E aña ei e organisashon a hasi algun kambio ku a yuda Studiantenan di Beibel kuminsá adorá Yehova mas uní. E Toren di Vigilansia a kuminsá publiká splikashon di e tekstonan ku nan lo a trata tur siman den nan Reunion di Orashon, Alabansa i Testimonio. Ademas, Studiantenan di Beibel a traha un kalènder ku tabatin un teksto pa kada siman i un kantika pa kada dia. Nan por a kanta e kantika ei durante nan estudio personal òf di famia.

Na reunion, nan tabata duna “testimonio” ku por tabata eksperensia den sirbishi, gradisimentu na Yehova, kantika òf asta orashon. Eva Barney, kende a batisá na 1923 tempu ku e tabatin 15 aña, a bisa: “Si bo kier a duna un testimonio, bo mester a djis lanta para i kuminsá bisa algu manera: ‘Mi ke yama Señor danki pa tur e bondat ku el a mustra na mi.’” Algun ruman tabata gusta duna testimonio. Ruman Eva a sigui konta: “Nos ruman stimá Godwin, tabata di edat avansá i semper tabatin hopi kos pa gradisí Señor. Pero ora su esposa mira ku e ruman ku tabata dirigí e reunion a kuminsá kansa, e ta trèk Ruman Godwin na su bachi i mesora e ta kai sinta.”

Un biaha pa luna kada klas (kongregashon) tabatin un Reunion di Orashon, Alabansa i Testimonio spesial. E Toren di Vigilansia di 1 di aprel 1923 a deskribí loke mester a hasi: “Mitar reunion mester bai na animá e trahadónan i na dunamentu di testimonio ku tin di haber ku e trabou di prediká. . . . Nos ta kere di kurason ku si nos tur hasi meskos, e rumannan lo sera mas ku otro.”

E reunionnan ei tabata di gran yudansa pa Charles Martin, un trahadó (publikadó) di klas di 19 aña di Vancouver, Canada. El a konta: “Ta einan m’a siña kiko mi tin ku bisa ora mi yama na un porta. Hopi biaha un hende tabata konta un eksperensia ku e tabatin den e trabou di kas pa kas. Esei tabata yuda mi sa kiko mi tin ku bisa òf kon pa trata ku diferente opstákulo den sirbishi.”

Un otro kos ku a uni e rumannan tabata e “dianan di sirbishi.” E Toren di Vigilansia di  1 di aprel 1923 a anunsiá: “Pa nos ta uní den e mesun trabou, . . . djamars 1 di mei 1923 lo ta un dia di sirbishi pa nos tur. I esei lo konta pa tur promé djamars di luna . . . . Tur miembro di e klasnan mester partisipá di un manera òf otro den e trabou akí.”

Studiantenan di Beibel yòn tambe a partisipá den e trabou di prediká. Hazel Burford, ku tabatin 16 aña na 1923, a bisa: “Den Boletin, a tabatin ehèmpel di presentashon pa sirbishi ku nos por a siña for di kabes. Ami ku Opa a traha hopi den sirbishi.” Sinembargo, Ruman Hazel haña oposishon di un hende ku e no a ferwagt. El a bisa: “Un ruman hòmber di edat masha stimá no tabata niun tiki eens pa mi papia ku hende den sirbishi. E tempu ei, algun ruman no a komprondé ku tur Studiante di Beibel, inkluso ‘mucha hòmber i mucha muhé,’ tin ku partisipá den e trabou di alabá nos Gran Kreador.” (Sal. 148:​12, 13) Pero Ruman Hazel no a stòp di prediká. Añanan despues el a bai e di dos klas di Skol di Galaad i a sirbi komo misionero na Panamá. Ku tempu, e ruman hòmbernan ei a kambia nan manera di pensa tokante hóbennan i e trabou di prediká.

E kongresonan tambe tabata di gran yudansa pa uni e rumannan. Hopi kongreso tabatin un dia spesial pa sirbishi. Por ehèmpel, na un kongreso na Winnipeg, Canada, tur esnan presente a ser animá pa prediká 31 di mart den e stat ei. Dianan spesial di sirbishi asina a duna hopi bon resultado, i e rumannan a haña chèns di papia ku hopi hende. Riba 5 di ougùstùs, mas o ménos 7.000 hende a asistí na un otro kongreso na Winnipeg. Nunka promé tabatin un asistensia asina grandi na un kongreso na Canada.

Un di e kongresonan di mas importante di 1923 tabata na Los Angeles, California, di 18 pa 26 di ougùstùs. Den e simannan promé ku e kongreso, korantnan a saka aviso di e evento, i Studiantenan di Beibel a parti mas ku 500.000 pamfleta. A pega spandoek riba tram i riba outo.

 Djasabra 25 di ougùstùs, Ruman Rutherford a duna e diskurso “Karné i Kabritu.” Den e diskurso ei el a splika klaramente ku “karné” ta hende ku ta dispuesto pa aseptá e bèrdat i ku lo biba den Paradeis aki riba tera. El a lesa tambe e resolushon “Un Atvertensia.” Den e resolushon ei, el a kondená kristiandat i a bisa hendenan sinsero pa sali for di “Babilonia e Grandi.” (Rev. 18:​2, 4) Mas despues, Studiantenan di Beibel rònt mundu a hasi tur nan esfuerso pa parti miónes di tratado ku tabatin e resolushon ei.

E último dia di kongreso, mas ku 30.000 hende a skucha Ruman Rutherford su diskurso públiko titulá “Tur Nashon Ta Marcha pa Armagedon, Pero Miónes di Hende Ku Ta na Bida Awor Lo No Muri Nunka.” Debí ku Studiantenan di Beibel a ferwagt hopi hende, nan a hür Los Angeles Coliseum. Pa hasi sigur ku tur hende lo tende bon, nan a usa e sistema di spiker di e stadion mes, ku tabata algu nobo e tempu ei. Hopi hende mas a skucha e programa via radio.

Na 1923, tabatin un gran oumento den e trabou di prediká na Afrika, Europa, India i Suramérika. Na India, A. J. Joseph tabata yuda produsí literatura na hindi, tamil, telugu i urdu. E tabata hasi tur esei miéntras ku e tabata perkurá pa su kasá i seis yu.

Na Sierra Leone, dos Studiante di Beibel, Alfred Joseph i Leonard Blackman, a skirbi sede mundial na Brooklyn, New York, pidiendo yudansa. E kontesta a yega 14 di aprel 1923. Alfred a konta: “Djasabra anochi lat m’a haña un yamada ku mi no a ferwagt.” Un stèm fuerte a puntra: “T’abo a skirbi pidi Watch Tower Society pa mas predikadó?” Alfred a kontestá: “Sí.” E persona a bis’é: “Awèl, nan a manda mi.” Tabata stèm di William R. Brown. E dia ei e ku su kasá, Antonia, i nan dos yunan chikitu, Louise i Lucy, a yega for di un isla di Karibe. E dos rumannan ei lo no mester a warda largu pa sera konosí ku Ruman Brown i su famia.

Alfred a sigui konta: “E siguiente mainta, miéntras ku ami ku Leonard tabata analisá Beibel manera nos sa hasi tur siman, diripiente un hòmber haltu a para den porta; tabata Ruman Brown. E tabata asina entusiasmá ku e bèrdat, ku e kier a duna un diskurso públiko su manisé mes.” Den ménos ku un luna Ruman Brown a laga tur e publikashonnan  ku el a bini kuné. Djis despues, el a haña 5.000 buki mas, pero no a tarda mashá ku eseinan tambe a kaba i ku e tabatin mester di mas. Pero Ruman Brown no tabata konosí komo bendedó di buki. Durante tur su añanan di sirbishi fiel na Yehova, semper el a usa Beibel den su diskursonan, i p’esei el a haña e beinam ‘Bible Brown.’

Mientrastantu, na Alemania, e rumannan a disidí di muda e sukursal for di Barmen, pasobra e ofisina a bira muchu chikitu. Ademas, nan a haña sa ku pronto Fransia lo a invadí e stat Barmen. Nan a haña un lugá na Magdeburg, ku tabata perfekto pa imprimí publikashon. Riba 19 di yüni, nan a kaba di paketá tur mashin di imprenta i otro kosnan i a muda pa e Bètel nobo na Magdeburg. E dia despues ku sede mundial a haña notisia di e mudansa, korantnan a anunsiá ku Fransia a invadí Barmen. E rumannan a mira e mudansa komo prueba di Yehova su bendishon i protekshon.

Na Brazil, Ruman George Young a biaha hopi pa prediká e bon notisia. El a habri un sukursal nobo einan i a kuminsá publiká E Toren di Vigilansia na portugues. Denter di algun luna, ya el a laga mas ku 7.000 publikashon. Sarah Ferguson tabata masha kontentu ora ku Ruman Young a bishitá su famia. For di 1899 Ruman Sarah tabata lesa E Toren di Vigilansia, pero nunka el a haña e oportunidat di batisá. Algun luna despues, por fin Ruman Sarah i su kuater yunan por a dal e paso importante ei.

Segun ku fin di 1923 tabata yegando, E Toren di Vigilansia di 15 di desèmber 1923 a deskribí kon e kambionan den reunion, kongreso i den e trabou di prediká a yuda Studiantenan di Beibel. El a bisa: “Bo por mira bon kla ku den sentido spiritual, e klasnan ta den bon kondishon . . . P’esei, laga nos prepará pa mas trabou i sigui sirbi Yehova ku entusiasmo i goso durante 1924.”

Aña 1924 tambe tabata un aña masha importante pa Studiantenan di Beibel. Pa algun luna e rumannan na Bètel tabata traha riba un tereno na Staten Island, ku no a keda muchu leu for di e sede mundial na Brooklyn. E konstrukshon a keda kla na kuminsamentu di 1924. E edifisionan ei lo a yuda uni e rumannan mas ainda i yuda plama e bon notisia na maneranan ku promé no tabata posibel.