Indeni uéxurhini jimbo, organisasioni mójtakuspti máru ambe ka inde ambe jarhuataasti Biblieri Jorhenguarhiriichani paraksï sánderu májku kʼéri kómarhini Tata Diosï Jeobani. Rebista The Watch Tower ueenaspti uandantani tekstueri ma enga ima jurhiatikua exekuarhipiringa Tánguarhikuarhu para Kómarhini, Kʼéri ambe arhini ka para Uandantani ambe ma. Ka i tánguarhikua mándani semana úkuarhisïreendi. Ístu Biblieri Jorhenguarhiriichaksï kalendariu ma úsïreendi enga tekstu ma jukanharhienga para mándani semana ka pirekua ma para mándani jurhiatikua. Ini pirekuanksï úsïreendi familieri jorhenguarhikua jimbo pireni o jiáni engaksï jandiajku jorhenguarhini japiringa Biblieri ambe.

Ini tánguarhikuecharhu, Biblieri Jorhenguarhiriichaksï uandantasïreendi na enga nikuauenga aianhpikuarhu, diosmaiamukuaksï íntskuntasïreendi Tata Diosï Jeobani, piresïreendiksï ka astaksï kómarhisïreendi Tata Diosïni. Eva Barney, enga 1923 jimbo itsï atakuarhipka jiáni enga 15 jatiriipka, uandantaspti: “Enga nema uékeenga uandantani ambe ma, jauarasïreendi ka ísï ueenasïreendi uandani ‘Uékasïnga diosmaiamukua arhini Tatani, jimbokarini ima kánikua kóndentasïnga...’”. Máru erachiichaksï kánikua tsitisïreendi uandani na enga nikuauenga. Pirenchi Barney uandantaspti: “Juchaari erachi Godwin enga jatiripkia méntkisï uánikua ambe jimbo diosmaiamukua arhisïreendi Tatani ka enga témba exeenga eska kuatantasïreengia ima erachi enga orhejtsïkuni japiringa tánguarhikuani, pirenchi iatsitakuarhu antsitakusïreendi chaketani ka erachi Godwin uaxakantasïreendia”.

Ma uelta ma kutsï jimbo, mándani klase (o kúnguarhikua) jatsisïreendi tánguarhikua ma enga arhinheenga Tánguarhikua para Kómarhini, Kʼéri ambe arhini ka Uandantani ambe ma. Rebista The Watch Tower enga 1 de abrili 1923 jimbo uérapka, uandantaspti: “Terujkani jamberi ma tánguarhikueri jindeuati para uandantani na engajtsïni nicheaka aianhpikuarhu ka uinhaperaantani ánchikuarhiriichani [...]. Exesïngachi eska engachi iáminduecha májkueni ambe úska, uaakachi sánderu sési pájperani”.

I tánguarhikuechaksï kánikua jarhuataspti Charles Martinini, klaserhu anapu ánchikuarhirini ma (o aianhpiri ma) enga 19 jatiriipka ka enga Vancouver (Canadá) anapuepka. I uandantaspti: “Jimini jorhenguarhispka ambe uandani aianhpikuarhu, someni kurhaasïreenga na enga nikuauenga erachiichani aianhpikuarhu. Jorhenguarhispka ambe uandani o néna mókukuntani nemani engareni arhipiringa ambe ma”.

Ima jurhiatikuecha engachi uéreenga aianhpini, ístu jarhuataaspti erachiichani paraksï sánderu májku kʼéri jarhani. Rebista The Watch Tower 1 de abrili 1923 anapu, uandantaspti: “Parachi iáminduecha májku ánchikuarhita úni jarhani [...], martesï 1 de maiu 1923 jimbo, indeni jurhiatikua jimbochi iáminduecha uéraaka aianhpini. Ka ísï úkuarhiati primeru martesï mándani kutsï anapu [...]. Iáminduecha engaksï klaserhu jaka, jatsiatiksï para úni ambe ma paraksï úni uérani aianhpini”.

Biblieri Jorhenguarhiriicha, asta imeecha engaksï sánderu sapichku japka, uérasïreendiksï aianhpini. Pirenchi ma enga Hazel Burford arhinheenga ka enga 16 jatiriipka 1923 jimbo, uandaspti: “Publikasioni Bulletin uánikua ejempluechani jukaasïreendi para aianhpini ka engachi jatsienga para memoria jimbo jorhenguarhiani. a Ji ka juchiiti abuelu kánikua tsípikua jingonchi úsïreenga ini ambe”. Joperu jarhaspti nema enga no uékeenga eska Hazel aianhpepiringa: “Erachi ma enga jatiriipkia, no uékasïreendi eskani ji aianguapiringa máteru kʼuiripuechani ambe engani jakajkuenga. Jiánisï, no iámindu Biblieri Jorhenguarhiriichaksï kurhangusïreendi eskaksï ‘tatakeecha ka nanakeecha’ jatsispka para aianhpini jámani paraksï kʼéri ambe arhini juchaari Kuerajpirini (Sal. 148:12, 13). Joperu Hazel seguiriispti aianhpini ka máru uéxurhini tátsekua niraspti Galaadiiri Jorhentperakuarhu klase dosi, ka Panamá axanhaspti komueska misionera. Ísï tátsekua, erachiichaksï niáraspti ménderueni eratseni tumbiicheeri ka aianhpikueri ambe.

K’éri tánguarhikuecha rejioniiri ka engaksï iretarhu úkuarhienga, ístuksï jarhuataasti erachiichani paraksï sánderu májku kʼéri jarhani. Indeni kʼéri tánguarhikuecha jimbo, jarhasptiksï jurhiatikuecha para uérani aianhpini. Pori ejemplu ísï úkuarhispti jiáni enga Winnipeg (Canadá) úkuarhipka kʼéri tánguarhikua ma. Jurhiatikua 31 de marsu jimbo, ambakiti ánchikuarhita ma úkuarhispti Winnipeg. Iámindu imeecha engaksï kʼéri tánguarhikuarhu japka, úpirindiksï nirani aianhpini. Ka kánikua sési nikuaspti aianhpikuarhu. Máteru kʼéri tánguarhikuarhu enga ístu Winnipeg úkuarhipka 5 de agostuni indeni mismu uéxurhini jimbo, sáno 7,000 kʼuiripuechaksï niraspti. No méni xáni uánikua kʼuiripuechaksï niraxapti kʼéri tánguarhikuarhu ma Canadá.

Jurhiatikua 18 a 26 de agostu 1923 jimbo, Los Ángeles (California) kʼéri tánguarhikua ma úkuarhispti enga  kánikua jukaparhakuepka. Máru semanecha antesi, periodikuecharhu uéraspti eska kʼéri tánguarhikua ma japiringa ka Biblieri Jorhenguarhiriichaksï jukari 500,000 pʼímarperakuechanksï íntspiaspti. Ístuksï jatsikuaspti letreruechani imeecheeri karruechani ka ístu transporticharhu paraksï aianhpini eska kʼéri tánguarhikua ma japiringa.

Sábadu 25 de agostuni, erachi Rutherford nitamataraspti arhijtsïkperatani enga arhinheenga “Karichiicha ka chibuecha”, ka uandaspti eskaksï karichiicha jindeeska ima kʼuiripuecha engaksï ambakiti mintsita ma jataka ka engaksï Echerirhu irekaaka jiáni enga paraisu máeuakia. Ka ístu arhijtsïkperata ma jimbo uandaspti eskaksï ima relijioniicha engaksï no jurhimbitiika no sésiksï ambe úxapka ka pʼímarhiaxapti imani kʼuiripuechani engaksï ambakiti mintsita ma jataka paraksï jurajkuni ‘Kʼéri Babiloniani’ (Apok. 18:​2, 4). Ísï tátsekua tratadu ma uéraspti enga indeeri ambe uandeenga, ka iámu parhakpinirhu Biblieri Jorhenguarhiriichaksï tsípikua jingoni íntspiaspti uánikua joperu uánikua trataduechani.

Ka últimu jurhiatikua kʼéri tánguarhikuecharhu, jukari 30,000 kʼuiripuechaksï kurhaaspti indeni arhijtsïkperatani enga erachi Rutherford nitamatarapka enga arhinheenga “Iámindu nasioniichaksï Armajedonirhu niáraati, joperu uánikuecha engaksï iásï irekani jaka nóksï méni uarhiati”. Jimbokaksï exespka eska uánikua kʼuiripu nipiringa, Biblieri Jorhenguarhiriichaksï estadiu ma rentariispti Los Ángeles. Ka paraksï iáminduecha úni sési kurhaani programani, erachiichaksï úraspti estadiurhu anapu soniduni jimboka inde sánderu jimbanhi ambeespka. Ístu uánikua kʼuiripuechaksï úspti kurhaani programani radiu jimbo.

Uéxurhini 1923 jimbo, ueenaspti sánderu aianhpinhani África, Europa, India ka Sudamérica. Ka India, erachi ma jarhaspti enga Adavimannathu Joseph arhinheenga, tembuchatixapti ka seisi uájpeechani kánguarhiasïreendi. I erachi jarhuajpespti parakaksï japiringa publikasioniicha hindi, tamil, telugu ka urdu jimbo.

Sierra Leona anapu erachiicha Alfred Joseph ka Leonard Blackman, karakusptiksï Betelini enga Brooklyn (New York) japka paraksï jarhuajperata kurhakuani. Ka 14 de abrili de 1923 jimbo, Beteli mókukuantaspti ini erachiichani. Erachi Alfred uandantaspti: “Sábadu ma jiáni enga iauani chúripkia, mátirku kúskaspti telefonu”. Ima kúrhaaspti enga nema arhipka: “¿Chásï kara jini Sociedad Watch Tower para aianhpiriichani kurhajkuarhiani?”. Ka erachi Alfred arhispti: “Jo”. Ka ima arhispti: “Exe, jíndentsïni axasti”. ¿Neespi ima enga uandajpani japka? Jindeespti erachi William Brown. Apenasi niáraspti Caribe uératini imeeri témba Antonia ka tsimani nanaka sapirhatiichani jingoni, Louise ka Lucy. Ka erachiichaksï no ióndaspti míteani.

Alfred seguiriispti uandantani: “Ísï pauandikua enga Leonard ka ji Bibliani jorhenguarhini japka, ísï eskachi na ueenga mándani semana, jimajku niáraspti puertarhu  kʼéri achamasï ma: jindeespti erachi William Brown. Ima xáni tsitisïreendi jorhentpini jurhimbikuani enga jamberi pauandikua uékeenga arhijtsïkperata ma nitamatarani”. No jamberi ma kutsï jimbo, erachi iámu publikasioniichani íntspiasptia enga xáni paapka, ka ísï no ióni jimbo axaminhaaspti máteru 5,000 publikasioniichani ka útasï uétarhinchaaxapti máteru. Joperu para máteruecha ima no solu jindeespti kʼuiripu ma enga publikasioniichani jámeenga ataraantani, imani uéxurhiniichani jimbo enga sési marhuakupka Tata Diosïni, erachi méntkisï úrasïreendi Bibliani enga arhijtsïkperateechani nitamatarauenga, ka jimboksïsï kʼuiripuecha ísï mítepti komueska Brown enga Bibliani kámeenga.

Ístu Barmen (Alemania) anapu sukursali jukari sapichuesptia ka ístu indeni ireta jimbo Francia anapu ejersitu uékaxaptia inchaakuni. Ísï jimbo, Biblieri Jorhenguarhiriichaksï edifisiu ma exentaspti Magdeburgo, jima kánikua sési jarhaspti para publikasioniichani imprimiriuani. Ka 19 de juniuni, erachiichaksï kʼamarasptia iámu ambe empakarini, iámindu ambe enga xáni imprentarhu anapuepka. Ka mótsisptiksï jimbanhi Betelirhu enga Magdeburgo japka. Ka meru ísï pauandikua engaksï erachiicha na uandantapkia Brooklyn anapu Betelirhu eskaksï mótsispkia, periodikuecharhu uéraspti eska Francia anapu ejersitu inchaakuspkia Barmen. Erachiichaksï pʼikuarheraspti na enga Tata Diosï Jeoba kuájchakuapka ka újchakuraani.

Ka Brasil, erachi George Young iámu paisi jimbo jámaspti aianhpini ambakiti aianhperakuani. Jima uaxastaspti sukursali ma ka ueenaspti petani rebistani The Watch Tower portugués jimbo. Ka máru kutsïicha jimbojku, ima jukari 7,000 publikasioniichani íntspiasptia. Enga erachi niárapka Brasil, kánikua jarhuataspti Sarah Fergusonini. Sarah desde 1899 ueenaspti arhintani rebistani The Watch Tower, joperu no méni úxapti itsï atakuarhini para xarhatani eska aiakukuarhespkia Tata Diosïni. Ka ísï máru kutsïicha jimbo enga erachi George Young niárapka, Sarah ka imeeri tʼámu uájpeechaksï úsptia itsï atakuarhini.

Enga na kʼamakurhini jámeengia uéxurhini 1923, rebista The Watch Tower 15 de disiembri 1923 anapu uandaspti na enga xáni marhuapka iámindu ima ambe enga xáni mójtakurhipka tánguarhikuecharhu, aianhpikuarhu ka kʼéri tánguarhikuecharhu. Rebista uandasïreendi: “Sési xarharasïndi eskaksï klasecha [...] sési jarhaska para Tata Diosïiri ambe jorhenguarhini [...]. Ju je jukantani indeni ambe enga jindeeka para uarhipeni ka ju je seguiriini mintsita jingoni marhuakuni Tata Diosïni ka kánikua tsípikua jingoni arini uéxurhini jimbo enga janoni jakaia”.

Para Biblieri Jorhenguarhiriicha kánikua jukaparhakuepirindi uéxurhini 1924. Beteli anapu erachiicha engaksï Brooklyn japka, iónksï páxaptia ánchikuarhini terrenu ma jimbo enga Staten Island japka, Brooklyn no iauani. Ka 1924 jimboksï kʼamaraspti uaani edifisuechani. Inde edifisuechaksï jarhuataaspti iámindu erachiichani paraksï sánderu májku kʼéri jarhani ka paraksï úni aianhpini Tata Diosïiri ambe jimeesïsï engaksï antesi no ueenga.