During datfala year, organization mekem samfala change wea helpem Olketa Bible Student for wan mind. The Watch Tower start for garem olketa koment wea explainim scripture wea olketa bae ting raonem evri week during Prea, Praise, and Testimony Meeting. And tu, Olketa Bible Student producem wanfala kalenda wea garem list blo scripture for each week and hymn wea olketa savve singim lo personal study and famili worship blo olketa.

During olketa meeting, Olketa Bible Student savve givim “olketa testimony” abaotem field service experience, praisem Jehovah, singim song, or even prea. Eva Barney, wea baptaes lo 1923 taem hem 15 years old hem ting bak and sei: “If iu laek for givim testimony, iu savve stand up and sei olsem, ‘Mi laek thankiu lo Lord for olketa gud samting wea hem duim for mi.’” Samfala brata laek tumas for duim datwan. Sista Barney sei moa: “Olo Brata Godwin, garem staka samting for thankiu lo Lord for hem. Bat taem waef lukim dat brata wea conductim meeting hem start for wari, waef savve pullim end lo coat blo hasband and hem sidaon nao.”

Wantaem lo month, each class [kongregeson] savve holem wanfala spesol Prea, Praise, and Testimony Meeting. The Watch Tower blo April 1, 1923, hem describem meeting hia olsem: “Haf blo datfala meeting hem for storyim olketa testimony and olketa experience abaotem field service and for encouragem olketa wea duim. . . . Mifala bilivim hao olketa meeting hia hem helpem evriwan for wan mind and fren klos tugeta.”

Charles Martin, wea hem 19-years-old wakaman lo class [kongregeson pablisa] from Vancouver, Canada, kasem gud samting from olketa meeting hia. Hem sei: “Lo olketa meeting hia, mi lanem wat for talem lo haos tu haos ministry. Evritaem, samwan savve storyim experience from haos tu haos ministry, datwan helpem mi for savve lo wat for talem and hao for ansarem olketa wea savve talem toktok for stopem story.”

From olketa markem olketa day for duim preaching, datwan helpem olketa tu for wan mind. The Watch Tower, April 1, 1923 sei: “Datwan mekem iumi evriwan wan mind for duim sem waka . . . , Tuesday, May 1, 1923, olketa markem for evriwan  duim preaching waka. Bihaen datwan, evri first Tuesday blo each month, hem day for duim preaching waka . . . Evri member blo evri kongregeson shud tek part.”

Nomata Olketa Bible Student wea young tu tek part lo disfala waka. Hazel Burford, wea 16 years old nomoa lo datfala taem sei: “Bulletin garem tu olketa idea for ministry for mifala memorizim. a Mi and grandadi, barava waka hard for sapotim evri arrangement.” Bat, Sista Burford sapraes bikos wanfala brata no hapi from hem duim preaching waka. Hem sei: “Wanfala olo brata garem strong tingting hao mi shud no story lo pipol lo ministry. Lo datfala taem, samfala no minim hao evri Bible Student, includim ‘evri yang gele an evri yang boe,’ shud tek part lo waka for praisem nem blo Nambawan Creator blo iumi.” (Sams 148:​12, 13, SIPB) Bat Sista Burford no givap. Gogo, hem attendim second class blo Gilead Skul and then hem missionary lo Panama. Isisi, olketa brata hia changem datfala tingting abaotem olketa young wan wea duim ministry.

Olketa convention tu helpem olketa brata and sista for barava wan mind. During lo olketa convention hia, hem garem tu olketa day for preaching. For example, lo March 31, datfala convention wea kamap lo Winnipeg, Canada, evriwan wea attend kasem invitation for preach lo city. Olketa meetim staka pipol lo olketa spesol preaching day hia and gud samting kamaot from datwan. Lo August 5, samting olsem 7,000 pipol nao attendim nara convention lo Winnipeg. Lo datfala taem, disfala convention garem highest attendance lo Canada.

Lo August 18-26, 1923, wanfala barava important convention lo pipol blo Jehovah hem kamap lo Los Angeles, California. Lo olketa week bifor convention, olketa niuspepa advertisem datfala event and Olketa Bible Student givimaot winim 500,000 invitation pepa. Olketa streetcar and private vehicle garem olketa banner wea advertisem convention hia.

Lo Saturday, August 25, Brata Rutherford givim wanfala tok wea garem title “Sheep and Goats.” Datfala tok storyim klia olketa “sheepsheep” nao,  hem olketa pipol wea raeteous wea bae laef olowe lo paradaes earth. Brata Rutherford talem tu resolution wea sei “A Warning.” Disfala resolution, tok againstim Christendom and encouragem olketa wea garem gudfala heart for go aot from “Bigfala Babylon.” (Rev. 18:​2, 4) Bihaen, Olketa Bible Student evriwea lo world distributim staka million copy blo datfala resolution.

Lo last day blo datfala convention, Brata Rutherford givim pablik tok wea garem title “All Nations Marching to Armageddon, but Millions Now Living Will Never Die,” and winim 30,000 nao herem datfala tok. Olketa Bible Student haerem Los Angeles Stadium wea olketa just wakem, bikos staka pipol interest for kam lisin. For mek sure evriwan herem, olketa brata iusim laod speaker system blo stadium, wea hem niu technology lo datfala taem. Staka tu herem program hia lo radio.

Lo year 1923, bigfala increase saed lo preaching waka hem kamap lo Africa, Europe, India, and South America. Lo India, nomata Brata Adavimannathu Joseph hem lukaftarem waef and sixfala pikinini blo hem, hem help lo waka for producem olketa literature lo Hindi, Tamil, Telugu, and Urdu.

Lo Sierra Leone, tufala Bible Student, Alfred Joseph and Leonard Blackman raet lo world hedquarter lo Brooklyn, New York, for askem samwan for kam helpem olketa. Lo April 14, 1923, tufala kasem ansa. Alfred sei: “Lo wanfala Saturday naet, mi kasem unexpected phone kol.” Hem herem wanfala laod voice, hem ask, “Iu nao man wea raet go lo Watch Tower Society and ask for eni preacher?” Alfred sei “Yes.” William Brown sei: “Well, olketa sendem mi kam.” Datwan hem voice blo William Brown. Hem arrive lo datfala day from Caribbean. Hem witim waef blo hem, Antonia and tufala young dota blo tufala, Louise and Lucy. Lo next day nomoa, olketa brata meetim hem and famili blo hem.

Alfred sei: “Lo next morning nomoa, taem mi and Leonard gohed discussim Bible olsem mifala savve duim evri week, then seke nomoa wanfala tol man standap lo door. Hem Brata Brown. Hem brata wea strong lo truth and hem laek for givim pablik tok lo next day.” Hem no even kasem wan month, Brata Brown givimaot evri literature wea hem tekem kam. And no long taem bihaen, hem kasem winim 5,000 buk, and hem givimaot evriwan tu. Bat pipol no ting lo Brata Brown olsem  man for salem buk. Lo full taem wea hem gohed strong for servem Jehovah, lo olketa tok wea hem givim, hem evritaem iusim Bible, dastawe pipol savve kolem hem lo Bible Brown.

Lo Germany, olketa brata disaed for muv aot from branch office wea stap lo Barmen bikos hem barava smol. And tu, olketa brata herem dat army blo France klosap for tekovarem datfala city. Olketa Bible Student faendem wanfala building lo Magdeburg, wea barava fitim for olketa duim printing waka lo there. Lo June 19, olketa finis for pakim ap olketa printing equipment and evri nara item and muv go lo niu Bethel lo Magdeburg. Lo next day, bihaen olketa brata talem go lo world hedquarter dat olketa muv finis, niuspepa talem dat France hem tekovarem datfala city lo Barmen. Olketa brata luksavve hao Jehovah protectim and blessim waka wea olketa duim.

Lo Brazil, Brata George Young, wea travel lo staka ples for preachim gud nius, setimap wanfala niu branch and start for pablisim The Watch Tower lo Portuguese. Insaed lo tu-thri month nomoa, hem givimaot winim 7,000 literature. Sarah Ferguson hapi tumas taem Brata Young kam lo Brazil and visitim famili blo hem. Since 1899, Serah bin readim The Watch Tower, bat hem no garem chance for dedicate and baptaes. Tu-thri month bihaen, Sista Ferguson and fofala pikinini blo hem mekem disfala important disison for baptaes.

Taem hem klosap end lo year 1923, The Watch Tower blo December 15, 1923 storyim, hao olketa change wea kamap saed lo olketa meeting, ministry, and olketa convention hem garem positive effect lo Olketa Bible Student. Hem sei: “Hem isi for lukim dat olketa kongregeson . . . garem strong faith . . . Iumi mas redi for duim staka waka moa and gohed strong for servem Jehovah witim hapi during lo year 1924.”

Year 1924, hem nara interesting year for Olketa Bible Student. Olketa brata lo Bethel bin waka hard for samfala month for build lo wanfala plot land lo Staten Island, wea no farawe from hedquarter lo Brooklyn. Lo start blo 1924, olketa completim olketa building lo datfala niu area, and datwan helpem olketa brata for wan mind and preachim gud nius winim enitaem.