Wɔ ɛvolɛ zɔhane anu, ahyehyɛdeɛ ne yɛle nzenzaleɛ bie mɔ mɔɔ boale maanle Baebolo Sukoavoma ne yɛle ko wɔ bɛ ɛzonlenlɛ nu a. Bɛbɔle ɔ bo kɛ bɛkɛlɛ edwɛkɛ mɔɔ kilehile ngɛlɛlera ne mɔɔ bɛsuzu nwo dapɛne biala wɔ bɛ Asɔneyɛlɛ, Ayɛlɛyelɛ Nee Daselɛlilɛ Ayia ne mɔ abo la anu wɔ The Watch Tower ne anu. Eza Baebolo Sukoavoma ne yɛle kalenda mɔɔ ngɛlɛlera mɔɔ bɛbazuzu nwo dapɛne biala wɔ debiezukoalɛ bo la wɔ zolɛ la. Ɛnee edwɛne mɔɔ bɛbahola bɛado wɔ mekɛ mɔɔ bɛlɛyɛ bɛ ti anwo debiezukoalɛ anzɛɛ abusua ɛzonlenlɛ la noko wɔ zolɛ.

Ɛnee saa Baebolo Sukoavoma ne kɔ debiezukoalɛ a, awie kola ka anwubielɛ bie mɔɔ ɔnyianle ye wɔ edwɛkɛhanlɛ gyima ne anu la, ɔyɛ Gyihova mo wɔ mɔɔ yeyɛ yemaa ye la anwo, ɔto edwɛne anzɛɛ ɔyɛ asɔne bɔbɔ. Ɛnee bɛfɛlɛ ɛhye “daselɛlilɛ.” Adiema raalɛ Eva Barney, mɔɔ bɛzɔnenle ye wɔ 1923 wɔ mekɛ mɔɔ ɛnee yeli ɛvolɛ 15 la hanle kɛ: “Ɛnee saa ɛkulo kɛ ɛdi daselɛ bie a, ɛbadwazo na wɔaha edwɛkɛ le kɛ, ‘Mekulo kɛ meyɛ Awulae mo wɔ mɔɔ yeyɛ yemaa me la kɔsɔɔti anwo.’” Ɛnee mediema bie mɔ anye die nwo kɛ bɛbali daselɛ wɔ debiezukoalɛ bo. Adiema raalɛ Barney doale zolɛ kɛ: “Ɛnee Adiema Godwin mɔɔ ɛyɛ ɛrelera la lɛ ninyɛne dɔɔnwo mɔɔ ɔkulo kɛ ɔyɛ Awulae mo wɔ nwolɛ a. Noko mɔɔ ɔ ye nwunle kɛ ɔlɛyɛ adiema nrenyia ne mɔɔ ɛlɛnea debiezukoalɛ ne azo ɛvɛlɛ la, ɔzɔle ɔ hu kootu ne anloa ɔhwenle ye, ɔti ɔgyakyile ɛdendɛlɛ na ɔdɛnlanle aze.”

Asafo biala yɛ Asɔneyɛlɛ, Ayɛlɛyelɛ Nee Daselɛlilɛ Ayia titili ko siane biala. April 1, 1923, The Watch Tower ne hanle ayia ɛhye anwo edwɛkɛ kɛ: “Ɔwɔ kɛ bɛfa mekɛ ne foa ko bɛka anwubielɛ mɔɔ bɛnyianle wɔ edwɛkɛhanlɛ gyima ne anu la anwo edwɛkɛ na bɛmaa gyimayɛvoma ne anwosesebɛ. . . . Yɛdie yɛdi kɛ debiezukoalɛ ɛhye mɔ mɔɔ maa anwosesebɛ la bamaa mediema ne mɔ abikye bɛ nwo kpalɛ.”

Charles Martin, asafo nu gyimayɛvo (nolobɔlɛnli) bie mɔɔ ɛnee yeli ɛvolɛ 19 mɔɔ vi Vancouver, Canada la nyianle debiezukoalɛ ɛhye mɔ azo nvasoɛ kpole. Nzinlii ɔhanle kɛ: “Ɛke a menlimoale menzukoale mɔɔ mebaha wɔ azua nu daselɛlilɛ nu la a. Fane dɔɔnwo ne ala, ɛnee awie mɔ ka anwubielɛ mɔɔ bɛnyianle ye wɔ azua nu daselɛlilɛ ne anu la. Ɛhye maanle menwunle mɔɔ mebaha nee kɛzi mebabua edwɛkɛ ngakyile mɔɔ bɛfa bɛpɛ adawubɔlɛ zo la.”

Eza “edwɛkɛhanlɛ kenle ne mɔ” maanle koyɛlɛ rale ahyehyɛdeɛ ne anu. April 1, 1923, The Watch Tower ne bɔle nolo kɛ: “Amaa yɛ muala yɛayɛ ko wɔ gyima ko ne ala anu la . . . , bɛye Dwɛkɛ, May 1, 1923, bɛzie ɛkɛ ne kɛ edwɛkɛhanlɛ kenle. Ɛhye anzi, Dwɛkɛ mɔɔ limoa wɔ siane biala anu la bayɛ edwɛkɛhanlɛ kenle . . . Ɔwɔ kɛ awie biala mɔɔ wɔ asafo ne anu la yɛ gyima ne bie.”

Baebolo Sukoavoma mɔɔ bɛle ngakula bɔbɔ la yɛle gyima ɛhye bie. Hazel Burford, mɔɔ ɛnee yɛli ɛvolɛ 16 ala wɔ zɔhane mekɛ ne la hanle kɛ: “Ɛnee adwelielilɛ nwo neazo wɔ Bulletin ne anu mɔɔ yɛbahola yɛahye yɛagua yɛ ti anu a. a Me nee me nenyia bɔle mɔdenle ɛsesebɛ yɛle gyima ɛhye mɔ bie.” Noko Adiema raalɛ Burford yiale dwazotia bie vile ɛleka mɔɔ ɛnee ɔ nye ɛnla la. Ɔhanle kɛ: “Adiema nrenyia kpanyinli bie hanle tinlinle zolɛ kɛ ɔnle kɛ mekɔ daselɛlilɛ. Zɔhane mekɛ ne, bie mɔ ande ɔ bo kɛ ɔwɔ kɛ Baebolo Sukoavoma amuala, mɔɔ “mgbavolɛ nee mbɛlɛra” boka nwo la ye yɛ Bɔvolɛ Kpole ne ayɛlɛ.” (Edw. 148:​12, 13) Noko Adiema raalɛ Burford hɔle zolɛ hanle edwɛkɛ ne. Ɔhɔle Geleade Sukulu mɔɔ tɔ zo nwiɔ la bie na ɔhɔyɛle edwɛkpatɛlɛvolɛ wɔ Panama. Nzinlii, mediema zɔhane mɔ hakyile kɛzi bɛyɛ bɛ nyɛleɛ wɔ ngakula mɔɔ kɔ daselɛlilɛ anwo la.

Eza nyianu ne mɔ maanle mediema ne mɔ yɛle ko. Wɔ nyianu ɛhye mɔ dɔɔnwo abo, ɛnee bɛlɛ kenle mɔɔ bɛfa bɛkɔ daselɛlilɛ a. Kɛ neazo la, wɔ nyianu mɔɔ bɛyɛle ye wɔ Winnipeg, Canada wɔ March 31 la, bɛhanle bɛhilele menli mɔɔ hɔle nyianu ne la kɔsɔɔti kɛ bɛli daselɛ wɔ suakpole ne azo. Bɛhanle edwɛkɛ ne bɛhilele menli dɔɔnwo wɔ zɔhane kenle ne mɔ na ɔzole ma dɔɔnwo. Wɔ August 5, menli kɛyɛ 7,000 hɔle nyianu bieko wɔ Winnipeg. Mekɛ ɛhye a menli dɔɔnwo hɔle nyianu wɔ Canada a.

Nyianu mɔɔ hyia kpalɛ mɔɔ Gyihova menli yɛle wɔ 1923 la a le mɔɔ bɛyɛle ye wɔ August 18-26, wɔ Los Angeles, California la. Wɔ dapɛne bie mɔ anu kolaa na nyianu ne adwu zo la, adwelie ngɛlata  bɔle gyimalilɛ ne nolo yɛɛ Baebolo Sukoavoma ne hyɛle nwolɛ ɛsalɛdolɛ ngɛlata mɔɔ bo 500,000. Bɛvale ɛdanlɛ mɔɔ bɛhɛlɛhɛlɛ zo mɔɔ bɛfa bɛabɔ gyimalilɛ ne nolo la bɛhendɛhendanle arane ahale nee awie mɔ ahale nwo.

Wɔ folɛ, August 25, Adiema Rutherford maanle ɛdendɛlɛ bie mɔɔ ɔ ti ne se, “Mboane Nee Mbɔnkye,” mɔɔ nuhua a ɔhilehilele nu kɛ “mboane” ne mɔ gyi ɛkɛ ne maa tenlenema mɔɔ bɛfɛta dahuu ngoane mɔɔ bɛbadɛnla aze wɔ paladaese la. Eza ɔvale kpɔkɛ bie mɔɔ bɛbɔle la ɔdole gua, ɛnee bɛfɛlɛ ye “Kɔkɔbɔlɛ.” Kpɔkɛbɔlɛ ne hanle kɛ bɛkpo Kilisienemaanle ne, na ɔmaanle menli mɔɔ lɛ ahonle kpalɛ la anwosesebɛ kɛ bɛhwe bɛ nwo bɛvi “Babelɔn Kpole ne” anwo. (Yek. 18:​2, 4) Nzinlii, Baebolo Sukoavoma mɔɔ bɔ mɔdenle la hyɛle kpɔkɛbɔlɛ ɛhye anwo trate mgbe dɔɔnwo.

Wɔ nyianu ne kenle mɔɔ li awieleɛ la, menli mɔɔ bo 30,000 la dele kɛ Adiema Rutherford ɛlɛmaa bagua nu ɛdendɛlɛ mɔɔ se “Maanle Maanle Ne Amuala Ɛlɛto Ɛlɔnwɔne Ahɔ Amagɛdɔn, Noko Menli Dɔɔnwo Mɔɔ De Aze Kɛkala La Ɛnrɛwu Ɛlɛ” la. Kɛmɔ ɛnee Baebolo Sukoavoma ne anye la kɛ menli dɔɔnwo bara la ati, bɛhɔhayele Los Angeles setediyɔm ne mɔɔ ɛnee bɛzi ye fofolɛ la. Amaa awie biala ade edwɛkɛ ne la, mediema ne mɔ vale speakers mɔɔ wɔ ɛkɛ ne la lile gyima, zɔhane mekɛ ne, ɛnee yemɔ a le debie fofolɛ mɔɔ ɛdwu zo a. Menli dɔɔnwo noko diele gyimalilɛ ne bie wɔ riledio zo.

Wɔ 1923, yɛnyianle anyuhɔlɛ kpole bie wɔ edwɛkɛhanlɛ gyima ne anu wɔ Africa, Europe, India, yɛɛ South America. Mɔɔ A. J. Joseph ɛlɛnea ɔ ye nee ɔ mra nsia wɔ India la, eza ɔnleanle ɔmaanle bɛyɛle mbuluku wɔ Hindi, Tamil, Telugu, yɛɛ Urdu aneɛ nu.

Alfred Joseph nee Leonard Blackman mɔɔ ɛnee bɛle Baebolo Sukoavoma wɔ Sierra Leone la hɛlɛle hɔle ewiade amuala gyima ne ati mɔɔ wɔ Brooklyn, New York la kɛ bɛhyia moalɛ. Wɔ April 14, 1923, bɛnyianle moalɛ mɔɔ ɛnee bɛhyia nwo la. Alfred hanle kɛ, “Kenle ko Folɛ bie nɔɔzo, bɛvɛlɛle me wɔ fonu zo mɔɔ ɛnee me nye ɛnla a.” Ɛnelɛ kpole bie bizale ye kɛ, “Ɛdawɔ a ɛhɛlɛle ɛhɔle Watch Tower Society kɛ bɛhyia edwɛkpakavolɛma la ɔ?” Alfred buale kɛ, “Ɛhɛe.” “Ɔyɛ, bɛse membɛla bɛ nehane.” William R. Brown a ɛnee ɔlɛtendɛ la. Ɛnee kenle ko zɔhane ala a ɔ nee ɔ ye Antonia yɛɛ bɛ mra mraalɛ ngakula, Louise nee Lucy ɛvi Caribbean ɛradwu ɛkɛ a. Ɛnee ɔwɔ kɛ mediema ne mɔ bayia Adiema Brown nee ye abusua ne ndɛndɛ.

 Alfred doale zolɛ kɛ: “Ye alehyenlɛ nu mɔɔ ɛnee me nee Leonard ɛlɛsuzu Baebolo ne anwo kɛ mɔɔ yɛyɛ ye dapɛne biala la, arɛlevilɛ nu ala yɛnwunle nrenyia tendenle bie wɔ anlenkɛ ne anyunlu. Adiema Brown ɔ. Kɛzi ɛnee ɔ nye die nɔhalɛ ne anwo la ati, ɛnee ɔkulo kɛ aleɛ kye ala a ɔmaa bagua nu ɛdendɛlɛ.” Yeandwu siane ko bɔbɔ na Adiema Brown ahyɛ mbuluku mɔɔ ɔvale ɔrale la amuala. Yeangyɛ, eza bɛrɛlɛle ye mbuluku 5,000, noko yɛ nye zo katete yɛ la ɛnee ɔhyia mbuluku bieko. Noko Adiema Brown anlie duma kɛ awie mɔɔ tɔne mbuluku. Wɔ ɛvolɛ tendenle mɔɔ ɔvale ɔzonlenle Gyihova la anu, dahuu ɔlɛmaa ɛdendɛlɛ a ɔtwe adwenle ɔkɔ Ngɛlɛlera ne azo, ɔti ɛnee bɛfɛlɛ ye Baebolo Brown.

Wɔ zɔhane mekɛ ne, ɛnee menli ɛhyele zo wɔ Bɛtɛle mɔɔ wɔ Barmen, Germany la, yɛɛ ɛnee France mɔɔ zua bɛ la ɛyɛ ye adwenle kɛ ɔba yearateta Barmen. Baebolo Sukoavoma ne nwunle sua bie wɔ Magdeburg mɔɔ ɛnee ɔzɔho kɛ ɔbaboa bɛ wɔ bɛ mbuluku ɛpelentelɛ ne anu la. Wɔ June 19, mediema ne mɔ boɔboale bɛ ninyɛne ne mɔ amuala anloa na bɛdule bɛhɔle bɛ Bɛtɛle fofolɛ ne mɔɔ wɔ Magdeburg la anu. Kenle ko ne ala mɔɔ bɛbɔle ewiade amuala gyima ne ati amaneɛ kɛ mediema ne mɔ ɛdu ɛhɔ Magdeburg bɔkɔɔ la, adwelie ngɛlata ne mɔ bɔle nolo kɛ France ɛrava suakpole Barmen. Mediema ne mɔ nwunle Magdeburg mɔɔ bɛdule bɛhɔle la kɛ ɔle daselɛ mɔɔ kile kɛ Gyihova ɛlɛyila bɛ yɛɛ ɔlɛbɔ bɛ nwo bane a.

George Young mɔɔ dudule adenle dɔɔnwo hɔbɔle edwɛkpa ne nolo la yɛle Bɛtɛle fofolɛ wɔ Brazil na ɔbɔle ɔ bo kɛ ɔpelente The Watch Tower ne wɔ Portuguese nu. Wɔ siane ekyii bie anu, ɔvale mbuluku mɔɔ bo 7,000 la ɔmaanle. Eza Brazil mɔɔ George Young hɔle la maanle Sarah Ferguson nyianle nwolɛ adenle kɛnlɛma bie. Ɛnee yegenga The Watch Tower ne ɔvi 1899, noko ɛnee ɔtɛkolale ɔtɛfale nzule nu ɛzɔnenlɛ ɔtɛyɛle ɔ nwo zo mɔɔ yeyila la anwo sɛkɛlɛneɛ. Yeangyɛ, bɛzɔnenle adiema raalɛ Ferguson nee ɔ mra nna ne.

Mɔɔ ɛvolɛ ne ɛlɛkɔ ye awieleɛ la, December 15, 1923, The Watch Tower ne hanle kɛzi nzenzaleɛ mɔɔ bɛyɛle ye wɔ yɛ debiezukoalɛ, daselɛlilɛ ɛhɔlɛ nee nyianu ne mɔ anu la boale Baebolo Sukoavoma ne la anwo edwɛkɛ kɛ: “Ɔda ali wienyi kɛ asafo ne mɔ . . . diedi nu ɛmia. Bɛmaa yɛziezie yɛ nwo kɛ yɛbayɛ dɔɔnwo na yɛava mɔdenlebɔlɛ nee anyelielɛ yɛazonle Nyamenle wɔ ɛvolɛ 1924 mɔɔ ɛlɛba la anu.”

Baebolo Sukoavoma ne anye liele wɔ 1924 noko. Ɛnee mediema mɔɔ wɔ Bɛtɛle la ɛva siane dɔɔnwo ɛyɛ azɛlɛ bie mɔɔ bɛlɛ wɔ Staten Island, mɔɔ ɔ nee bɛ gyima ne ati mɔɔ wɔ Brooklyn la avinli anwa la. Bɛwiele azɛlɛ fofolɛ zɔhane azo azua ne mɔ sisi wɔ 1924 mɔlebɛbo, na bɛboale bɛmaanle mediema ne mɔ yɛle ko na bɛbɔle edwɛkpa ne nolo bɛdɛlale mekɛ mɔɔ ɛze ɛhɔ la.