1923 huatapica Diospaj pueblota pushajcunaca huauqui panicuna tandalla cachunmi huaquin cambiocunata rurarcacuna. Por ejemplo The Watch Tower nishca revistapimi shuj verso ima nisha nishcata explicai callarircacuna. Chai versomantaca cada semana tiyaj Reunión de Oración, Alabanza y Testimonio nishca tandanacuipimi huauqui panicunaca yachacujcuna carca. Shinallataj chai punllacunapica shuj calendariotami rurajcuna carca. Chai calendariopimi cada semanapaj shuj verso, shinallataj cada punllapaj shuj canto tiyarca. Huauqui panicunaca chai cantocunataca paicunalla o familiahuan Bibliata estudiacushpami cantajcuna carca.

Tandanacuicunapica huaquin huauqui panicunaca predicacushpa ima experienciata charishcata ningapajmi oportunidadta charircacuna. Shujtaj huauqui panicunaca tucuicunapaj ñaupajpimi Jehová Diosta pagui nijcuna carca. Cantocunatapishmi cantajcuna carca. Huaquinpicarin Jehová Diostami mañajcuna carca. Pani Eva Barneyca 15 huatacunata charishpami 1923-pi bautizarirca. Paica: “Tandanacuipi parlanata munajcunaca shayarishpami ‘Taita Amito cꞌuyaj cashcamantami agradicisha nini’ nishpa parlai callarijcuna carca. Huaquin turi ñañacunaca tandanacuipi parlanatami achcata munajcuna carca. Por ejemplo, shuj yuyajlla turica siempremi tandanacuipi Diosta pagui nij carca. Pero chai turi achcata parlaj cashcamantami huaquinpica tandanacuita pushaj turica ashata pꞌiñarij carca. Chaita ricushpami turipaj huarmica paipaj ropamanta aisashpa tiyachij carca” nircami.

Congregacioncunaca quillapica shuj cutintami shuj especial tandanacuita charijcuna carca. The Watch Tower del 1 de abril de 1923 revistapica: “Chaupi tandanacuitaca huauqui panicuna paicunapaj experienciacunata cuchun, paicunaman animota cungapajmi utilizana can. Muyundij Allpapi tucuicuna chaillatataj rurashpami tandalla Diosta sirvi tucungacuna” nircami.

Chai tandanacuica 19 huatacunata charij huauqui Charles Martinpajca valishcami carca. Paica Canadá llajtamantami carca. Charlesca, “huauqui panicuna predicacushpa ima experienciacunata charishcata uyashpami jarcaicunata ima shina chꞌimbapuranata yacharcani” nircami.

Huauqui panicunaca predicacionman llujshishpami tandalla carcacuna. The Watch Tower del 1 de abril de 1923 revistapica: “Tucuicuna tandalla huillangapajca martes 1 de mayo de 1923-tami predicacionman llujshishun. Cada quillapaj primer martestami chaitaca rurashun. Tucui huauqui panicuna ima layapish huillangapajmi esforzarina can” nircami.

Jovencitocunapishmi predicangapaj esforzarijcuna carca. Pani Hazel Burfordca 1923 huatapica 16 huatacunatami charirca. Paica: “Bulletin nishca publicacionpica ima shina huillanatami yachachij carca. a Chaimi ñucapish, ñuca abuelitopish chai yuyaicunahuan huillaj carcanchij. Pero shuj mayorlla turica ñuca crishcacunamanta predicachunca mana munarcachu. Chai punllacunaca maijancunaca ‘jovencitocunaca mana predicanachu can’ nishpami yuyajcuna carca nircami” (Salmo 148:​12, 13). Shinapish Hazelca predicashpami catirca. Qꞌuipacarin Escuela de Galaad clase 2-man richunmi paitaca invitarcacuna. Chai escuelaman rishca qꞌuipaca Hazelca Panamá llajtapimi sirvirca. Huatacuna pasajpimi huauqui panicunaca jovencitocunapish Diosmanta huillana cashcata intindircacuna.

Huauqui panicunaca jatun asambleacunaman, uchilla asambleacunaman rishpami tandalla carcacuna. Por ejemplo, Canadá llajtapi ima tucushcata ricushun. 31 de marzotami asambleaman rij tucui huauqui panicunaca predicacionman llujshircacuna. Cutin chai llajtallapitaj 5 de agosto de 1923-pi tiyashca asambleamanca 7.000 gentecunami rircacuna. Canadá llajtapi tiyashca asambleacunapica chashna achca gentecunaca mana tandanacushcachu carca.

18-26 de agosto de 1923-pica los Ángeles, California llajtapimi shuj valishca asamblea tiyarca. Chai asamblea tiyachun huaquin semanacuna faltajpimi periodicocunapi chai asamblea tiyanata huillarcacuna. Shinallataj huauqui panicunaca 500.000 yalli invitacioncunatami curcacuna. Paicunapaj carrocunapipish buscunapipishmi letrerocunata churarcacuna.

 Sábado 25 de agostotaca huauqui Rutherfordca Jesús parlashca “chivocunamanta, ovejacunamantami” shuj conferenciata curca. Paica “oveja shina cajcunaca Jehová munashca shina causashcamantami cai Allpa Paraíso tucujpi huiñai huiñaita causangacuna” nircami. Shinallataj paica panda religioncuna llullacunata yachachijcuna cashcata ricuchingapaj, alli shunguta charij gentecunata Babilonia jatun pueblomanta llujshichun animangapajmi shuj conferenciata curca (Apocalipsis 18:​2, 4). Chai qꞌuipaca huauqui Rutherford cushca conferenciamantami shuj publicacionta rurarcacuna. Muyundij Allpapi caj Estudiantes de la Bibliaca achca gentecunamanmi chai publicacionta curcacuna.

Asamblea tucuri punllaca 30.000 gentecunami huauqui Rutherfordpaj conferenciata uyarcacuna. Paica achca gentecuna Armagedonpi huañujpipish huaranga huaranga gentecuna huiñai huiñaita causai tucushcatami intindichirca. Chai conferenciata achca gentecuna uyai tucuchunca huauquicunaca cunanlla shayachishca coliseotami arrendarcacuna. Shinallataj tucuicuna conferenciacunata alli uyai tucuchunca mushuj aparatocunatami utilizarcacuna. Achca gentecunaca chai conferenciataca radiopipishmi uyarcacuna.

1923-pica Africapi, Europapi, Indiapi, Sudamericapica huauqui panicunaca achcatami huillacurcacuna. Por ejemplo, Indiapica Adavimannathu Joseph nishca huauquica huarmiyuj, 6 huahuacunayuj cashpapish hindi, tamil, telugu, urdu nishca shimicunapi publicacioncuna tiyachunmi ayudarca.

Cutin, Sierra Leona llajtaman ashtahuan huillajcunata cachachunmi Alfred Joseph y Leonard Blackman huauquicunaca Central Mundialman shuj cartata cacharcacuna. 14 de abril de 1923 ima tucushcata ricushun. Alfredca cashnami nirca: “Sábado tuta cajpimi ñucataca telefonopi cayarcacuna. Shuj runaca ‘¿canchu Sociedad Watch Towerman ashtahuan huillajcunata minishtinchij nishpa shuj cartata cacharcangui?’ nishpami tapurca. Ari nijpimi paica, ‘ñucatami chai llajtaman richun cacharcacuna’” nirca. Chai runaca William Brownmi carca. Paica recienllami Caribepi paipaj huarmihuan, paipaj ishqui ushushicunahuan huillashpa tigramushca carca. Paicunaca ratomi Sierra Leona llajtaman rircacuna.

Alfredca cashnapishmi nirca: “Cayandij punlla Leonardhuan Bibliamanta parlanacucujpimi huauqui  William Brownca ñucanchij huasiman chayarca. Paica Jehová Diosta achcata cꞌuyaj cashcamantami cayandij punllaca shuj conferenciata cusha nirca. Huauqui Brownca manaraj shuj quilla chai llajtapi cashpami tucui pai charishca publicacioncunata ña saquishca carca. Paiman 5.000 librocunata cachajpipish ratomi chai librocunataca gentecunaman saquirca. Pero gentecunaca huauqui Brown librocunata cꞌatushpa purij cashcallataca mana yuyarcacunachu. Paica siempremi Bibliata utilizashpa conferenciacunata cuj carca. Chaimantami gentecunaca paitaca Bibliamanta yachachij Brown nishpa rijsijcuna carca”.

Cutin Alemania llajtapi tiyaj sucursalca uchilla cashcamantami achcacunaca chaipica mana sirvi tucurcacuna. Ashtahuanpish Franciamanta soldadocunami chai ciudadta dueñoyasha nircacuna. Chaimi huauquicunaca Magdeburgopi tiyaj jatun huasiman sucursalta pasachinata decidircacuna. Chaipica publicacioncunatapishmi rurai tucurcacuna. 19 de juniotaca huauquicunaca librocunata rurangapaj maquinacunata, chaipi tucui imalla tiyashcacunatami chaiman ña pasachishcacuna carca. Chai qꞌuipaca Central Mundialmanmi chai cambiota rurashcata huillarcacuna. Cayandij punllaca Francia soldadocunaca ñaupa sucursal tiyaj ciudadtami dueñoyarcacuna. Chaita ricushpami huauquicunaca Jehová Dios paicunata cuidacushcata intindircacuna.

Shinallataj George Young shuti huauquica tucui Brasil llajtapimi huillarca. Paica chai llajtapi shuj sucursal tiyachunpishmi ayudarca. Chai sucursalpimi paica The Watch Tower revistata portugués shimipi imprimi callarirca. Asha quillacunapimi paica 7.000 publicacioncunata gentecunaman cushca carca. Sara Ferguson huarmica 1899 huatamantami The Watch Tower revistata liyicushca carca. Shinapish Brasilpi testigocuna manaraj tiyashcamantami paica manaraj bautizarishca carca. Pero huauqui George Young Brasilman chayajpica paipish paipaj chuscu huahuacunapishmi bautizarircacuna.

The Watch Tower del 15 de diciembre de 1923 revistapica tandanacuicunapi, predicacionpi, asambleacunapi cambiocuna tiyashcamanta huauqui panicuna achcata beneficiarishcatami nirca. Shinallataj “congregacioncunaca espiritualmente sinchimi can. Jehová cushca macanacunata churarishpa catij huatapi paita tucui shunguhuan sirvishpa catishunchij” nircami.

1924 huatapish Estudiantes de la Bibliapajca valishca huatami cagrirca. Central Mundialpi caj huauquicunaca Staten Islandpi tiyaj allpapimi shuj jatun huasita shayachishcacuna carca. Huata 1924 callaricujpimi chaipi huasichinataca tucuchircacuna. Chai huasicunami huauqui panicuna tandalla cachun, Diospaj alli huillaicuna huillarishpa catichun ayudarca.