Mu1923, kuli kumwi kuchincha kwakachitika mumbunga kwakali kuyoopa kuti kunjila miswaangano kubajatanizye Basikwiiya Bbayibbili. Ngaziyakulinda yakasaanguna kupupulula makani aakali kupandulula lugwalo ndubakali kulanga-langa mumviki imwi ayimwi chiindi nibakali kuchita Muswaangano Wakukomba Akutembawula Jehova. Alubo Basikwiiya Bbayibbili bakapanga kkalenda yakali aalugwalo alwiimbo ndubakali kwiimba mumviki imwi ayimwi chiindi umwi awumwi naakali kubala akuyanduulisisya anibakali kuchita kukomba kwampuli.

Nibakali aamiswaangano, Basikwiiya Bbayibbili bakali kwaamba zyakali kubachitikila nibakali mumulimu wakukambawuka, zintu zyakali kupa kuti balumbe Jehova, kwiimba lwiimbo akukomba. Eva Barney wakabbabbatizigwa mu1923 kali aaminyaka iili 15, wakaamba kuti: “Kuti kakuli wakali aazintu nzwaakali kuyanda kwaamba, wakali kunyampuka mpawo wasaanguna kwaamba kuti, ‘Ndilamulumba Mwaami akaambo kazintu nzyaakandichitila.’” Bamwi bakwesu bakali kuyandisya kwaamba zintu zyakabachitikila. Muchizi Barney wakayungizya kuti: “Mukwesu Godwin wakali aazintu zyiingi zyakulumba Mwaami. Pesi mwanakazi wakwe naakali kubona kuti sikuchitisya wabboyikana akaambo kakuti mulumaakwe wabweza chiindi chilamfu, wakali kumudonsa bbachi mpawo wakkalaansi.”

Kamwi amweezi, mbungano imwi ayimwi yakali kuchita Muswaangano Wakukomba Akutembawula Jehova. Kayipandulula atala amuswaangano ooyu, Ngaziyakulinda yamuApril 1, 1923 yakaamba kuti: “Hafu yazintu zyaambwa aaBasikwiiya Bbayibbili zili atala azyakabachitikila zyeelede kuti kazili atala amulimu wakukambawuka akusungwaazya bakombinyina. . . . Tusyoma kuti miswaangano eeyi ilabasungwaazya bakombima akupa kuti bajatane.”

Charles Martin, kali aaminyaka iili 19 wakali sikupupulula mumbungano yaVancouver kuCanada. Mukwesu Martin wakagwasigwa loko amiswaangano eeyi. Wakaamba kuti: “Miswaangano eeyi njiyo yakandigwasya kuti ndisaangune kukambawuka aang’anda ang’anda. Chiindi chiingi, bamwi bakali kwaamba zyakali kubachitikila nibali kukambawuka aang’anda ang’anda. Eezi zyakandigwasya kuti ndizibe nzindakeelede kwaamba ambundakali kukonzya kusandula bantu bakali aamibuzyo iisiyene-siyene.”

Mazuba aakukambawuka akajatanisya Basikwiiya Bbayibbili. Ngaziyakulinda yamu-April 1, 1923 yakaambilizya kuti: “Kuti toonse tujatane mumulimu  wesu . . . , buzuba bwamuli Bwabili 1 May 1923, bwasalwa kuti bube buzuba bwakukambawuka. Alubo buzuba bwamuli Bwabili bwakusaanguna mweezi amweezi bunooli buzuba bwakukambawuka . . . Bantu boonse bamumbungano beelede kutola lubazu mubuzuba oobu.”

Basikwiiya Bbayibbili bakali bachiniini ambabo bakali kukambawuka. Hazel Burford wakali aaminyaka iili 16 aachiindi eechi, wakaamba kuti: “Bulletin yakali aazikozyano zyakwaambuuzyania nzitwakali kujata aamutwe. a Kandilaamwi asyaanene, ndakali kubeleka changuzu mumilimu yoonse eeyi.” Pesi Muchizi Burford taakaziyanda pe zyakachitwa aawumwi mukwesu. Wakaamba kuti: “Umwi mukwesu wakali kuyanda kuti ndileke kukambawukila bantu. Aachiindi eechi, bamwi teebakali kumvwisisisya pe kuti Basikwiiya Bbayibbili boonse kuswaanizya ‘balombwana abasimbi’ bakeelede kutembawula Mulengi wesu Mupati.” (Int. 148:​12, 13) Nikuba oobo, Muchizi Burford taakaleka pe kukambawuka. Wakazoonjila kkilasi yachibili yaChikolo chaGiliyadi alubo wakakubelekela kuPanama kali mumishinali. Mukuya kwachiindi, bakwesu aabo bakazoochincha maboneno aabo aakuti bachiniini batakambawuki pe.

Miswaangano yabbooma yakali kujatanisya bakwesu. Miswaangano yabbooma myiingi yakali aamazuba aakukambawuka mbuli muswaangano wakachitwa kuWinnipeg kuCanada. Bantu bakanjila muswaangano ooyu bakakumbilwa kuti batole lubazu mumulimu wakukambawuka mu31 March kuWinnipeg. Mazuba aakukambawuka akapa kuti basikupupulula biingi bakambawuke akuti Basikwiiya Bbayibbili bavule. Mu5 August, kuyeeyelwa kuti bantu basika ku7 000 bakanjila umwi muswaangano wabbooma kuWinnipeg. Aachiindi eechi, namba eeyi njiyo yakali namba mpati yabantu bakanjila muswaangano wabbooma kuCanada.

Muswaangano wabbooma uuyandikana loko wabakombi baJehova wamu1923 wakachitwa mu-August 18-26 kuLos Angeles kuCalifornia. Kawutanasika muswaangano ooyu, manyuzipepa akaambilizya atala amuswaangano ooyu alubo Basikwiiya Bbayibbili bakapa bantu mapepa aakutamba ayinda ku500 000. Zibbaakani zyakutamba bantu zyakanamatizidwe aamoota.

 MuMugibelo 25 August, Mukwesu Rutherford wakapa nkani yakali aamutwe uuti “Mbelele aMpongo.” Wakapandulula kuti “mbelele” mbalulami batazoopone aanyika muparadayizi. Alubo wakapa nkani yakali aamutwe utii, “Nchenjezyo.” Nkani eeyi yakaamba bubi bwazikombelo zyakubeja alubo yakasungwaazya babombe myoyo kuti bataliswaanizyi ‘aaBbabbiloni Mupati.’ (Chi. 18:​2, 4) Basikwiiya Bbayibbili bakajatana munyika yoonse mukupa bantu mamiliyoni aamapepa akali kwaambuula atala ankani eeyo.

Mubuzuba bwamamanino bwamuswaangano wabbooma, bantu bayinda ku30 000 bakamvwa nkani yaMukwesu Rutherford itii, “Zisi Zili Kumacha Kaziya Kunkondo ya-Amagedoni Pesi Mamiliyoni Aabantu Tabazoofwi Pe.” Akaambo kakuti Basikwiiya Bbayibbili bakali kulangilila kuti kuzooba bantu biingi, bakarenta mayake aakachili kuzwa aakuyakwa aaLos Angeles Coliseum. Kuti babe aachoonzyo chakuti bantu boonse bayimvwa nkani eeyi, bakwesu bakabelesya maspikka mapati, eeyo njiyo yakali tekkinoloji mpya aachiindi eecho. Biingi bakaswiilizya pulogilamu eeyi aarediyo.

Mu1923, mulimu wakukambawuka mu-Africa, ku-Europe, ku-India akuSouth America wakavula. Ku-India, nikuba kuti mukwesu A. J. Joseph wakali kulangania mwanakazi wakwe abana babo bali 6, wakalipeda kugwisya mabbuku muchiHindi, chiTamil, chiTelugu amuchi-Urdu.

KuSierra Leone, Basikwiiya Bbayibbili baswaanizya Alfred Joseph aLeonard Blackman bakalembela kumawofesi mapati kuBrooklyn kuNew York kabakumbila lugwasyo. Mu14 April 1923, lugwalo lwabo lwakasandulwa. Alfred wakaamba kuti: “Limwi zuba muMugibelo mansiku, ndakafoonenwa aawumwi muntu.” Wakamvwa jwi lyamuntu wakali kwaambwiida aajulu kati, “Nduwe na nwaakalembela kuWatch Tower Society kukumbila kuti kuze bakambawusi biingi?” Alfred wakasandula kuti, “Iiyi, ndime.” Muntu ooyo wakazooti, “Batuma ndime.” Muntu ooyo wakali William R. Brown. Buzuba mbwaakafoona mbubuzuba mbwaakasika kuzwa kuCaribbean amwanakazi wakwe Antonia abana babo basimbi, Louise aLucy. Bakwesu bakali banonokelwa biya kuti batambule Mukwesu Brown ampuli yakwe.

Alfred wakayinkilila kunembo kwaamba kuti: “Ime aLeonard nitwakali kulanga-langa mavesi aamuBbayibbili mbuli mbutwakali kuchita mviki amviki, twakabona umwi mwaalumi mulamfu aamulyango. Mwaalumi ooyo wakali William R. Brown. Mukwesu Brown wakalisungweete kubuzya bamwi kasimpe zyakuti mubuzuba bwakatobela wakali kuyanda  kupa nkani.” Kutanamana mweezi, Mukwesu Brown wakapa bantu mabbuku woonse ngakazidaawo. Kakutanayinda chiindi, wakatambula aamwi mabbuku aali 5 000 alubo mabbuku aayo taakkala pe, kwakachili kuyandikana aambi. Pesi Mukwesu Brown taakazibikene kuti ngusikuuzya mabbuku. Mubuumi bwakwe boonse, wakali musungu kukubelekela Jehova alubo chiindi choonse wakali kubelesya Magwalo munkani zyakwe alubo bantu bakazoomuzika zina lyakuti Bbayibbili Brown.

Wofesi yamutabi yakali kuBarmen kuGermany yakali yaba aabantu biingi loko alubo nyika yakuFrance yakali kuyanda kubweza dolopo eeli. Basikwiiya Bbayibbili bakajana aamwi mayake mapati kuMagdeburg alubo bakabona kuti bakali kukonzya kupulinta mabbuku nkukooko kakutakwe zibapambanisya. Bakwesu bakamanisya kubamba minchina yabo yakupulinta azimwi zibelesyo mu19 June mpawo bakalongela kuBbeteli mpya kuMagdeburg. Mubuzuba bwakatobela kuzwa bakwesu bakumawofesi mapati nibakabuzigwa kuti bamaninsya kulonga, munyuzipepa mwakaambilizigwa kuti France yazwidilila kubweza dolopo lyaBarmen. Bakwesu bakabona bukamboni bwakuti kulonga nkubakachita nguJehova wakabalongezya akubakwabilila.

KuBrazil, George Young wakeenda loko kalikukambawuka makani mabotu, wakajula mutabi mupya akusaanguna kupupulula Ngaziyakulinda muchiPortuguese. Nikwakayinda myeezi miche, wakapa bantu mabbuku ayinda ku7 000. Mukwesu Young naakasika kuBrazil, Muchizi Sarah Ferguson wakabotelwa loko akaambo kakuti Young wakaswaya mpuli yabo. Muchizi Ferguson wakali kubala Ngaziyakulinda kuzwa mu1899 pesi taakwe naakabweza ntaamu yakulipeda akubbabbatizigwa. Nikwakayinda myeezi miche, Muchizi Ferguson abana bakwe bali 4 bakazoobweza ntaamu eeyi iiyandikana loko.

Kumamanino aamunyaka wa1923, Ngaziyakulinda yamuDecember 15, 1923 yakaamba kuti Basikwiiya Bbayibbili bakagwasigwa loko amiswaangano yambungano, mulimu wakukambawuka amiswaangano yabbooma. Yakaamba kuti: “Nkuuba loko kubona kuti mumbungano muli bantu basimide mubukombi . . . Atwiinkilile kunembo kuzwaata zilwanisyo zyesu alubo atubeleke changuzu kukambawuka makani mabotu akubelekela Leza katubotelwa mumunyaka uutobela wa1924.”

Munyaka wakatobela wakali kuyandikana loko kuli Basikwiiya Bbayibbili. Bakwesu bakuBbeteli bakali babeleka changuzu kwamyeezi myiingi kundawu yakali kukasuwa kategwa Staten, aafwiifwi amawofesi mapati aakali kuBrooklyn. Mayake aakali kuyakwa kundawu eeyi akamana kumasaangunino aa1924 alubo akagwasya bakwesu kuti bajatane munyika yoonse akupa kuti makani mabotu akambawukwe kakubelesegwa nzila zyakatanabelesegwa pe.