Ԝе сале, сәва кӧ йәктийа нав Лекʹолинкʹаред Кʹьтеба Пироз дьһа ԛәԝи бә, тʹәшкиләте һьнә тьшт гӧһаст. Бьрща Ԛәрәԝьлийеда әв рʹезед Кʹьтеба Пироз дьһатьнә шьровәкьрьне, йед кӧ һәр һʹәфте сәр щьвина «Щьватед Дӧа у Пәсьндайине» дьһатьнә лекʹолинкьрьне. Ӧса жи, Лекʹолинкʹаред Кʹьтеба Пироз салнәʹмә нәшьр дькьрьн, кʹижанеда әв рʹез дьһатә лекьрьне, йа кӧ һәр һʹәфте сәр щьвине дәрбаз дьбу. Һьм жи кʹьламед бона лекʹолина шәхси, йан жи бона ԛӧльхкьрьна тʹәви малбәте нәшьр дькьрьн.

Сәр щьвата, Лекʹолинкʹаред Кʹьтеба Пироз дәрһәԛа ԛәԝьмандьнед хьзмәтийеда гьли дькьрьн, дьготьн кӧ чьрʹа әԝана жь Йаһоԝа рʹази нә, кʹьлам дьстьран у һәла һе дӧа жи дькьрьн. Хушка мә Ева Барней, йа кӧ сала 1923, 15 салийа хԝәда һатә ньхӧмандьне, ӧса гот: «Һәрге кәсәки бьхԝәста шәʹдәтийе бьда, әԝ гәрәке рʹабуйа сәр пʹийа у тьштәки ӧса бьгота: ‹Шькьр жь Хӧданрʹа жь бо һʹәму тьштед ԛәнщ, кӧ әԝи бона мьн кьрийә›». Һьнәка әв йәк пʹьрʹ һʹәз дькьр. Хушка Барней ӧса дьбежә: «Бьраки мәйи кал бь наве Годԝин, бона гәләк тьшта шькьри дьда Хӧдан. Ле гава жьна ԝи дьдит кӧ бәрпьрсийаре щьвине жь бо хәбәрдана ԝийә дьреж әʹщьз дьбә, әԝе һедика кʹьнще мере хԝә кʹаш дькьр, у әԝ дәрберʹа рʹудьньшт».

Мәһе щарәке, һәр щьватәк бәрнамәкә мәхсус бона «Щьватед Дӧа у Пәсьндайине» һазьр дькьрьн. Дәрһәԛа ве щьвине, Бьрща Ԛәрәԝьлийеда йа 1 Нисане сала 1923, ӧса те готьне: «Гәрәке ниве щьвине дәрбаз бә бона хәбәрдана дәрһәԛа хьзмәтийе у һеланкьрьна хушк-бьра. . . . Әм баԝәр ьн, кӧ әв щьвинед хԝәш ԝе һәвала дьһа незики һәв кьн».

Чарлз Мартин, мьзгинванәки 19 сали жь Канадайе (Вәнкувәр), жь ван щьвина кʹарәкә мәзьн дьстанд. Әԝи гот: «Ԝедәре, әз һин бум кӧ чаԝа хьзмәтийеда хәбәр дьм. Гәләк щар, кәсәки дәрһәԛа сәрһатикә жь хьзмәтийа мал бь мал гьли дькьр. Ве йәке фькьр дьда мьн, кӧ әз чь бежьм у чаԝа щаба мәрьвед нәԛайил бьдьм».

«Рʹожед хьзмәтийе» жи али дькьрьн йәктийе хԝәй кьн. Журнала Бьрща  Ԛәрәԝьлийеда, йа 1 Нисане, сала 1923, ӧса дьһатә готьне: «Шьхӧле мә нав мәда йәктийе пешда тинә. . . . Рʹожа Сешәме, 1 Гӧлане, сала 1923, һатийә кʹьфшкьрьне ча рʹожа бона хьзмәтийе. Паши ве йәке, һәр мәһ, рʹожа Сешәма пешьн, рʹожа хьзмәтийе йә. . . . Әндәмед жь һʹәму щьвата гәрәке хьзмәтийеда кʹар бькьн».

Һәла һе кәсед щаһьл жи ве йәкеда кʹар дькьрьн. Хушка Һазел Барфорд, йа кӧ ԝи чахи 16 сали бу, гот: «Бәрнаме бона хьзмәтийеда, щурʹед бәлакьрьна мьзгинийе һәбун, йед кӧ али мә дькьрьн хьзмәт кьн. a Әз у кальке мьн, мә бь дьл у щан ве йәкеда кʹар дькьр». Ле хушка Һазел жь бо готьн у фькьред бьраки, әʹщебмайи ма. Әԝе гот: «Бьраки дәлал, йе кӧ әʹмьрда мәзьн бу, ԛайил нибу, ԝәки әз шәʹдәтийе бьдьмә кәсед дьн. Ԝи чахи, һьнәка фәʹм нәдькьр кӧ һʹәму Лекʹолинкʹаред Кʹьтеба Пироз, һәла һе ‹хортед мерхас у кәчʹьк› жи, гәрәке пәсьне Әʹфьрандаре Һьмзор бьдьн» (Зәбур 148:12, 13). Ле хушка Һазел бәрдәԝам дькьр хьзмәт кә. Паше әԝ чу кʹома дӧда йа Мәкʹтәба Гиләде у Панамайеда ча мисйонер хьзмәт дькьр. Ԝәхт шунда, ԝан бьра фәʹм кьр, ԝәки кәсед щаһьл жи дькарьн хьзмәт кьн.

Щьватед мәзьн жи йәктийе пешда тиньн. Ԝи чахи, ԝәʹде гәләк щьватед мәзьн рʹожед хьзмәтийе кʹьфш дькьрьн, мәсәлә ль Винипеге (Канада). Һʹәму мәрьвед сәр ԝе щьвата мәзьн, һатьнә тʹәглифкьрьне, ԝәки 31 Адаре ви бажарида хьзмәт кьн. Гәләк мәрьв ве йәкеда кʹар кьрьн у бь сайа ве йәке, гәләк ԛәԝьмандьнед баш һәбун. Ԝәкә 7 000 мәрьв, 5 Тʹәбахе чунә сәр щьвата мәзьн ль Винипеге. Пешийа ве йәке, Канадайеда сәр щьвата мәзьн һаԛас мәрьв ԛә тʹоп нәбьбун.

Щьвата мәзьнә мәхсус йа сала 1923, жь 18 һʹәта 26 Тʹәбахе, Лос Анщелеседа дәрбаз бу (Калифорнйа). Чәнд һʹәфте пешийа ве щьвата мәзьн, дәрһәԛа ве  щьвине рʹожнәʹмада һатә әʹламкьрьне, у Лекʹолинкʹаред Кʹьтеба Пироз зедәтьри 500 000 бәлавок данә мәрьва. Ӧса жи әв әʹламәти трен у әʹрәбава дьзәльԛандьн.

Рʹожа Шәмийе, 25 Тʹәбахе, Рутерфорд бьра пе готара бь наве «Пәз у Бьзьн» дәркʹәт. Әԝи шьровәкьр, кӧ «пәз» тенә һʹәсабе кәсед кӧ нета ԝан рʹаст ә у дьхԝазьн щьнәтеда бьжин. Ӧса жи, әԝи готара бь наве «Һаш жь Хԝә Һәбьн» хԝәнд, Мәсиһийе ве дьне сущдар кьр у кәсед дьлсах һелан кьр, ԝәки жь «Бабилона Мәзьн» дәркʹәвьн (Әʹйанти 18:2, 4). Паше, Лекʹолинкʹаред Кʹьтеба Пироз бь милйона копийед ве готаре сәр тʹәмамийа дьне бәла кьрьн.

Рʹожа пашийе, йа ве щьвата мәзьн, зедәтьри 30 000 мәрьв, гӧһ данә готара Рутерфорд бьра, бь наве «Һʹәму Мьләт Дьчьн Бәрбь Һармәгәдоне, ле бь Милйона Кәсед кӧ Ньһа Дьжин ԝе Тʹӧ Щара Нәмьрьн». Лекʹолинкʹаред Кʹьтеба Пироз бона ве щьвата мәзьн һивийа гәләк мәрьва бун. Ләма жи, ԝана стадиона тʹәзә бь наве Коләзйум, Лос Анщелеседа кʹьре гьртьн. Сәва кӧ һәр кәс бәрнаме баш бьбьһиста, ԝана система дәнг йа стадйоне данә хәбате. Бона ԝи чахи, әв йәк техноложийәкә тʹәзә бу. Гәләк кәсед дьн жи бь сайа радиойе әв тʹема бьһистьн.

Сала 1923-да, шьхӧле бәлакьрьна мьзгине Африкайеда, Әԝропайе, Һьндьстане у Америка Башурда бәла бу. Һьндьстанеда, бьре мә А. Щ. Щозеф зәԝьщи бу у баве шәш зарʹа бу. Ле диса жи, әԝи һьм малбәта хԝә дьбу хԝәйи, һьм жи нәшьркьрьна әʹдәбйәтада кʹар дькьр сәр зьмане Һьнди, Тамили, Тәлуги у Урду.

Сиерра-Леонеда, Лекʹолинкʹаред Кʹьтеба Пироз Алфред Щозеф у Леонард Блакмен, бь сайа нәʹме аликʹари жь офиса сәрәкә хԝәстьн, демәк жь Бруклине (Нийу Йорк). Сала 1923-да 14 Нисане, щаб ԝанарʹа һат. Алфред гот: «Рʹожа Шәмийе, шәв дәрәнг ньшкева тʹеле хьстьн». У бь дәнгәки бьльнд пьрсин: «Әԝ тә Щьвака Бьрща Ԛәрәԝьлийерʹа нәʹмә ньвиси?» Алфред гот: «Әре». Паше бьре Ԝиллиам Р. Браун гот: «Әзе али ԝә бькьм». Ԝе рʹоже, әԝ, жьна ԝи у ԛизед ԝан Луиз у Луси, жь Карибе һатьнә ԝедәре. Паши дәмәкә кьн, хушк у бьра тʹәви ԝан бунә нас.

 Паше Алфред гот: «Сьбәтьре, мьн у Леонард мә Кʹьтеба Пироз лекʹолин дькьр, чаԝа мә һәр һʹәфте дькьр, у ньшкева мә мерәки бьльнд бәр дери дит. Әԝ бьре мә Ԝиллиам Браун бу. Әԝ рʹастийеда йәки һаԛас хирәт бу, кӧ дьхԝәст рʹожа дьн пе готарәке дәре». Ԝәкә нава мәһәкеда, бьре Ԝиллиам һʹәму әʹдәбйәтед кӧ тʹәви хԝә анибу, бәла кьр. Һьнә ԝәхт шунда әԝи зедәтьри 5 000 кʹьтеб станд, у һәла һе дьһа зедә жерʹа лазьм бу. Ле тʹәмамийа әʹмьре хԝә, Ԝиллиам бьра нә кӧ ча кәсе кӧ кʹьтеба дьфьрошә дьһатә наскьрьне, ле ча хьзмәткʹаре Йаһоԝайә хирәт. Готаред хԝәда, әԝи һәртʹьм дина мәрьва дькʹьшандә сәр Ньвисаред Пироз. Ләма жи, мәрьва әԝ ча Брауне Кʹьтеба Пироз нав дькьр.

Ԝи чахи, филиала Бармене (Алманйа) ида тʹьжә бьбу. Ӧса жи, әскәред Франсайе дьхԝәстьн ви бажари зәфт кьн. Лекʹолинкʹаред Кʹьтеба Пироз бона нәшьркьрьна әʹдәбйәта, Магдәбургеда авайики лайиԛ дитьн. У 19 Һʹәзиране, мәкʹинәйед бона нәшьркьрьне у тьштед дьн, сәва баркьрьне һазьр бун кӧ дәрбази Бәйтʹәла Магдәбурге кьн. Офиса сәрәкә пеһʹәсийа кӧ шьхӧле баркьрьне хьлаз буйә. Рʹожәк шунда, рʹожнәʹмада әʹлам кьрьн, кӧ Франсайе бажаре Бармене зәфт кьрийә. Бьра дитьн кӧ Йаһоԝа тʹәви ԝан ә у ԝана дьпʹарезә.

Бразилйайеда, Щорщ Йанг, йе кӧ бона бәлакьрьна мьзгинийе дьчу щийед дур, филиаләкә тʹәзә саз кьр у дәстпекьр Бьрща Ԛәрәԝьлийе сәр зьмане Португали нәшьр кә. Нава чәнд мәһада, әԝи зедәтьри 7 000 әʹдәбйәт бәла кьр. Чахе әԝ һатә Бразилйайе, мәщаләкә баш Сара Фергӧсонерʹа вәбу. Әԝе жь сала 1899, Бьрща Ԛәрәԝьлийе дьхԝәнд у әʹмьре хԝә тʹәсмили Йаһоԝа кьрьбу, ле һе нәһатьбу ньхӧмандьне. Паши чәнд мәһа, әԝ у һәр чар зарʹед ԝе һатьнә ньхӧмандьне.

Хьлазийа сале, Бьрща Ԛәрәԝьлийеда йа 15 Кануна Пешьн, сала 1923, дьһатә готьне дәрһәԛа йәктийа һʹәбандьна Лекʹолинкʹаред Кʹьтеба Пироз: «Дьһатә кʹьфше, ԝәки щьватед мә . . . рʹӧһʹанда ԛәԝи нә. . . . Ԝәрә әм бона шьхӧле дьһа мәзьн һазьр бьн у салкә дьн, бь хирәт у бь шабуне Хԝәдерʹа хьзмәт кьн».

Сала 1924 жи, тьштед һʹәԝас һивийа Лекʹолинкʹаред Кʹьтеба Пироз бун. Бруклинеда незики офиса сәрәкә, бьред жь Бәйтʹәле гәләк мәһа ль Стеитед Аиленде, авакьрьнеда кʹар дькьрьн. Дәстпека сала 1924-да, авакьрьна ван авайа хьлаз бу. Әв проект йәктийа бьратийа мә ԛәԝи кьр у бь сайа ве йәке, мьзгини дьһа баш һатә бәлакьрьне.