Itech nejon xiuit, inechikol Jehová kipatak seki taman tein kinpaleuij akin momachtiayaj Biblia maj okachi kuali kisenueyichiuakan. The Watch Tower peuak kimelaua texto tein momachtiayaj itech Reunión de Oración, Alabanza y Testimonio, tein mochiuaya sejse semana. Uan akin momachtiayaj Biblia kiamakixtiayaj se calendario kampa kipiaya se texto para se semana uan se nekuikatil para sejse tonal, tein ueliskia mokuikatiskej keman momachtiskiaj ininselti oso iniuan ininchankauan.

Itech nechikolmej, akin momachtiayaj Biblia kijtouayaj tein kinpanouaya keman tanojnotsayaj, kitasojkamatiliayaj Jehová, mokuikatiayaj se nekuikatil oso hasta motataujtiayaj. Eva Barney akin moauij itech xiuit 1923 keman kipiaya 15 xiujmej, kijtoj: “Komo aksa kinekia kijtos tein kipanoka, moketsaya uan peuaya kijtouaya ‘Nikneki niktasojkamatilis toTekotsin porin nechnextiliani ke semi nechtasojta...’”. Seki tokniuan semi kiuelitayaj kijtoskej tein kinpanoka. Tokniuj Barney kijtoj: “Toknitsin Godwin semi xiuejya katka uan nochipa kitasojkamatilijtoya toTekotsin. Sayoj ke keman isiuatsin kiitaya ke akin kiixyekanaya nechikol tasematia, kitilaniliaya isuéter tokniuj Godwin para maj motali”.

Sepa itech metsti, akin momachtiayaj (oso nechikol) kichiuayaj se Reunión de Oración, Alabanza y Testimonio tein semi kualtsin katka. The Watch Tower 1 de abril de 1923 kijtoj tein mochiuaya: “Tajko nechikol moneki ika motajtos tein sekin kinpanoua keman tanojnotsaj uan maj kinyolchikauakan tekitinij […]. Tiknemiliaj ke komo tinochin tikchiuaj nejin, okachi kuali timouikaskej”.

Nejin nechikolmej semi kipaleuij Charles Martin, se telpoch akin kipiaya 19 xiujmej uan tapaleuiaya maj kinmachtikan oksekin (oso tanojnotskej), yejua katka kayot Vancouver (Canadá). Charles kijtoj: “Ompa nimomachtij toni nikijtos keman titanojnotsayaj kajkalpan. Miakpa aksa kijtouaya tein kipanoka keman tanojnotsaya. Nejon nechpaleuiaya maj nikmati toni nikijtos uan keniuj nitanankilis keman amo kinekiaj nechkakiskej”.

“Keman tanojnotsayaj” no kinpaleuij tokniuan maj kuali mouikanij. The Watch Tower 1 de  abril de 1923 tanauatij: “Para maj tinochin tikchiuakan sayoj se tekit […], tonal martes 1 de mayo xiuit 1923 tinochin tisentanojnotsaskej. Ijkon mochiuas sejse metsti itech yekinika martes […]. Nochin akin pouij itech nechikol moneki tapaleuiskej maski tataman kemej kichiuaskej”.

Akin ayamo xiuejkej katkaj uan momachtiayaj Biblia, no tanojnotsayaj. Itech xiuit 1923, Hazel Burford, se tokniuj siuat akin kipiaya 16 xiujmej, kijtoj: “Amaix Bulletin kijtouaya tein ueliskia tikijtoskej keman peuaskia titanojnotsaskiaj uan monekia semi timomachtiskej para amo tikixtajtoltijtiaskej. a Nejua uan noueyitat techyolpaktiaya tikchiuaskej nejin tekit”. Sayoj ke Hazel kimojkaitak keman se tokniuj akin xiuejya peuak kiixnamiki, yejua kijtoua: “Se tokniuj akin xiuejya nechchikaujkailuij ke amo monekia maj nikinilui oksekin toni nikneltoka. Nejon xiujmej amo kiajsikamatiaj ke tinochin, ‘telpochmej uan ichpochmej’ monekia tikueyitaliskej toUeyi Tachijchiujkauj” (Sal. 148:​12, 13). Sayoj ke Hazel kisentokak tanojnotsak. Xiujmej satepan kiselij ojpatika Tamachtilis tein motemaka Galaad uan tapaleuij kemej misionera ompa Panamá. Satepan nejon tokniuan amo kinemiliayajok ke akin telpochmej amo monekia tanojnotsaskej.

Uejueyi nechikolmej no kinpaleuij tokniuan maj kuali mouikakan. Keman mochiuayaj nejon uejueyi nechikolmej no tanojnotsayaj, ijkon kemej tein mochiuak ompa Winnipeg (Canadá). Itech 31 de marzo kinyoleujkej nochin akin ompa yetoyaj maj tanojnotsanij komo ueliaj. Tonalmej keman tanojnotskej kuali kinkakkej. Itech okse ueyi nechikol tein mochiuak nejon xiuit ompa Winnipeg itech 5 de agosto mosentilijkej kemej chikome mil. Amo keman ijkon mosentilijtoyaj itech se ueyi nechikol ompa Canadá.

Itech tonal 18 hasta 26 de agosto xiuit 1923, ompa Los Ángeles (California) mochiuak se ueyi nechikol tein semi kualtsin. Seki semanas achto, itech periódico motematiltij ke mochiuaskia ueyi nechikol uan akin momachtiayaj  Biblia kitemakakej panoua 500 mil amamej tein ika tayoleujkej. Uan no kitalijkej itech inincarro uan itech okseki carros tein kitematiltiaya ke mochiuaskia ueyi nechikol.

Itech sábado 25 de agosto, tokniuj Rutherford kitemakak tanojnots “Ovejas y cabras”, itech nejon tanojnots kimelauak ke “ichkamej” yejuan akin kipiaj tanemilil tein moneki para nemiskej itech taltikpak kampa yeski se xochital. Uan no kiixtajtoltij tein moixtalijka maj kichiuakan uan motokaytij “Amonestación”, nejin kijtouaya ke taneltokalismej tamachtiayaj tein amo melauak uan kinyolchikauaya akin yolkualmej maj kisakan de “Ueyi Babilonia” (Apoc. 18:​2, 4). Satepan moamakixtij nejon tein moixtajtoltijka uan akin momachtiayaj Biblia kimoyaujkej millones amaixmej.

Keman tamik ueyi nechikol, panoua 30 mil kikakkej tanojnots tein kitemakak tokniuj Rutherford, tein motokaytij “Todas las naciones están marchando hacia el Armagedón, pero millones que ahora viven no morirán jamás”. Kemej kiitakej ke miakej mosentiliskiaj, akin momachtiayaj Biblia taxtaujkej para maj kintaneujtikan estadio Coliseo de Los Ángeles, tein yankuixtok kitamichijchiujkaj. Para maj nochin kuali kikakinij ueyi nechikol, tokniuan kikuikej teposmej tein yetoyaj itech estadio tein yankuikej katkaj. Uan no, miakej kikakkej ueyi nechikol itech radio.

Itech xiuit 1923 okachi peuak motanojnotsa ompa África, Europa, India uan Sudamérica. Ompa India, tokniuj Adavimannathu Joseph, akin kipiaya isiuatsin uan chikuasen ikoneuan, tapaleuij maj mokixtikan amaixmej itech tajtol hindi, tamil, telugu uan urdu.

Ompa Sierra Leona, Alfred Joseph uan Leonard Blackman kintajkuilouilijkej tokniuan akin tekitij itech ueyi kali kampa techixyekanaj ompa Brooklyn (Nueva York) porin kinekiaj maj kinpaleuikan. Itech 14 de abril de 1923, kinnankilijkej. Alfred kijtoj: “Se sábado keman tel youakya katka nechnotskej”. Akin kinotsak, toskachikauak katka uan kitajtanij: “¿Tejuatsin tikontajkuilouilij Sociedad Watch Tower para tiontajtanis okachi tanojnotsanij?”. Alfred tanankilij ke kemaj. Akin tanotsak kijtoj: “Nejua nechtitankej”. ¿Akoni katka? William Brown. Nejon tonal ajsikej Sierra Leona iuan isiuatsin Antonia uan ome isiuapipiluan, Louise uan Lucy. Uan tokniuan niman uelik kinixmatkej.

 Alfred kijtoj: “Mostika kualkan, keman Leonard uan nejua timomachtijtoyaj Biblia kemej ipa tikchiuayaj sejse semana, itech puerta moketsato se ueyi takat: katka William Brown. Kemej semi kitasojtaya Jehová kinekia kitemakas se tanojnots mostika”. Ayamo tamia metsti uan tokniuj Brown kitemakakaya nochi amaixmej tein kiuikak. Niman oksepa kititanilijkej okseki makuil mil amaixmej, uan oksepa kinekia okachiok. Maski ijkon oksekin amo kiitayaj kemej aksa akin kinamakaya amaixmej. Itech nochi xiujmej keman kitekitilij Jehová, yejua nochipa kikuia Biblia keman kipanoltiaya tanojnotsmej, yejua ika kiixmatiaj kemej Brown akin kikui Biblia.

Itech Betel de Barmen (Alemania) amo miakejok katkaj uan tateuianij franceses amo uejkaua ajsiskiaj itech nejon xolal. Akin momachtiayaj Biblia kiajsikej seki uejueyi kalmej ompa Magdeburgo kampa ueliskiaj kiamakixtiskej amaixmej. Itech 19 de junio, tokniuan kieujkej tein ika taamakixtiayaj uan okseki taman uan yajkej itech yankuik Betel de Magdeburgo. Se tonal satepan ke tanauatijkaj itech ueyi kali kampa techixyekanaj ke nochin kiskajya, itech periódicos motematiltij ke tateuianij franceses ajsikajya itech xolal de Barmen. Tokniuan niman kiitakej ke Jehová kinpaleuijtoya uan kinyekpiaya.

Ompa Brasil, George Young tanojnotstinemik itech nochi altepet. Ompa kiixtalij maj mochiua se Betel uan peuak kiamakixtia The Watch Tower itech tajtol portugués. Itech seki metsti kimoyauak panoua chikome mil amaixmej. Keman nejin tokniuj ajsik Brasil, Sarah Ferguson semi yolpakik keman tokniuj kinkalpanoj. Yejua kiixtajtoltiaya amaix The Watch Tower desde xiuit 1899, sayoj ke ayamo uelia moauiaya. Seki metsti satepan ke ajsik tokniuj George Young, Sarah uan naui ikoneuan moauijkej.

Itamian nejon xiuit, amaix The Watch Tower 15 de diciembre de 1923 kijtoj keniuj akin momachtiayaj Biblia kinpaleuij tein mopatak itech nechikolmej, keman tanojnotsayaj uan itech uejueyi nechikolmej. Kijtoj ke amo ouij katka kiitaskej ke tein tamachtiayaj itech nechikolmej kinpaleuiaya maj kuali mouikanij iuan Dios, ke monekia kisentokaskej kitekitiliskej uan yolpakiskej, uan kichiaskej okachi tekitiskej itech xiuit 1924.

Nejon xiuit no panoskia teisa tein kinyolpaktiskia akin momachtiayaj Biblia. Tokniuan akin yetoyaj Brooklyn itech ueyi kali kampa techixyekanaj, miak metstia tekititoyaj ompa Staten Island tein amo uejka yetoya. Ipeujyan xiuit 1924 matankej kalchijchiujkej. Nejon uejueyi kalmej tapaleuij maj tokniuan okachi kuali mouikanij uan maj okachi motanojnotsa hasta kampa ijkuak amo ueliaj tanojnotsayaj.