajọwha gọ Jihova ikpe buobu.

Oke yena uwou ogha nọ o jọ ẹwho nọ a re se Barmen evaọ Germany o gbẹ jẹ gba ahwo ho. Yọ ahwo France a jẹ gwọlọ nọ a rẹ wọ ẹmo ziọ ẹwho na. Emọ-Uwuhrẹ Ebaibol na a tẹ jọ ẹwho nọ a re se Magdeburg dẹ uwou jọ nọ a rẹ hae jọ printi ebe. Oria na ọ nwani kiehọ iruo na gaga. Evaọ edẹ ikpegbizii Azeza, a tẹ te kwa eware nọ a re ro printi ebe na kpobi gbe eware efa kpobọ Magdeburg. Ẹdẹdẹ nọ a rọ vuẹ inievo nọ e rrọ obọ ehri ukoko inọ a kwa kpohọ obei no, a tẹ jọ ebe-usi ta nọ ahwo France a wọ ẹmo ziọ Barmen no, yọ ae a bi su ei enẹna. Inievo na a tẹ ruẹ nọ Ọghẹnẹ ọvo o ru nọ a rọ kwa no obọ Barmen na.

Brọda George Young nọ ọ jẹ hai kpohọ eria avọ eria nyae ta usi uwoma, o te obọ Brazil, o te fi uwou ogha họ etẹe. Ọ tẹ jẹ hai printi Uwou-Eroro ẹvẹrẹ Portuguese. Oniọvo na ọ ghale ebe nọ i bu vi idu ihrẹ (7,000) kẹ ahwo evaọ emerae jọ ọvo. Obọ Brazil nọ ọ nya na u fiobọhọ kẹ aye jọ nọ a re se Sarah Ferguson gaga. Anwọ ukpe 1899 ze, aye na ọ be hai se Uwou-Eroro nọ o kpozi. Ọ riẹ nọ Emọ-Uwuhrẹ Ebaibol na họ egagọ uzẹme na, rekọ ọ re sae họ-ame no ho. Nọ Brọda Young ọ nyaze no, te aye na te emọ ene riẹ a tẹ họ-ame.

Evaọ obọ urere ukpe 1923, Uwou-Eroro Akpegbivẹ 15, 1923 o ta ẹme te epanọ Emọ-Uwuhrẹ Ebaibol na a je ro ru eware oghẹrẹ ovona evaọ ukpe yena. O ta nọ: “Who te rri eklase [hayo ikoko] na kpobi . . . whọ rẹ ruẹ nọ inievo na a bi kru oma ga evaọ iruo Ọghẹnẹ. . . . Joma mu eku mai ga re ma rọ ajọwha ta usi uwoma na evaọ ukpe notha. Joma rọ evawere ru iruo na.”

Ukpe nọ u lele i rie, Emọ-Uwuhrẹ Ebaibol na a ru obọdẹ oware jọ. A dẹ otọ jọ no vẹre evaọ oria nọ a re se Staten Island. Yọ u te emerae buobu no nọ inievo nọ e jọ obọ Ebẹtẹle a be rọ jariẹ ru iruo ebabọ. Etẹe na ọ kẹle oria nọ ehri ukoko ọ jọ evaọ Brooklyn. Obọ emuhọ ukpe 1924 a rọ bọ iwou nọ a gwọlọ bọ fihọ etẹe na kpobi no. Yọ iruo nọ a jọ etẹe ru uwhremu na o lẹliẹ usi uwoma na te eria buobu, inievo na a tẹ jẹ kẹle ohwohwo.