Chay watacho rurashgan cambiucuna hermanunchicunata yanapargan juc shongunola Jehovata adurapäcunanpaj. Chay wichancho, cada semana Mañacunapaj, Alabanapaj y Wilacunapaj reuniunmi cargan. Chaypäga Wilacamoj revistacho juc textuta tantiachergan chay reuniuncho yachacunapaj. Jinamanpis juc calendariucho yargurgan cada semanapaj juc texto Bibliapita, y cada junajpaj juc canción hermanunchicuna familianwan cantapäcunanpaj.

Chay wichan reuniuncunacho hermanunchicuna predicaciuncho ima pasashganpita “wilacärej’’, nircur Diosta agradecicur canciuncunata cantapäcoj y öraga Jehovata mañacärejpis. 1923 watacho, Eva Barney jipash 15 watayojlaraj caycaptin bautizacurgan, pay nin: “Mayganchipis predicashganchipita imalatapis wilacuyta munarga, ichircur cayno nipäcoj cä: ‘Diosta alapa agradecicö cuyamar yanapämashganpita’”. Waquin hermanucuna alapa cushicoj chayta rurar. Caytapis nin: “Edayashga turinchi Godwin imaypis wilacuyta munargan, ichanga alapa parlashganraycur warminga trajinpita chutaj jamacunanpaj”.

Cada quillacho juc cuti ruracargan Mañacunapaj, Alabanapaj y Wilacunapaj reuniuncuna. Chayno rurapäcushganpita, 1 abril 1923 watapaj Wilacamoj revista cayno nergan: “Chay reuniuncunachoga predicaciuncho ima pasashganpita hermanunchicuna más wilacärej y jucnin jucninpis shacyächinacärej, chaynopa juc shongunola carcaycänanpaj”.

Cay reuniuncuna Charles Martin hermanunchita alapa yanapargan. Payga 19 watayoj caycaptin Canadá naciuncho publicador cargan, paymi nin: “Chay reuniuncunacho waquin hermanucuna wasin wasin imano predicashganpita wilacushgancuna, yanapämargan nogapis preparado caycänäpaj Bibliapita runacunata yachachinäpaj”.

Predicaciunpis hermanunchicunata yanapargan jucnaynola Diosta sirvircaycänanpaj. 1 abril 1923 watapaj, Wilacamoj revista cayno nergan: “Juc shongunola Jehovata sirvinanchipaj, martes  1 mayo lapanchimi predicaj yargushun. Cananpitaga cada quillami chayno canga, chay junaj lapanchimi imaycanopapis predicananchi”.  

Chay wichancho jovinlaraj hermanunchicunapis predicargan. Hazel Burford cristianapis 16 watayojla cargan, paymi nin: “Bulletin jutiyoj publicaciuncho yanapacuycuna cargan imano predicanapaj. a Awilüwan cushi cushila mana faltaypa predicaj yargoj cä”. Ichanga mana yarpashganmi pasargan, pay nin: “Juc edayashga turi mana munarganchu runacunata predicanäpaj. Chay wichan waquin hermanucuna mana munarganchu mozo jipashcunapis predicar Diosta alabananchita” (Sal 148: 12, 13). Chayno captinpis Hazel jinala predicargan. Tiempuwanga Galaad escuela ishcay caj clasiman aywargan, y nircurna Panamá naciuncho misionerano sirvirgan. Tiempuwanga chay hermanucuna jucnopana yarpar galaycärergan predicaciunpita y jovincunapitapis.

Jinan marcacho y jatun asambleacunachopis hermanunchicunaga juc shongula carcaycargan, hasta waquin junajcunachoga predicapäcoj. Chaytami rurargan Winnipeg nishgan Canadá naciuncho. 31 marzo junajchoga lapan asambleaman aywajcuna predicapäcurgan. Chayta rurashgancunaga alipämi cargan. Chay watalacho 5 agosto junajpäga, Winnipeg marcacho ruracashgan asambleacho 7.000 runacunano aywapäcurgan, chaynoga manami imaypis Canadá naciuncho juc asambleapaj shuntacarganchu cargan.

18 al 26 de agosto junajcuna 1923 watacho juc asamblea ruracargan Los Ángeles nishgan California marcacho. Juc ishcay semanacuna pishiycaptin chay junajpaj, periodicucunacho wilacamurgan Testigucunapa asamblean cananpaj. Chaura hermanunchicunaga 500,000 invitaciuncunatano runacunata aypurgan. Jina quiquincunapa y waquincunapa carruncunachopis asambleapita letrerucunata lagaycurgan.

 Sábado 25 agostupäga wauguinchi Rutherford juc discursucho shumaj tantiachicamurgan “Pïcunataj uyshacunano y cabracunano” cashganta, nirganpis “uyshacunano” cajcunaga cuyaylapaj Paraisucho cawapäcunanpaj. Nircur anyapargan luta cristianucuna imata ruraycashganta y ali shonguyoj runacunataga shacyächergan ‘Jatuncaray Babiloniapita’ yargunanpaj (Apoc 18: 2, 4). Tiempuwanga juc tratadupis chay wilacuywan yargamurgan, y hermanunchicunaga entero munducho aypala copiacunata runacunata aypurgan.

Asambleapa último caj junajcho 30.000 runacunano wauguinchi Rutherfordpa discursunta wiyargan, temanga caymi cashga: “Lapan naciuncuna armagedunman chayaycan, ichanga chaychicaj canan cawajcunaga manami imaypis wanungachu”. Chaychicaj runacuna aywananpaj cajta yarpar hermanunchicunaga Los Ángeles marcacho jatun coliseuta alquilargan. Chaycho caycajcuna shumaj wiyananpäga coliseucho caycaj mushojlaraj soniduta utilizapäcurgan. Waquincuna ichanga radiupa chay programata wiyargan.

1923 watacho Testigucuna alapa mirargan África, Europa, India y Sudamérica caycaj naciuncunacho. India naciuncho Adavimannathu Joseph hermanunchi warminwan y sojta wamrancunawan yanapacurgan hindi, tamil, telugu y urdu rimaycunacho publicaciuncuna cananpaj.

Sierra Leona naciunchopis Alfred Joseph y Leonard Blackman hermanucuna, Brooklyn, Nueva York hermanunchicunaman cartata apachicamurgan más hermanucunata mandamunanpaj. 14 abril 1923 watapäga, mañacushgancunata hermanunchicuna contestargan. Alfred wilacun: “Sábado junaj chacaypami juc hermano gayamar nimargan: ‘¿Gamcu mañacushcanqui más hermanucunata mandamunanpaj?’ nir. ‘Au’ niptëmi, payga nimashga: ‘Nogatami mandamashga’. Payga William Brown wauguinchi cargan. Y chaylaraj Caribe marcapita chayamushga cargan warmin Antoniawan y ishcay warmi wamrancunawan Lois y Lucy jutiyoj. Paycunaga rasla hermanucunawan reguinacärergan”.

Alfred caytapis wilacun: “Juc tutacho Leonard jutiyoj runata Bibliapita yachaycächipté, ilajpita yurimurgan William Brown wauguinchi. Payga Diosta alapa cuyar, waraynilan juc discursuwan yachachicuyta munargan”. Chaypitapis payga juc quillalacho apashgan publicaciuncunata  runacunata aypur ushargan. Nircur ichiclacho 5.000 librucunano chasquirpis, rasla ushacächergan. Hermanunchi rurashganga manami librucunata ranticuycajnochu cargan, payga Jehovata sirvir imaypis Bibliawanmi yachachicamoj. Chaymi runacuna Brown el de la Biblia nir paytaga reguipäcoj.

Pero Barmen nishgan Alemania naciuncho caycaj Betelchoga walcajlanami yanapacuycargan, jina Francia naciunpita soldaducunapis chay marcata atacananpaj caycargan. Chaura hermanunchicunaga juc localtana ashirgan Magdeburgo marcacho publicaciuncunata imprimipäcunanpaj. Y 19 juniupäga hermanunchicuna imaycancunata y impriminanpaj maquinatapis alistashgana cargan Magdeburgo marcacho caycaj Betelman apananpaj. Nircur central mundial nishgancho caycajcunata wilarcuptin lapanta apashganpita, warayninga periodicucunacho wilacurgan Franciapita soldaducuna Barmen marcata atacashganta. Hermanunchicunaga ricargan Jehová yanapashganta y bendiciycashgantapis.

Brasil naciunchona George Young wauguinchi may chaypami predicaycargan. Jina juc sucursaltapis camacächir portugués rimaycho Wilacamoj revistata imprimir galaycurgan. Juc quillalacho 7,000 revistapitapis mastaraj runacunata aypushga cargan. Pay rurashganga, achcajtami yanapargan. Sara Ferguson warmiga 1899 watapita Wilacamoj revistata leiycargan, ichanga manami bautizacushgarächu cargan. Chaura George Young chayashganpita walca quillacunala pasariptin Sara chuscu wamrancunawan bautizacärergan.

Chay wata ushanancho, 15 diciembre 1923 watapita Wilacamoj revistacho wilacamurgan reuniuncunacho, predicaciuncho y asambleacunachopis cambiucuna cashgan imano yanapacushganta. Nergan: “Cay watacho lapan cambiucunaga alimi cashga. Chaymi camaricushgala caycäshun cushishgala y lapan shongunchiwan mushoj watacho Jehovata jinala sirviycänanchipaj”.

1924 wataga alapa cushicuypämi cargan hermanunchicunapaj. Brooklyn caycajcho yanapacoj hermanunchicunaga achca quillacunapami aruycargan sharcachinanpaj mushoj localcunata Staten Island marcacho. Chaytaga 1924 wata galaycunancho ushargan, y chay localcunaga yanapacurgan hermanunchicuna juc shongunola carcaycänanpaj y Diospa ali wilacuynincunapis may chaymanpis chayananpaj.