Ipan 1923, ikalpan toTajtsin okichiuj seki tlemach tlen okinpaleui Nomachtijkej itech Biblia más kuajli makiueyichiuakan Jehová. Ijkuakon, nochi semanas noitaya se tlaxelojli itech Biblia ipan Reunión de Oración, Alabanza y Testimonio. San ika, sakin revista The Watch Tower opeuj kitetomilia tlenon kijtosnekiya yejon tlaxeloltin tlen ompa noitayaj. Noijki, Nomachtijkej itech Biblia okikixtijkej se calendario kampa uajlaya tlaxelojli tlen nopouaskia ipan semana niman se tlakuikajli tlen mojmostla ueliskia noitas, niman ueliskia nokuikatiskej ijkuak nomachtiskiaj inselti noso imiuan inchanejkauan.

Ijkuak Nomachtijkej itech Biblia nosentlaliayaj, kijtouayaj tlen inpan nochiuaya ijkuak tenojnotsayaj, kitlasojkamachiliayaj Jehová, nokuikatiayaj noso hasta kichiuayaj se teoyotl. Eva Barney, akin onoapolakti ipan 1923 ijkuak kipiaya 15 xiuitl, okijto: “Tla yakaj kinekiya itlaj kijtos, nokuiteuaya niman kijtouaya: ‘Nikneki niktlasojkamachilis toTeko pampa yonechititi ika nechtlasojtla. . . ’”. Sekimej tokniuan melak kuelitayaj ijkon kichiuaskej. Tokniuj Eva noijki okijto: “Toknitsin Godwin iueyi katka niman melak kuelitaya kitlasojkamachilis toTeko. San ika, ijkuak isiuatsin kitaya ika akin kiyekantoya tlanechikojli ikinekiya matlantiuetsi, kititilaniliaya itlaken tokniuj Godwin para manotlali”.

Sejpa ipan se metstli, nochi tlanechikoltin kipanoltiayaj se Reunión de Oración, Alabanza y Testimonio tlen melak ueyi kijtosnekiya. Revista The Watch Tower del 1 de abril de 1923, okijto tlenon nochiuaya: “Tlajko tiempo tlen notekitiltia para tlanechikojli tokniuan noneki kijtoskej tlenon inpan onochiuj ijkuak tenojnotsayaj niman noijki kinyolchikauaskej oksekimej [ . . . ]. Tiknemiliaj ika, tla nochimej tokniuan ijkon kichiuaj, más kuajli nouikaskej”.

Yejuin tlanechikoltin melak okipaleui Charles Martin, se tenojnotsketl akin kipiaya 19 xiuitl niman chantiya Vancouver (Canadá). Okijto: “Ompa oniuel kenon nitenojnotsas. Miyekpa, ipan yejon tlanechikoltin yakaj kijtouaya tlen ipan onochiujka ijkuak tenojnotstinemiya techajchan. Yejon onechpaleui manikmati tlenon nikijtos ijkuak yakaj xkinekiya nechkakis”.

Pampa tokniuan opeujkej tenojnotsaj okinpaleui más kuajli manouikakan. The Watch Tower del 1 de abril de 1923, okijto: “Tla tiknekij tikchiuaskej san no yejua tekitl, [ . . . ] tonajli martes 1 de mayo de 1923 tinochimej titenojnotsaskej. Ijkon tikuajchiujtiaskej nochi martes ijkuak peuas metstli [ . . . ]. Nochimej akin uajlauej ipan tlanechikoltin nonekis ijkon kichiuaskej”.

Nomachtijkej itech Biblia akin ximás iuejueyimej katkaj noijki tenojnotsayaj. Se tokniuj siuatl akin itoka Hazel Burford, akin kipiaya 16 xiuitl ijkuak onoapolakti ipan 1923, okijto: “Amatlajkuilojli Bulletin kipiaya tlen techpaleuiaya matitenojnotsakan niman nonekiya tiktsontekontlaliskej. a Nejua niman noabuelo ika nochi toyojlo titenojnotsayaj”. San ika, yakaj xkuelitaya tlen Hazel kichiuaya. Hazel kijtoua: “Se tokniuj akin iueyi xkinekiya ika nejua manikinnojnotsa oksekimej. Ijkuakon, sekimej Nomachtijkej itech Biblia, xmás kasikamatiyaj ika telpokamej niman ichpokamej noijki nonekiya kiueyichiuaskej toTajtsin, akin otexchijchiuj” (Sal. 148:​12, 13). San ika, Hazel xokikajkauj ika tenojnotsa. Seki xiujtin sakin oyaj ipan ika ome itlamachtil Galaad niman otlapaleui ken misionera ne Panamá. Sakin, tokniuan akin kinemiliayaj ika telpokamej niman ichpokamej xnonekiya tenojnotsaskej okipatlakej ken tlanemiliayaj.

Uejueyimej tlanechikoltin noijki okinpaleui tokniuan más kuajli manouikakan. Miyekpa, ipan yejon uejueyimej tlanechikoltin noijki ontenojnotsayaj. Ken ipan ueyi tlanechikojli tlen onopanolti ne Winnipeg (Canadá). Ipan 31 de marzo, nochimej akin oyajkaj ipan ueyi tlanechikojli ne Winnipeg ueliskiaj teuan ontenojnotsaskiaj. Melak kuajli tlen inpan onochiuj ijkuak otenojnotsatoj. Ipan san no yejua xiuitl, ne Winnipeg onopanolti okse ueyi tlanechikojli ipan 5 de agosto niman onosentlalijkej kanaj 7,000. ¡Xkeman ijkon miyekej nosentlaliayaj ne Canadá!

Ipan 18 al 26 de agosto de 1923, onopanolti se ueyi tlanechikojli tlen melak ueyi kijtosneki ne  Los Ángeles (California). Yejuin tlen nochiuaskia onotlali ipan periódico niman tokniuan okintemakakej ipantsin 500,000 invitaciones. Noijki, okinpepechojkej yejuin amamej ipan carros.

Ipan sábado 25 de agosto, tokniuj Rutherford okipanolti tlamachtijli “Ovejas y cabras”. Ompa okijto ika “ovejas” noso borregos yejuamej akin kinekij kixmatiskej toTajtsin niman akin nemiskej ipan tlaltikpaktli ijkuak yes se xochitlalpan. Noijki, okipanolti se tlamachtijli kampa kijtouaya ika religiones akin kijtouaj ika kichiuaj ken Cristo xkuajli tlen kichiuayaj, niman kinyolchikauaya akin kipiyaj kuajli inyojlo makisakan itech “ueyixtikaj [ . . . ] Babilonia” (Apoc. 18:​2, 4). Sakin, onochijchiuj se amatlajkuilojli pitentsin kampa tlajtouaya itech yejon niman Nomachtijkej itech Biblia, okinxejxelojkej melak miyek copias ipan nochi tlaltikpaktli.

Ijkuak sa poliuiya se tonajli niman ijkon tlamiskia yejon tlanechikojli, ipantsin 30,000 okikakkej tlamachtijli tlen okipanolti tokniuj Rutherford, tlen itoka “Todas las naciones están marchando hacia el Armagedón, pero millones que ahora viven no morirán jamás”. Pampa Nomachtijkej itech Biblia kinemiliayaj ika melak miyekej yaskiaj ipan ueyi tlanechikojli, okitlaneujkej Coliseo de Los Ángeles, se estadio tlen kemach yokichijchiujkaj. Tokniuan kinekiyaj ika nochimej kuajli makikakikan ueyi tlanechikojli, ika yejon, okintekitiltijkej ibocinas estadio, ipan yejon tonaltin yejon tlen más yenkuik katka. Noijki, melak miyekej okikakkej ueyi tlanechikojli ipan radio.

Ipan 1923, opeuj chikauak notenojnotsa ne África, Europa, India niman Sudamérica. Ne India, Adavimannathu Joseph, akin yononamiktijka niman kipiaya chikuasen ikoneuj otepaleui manochijchiuakan amatlajkuiloltin ika tlajtoltin hindi, tamil, telugu niman urdu.

Ne Sierra Leona, Alfred Joseph niman tokniuj Leonard Blackman okitlajtlankej makinpaleuikan, ika yejon, okitlajkuilouilijkej oficina kampa noyekanaj nochi sucursales tlen onka Brooklyn (Nueva York). Ipan 14 de abril de 1923, okinnankilijkej tokniuan. Alfred, okijto: “Se sábado ika tlayoua onechuajnotskej. Akin onechuajnots onechtlajtolti: ‘¿Tejua akin otikontlajkuilouili Sociedad Watch Tower niman otikteijli makinuajtitlanikan akin tenojnotsaskej?’. Nejua oniknankili: ‘Kema’. Akin nechuajnotstoya onechijli: ‘Nejua onechuajtitlankej’”. ¿Akinon kuajnotstoya tokniuj Alfred? Katka tokniuj William Brown. Yejua, isiuatsin Antonia niman omemej iichpokatsitsinuan, Louise niman Lucy, nemiyaj Caribe niman kemach yoonejkokaj. Kuakon, tokniuan de Sierra Leona nimantsin ouel okimixmatkej.

 Alfred kijtoua: “Uajmostla ijkuak Leonard niman nejua tomachtijtoyaj Biblia, ijkon ken tikchiuayaj nochi semanas, yakaj oajsik kampa topuerta. Katka William Brown. Pampa melak kuelitaya kiteijlis tlen melauak, uajmostla nimantsin kinekiya kipanoltis se tlamachtijli”. Nion xipanouaya se metstli niman tokniuj Brown yokintemakaka nochi amatlajkuiloltin tlen kimitkiya. Nimantsin okinuajtitlanilijkej okseki 5,000 libros, niman noijki isiujkan nochi okintemakak. San ika, tlaltikpakchanejkej xkitayaj kentla yakaj akin san kinnemaka libros. Yejua ouejkauj kuajli okitekichiuili Jehová niman nochipa kitekitiltiaya Biblia ijkuak kinpanoltiaya itlamachtiluan. Ika yejon, kixmatiyaj ken Brown el de la Biblia.

San ika, tokniuan de sucursal tlen onkatka Barmen (Alemania), xok onakiyaj kampa nemiyaj niman kalpan ikinotlatkitiskiaj franceses. Nomachtijkej itech Biblia okinnextijkej seki kaltin ne Magdeburgo kampa ueliskia kinchijchiuaskej amatlajkuiloltin. Ipan 19 de junio tokniuan otlankej tlatlajtlaliaj niman oyajkej Betel tlen okichijchiujkej ne Magdeburgo. Ijkuak tokniuan okontlajkuilouilijkej Sociedad Watch Tower niman okijlikej ika yoyajkaj Magdeburgo, ipan periódicos opeuj noijtoua ika franceses yokinotlatkitijkaj Barmen. Tokniuan okitakej kenon Jehová okinteochiuj niman okintlajpix.

George Young, otenojnots ipan nochi Brasil. Ompa otlapaleui maonia se sucursal niman opeuj kikixtia revista The Watch Tower ika tlajtojli portugués. San ipan seki metstin yokintemakaka ipantsin 7,000 amatlajkuiloltin. Pampa George Young otlapaleuito Brasil, melak okipaleui tokniuj Sarah Ferguson. Yejua, kiamapouaya revista The Watch Tower desde xiuitl 1899, san ika, xueliya noapolaktiaya. Sakin ika tokniuj George Young oajsik Brasil, tokniuj Sarah niman ikoneuan ouel onoapolaktijkej.

Itlamiyan xiuitl 1923 revista The Watch Tower del 15 de diciembre okijto kenon melak yotepaleui pampa yonopatlaka ken nopanoltiayaj tlanechikoltin, ken notenojnotsaya niman ken nopanoltiayaj uejueyimej tlanechikoltin. Okijto: “Kuajli nesi ika tokniuan akin nemij ipan tlanechikoltin [ . . . ] chikauak kipiyaj intlaneltokil [ . . . ]. Matikintekitiltikan nochi armas tlen Jehová techinmaka. Chikauak matiktekichiuilikan toTajtsin niman matiyolpakikan ipan xiuitl tlen uajlauj”.

Ipan 1924, panoskia itlaj tlen melak ueyi kijtosneki para Nomachtijkej itech Biblia. Tokniuan de oficina kampa noyekanaj nochi sucursales ne Brooklyn, youejkaujkaj seki metstin ika tekititoyaj ne Staten Island. Otlankej intekiyo ipeujyan xiuitl 1924. Yejuin kaltin otepaleuijkej más kuajli manouikakan tokniuan niman noijki más miyekan manotenojnotsa.