Mu caka ceneci, gulu ya Yahova yacita macinjo akuti aphedza anyakupfundza Bhibhlya toera apitirize kumulambira mwakuphatana. Mu revista ya Ncenjezi mwatoma kuikhwa mphangwa zakuti mbazidapfundzwa masumana onsene pa Nsonkhano wa Phembero na Kusimba Yahova. Kusiyapo pyenepi, Anyakupfundza Bhibhlya atoma kudhinda kalendaryo yakuti ikhali na malemba akhafuna kupfundzwa pa sumana ibodzi na ibodzi pa misonkhano na nyimbo zikhafuna kuimbwa ntsiku ibodzi na ibodzi pa pfundziro ya munthu paekha peno pa pfundziro ya banja.

Pa misonkhano yawo, Anyakupfundza Bhibhlya akhalonga pinthu pidaacitikira m’basa ya m’munda, kupereka takhuta kuna Yahova, kuimba nyimbo na kucita phembero. Mulongo Eva Barney adabatizwa mu caka 1923 pikhali iye na pyaka 15 pyakubalwa alonga: “Munthu angafuna kutawira akhalamuka mbalonga: ‘Ine ndisapereka takhuta kuna Mbuya thangwi ya pinthu pyonsene pyadidi pidacita iye kuna ine.’” Abale anango akhakomerwa kakamwe kutawira. Mulongo Barney athimiza: “M’bale wathu wakufunika Godwin akhali na mathangwi mazinji toera kupereka takhuta kuna mbuya. Mbwenye nkazace angaona kuti m’bale anatsogolera nsonkhano aneta na kubvesera, iye akhakweya kazako ya mamunace, buluka penepo akhamatama mbakhala pantsi.”

Mpingo ubodzi na ubodzi ukhacita nsonkhano kabodzi pa mwezi. Pa nsonkhano unoyu pakhacitwa phembero, pontho pakhaimbwa nyimbo zakusimba Yahova. Ncenjezi wa 1 ya Abril ya 1923 walonga tenepa thangwi ya nsonkhano unoyu: “Hafu ya ndzidzi wa nsonkhano ikhafunika kuphatisirwa toera kutawira, kulonga pinthu pidacitikira abale na alongo m’basa ya m’munda na kuwangisa amwazi mphangwa. . . . Misonkhano ineyi yakuwangisa ikhatiphedza toera tikhale akuphatana kakamwe.”

Charles Martin, m’mwazi mphangwa wa pyaka 19 pyakubalwa wa ku Kanadha, aphedzeka kakamwe na misonkhano ineyi. Iye alonga: “Ndi pa misonkhano ineyi padatoma ine kupfundza pinthu pikhafuna ine kulonga pakumwaza mphangwa nyumba na nyumba. Kazinji kene anthu akhalonga pinthu pidaacitikira pakumwaza mphangwa nyumba na nyumba. Pyenepi pyandiphedza toera kudziwa pinthu pikhafuna ine kulonga, pontho kuti mbidatawira tani anthu angandigwanda mafala.”

Abale na alongo akhali akuphatana kakamwe thangwi yakukhala na ntsiku zakumwaza mphangwa. Ncenjezi wa 1 ya Abril ya 1923, walonga: “Toera tikhale akuphatana m’basa ibodzi ene . . . , Ncipiri, ntsiku 1 ya Maio ya 1923, yasankhulwa toera kukhala ntsiku ya basa yakumwaza mphangwa. Munjira ibodzi ene, cipiri cakutoma ca miyezi yonsene mbidaphatisirwa toera kukhala ntsiku yakumwaza mphangwa. . . . Abale na alongo onsene mu mpingo asafunika kucita basa ineyi.”

Anyakupfundza Bhibhlya akuti akhali aphale na atsikana, akhacitambo basa ineyi. Hazel Burford, wakuti akhali basi ene na pyaka 16 pyakubalwa mu ndzidzi unoyu alonga: “Boletim ikhali na mafala akuti tikhafunika kuakoya munsolo toera kuaphatisira pakumwaza mphangwa. a Ine na yavu wanga tikhamwaza mphangwa mwaphinga.” Ngakhale tenepo, Mulongo Burford adzumatirwa na pinthu pidalonga m’bale unango thangwi ya basa yace yakumwaza mphangwa. Iye alonga: “M’bale unango wakukalamba akhaona kuti ine nee ndikhafunika kucedza na anthu. Mu ndzidzi unoyu anango nee akhabvesesa kuti Anyakupfundza Bhibhlya onsene, kuphatanizambo ‘aphale na atsikana’ akhafunika kusimba Nciti wathu Wankulu.” (Mas. 148:12, 13) Mbwenye Mulongo Burford apitiriza kumwaza mphangwa. Iye acemerwa toera akurusari Xikola ya Jiliyadhi, buluka penepo aenda katumikira ninga misionaryo ku Panamá. Mukupita kwa ndzidzi, abale acinja maonero awo thangwi ya aphale na atsikana akhamwaza mphangwa.

Misonkhano ya gawo yaphedzambo abale na alongo athu toera akhale akuphatana. Mizinji mwa misonkhano ineyi ikhali na ntsiku yakumwaza mphangwa. Mwacitsandzo, nsonkhano udacitika ku Winnipeg, Kanadha, onsene adagumanika pa nsonkhano unoyu aphembwa toera amwaze mphangwa mu nzinda unoyu ntsiku 31 ya Março. Anthu azinji amwazirwa mphangwa ntsiku zenezi zakupambulika. Mu ntsiku 5 ya Agosto anthu cifupi na 7.000 agumanika pa nsonkhano unango ku Winnipeg. Unoyu ukhali nsonkhano udakhala na anthu azinji kakamwe kupiringana misonkhano inango idacitwa ku Kanadha.

 Nsonkhano ukulu kakamwe wa atumiki a Yahova wa caka ca 1923 wacitwa ntsiku 18-26 ku Los Angeles, California. Masumana mangasi mbidzati kufika ntsiku ya nsonkhano, Anyakupfundza Bhibhlya acita pidziwiso m’majornali, pontho amwaza micemerero yakupiringana 500.000. Kusiyapo pyenepi, iwo akhakolari matsamba m’mamaxibhombo na m’makaru awo toera kudziwisa nsonkhano unoyu.

Nsabudu, ntsiku 25 ya Agosto, M’bale Rutherford acita nkhani ya nsolo wakuti “Mabira na Mbuzi,” pontho mu nkhani ineyi iye alonga kuti “mabira” ndi anthu a mitima yadidi akuti anakhala mparaizu pa dziko yapantsi. Kusiyapo pyenepi, iye aleri mphangwa zikhacemerwa “Cenjezo.” Mu mphangwa zenezi iye alonga thangwi ya uphemberi wauthambi, pontho acenjeza anthu a mitima yadidi toera abuluke mu “Bhabhilonya Wankulu.” (Apok. 18:2, 4) Mukupita kwa ndzidzi, Anyakupfundza Bhibhlya aphinga agawira matratadho mazinji kakamwe akuti akhali na mphangwa zenezi.

Pa ntsiku yakumalisa ya nsonkhano, anthu akupiringana 30.000 abvesera M’bale Rutherford pikhacita iye nkhani ya nsolo wakuti “Anthu Onsene Ali Kuenda ku Armajedhoni, Mbwenye Azinji Akuti Lero Ali m’Maso Cipo Anafa.” Nakuti akhadikhira anthu azinji, Anyakupfundza Bhibhlya alugari estádio ya ku Los Angeles yakuti ikhadamala kwene kumangwa. Toera anthu onsene akwanise kubvesera, abale aphatisira makuluna a mu estádio akuti akhatoma kwene kuphatisirwa mu ndzidzi unoyu. Anthu anango azinji abvesera nsonkhano unoyu mu radhyo.

Mu caka ca 1923, mphangwa zadidi zafikambo ku Afrika, Europa, Indiya, na ku América do Sul. Ku Indiya, mu ndzidzi wakuti Adavimannathu. J. Joseph akhali na nkazi na ana atanthatu, aphedzera basa yakucita mabukhu mu cilongero ca Hindi, Tamil, Telugu na Urdu.

Ku Serra Leoa, Anyakupfundza Bhibhlya akhacemerwa Alfred Joseph na Leonard Blackman alemba tsamba yakuphemba ciphedzo mbaitumiza ku ofesi ikulu ya dziko yonsene ku Brooklyn, Nova York. Pa ntsiku 14 ya Abril ya 1923 phembo yawo yatawirwa. M’bale Alfred alonga: “Mukupita kwa ndzidzi, Nsabudu namasiku ndamenyerwa ntokodzi mwakukhonda dikhira.” Iye abva munthu mbabvundza mwakugaluza: “Ndimwe adatumiza tsamba ku Sociedade Torre de Vigia toera kuphemba amwazi mphangwa?” Alfred atawira: “Inde.” M’bale William R. Brown alonga: “Iwo atuma ine.” Ntsiku ineyi iye akhabuluka ku Caribe pabodzi na nkazace, Antonia na anace atsikana, Louise na Lucy.  Abale nee adikhira ndzidzi uzinji toera kutambira m’bale Brown na banjace.

M’bale Alfred athimiza: “Mangwana mwace namacibese, ine na Leonard tikhacita pfundziro ya Bhibhlya ikhacita ife masumana onsene, buluka penepo, taona mamuna wakulapha pansuwo. Akhali M’bale Brown. Iye akhali m’mwazi mphangwa waphinga kakamwe, pontho akhafuna kucita nkhani yapakweca mangwana mwace.” Mwezi mbudzati mala, M’bale Brown akhadagawira mabukhu onsene adabweresa iye. Mwakukhonda dembuka, iye atambira mabukhu anango 5.000, mbwenye mu ndzidzi wakucepa iye akhafuna pontho anango. Mbwenye m’bale Brown nee akhadziwika ninga nyakugulisa mabukhu. Mu umaso wace onsene ninga ntumiki waphinga wa Yahova, kazinji kene iye akhaphatisira malemba mu nkhani zace, na thangwi ineyi anthu akhancemera Brown Bhibhlya.

Abale ku Alemanya abuluka ku Bheteli ya ku Barmen thangwi ikhali ing’ono. Kusiyapo pyenepi, iwo akhadabva kuti anyankhondo a Fransa mbadaenda mu nzinda unoyu toera kumenya nkhondo. Anyakupfundza Bhibhlya agumana mbuto ku Magdeburg yakuti ikhali yadidi toera kudhindira mabukhu. Pa ntsiku 19 ya Junho abale akhadamala kupaka pinthu pikhafuna kuphatisirwa toera kudhinda mabukhu na pinthu pinango toera kuenda ku Bheteli ipswa ku Magdeburg. Pa ntsiku ibodzi ene idadziwisa ofesi ikulu kuti abale amala fuluka, majornali akhalonga kuti dziko ya Fransa yakunda nzinda wa Barmen. Abale aona kufuluka kweneku ninga cipangizo ca nkhombo za Yahova na citsidzikizo cace.

Ku Bhrazil, George Young, adacita ulendo wakulapha kakamwe toera kamwaza mphangwa zadidi atomesa Bheteli ipswa, pontho atoma kugawira Ncenjezi Ncizungu. Nkati mwa miyezi yakucepa, iye agawira mabukhu akupiringana 7.000. Pidafika iye ku Bhrazil, Sarah Ferguson atsandzaya kakamwe pidaenda iye kaona banja yawo. Iye akhaleri Ncenjezi kutomera mu caka ca 1899, mbwenye akhadzati kuperekeka na kubatizwa. Pakupita miyezi mingasi, mulongo Ferguson na anace anai abatizwa.

Pakumala kwa caka, Ncenjezi wa 15 ya Dezembro ya 1923 walonga kuti macinjo a misonkhano, basa yakumwaza mphangwa na misonkhano ya gawo aphedza tani Anyakupfundza Bhibhlya. Ncenjezi unoyu walonga: “Ndi pyakukhonda nentsa kuona kuti abale na alongo m’mipingo ali na cikhulupiro cakuwanga . . . Natenepa mbatipirizeni kuphata basa mbatitumikira Mulungu mwaphinga na mwakutsandzaya mu caka ca 1924.”

Caka ca 1924 cakhala cakutsandzayisa kakamwe kuna Anyakupfundza Bhibhlya. Miyezi mizinji abale ku Bheteli asasanyira mbuto inango ku Staten Island yakuti ikhali dhuzi na ofesi ikulu ku Brooklyn. Nyumba zidamangwa pa mbuto ineyi ipswa zamaliswa mu caka ca 1924, pontho zaphedza abale na alongo toera akhale akuphatana.