Muchina chaaka kuloñesha kwahimpiliku yuma yimu yakwashili Atudizi aBayibolu kutachika kudifukula mukunuñañana. MuKaposhi Kakutalila atachikili kwidishamu nsañu yalumbulwileña nsona yahanjekeleñawu munowu mulungu wunapompiwu naKulomba, Kushimeka niKushimuna Yuma Yamwekana muMudimu waKushimwina. Kubombelahu, Atudizi aBayibolu edishili kalenda yamwekesheleña nsona yakuhanjekahu munowu mulungu hakupompa nikamina katela kwimbayi muntu hakudiza nkawindi nihakudifukula kwachisaka.

Neyi anakupompa, Atudizi aBayibolu ashimwineña yuma yamwekana mumudimu wakushimwina, kushimuna yuma yinaleteshi amusakilileña Yehova, kwimba kamina, hela nikulomba. Muhela Eva Barney, wapapatisheweli mu 1923 hadiñayi nayaaka 15, wanukili nindi: “Neyi wunakukeña kushimuna yuma yamwekana mumudimu wakushimwina, wukwimana nakutachika kuhosha neyi, ‘Inakukeña kumusakilila Mwanta hayuma yejima yayiwahi yinañililiyi.’” Amanakwetu amakwawu atiyileña kuwaha kushimuna yuma yamwekeneña mumudimu wakushimwina. Muhela Barney watwalekelihu nindi: “Manakwetu Godwin wakula dehi wadiña nayuma yayivulu yakumusakililahu Mwanta. Ilaña neyi ñodindi amona nindi manakwetu wunakulombola natachiki kwakama, wamukwatileña chantesha nfumwindi kukahuma nawa walekeleña kuhosha, kuhiñahu ashakama.”

Kamu mukakweji, chipompelu-hichipompelu chapompeleña hamu nakulomba Kulomba kwadimena, Kushimeka niKushimuna Yuma Yamwekana muMudimu waKushimwina. Kaposhi Kakutalila kaApril 1, 1923, kalumbulwili iku kupompa nawu: “Chikunku chaniku kupompa chadiña chakushimuna yuma yamwekeneña mumudimu wakushimwina nikukolesha akanyidimu. . . . Tunakuhweleli netu iku kunuñañana kwayiletesheli awa amabwambu jetu kudikunda chikupu.”

Iku kupompa kwamukwashili nankashi manakwetu Charles Martin, mukakushimwina wadiña nayaaka 19 wakuVancouver, Canada. Nkumininaku, wanukili nindi: “Kuniku kupompa dikunadizilili katachi chakushimwina kwitala nikwitala. Kakavulu hikwabulileñahu muntu wukushimuna yuma yamwekana mumudimu wakushimwina kwitala nikwitalaku. Chumichi chankwashili kwiluka chakuhosha nichakwila nekañesha didi dejima.”

Kwikala ‘namafuku akuya nakushimwina hamu’ nikwena kwayinuñañesheli amanakwetu chikupu.  Kaposhi Kakutalila kaApril 1, 1923, kabidikili nawu: “Hakwila wejima wetu twiikali anuñañana nakuzatila hamu . . . , ifuku daHachiyedi, May 1, 1923, anaditondi nawu wejima wetu twakazatili hamu mumudimu wakushimwina. Dichitukwilaña mpinji yejima Hachiyedi yakutachikilahu mukakweji-hikakweji . . . Antu ejima muchipompelu-hichipompelu atela kubulakana nakuya nakushimwina.”

Kadizi waBayibolu wejima wakansi wazatileñaku muniwu mudimu. Muhela Hazel Burford, wadiña nayaaka 16 hayina mpinji, wanukili nindi: “Tilakiti yateneneñawu nawu Bulletin asonekelimu njila yachakuhanjeka nawantu yitwatela kwanukaña hakushimwina. a Kuzatila hamu nawankaaka awamayala, nazatili chikupu muniyi nyidimu yejima.” Hela chochu, Muhela Burford atachikili kumudimbulula kudi manakwetu wumu. Wahosheli nindi: “Manakwetu wumu wakula dehi wankañesheleña nankashi kuhosha nawantu. Hayina mpinji, antu amakwawu atiyishishili wanyi neyi chakwila Atudizi aBayibolu ejima, kushilahu ‘atwansi awamayala niawambanda,’ atela kumushimeka Nleñi yetu Wabadika.” (Mas. 148:​12, 13) Ilaña Muhela Burford watwalekelihu kushimwina. Wayili kuShikola yaGiliyadi yamuchiyedi nawa amutemesheli kuya nakuzatila wumishonali kuPanama. Mukuhita kwampinji, ana amanakwetu ahimpili yitoñojoka yawu kutalisha hachayimweneñawu atwansi kuya nakushimwina.

Kupompa kwamaneni nikwena kwayinuñañesheli amanakwetu chikupu. Iku kupompa kwakuvulu kwahosheleña hamafuku akuya nakushimwina, chidi neyi kupompa kwadiñaku muWinnipeg, Canada. Ejima apompeli haniku kupompa kweneni ayilejeli kuzataku kampeni yakushimwina mumusumba, ha 31 March. Antu amavulu ayishimwinini munawa mafuku akushimwina kwadimena nawa mwafumini yuma yayiwahi. HaAugust 5, antu akushika kwakwihi na 7,000 enjili kukupompa kweneni kukwawu muWinnipeg. Hayina mpinji, aka dikadiña katachi kwikala nanaambala yeneni yawantu apompeli hakupompa kweneni muCanada.

Kupompa kweneni kwadimena kwapompeliwu antu jaYehova mu 1923 kwadiña haAugust 18-26, muLos Angeles, California. Munyilungu yantesha yashaliliku henohu iku kupompa kanda, apulintili yipapilu yansañu yatiyakesheleña iku kupompa nawa  Atudizi aBayibolu ahanini yipapilu yakutambika nachu antu yakubadika ha 500,000. Alamikili yipapilu yakutiyakesha kupompa hanyotoka mwakandamaña antu amavulu nihanyotoka yikwawu.

Hamposu, haAugust 25, Manakwetu Rutherford wahanini mpanji yahosheleña nawu “Anyikoku niAmpembi,” mwalumbulwiliyi chiwahi nindi “anyikoku” hiyantu adi nanyichima yashinshika akashakama muparadisa hamaseki. Wahosheli cheñi hamutu wahosheleña nawu “Kusoñamisha.” Iwu mutu wamufwishileña Kristendomu nanyiloña nawa wakonkomweneni antu akweti nyichima yashinshika kudaambula kudi “Babiloni Muneni.” (Chim. 18:​2, 4) Mukuhita kwampinji, Atudizi aBayibolu adikita mwahita kaayi kejima azatilili hamu nakuhana matilakiti amavulu nankashi adiña naniwu mutu.

Ifuku dakukumishaku iku kupompa, antu akubadika ha 30,000 atiyilili kumpanji yawantu amavulu yahaniniyi Manakwetu Rutherford, yadiña namutu nawu “Nyuza Yejima Yinakuya kuAmagedoni, Ilaña Antu Amavulu Nankashi Adiku Makonu Hiyakafwaku (All Nations Marching to Armageddon, but Millions Now Living Will Never Die).” Chamweniwu nawu antu akenza akavula, Atudizi aBayibolu afuukwilihu kusonkela ibulu dangunja dafuminiwu tuhu nakutuña daLos Angeles Coliseum. Hakwila akwashi antu ejima kutiyilila kuniyi progiramu, amanakwetu azatishili yozelu yavuma chikupu yadiña mwibulu dangunja, yazatishileñawu nankashi hayina mpinji. Antu amavulu atiyilili kuniyi progiramu hachisanji.

Muchaaka cha 1923, mudimu wakushimwina wataandili chikupu muAfrica, Europe, India nimuSouth America. MuIndia, manakwetu A. J. Joseph hampinji yakameneneñayi ñodindi nianyanindi 6, wakwashañeniku mumudimu wakwidisha nyikanda muHindi, Tamil, Telugu niUrdu.

MuSierra Leone, Atudizi aBayibolu aAlfred Joseph naLeonard Blackman asonekeleli kasanji keneni mukaayi muBrooklyn, New York, nakulomba nawu ayikwashi. Ayakwili haApril 14, 1923. Manakwetu Alfred wahosheli nindi, “Hamposu yimu nawufuku antemesheleli foni yinabulili kukuhwelela.” Watiyili muntu wamwihwileña nezu datiyakana nindi, “Yeyi wasonekeleli aWatch Tower Society nakulomba akakushimwina?” Manakwetu Alfred waakwili nindi, “Yami mwani.” Manakwetu William R. Brown wahosheli nindi: “Anatemeshi ami.” Enjili hadodina ifuku kufuma kuCaribbean, yena niñodindi Antonia, kushilahu nianyanawu anyanya ayedi awambanda, aLouise naLucy. Amanakwetu ashikeneni dakuya nakudimona nawu.

Manakwetu Alfred watwalekelihu kuhosha nindi: “Ifuku dalondelelihu nantetemena, ami naLeonard  twadiña nakudiza Bayibolu neyi chitwelileña diikalu mulungu-himulungu. Hohenohu twamweni iyala wataluka nemani kuchiisu. Wadiña Manakwetu Brown. Wakeñeli chalala chikupu chakwila wakeñeleña kuhana mpanji yawantu amavulu hefuku dalondelelihu.” Kakweji kamanini wanyi, Manakwetu Brown wahanini mumudimu wakushimwina nyikanda yejima yenjiliyi nayu. Mukuhita kwampinji, watambwilili nyikanda yikwawu 5,000 nawa hashimbwili wanyi kwakeñekeleña nyikanda yikwawu. Ilaña Manakwetu Brown halandishileña nyikandaku. Mumudimu windi wejima wamukalakeleleñayi Yehova neyena, mpinji yejima mpanji jindi jashindameneneña haNsona, nawa muloña wachumichi antu atachikili kumutena nawu Bible Brown.

Haniyi mpinji, kasanji kamutayi kadiña muBarmen, Germany, kakeheli muloña antu aswejeli kuvula, nawa atiyili nawu amashidika awaFrance katataka alukuki ona musumba. Atudizi aBayibolu awanini itala dakuzatilamu muMagdeburg damwekeni neyi dadiwahi kuzatilamu mudimu wawu wakupulinta. HaJune 19, Amanakwetu amanishili kuloñejeka yozelu yejima yakupulinta nachu niyuma yikwawu yakuzatisha nawa abuukilili kuBeteli yayiha muMagdeburg. Hadodina ifuku delili kasanji keneni mukaayi kejima kashimuni nawu kasanji anakibuukishi dehi, kwedikili yipapilu yansañu yashimwini nawu ituña daFrance dinatambuli musumba waBarmen. Amanakwetu amweni kuna kubuuka nawu hiwunsahu wamwekesheli nawu Yehova wayikiswilileña nawa wayikiñileña.

MuBrazil, Manakwetu George Young, wendeli matuña amavulu nakutaandisha nsañu yayiwahi, watuñili kasanji kakaha nawa watachikili kwidisha Kaposhi Kakutalila muchiPortuguese. Mutukweji twantesha hohu, wahanini nyikanda yakubadika ha 7,000 mumudimu wakushimwina. Kwinza kwindi muBrazil kwamuzañalesheli niMuhela Sarah Ferguson. Watañili Kaposhi Kakutalila kufuma mu 1899, ilaña hadihanini nakupapatishewaku. Chimwahitili tukweji twantesha, Muhela Ferguson hamu nawanyanindi awana apapatisheweli.

Kukumana kwachaaka, Kaposhi Kakutalila kaDecember 15, 1923 kalumbulwili chahimpikili ntanjikilu Yawatudizi aBayibolu yakupompa, kushimwina nikupompa kwamaneni. Kahosheli nawu: “Chinamwekani hatooka nawu yipompelu yinakupama kuspiritu. . . Tudiloñeshenu kuzata nyidimu yayivulu nikutwalekahu kumukalakela Yehova neyena ninamuzañalu.”

Chaaka cha 1924 nichena chadiña chaaka chakuzañalesha kudi Atudizi aBayibolu. Amanakwetu haBeteli azatilileña heluña dadiña haChituutu chaStaten hadi tukweji, iluña dadiña kwakwihi nakasanji keneni mukaayi muBrooklyn. Matala atuñililiwu hanidi iluña dadiha amanini kumatachikilu a 1924, nawa akwashili amanakwetu kunuñañana nikutaandisha nsañu yayiwahi kubadika chichadiña kunyima.