Na yâ ti ngu ni, bungbi ti Jéhovah asara ambeni changement so a-aidé aWamandango Bible ti voro Nzapa beoko ahon ti kozo. Na yâ ti Tour ti Ba Ndo, a komanse ti sigi na acommentaire so afa nda ti aversê so ala yeke bâ ni na ngoi ti Bungbi ti sambela, ti sepela nga ti mungo témoignage, so ala yeke sara ni yenga oko oko. A-Wamandango Bible asigi nga na mbeni calendrier so na yâ ni a fa versê so ala yeke sara lisoro na ndö ni yenga oko oko na ngoi ti bungbi, nga na mbeni bia ndali ti lango oko oko so ala peut ti he ni na ngoi ti mandango ye ala wani wala na sewa.

Na ngoi ti abungbi, aWamandango Bible ayeke sara “témoignage” na ndö ti mbeni ye so asi na fango tënë, ala yeke fa ye so ala kiri singila na Jéhovah ndali ni, ala yeke he mbeni bia wala même ala yeke sambela. Eva Barney, so awara batême na 1923 na ngu 15, atene: “Tongana mo ye ti sara mbeni témoignage, mo yeke londo nga mo komanse na mara ti tënë so: ‘Mbi ye ti kiri singila na Seigneur ndali ti anzoni ye kue so lo sara na mbi.’” Ambeni ita aye mingi ti sara témoignage. Ita-wali Barney akiri atene: “Ita-koli Godwin, so ayeke mbakoro, so e ye lo mingi, ayeke lani na aye mingi ti kiri singila na Seigneur ndali ni. Me tongana wali ti lo abâ so ita so ayeke mû li ni akomanse ti gi bê ti lo, lo yeke gbu bongo ti koli ti lo lo gboto ni kete na koli ni ayeke zia ti sara tënë na lo duti.”

Fani oko na yâ ti nze, congrégation oko oko ayeke sara mbeni Bungbi ti sambela, ti sepela nga ti mungo témoignage so ayeke nde. Tour ti Ba Ndo ti lango 1 ti avril 1923 asara tënë na ndö ti bungbi so, atene: “A yeke nzoni a mû ndambo ti ngbonga ti bungbi ni ti sara témoignage na ndö ti kua ti fango tënë nga ti kpengba awafango tënë. . . . E bâ so abungbi so akpengba zo so ayeke sara si aita aga nduru mingi na mba.”

Ita Charles Martin, mbeni wafango tënë so ayeke na ngu 19 na Vancouver, na Canada, abâ lani nzoni mingi na lege ti abungbi so. Ambeni ngoi na pekoni lo tene: “A yeke na ngoi ti abungbi so la ti kozoni mbi hinga tënë so mbi yeke tene na ngoi so mbi yeke fa tënë da na da. Fani mingi, mbeni zo ayeke fa mbeni ye so asi na ngoi ti fango tënë da na da. A aidé mbi ti hinga tënë so mbi yeke tene nga tongana nyen la mbi yeke kiri tënë na atënë nde nde so azo ayeke tene ti kanga lege na e ti fa tënë.”

“Alango ti fango tënë” asara nga si aita aduti beoko mingi. Tour ti Ba Ndo ti lango 1 ti avril 1923 atene lani tokua so: “Ti tene e kue e duti beoko na yâ ti oko kua . . . , a mû mardi, lango 1 ti mai 1923, ti tene azo kue afa tënë. Tongaso, na pekoni kozo mardi ti nze oko oko kue ayeke duti lango ti fango tënë . . . A yeke nzoni aita kue ti congrégation amû mbage na kua so.”

Même aWamandango Bible so ade maseka ayeke fa lani tënë. Hazel Burford, so ayeke lani gï na ngu 16 na ngoi ni so, atene: “Na yâ ti Bulletin, e yeke wara lani akode ti fango tënë so e doit ti bata na li. a Mbi na âta-koli e yeke sara lani akua so mingi.” Ye oko, li ti Ita-wali Burford akpe na ye so mbeni ita-koli apensé na ndö ti kua ti fango tënë ti lo. Lo tene: “Mbeni ita-koli so ayeke mbakoro ake na kuru go ti tene mbi fa tënë na azo. Na ngoi ni so, ambeni ita acomprendre ape so aWamandango Bible kue, so ti tene ‘amaseka-koli nga na amaseka-wali,’ adoit ti sepela Lo so acréé e so ayeke kota mingi.” (Ps. 148:​12, 13). Me Ita-wali Burford azia ti fa tënë ape. Ambeni ngoi na pekoni, lo gue na klase use ni ti Ekole ti Galaad na a tokua lo missionnaire na Panama. Tongana ngoi ayeke hon, aita so achangé bango ndo so ala yeke na ni na ndö ti amaseka so ayeke fa tënë.

Akota bungbi a-aidé nga aita ti duti beoko mingi. Na ngoi ti gbâ ti akota bungbi so, a mû lani mbeni lango ti fa tënë. Na tapande, na ngoi ti kota bungbi so a sara na Winnipeg, na Canada, a hunda na azo kue so aga na kota bungbi ni ti fa tënë na yâ ti gbata ni na lango 31 ti mars. A wara lege ti sara lisoro na gbâ ti azo na ngoi ti fango tënë so ayeke nde so, na gbâ ti anzoni ye aga na pekoni. Na lango 5 ti août, wungo ti azo 7000 tongaso aga na mbeni kota bungbi ni na Winnipeg. Na ngoi ni so, kota bungbi so ayeke kota bungbi so azo aga dä mingi na Canada.

Kota bungbi ti aTémoin ti Jéhovah so ayeke kota mingi, so a sara ni na ngu 1923, ayeke ti so a sara ni na lango 18 ti si na lango 26 ti août na Los Angeles, na Californie. Na yâ ti ayenga so  aga kozo na kota bungbi ni, a sara tënë ni na yâ ti ambeti-sango nga aWamandango Bible akangbi ambeti ti tisango ndo ahon 500000. A kanga abanderole ti kota bungbi ni na terê ti abus na ataxi nga na terê ti a-oto ti azo.

Na samedi lango 25 ti août, Ita Rutherford amû mbeni diskur so li ni ayeke “Ataba na angasa,” na Anglais, so na yâ ni lo fa polele so “ataba” ayeke azo ti mbilimbili so ayeke vivre ande na yâ ti Paradis na ndö ti sese. Lo mû nga mbeni diskur nga lo diko mbeni mungo yanga so a iri ni “Gbotongo mê.” Mungo yanga so afa na gigi nda ti a-eglize so atene ala yeke aChrétien nga awa azo so aye ti hinga Nzapa ti sigi na yâ ti “Babylone, Ngangu gbata”. (Apoc. 18:​2, 4). Na pekoni, aWamandango Bible so ayapu na yâ ti dunia kue akangbi atract so mungo yanga so ayeke na yâ ni kutu mingi na azo.

Na ndangba lango ti kota bungbi ni, azo ahon 30000 amä kota diskur so Ita Rutherford amû na Anglais, so li ni ayeke “Amara kue ayeke gue na Harmaguédon, me azo kutu na kutu so ayeke fadeso na fini ayeke kui ande pëpe.” So aWamandango Bible ahinga so azo ayeke ga ande mingi, ala loué mbeni kota ndo ti sarango ngia so a leke ni fini fini na Los Angeles. Ti sara kue ti tene azo amä tënë nzoni, aita asara kua na ahaut-parleur ti ndo ti sarango ngia ni, so ayeke lani afini gbakuru na ngoi ni so. Azo mingi amä kapa ni na radio.

Na yâ ti ngu 1923, kua ti fango tënë amû ndo mingi na Afrika, Europe, Inde nga na Amérique du Sud. Na Inde, Adavimannathu Joseph ayeke bâ lege ti wali ti lo nga na amolenge ti lo omene nga lo yeke mû maboko na sigingo na ambeti na yanga ti Hindi, Tamil, Telugu nga na Urdu.

Na Sierra Leone, aWamandango Bible Alfred Joseph nga na Léonard Blackman atokua mbeti na kota ndokua ti aWamandango Bible na Brooklyn, na New York, ti hunda mungo maboko. Na lango 14 ti avril 1923, a kiri tënë na ala. Alfred atene: “Na mbeni samedi so l’heure ahon na bï, mbi wara mbeni appel so mbi ku terê ti mbi na ni ape.” Lo mä mbeni nene go so ahunda lo, atene: “Eskê mo la mo tokua mbeti na Société Watch Tower, mo hunda awafango tënë so?” Alfred atene: “En.” Zo ni atene: “Mbi la a tokua mbi.” A yeke lani go ti William Brown. Lo londo na Caraïbes la lo ga, lo na wali ti lo Antonia, nga na amolenge ti ala ti wali, Louise na Lucy. A ninga ape aita awara terê na Ita Brown na sewa ti lo.

 Alfred akiri atene: “Gï na ndade ni na ndapre, na ngoi so mbi na Léonard e yeke sara lisoro na ndö ti Bible tongana ti so e yeke sara ka yenga oko oko, mbeni yongoro koli aluti na porte ti e. A yeke lani Ita Brown. Lo yapu lani mingi ti fa tâ tënë, tongaso lo ye ti mû mbeni diskur na ndade ni.” A sara nze oko ape, Ita Brown akangbi ambeti kue so lo ga na ni. Kete na pekoni, lo wara ambeti 5000 na a ninga ape a bezoin encore gbâ ti ambeti. Me a hinga lani Ita Brown tongana zo ti kango mbeti ape. Na yâ ti gbâ ti angu so lo yapu na kua ti Jéhovah, lakue lo yeke sara tënë ti Bible na yâ ti lisoro ti lo na azo, a sara si azo airi lo Brown Bible.

Na Allemagne, aita amû desizion ti quitté Da ti Béthel so ala yeke na yâ ni na Barmen ndali ti so ayeke kete mingi. Ala mä nga so aturugu ti France aga nduru ti mû gbata ni. A-Wamandango Bible awara mbeni da na Magdeburg so na bango ni a lingbi na kua ti petengo ambeti ti ala. Na lango 19 ti juin, aita ahunzi kangango akungba ti imprimengo na mbeti nga na ambeni gbakuru ti kua na ala kiri na yâ ti fini Béthel so ayeke na Magdeburg. Lango oko na peko ti so a tene na kota ndokua ti e so aita akiri na yâ ti fini Béthel ni awe, ambeti-sango afa so aturugu ti France amû gbata ti Barmen awe. Aita akiri singila na Jéhovah so abata ala nga a-aidé ala.

Na Brésil, George Young, so avoyagé mingi ti fa nzoni tënë, azia na sese mbeni fini filiale na a komanse ti sigi na Tour ti Ba Ndo na Portugais. A sara nze mingi ape, lo kangbi ambeti ahon 7000. Terê ti Sarah Ferguson anzere lani mingi na ngoi so Ita Young asara vizite na sewa ti ala. Lo komanse ti diko Tour ti Ba Ndo depuis 1899, me lo wara batême ape ti fa so lo mû terê ti lo na Nzapa awe. Anze mingi ape na pekoni, Ita-wali Ferguson na amolenge ti lo osio awara batême.

Na hunzingo ti ngu ni, Tour ti Ba Ndo ti lango 15 ti décembre 1923 afa tongana nyen la achangement so aWamandango Bible asara na yâ ti abungbi ti ala, fango tënë nga na akota bungbi aga na anzoni ye. A tene: “A yeke polele so acongrégation ayeke na kpengba mabe. Zia e duti nduru ti sara kua mingi nga e ngbâ ti yapu ti sara na Nzapa na ngia na yâ ti ngu so ayeke ga.”

Ngu 1924 ayeke lani mbeni ngu so aWamandango Bible asara nga apendere ye dä mingi. A sara anze mingi awe la aita ti Béthel ayeke sara kua na ndö ti mbeni terrain so ayeke na Staten Island, so ayeke nduru na kota ndokua ti ala na Brooklyn. A hunzi ti leke ada na ndö ti fini terrain ni na tongo nda ti ngu 1924, na a aidé aita ti dunia kue ti duti beoko nga ti fa nzoni tënë na mbeni fason so ade a sara ni lâ oko ape.