Momvhura zoozo, mbunga zaJehova kwa tulisire po malitjindjo aga ga vaterere Valirongi woBibeli yipo va tulise po uumwe mokatji kawo. The Watch Tower yipo za tamekere kupwagesa magano aga ga faturura matjangwa aga ngava zogere mepongo lyankenye sivike lyokukanderera nokuhamberera Jehova. Mokugwederera ko, Valirongi woBibeli kwa pwagesere kalindeli omu mwa kere matjangwa gankenye sivike ntani norusumo oru ngava dimbi pelirongo lyanyamwawo lyoBibeli ntani poukareli wepata.

Valirongi woBibeli ngava uyunga momapongo gawo kuhamena yininke eyi ngava limonene moyirugana yokuzuvhisa ntani ngava uyunga rupandu oru va kere naro kwaJehova ntani awo hena ngava dimbi rusumo nokukanderera. Eva Barney ogu ga gwene ekuho mo-1923 apa ga kere nonomvhura 15 kwa uyunga asi: “Apa muntu ga here kuuyunga kuhamena yilimonena yendi, age ga hepere kukatuka nokuuyunga asi, ‘Tani pandura Hompa koyininke nayinye yoyiwa eyi ga ruganena nge.’” Vanavazinyetu vamwe kwa here kuuyunga yilimonena yawo. Munazinyetu gomukadi Barney kwa twikira ko asi: “Munazinyetu gomugara gomukurupe kwa kere noyininke yoyinzi eyi ga hepere kupandwira Hompa. Nye mukadendi apa ga dimbwilire asi munazinyetu ogu ga pitisilire kwa tamekere kukara nowoma, makura age nga koko nakauke kondjakete zamugara gwendi, makura age nga hageke kuuyunga nokuhingira.”

Rumwe mokwedi, nkenye mbungakriste ngazi kara nepongo lyokukanderera noyilimonena nokuhamberera Jehova. Ruhungu romo-1 Kudumogona 1923 kwa tente asi: “Harufa zepongo va hepa kuziruganesa yipo vapurakeni va uyunge yilimonena yawo nokukorangeda vazuvhisi. . . . Twasihuguvara asi epongo eli lyokukorangeda ngali vatera vakaume valihedere unene pepi.”

Charles Martin muzuvhisi gonomvhura 19 gomoVancouver moCanada, kwa gwanenene mo mauwa gomanzi mepongo eli. Konyima age kwa ya tente asi: “Mepongo eli yimo na lirongerere sikando sange sokuhova kuzuvhisa tunda embo zende embo. Yikando yoyinzi, muzuvhisi nga uyunga yilimonena yokuzuvhisa tunda embo zende embo. Eyi kwa pere nge magano kuhamena eyi nani uyunga ntani nomu nani limburura ava ngava hetekere ko kuhagekesa nge kuzuvhisa.”

Mazuva aga ngava zuvhisa vanavazinyetu kwa va vaterere va kare mouumwe. Ruhungu romo-1 Kudumogona 1923 kwa divisire asi: “Mokuninka asi natuvenye  tu ruganene kumwe mosirugana simwe . . . , Uvali 1 Kudumonkuru 1923, ta tu litura li kare ezuva lyokuzuvhisa. Kutunda nye opo, nkenye Uvali wokuhova wankenye kwedi ngali kara ezuva lyokuzuvhisa . . . Nkenye gumwe gomombungakriste ga hepere kulihameka mo mokuzuvhisa.”

Nampili Valirongi woBibeli wovadinkantu nawo ngava lihameke mo mosirugana esi. Hazel Burford ogu ga kere nonomvhura 19 posiruwo sina, kwa tente asi: “Mosifo Bulletin kwa kere mo magano aga twa kwete momutwe gokuhamena omu no zuvhisa. a Name nomama wovagara ngatu rugana unene moyirugana nayinye eyi.” Nye nampili ngoso, munazinyetu gomukadi Burford kwa tetukire monkedi omu munazinyetu gumwe gomugara ga lizuvhire kuhamena eyi a zuvhisa. Burford kwa tente asi: “Munazinyetu gomugara gomukurupe kwa lizuvhire asi na hepa kuhageka kuuyunga novantu. Posiruwo sina, vamwe kapi va yi kwete egano asi Valirongi woBibeli navenye kukwatera mo “vamati novakadona,” va hepa kulihameka mo mokuhamberera Musiti gwetu.” (Epis. 148:​12, 13) Nye munazinyetu Burford kwa twikilire kuzuvhisa. Konyima, age kwa zire koSikora zauvali zaGiliyata ntani kwa ka kere mutumwa moPanama. Mwaza siruwo, vanavazinyetu wovagara owo kwa tjindjire mutaro gwawo kuhamena vadinkantu ava ngava zuvhisa.

Yigongi kwa vaterere hena vanavazinyetu yipo va kare mouumwe. Sinzi soyigongi eyi kwa kere mo mazuva aga ngava zuvhisa. Pasihonena sigongi esi sa karerere moWinnipeg, moCanada, navenye ava va kere posigongi oso kwa va zigidire va ka zuvhisire mositata oso mo-31 Nsinano. Vantu wovanzi kwa va zigidire pezuvhiso eli lyokulikarera ntani kwa retere yitundwamo yoyiwa. Mo-5 Siwogedi, vantu wokusika koyiha yo-7 000, kwa kere posigongi simwe esi sa kere moWinnipeg. Posiruwo sina, esi kwa kere sivaro sosinene po unene sovantu ava va kere posigongi moCanada.

Sigongi somulyo unene esi va kere naso vantu vaJehova kwa kere mo-1923. Aso kwa kere mo-18-26 Siwogedi, moLos Angeles, California. Yivike eyi ya twaredesere kosigongi, monosaitunga kwa kere mo madiviso gosilika esi ntani Valirongi woBibeli kwa hanesere yimbapira yezigido kosigongi  yokupitakana po-500 000. Makehe aga va tjenge nonkango dokuzigida vantu kosigongi kwa ga tulire komatuwa.

Mo-25 Siwogedi, moMapeu, munazinyetu Rutherford kwa geve siuyungwa sosiparatjangwa asi “Nonzwi ntani Yikombo,” omu ga fatwilire “nonzwi” asi awo kuna kara vantu ava gwa tumbukira mwenyo gwanarunye ava ngava ka paruka moparadisa pevhu. Age hena kwa geve siuyungwa omu ga resere nonkango edi asi “Erondoro.” Nonkango odo kwa nyokerere po maukarelikarunga goyimpempa ntani kwa tumangedere vantu wonomutjima donongwa va tunde mo ‘moBabironi zonene.’ (Ehor. 18:​2, 4) Konyima, Valirongi navenye woBibeli woupampi kwa gaverere yitratate omu mwa kere nonkango odo.

Mezuva lyokuhulilira lyosigongi, vakalimo wokupitakana po-30 000 kwa purakenene munazinyetu Rutherford ngomu ga geve siuyungwa sosiparatjangwa “All Nations Marching to Armageddon, but Millions Now Living Will Never Die.” Valirongi woBibeli kwa hilire sira sosipe somaudano somoLos Angeles, morwa awo kwa gazarere asi vantu wovanzi ngava wiza kosigongi oso. Vanavazinyetu kwa ruganesere mambako gokuzuvhika nawa gomosira somaudano esi va hilire, yipo nkenye gumwe aya lizuvhire ko nawa sigongi. Mambako aga kwa kere sikwakonentu sosipe posiruwo sina. Sinzi sovantu kwa purakenene kelikwamo olyo kupitira koradiyo.

Mo-1923, vanavazinyetu kwa dimbwilire asi sirugana sokuzuvhisa sina ligwederere moAfrika, Europa, India, ntani moSouth America. Apa munazinyetu A. J. Joseph ga kere moIndia noku pakera mbili mukadendi ntani novana vendi ntazimwe, age nga vatere mokunduruka yimbapiratjangwa yomoRuhindi, Tamil, Telugu, ntani yomoRuurdu.

Alfred Joseph ntani naLeonard Blackman ava va kere Valirongi woBibeli womoSierra Leone, kwa pulire ehundiro koMberewa zonene zoNombangi daJehova zomoBrooklyn, New York. Mo-14 Kudumogona 1923, yipo va gwene elimbururo lyawo. Alfred kwa uyunga asi: “Esiku limwe moMapeu, kwa belelenge na hana kuyindindira.” Age kwa zuvhire ezwi lyenene lina kuuyunga asi: “Nyove ko tjangerere koMberewa zonene zoNombangi daJehova o pure evatero lyovazuvhisi ndi?” Alfred yipo ga limbwilire asi, “Nhi.” Makura William R Brown yipo ga limbwilire asi: “Nyame vana kutuma.” Age kwa sikire lyoolyo ezuva namukadendi Antonia va tunde koCaribbean kumwe novana vawo wovakadona wovanona, Louise naLucy. Vanavazinyetu kwa ndindilire nononkondo mokutambura munazinyetu Brown kumwe nepata lyendi.

Alfred kwa twikira kuuyunga asi: “Ngurangura ezi  za kweme ko, name naLeonard kwa zogerere kumwe kuhamena Bibeli ngomu twa hwa kuyirugana nkenye sivike. Hararasi tupu, makura yipo twa mwene mugara gomutundusika mevero. Age kwa kere munazinyetu Brown. Age kwa kere munazinyetu goupampi ntani kwa here kugava siuyungwa sanavenye sokulikarera ezuva eli lyakweme ko.” Munazinyetu Brown kwa gaverere yimbapiratjangwa nayinye eyi ga wizire nayo moyivike yongandi komeho tupu kupwe kwedi. Konyima zosiruwo age kwa gwene ko hena nobuke dokusika po-5 000. Nye munazinyetu Brown kapi ga divikwire asi age murandesi gonobuke. Siruwo nasinye esi ga kere mukareli gwaJehova goupampi, age nga ruganesa Matjangwa moyiuyungwa yendi ano eyi kwa ninkisire vantu va mu tumbure asi Bible Brown.

Vanavazinyetu kwa tokwere kudiruka mo moBeteli zomoBarmen moGermany morwa azo kwa kere nunu. Ntani awo kwa zuvhire asi vakwayita vaFrance kwa kere pepi nokuyahomona sitata oso. Valirongi woBibeli kwa gwene etungo moMagdeburg omu va ndurukilire yimbapiratjangwa. Mo-19 Pembagona, vanavazinyetu kwa mene kurongera yiruganeso yokundurukisa noyiruganeso yimwe ntani awo kwa dirukilire moBeteli zompe moMagdeburg. Konyima zapa tupu Mberewa zonene va zi divisire asi vana mana kudiruka, saitunga yipo za divisire asi sirongo saFrance sa homokere sitata saBarmen. Vanavazinyetu kwa pandwire Jehova kweyi ga va poperere nokuvavatera.

Munazinyetu George Young gomoBrazil, ogu nga gendi unene koyirongo a zuvhise mbudi zongwa, kwa tulisire po Beteli zompe nokutameka kupwagesa Ruhungu moRuputu. Konyima tupu zomakwedi gomasesu, age kwa hanesere yimbapiratjangwa yokupitakana po-7 000. Sara Ferguson kwa hefe unene apa George Young ga ka dingwire epata lyawo. Age nga resa maRuhungu kutundilira mo-1899, nye kapi ga li geve kwaJehova a gwane ekuho. Konyima zomakwedi gomasesu, munazinyetu Ferguson novana vendi vane kwa gwene ekuho.

Kehagero lyomvhura, Ruhungu romo-15 Sindimba 1923 kwa fatwilire omu malitjindjo gokuhamena mapongo nosirugana sokuzuvhisa noyigongi ya kundamene Valirongi woBibeli. Aro kwa tente asi: “Ayo kuyimonena nawa-nawa asi nombungakriste dina kara mouumwe. Tuliwapaikireni yirugana yoyinzi ntani nokutwikira kukarera Karunga noupampi ntani noruhafo momvhura 1924.”

1924 kwa kere mvhura zoruhafo koValirongi woBibeli. Vanavazinyetu wokoBeteli ngava ruganene pevango limwe lyoposirudi saStaten ure womakwedi, aso kwa kere pepi nomberewa zonene zoNombangi daJehova moBrooklyn. Matungo aga va tungire pevango olyo kwa pwire kugadika ketamekero lyo-1924 ntani ago kwa vaterere vanavazinyetu va kare mouumwe ntani kwahanesere mbudi zongwa mononkedi edi va dira kuyirugana rumwe.