Durante tinan 1923, organizasaun halo mudansa balu neʼebé ajuda atu hametin liután Estudante Bíblia sira-nia unidade. Livru Haklaken hahú fó sai esplikasaun kona-ba eskritura neʼebé sira sei koʼalia hamutuk durante reuniaun ida naran “Reuniaun atu halo orasaun no hahiʼi Jeová”. Liután neʼe, Estudante Bíblia sira prodús kalendáriu ida neʼebé kada semana fó sai eskritura ida no mós knananuk ida neʼebé sira bele kanta kuandu sira estuda mesak ka halaʼo adorasaun nuʼudar família.

Kuandu tuir reuniaun, Estudante Bíblia sira fó sai esperiénsia neʼebé sira hetan iha serbisu haklaken, fó sai tanbasá sira agradese ba Jeová, kanta knananuk ida, ka halo orasaun. Eva Barney neʼebé hetan batizmu iha tinan 1923 kuandu nia tinan 15, hatete: “Se ita hakarak koʼalia, ita bele hamriik no hahú hodi hatete buat ruma hanesan: ‘Haʼu hakarak fó obrigadu ba Naʼi tanba ninia laran-diʼak mai haʼu.’” Irmaun balu gosta tebes atu koʼalia. Irmán Eva hatutan tan: “Irmaun Godwin sempre fó sai buat barak atu fó agradese ba Naʼi. Maibé bainhira ninia feen nota katak irmaun neʼebé dirije reuniaun komesa hanoin barak kona-ba tempu, irmaun Godwin nia feen dada ninia kazaku uitoan no nia sei para koʼalia no tuur fali.”

Fulan ida dala ida, kongregasaun ida-idak sei halaʼo “Reuniaun atu halo orasaun no hahiʼi Jeová” iha dalan espesiál. Livru Haklaken 1 Abríl 1923 esplika katak “presiza uza parte sorin husi reuniaun neʼe atu ema bele fó sai sira-nia esperiénsia kona-ba haklaken no anima maluk sira. . . . Reuniaun sira hanesan neʼe sei ajuda maluk sira atu hakbesik liután ba malu.”

Irmaun Charles Martin neʼebé tinan 19 iha Vancouver, rai-Kanadá, hetan benefísiu barak husi reuniaun sira-neʼe. Nia hatete: “Iha reuniaun neʼe, haʼu aprende kona-ba buat neʼebé haʼu bele koʼalia kuandu haklaken. Dala barak ema sei konta esperiénsia husi haklaken uma ba uma. Ida-neʼe fó ideia ba haʼu kona-ba oinsá atu koʼalia no mós oinsá atu hatán ba ema nia pergunta sira.”

Irmaun-irmán sira hetan unidade liután kuandu iha loron espesífiku neʼebé ema hotu bá haklaken. Livru Haklaken 1 Abríl  1923 hatete: “Atu ita hotu iha unidade hodi halo serbisu neʼebé hanesan . . . ami hili loron-tersa 1 Maiu 1923 nuʼudar loron ba ema hotu atu bá haklaken. Iha loron-tersa primeiru kada fulan, neʼe sei sai nuʼudar loron haklaken nian. . . . Ema hotu iha kongregasaun presiza hola parte iha serbisu neʼe.”

Estudante Bíblia neʼebé joven mós hola parte iha serbisu haklaken. Irmán Hazel Burford neʼebé tinan 16, hatete: “Revista Bulletin a fó sai ezemplu atu haklaken ba ami atu dekór. Haʼu no avó badinas atu hola parte iha atividade sira-neʼe.” Maibé irmán Hazel hakfodak kona-ba oinsá irmaun ida sente kona-ba neʼe. Irmán Hazel hatete: “Irmaun ida neʼebé idade ona iha opiniaun makaʼas katak haʼu labele haklaken. Ema balu la komprende katak Estudante Bíblia hotu, inklui ‘mane joven no feto joven’ presiza hola parte atu fó hahiʼi ba ita-nia Kriadór Boot.” (Sal 148:​12, 13) Maski nuneʼe, irmán Hazel kontinua haklaken. Tuirmai, nia tuir Eskola Gilead klase segundu no serbí nuʼudar misionária iha rai-Panamá. Ikusmai, irmaun-irmán sira-neʼe mós hadiʼa sira-nia hanoin neʼebé sala kona-ba joven sira neʼebé haklaken.

Reuniaun boot sira mós ajuda irmaun-irmán sira atu hametin sira-nia unidade. Baibain reuniaun boot sira inklui halaʼo serbisu haklaken. Porezemplu, iha reuniaun boot iha Winnipeg, rai-Kanadá, ema hotu neʼebé asiste hetan anima atu haklaken iha data 31 Marsu. Hodi haklaken iha loron sira-neʼe ajuda irmaun-irmán sira atu haklaken ba ema barak liután. Iha data 5 Agostu, iha reuniaun boot ida tan iha Winnipeg, no maizumenus ema naʼin-7.000 mak asiste. Iha tempu neʼebá, neʼe mak ema barak liu neʼebé tuir reuniaun boot iha rai-Kanadá.

Reuniaun boot importante ida husi Jeová nia povu iha tinan 1923 mak halaʼo iha Los Angeles, Kalifórnia, iha data 18-26 Agostu. Semana balu antes reuniaun boot, jornál sira fó sai kona-ba reuniaun boot neʼe, no Estudante Bíblia sira fahe panfletu hamutuk  500.000 liu. Sira mós monta banner ba karreta privadu no transporte públiku.

Iha loron-sábadu 25 Agostu, irmaun Rutherford hatoʼo diskursu ho títulu “Bibi-malae no bibi-timur”, no nia fó sai ho klaru katak “bibi-malae” reprezenta ema laran-loos neʼebé sei moris iha mundu paraízu. Nia mós hatoʼo diskursu no lee rezolusaun ida naran “Avizu”. Rezolusaun neʼe koʼalia nakloke kona-ba relijiaun Kristaun falsu no husu ema laran-loos atu haketak an husi “Babilónia Boot”. (Apok 18:​2, 4) Depois neʼe, Estudante Bíblia sira laran-manas atu fahe panfletu millaun ba millaun iha mundu tomak neʼebé fó sai rezolusaun neʼe.

Iha loron ikus ba reuniaun boot neʼe, ema naʼin-30.000 rona ba irmaun Rutherford neʼebé hatoʼo diskursu públiku ho títulu: “Nasaun hotu marxa ba Armagedon, maibé ema rihun ba rihun neʼebé moris agora sei nunka mate.” Estudante Bíblia sira hatene katak ema barak sei asiste, tan neʼe sira aluga estádiu foun ida. Atu ema hotu bele rona, irmaun sira uza estádiu nia sistema áudio, iha tempu neʼebá neʼe mak teknolojia neʼebé foun. Ema barak mós rona programa neʼe liuhusi rádiu.

Iha tinan 1923, serbisu haklaken mós aumenta iha Áfrika, Europa, rai-Índia no Amérika Súl. Iha rai-Índia, irmaun A. J. Joseph tau matan ba ninia feen no sira-nia oan naʼin-neen, no iha tempu hanesan nia mós ajuda prodús publikasaun sira iha língua Hindi, Tamil, Telugu, no Urdu.

Iha rai-Serra Leoa, Estudante Bíblia sira naran Alfred Joseph no Leonard Blackman hakerek ba sede-jerál iha Brooklyn, Novaiorke atu husu ajuda. Iha data 14 Abríl 1923, sira simu resposta. Irmaun Alfred hatete: “Iha sábadu kalan-boot ema ida telefone haʼu.” Ema ho lian boot husu: “Ita-Boot mak hakerek hodi husu haklaken-naʼin liután?” Alfred hatán: “Sin.” Ema neʼebé telefone hatete: “Sira haruka haʼu mai.” Ema neʼebé telefone mak William Brown. Nia ho ninia feen Antonia no sira-nia oan-feto naʼin-rua Louise no Lucy foin toʼo husi Karaíba. Irmaun sira la presiza hein kleur atu hasoru irmaun William no ninia família.

Irmaun Alfred mós hatete: “Dadeer tuirmai, haʼu no Leonard koʼalia hamutuk kona-ba  Bíblia hanesan ami halo semana-semana. Derrepente, mane ain-aas ida mosu iha odamatan oin. Neʼe mak William. Nia laran-manas tebes kona-ba lia-loos, tan neʼe nia hakarak hatoʼo diskursu públiku iha loron tuirmai.” Iha semana balu nia laran deʼit, irmaun William fahe publikasaun hotu neʼebé nia lori husi rai liʼur. Lakleur nia simu tan livru 5.000 no lakleur deʼit nia presiza livru liután. Maibé ema la koñese deʼit irmaun William Brown nuʼudar ema neʼebé faʼan livru. Nia serbí Jeová ho laran-manas no sempre uza eskritura sira iha ninia diskursu, tan neʼe ema bolu nia Brown Bíblia.

Iha rai-Alemaña, irmaun sira deside atu muda husi sukursál iha Barmen tanba fatin mak kiʼik liu no sira mós rona katak lakleur tan tropa Fransa atu ataka sidade neʼe. Estudante Bíblia sira hetan edifísiu ida iha sidade Magdeburg, fatin neʼe diʼak tebes atu print livru sira. Iha data 19 Juñu, sira haloot hotu ekipamentu neʼebé uza atu print no sasán sira seluk, no muda ba Betel foun iha Magdeburg. Loron tuirmai depois sede-jerál rona katak irmaun sira muda hotu ona, jornál sira fó sai katak tropa Fransa manán ona sidade Barmen. Irmaun sira agradese ba Jeová tanba ajuda no proteje sira.

Iha rai-Brazíl, irmaun George Young neʼebé halo viajen ba fatin oioin atu fahe liafuan diʼak, loke sukursál foun no komesa fó sai Livru Haklaken iha língua Portugés. Iha fulan balu deʼit, nia fahe publikasaun 7.000 liu. Feto ida naran Sarah Ferguson kontente tebes kuandu irmaun George vizita ninia família. Nia lee ona Livru Haklaken husi tinan 1899, maibé nia seidauk hetan oportunidade atu hatudu sai ninia dedikasaun liuhusi hetan batizmu. Liutiha fulan balu, irmán Sarah no ninia oan naʼin-haat hetan batizmu.

Iha tinan neʼe nia rohan, Livru Haklaken 15 Dezembru 1923 fó sai kona-ba rezultadu neʼebé Estudante Bíblia sira hetan tanba halaʼo adorasaun ho unidade, hodi hatete: “Ita bele haree ho klaru katak kongregasaun sira iha fiar neʼebé metin. . . . Mai ita prepara atu halo serbisu barak liután no kontinua serbí Maromak ho laran-manas no haksolok durante tinan 1924.”

Tinan 1924 mós sai nuʼudar tinan importante ba Estudante Bíblia sira. Durante fulan balu ona irmaun sira halo serbisu iha rai pedasuk ida iha Staten Island, neʼebé besik sede-jerál iha Brooklyn, Novaiorke. Irmaun sira harii hotu edifísiu iha rai neʼe iha tinan 1924 nia hahú no neʼe ajuda irmaun-irmán sira atu iha unidade liután no habelar liafuan diʼak iha fatin barak liután.