Long dispela yia, oganaisesen i mekim sampela senis na dispela i helpim ol Sumatin Bilong Baibel long stap wanbel long mekim lotu. Nius The Watch Tower i stori long tok bilong ol skripsa em ol i bin skelim long olgeta wik long Prea, Preis, na Testimoni Miting. Na tu, ol Sumatin Bilong Baibel i kamapim wanpela kalenda i gat lista bilong ol skripsa bilong skelim long olgeta wan wan wik, na ol singsing bilong singim long taim bilong pesenel stadi na famili lotu.

Long taim bilong ol miting, ol Sumatin Bilong Baibel i stori long “ol testimoni,” we ol i stori long wanpela ekspiriens bilong wok autim tok, mekim ol tok tenkyu long Jehova, singsing, na beten. Eva Barney i bin kisim baptais long 1923 taim em i gat 15 krismas, em i tok: “Sapos yu laik stori long wanpela testimoni, yu bai sanap, na yu bai kirapim tok bilong yu olsem, ‘Mi laik tok tenkyu long Bikpela long olgeta gutpela samting em i mekim long mi.’” Sampela brata i save amamas long givim testimoni. Sista Barney i tok moa olsem: “Lapun Brata Godwin i gat planti samting em i laik tok tenkyu long Bikpela long en. Tasol taim meri bilong em i lukim olsem brata i lukautim dispela hap i luk olsem em i tingting planti o i no stap isi, em i pulim kolsiot bilong man bilong em isi tasol na man i sindaun bek gen.”

Wanpela taim long olgeta wan wan mun, wanpela klas (kongrigesen) i save mekim Spesel Prea, Preis, na Testimoni Miting. Nius The Watch Tower bilong Epril 1, 1923, i tok long dispela miting olsem: “Ol i save makim wanpela hap bilong dispela miting olgeta bilong stori long ol testimoni bilong wok autim tok na kirapim ol wokman long givim bel long mekim wok. . . . Mipela i bilip olsem dispela pasin wanbel bai helpim ol pren long pas gut wantaim.”

Charles Martin, em i gat 19 krismas na em i wanpela wokman bilong klas (pablisa bilong kongrigesen) bilong Vancouver, Kanada, em i kisim bikpela helpim tru long ol dispela miting. Em i tingting i go bek na em i tok: “Long dispela miting, em fes taim mi lain long wanem tok mi bai mekim long taim mi go long haus bilong man na autim tok. Planti taim wanpela bai stori long ekspiriens bilong em long wok autim tok. Dispela i givim tingting long mi long wanem tok mi bai autim na hau long bekim ol narapela narapela askim.”

“Ol de bilong autim tok” i strongim oganaisesen long stap wanbel wantaim. Nius The Watch Tower  bilong Epril 1, 1923, i mekim dispela tokaut olsem: “Bilong stap wanbel wantaim long mekim dispela wankain wok . . . mipela i makim Tunde Me 1, 1923 olsem de bilong autim tok. Olsem tasol, bihain long dispela, olgeta fes Tunde bilong olgeta wan wan mun . . . olgeta memba bilong klas i mas insait long mekim dispela wok.”

Ol yangpela Sumatin Bilong Baibel tu i insait long dispela wok. Hazel Burford, em i bin gat 16 krismas tasol long dispela taim, em i tok: “Nius Bulletin i gat ol eksampel bilong toktok (wankain olsem long nau) em mipela i mas holim long tingting. a Mi save wok wantaim Bubuman, na mi givim bel tru long mekim ol dispela wok.” Tasol wanpela i no amamas long Sista Burford i mekim dispela wok. Sista Burford i tok: “Wanpela lapun brata i krosim mi long mi autim tok long ol manmeri. Long dispela taim, sampela i no kliagut olsem olgeta Sumatin Bilong Baibel, dispela i makim tu ‘ol yangpela man na ol yangpela meri,’ i gat wok long preisim Bikpela Man Bilong Wokim yumi.” (Sng. 148:​12, 13) Tasol Sista Burford i wok strong yet long autim tok. Em i go long namba 2 klas bilong Skul Gileat na em i go mekim wok misineri long Panama. Bihain ol dispela brata i senisim tingting ol i gat long ol yangpela insait long kongrigesen long sait bilong autim tok.

Ol kibung i bin strongim tru pasin wanbel. Long planti bilong ol dispela kibung, ol i save makim wanpela de bilong mekim wok autim tok, olsem kibung i bin kamap long Winnipeg, Kanada. Long Mas 31, ol i makim dispela de bilong mekim “Spesel Wok Autim Tok Long Winnipeg,” na ol i singautim olgeta bratasista i kam long kibung long insait long dispela wok. Ol i bin autim tok long planti manmeri tru long dispela spesel de bilong autim tok na planti gutpela samting i bin kamap. Long Ogas 5, inap olsem 7,000 manmeri i bung long wanpela kibung i kamap long Winnipeg. Em fes taim bikpela lain olsem i bung long wanpela kibung long Kanada.

Wanpela bikpela kibung tru bilong lain bilong Jehova i bin kamap long 1923, em kibung i bin kamap long Ogas 18-23 long Los Angeles, Kalifonia. Long ol wik paslain long dispela kibung, ol niuspepa i prinim ol edvetaismen bilong dispela bung, na ol Sumatin Bilong Baibel i tilim winim 500,000 liklik nius  i tokaut long kibung. Ol i prinim tu ol posta bilong kibung na putim long ol kar bilong ol yet na long ol pablik trenspot.

Long Sarere Ogas 25, Brata Rutherford i mekim wanpela tok, nem bilong en, “Ol Sipsip na Ol Meme,” na em i tokaut klia olsem “ol sipsip” em ol man i gat gutpela bel na ol bai stap long Paradais long graun. Em i mekim tu wanpela tokaut, nem bilong en: “Wanpela Tok Lukaut.” Dispela tokaut i tok God i no orait long ol Kristendom na em i kirapim olgeta man i gat gutpela bel long ol i mas stap longwe long “Bikpela Babilon.” (Rev. 18:​2, 4) Bihain ol Sumatin Bilong Baibel long olgeta hap bilong graun i givim bel tru long tilim planti milion kopi bilong liklik nius i gat dispela tokaut.

Long laspela de bilong kibung, winim 30,000 manmeri i stap long odiens i putim yau long pablik tok em Brata Rutherford i mekim, nem bilong en: “Olgeta Kantri i Mats i Go Long Armagedon, Tasol Planti Milion Man i Stap Nau Ol i No Ken i Dai.” Ol Sumatin Bilong Baibel i save olsem planti manmeri tru bai kam, olsem na ol i haiarim wanpela nupela stediam nem bilong en Los Angeles Coliseum. Bilong helpim odiens long harim gut tok, ol brata i yusim nupela laud-spika sistem bilong stediam, em nupela teknoloji long dispela taim. Planti manmeri moa i harim dispela program long rot bilong redio.

Long yia 1923, wok autim tok i go bikpela na i go kamap long Afrika, Yurop, India, na Saut Amerika. Long India, Brata A. J. Joseph i lukautim meri na 6-pela pikinini bilong em na long wankain taim em i lukautim wok bilong wokim ol litresa long tokples Hindi, Tamil, Telugu, na Urdu.

Long Sierra Leone, ol Sumatin Bilong Baibel em Alfred Joseph na Leonard Blackman, ol i raitim pas i go long wol hetkota long Brooklyn, New York, na askim long kisim sampela helpim. Long Epril 14, 1923, ol brata i bekim askim bilong ol. Alfred i tok: “Long biknait long wanpela Sarere, wanpela man i ringim mi.” Alfred i harim nek bilong wanpela man i askim em olsem: “Yu dispela man i bin raitim pas i kam long Watch Tower Society na askim long sampela man bilong autim tok, a?” Alfred i tok: “Yes.” Na dispela man long fon i tok: “Ol i salim mi i kam.” Dispela man i toktok long fon em William R. Brown. Long dispela de em i ring, em i bin lusim Karibian na i kam kamap wantaim meri bilong em Antonia na tupela liklik pikinini meri bilong ol Louise na Lucy. Ol brata i luk fowed long bungim dispela famili.

Alfred i tok moa olsem: “Long neks moning, mitupela Leonard i mekim Baibel stadi bilong mipela  bilong wik i stap taim mipela i lukim wanpela longpela man i kam sanap long dua. Em Brata Brown. Em i laikim tru tok i tru na em i laik givim pablik tok long neks de tasol.” I no winim wanpela mun yet na Brata Brown i tilim olgeta litresa em i kisim i kam wantaim em. Bihain tasol long dispela em i kisim 5,000 buk moa, na em i mas kisim sampela buk moa. Tasol ol man i no tingim Brata Brown olsem wanpela man bilong salim buk, nogat. Long laip olgeta bilong em olsem wanpela gutpela wokman bilong Jehova, em i save yusim Ol Skripsa planti taim long tok bilong em, olsem na ol man i kolim em long nem Baibel Brown.

Long Jemani, ol bratasista i muv aut long brens ofis long Barmen bikos em i liklik tumas, na tu, long wankain taim ol i harim olsem ami bilong Frans bai kam pait na kisim dispela taun. Ol Sumatin Bilong Baibel i kisim wanpela bilding long Magdeburg we i luk olsem em i gutpela hap bilong prinim ol pablikesen long en. Long Jun 19, ol brata i pinisim wok bilong muvim ol masin bilong prinim buk samting na ol sia samting i go long dispela nupela Betel long Magdeburg. Wanpela de bihain long wol hetkota i kisim toksave olsem ol bratasista i muv i go pinis long nupela brens, niuspepa i tokaut olsem ami bilong Frans i kam kisim taun Barmen. Ol brata i luksave olsem Jehova i stiaim ol long mekim dispela muv na em i blesim na lukautim ol.

Long Brasil, Brata George Young i save raun i go long planti hap bilong autim gutnius na em i kamapim nupela brens na em i kirap long wokim The Watch Tower long tokples Potugal. Insait long sampela mun tasol, em i tilim winim 7,000 litresa. Taim em i go kamap long Brasil, dispela i helpim tu famili bilong Sarah Ferguson. Sarah i bin ritim The Watch Tower kirap long yia 1899, tasol em i no gat rot bilong kisim baptais bilong soim klia dedikesen bilong em. Sampela mun bihain, Sista Ferguson na 4-pela pikinini bilong em i mekim dispela bikpela samting—ol i kisim baptais.

Long pinis bilong yia 1923, The Watch Tower bilong Disemba 15, 1923 i stori long gutpela samting i kamap long pasin bilong ol Sumatin Bilong Baibel long stap wanbel long mekim lotu na em i tok: “Em i klia tru olsem ol klas . . . i gat strongpela bilip . . . Yumi mas redi long mekim planti wok moa na wok yet long givim bel tru na amamas long mekim wok bilong God long yia 1924.”

Neks yia, em bai wanpela bikpela yia bilong ol Sumatin Bilong Baibel. Ol brata long Betel i bin wok hat tru inap sampela mun long wanpela hap graun long Staten Island, em i no longwe tumas long wol hetkota long Brooklyn. Ol i pinisim wok bilong sanapim ol bilding samting long dispela nupela hap graun long kirap bilong yia 1924, na ol i helpim ol brata long stap wanbel na autim gutnius long ol rot we ol i no bin mekim bipo.