I te tausaga tenā, ne fai ne te fakapotopotoga kātoa a nai fakama‵fuliga ke fakamalosi aka te ‵kau fakatasi o Tino A‵koga ki te Tusi Tapu i fakatasiga. Ne kamata o ‵lomi ne The Watch Tower a fakamatalaga e uiga ki te tusi faitau ne sau‵tala latou ki ei i te lotou Fakatasiga o ‵Talo mo Vikiga ki a Ieova. E se gata i ei, ne faite ne Tino A‵koga ki te Tusi Tapu se kalena e fakasolo i ei a tusi fai‵tau mō vaiaso takitasi mo se pese ke usu i taimi o sukesukega totino mo tapuakiga a kāiga.

I olotou fakatasiga, e fai atu ne Tino A‵koga ki te Tusi Tapu se “molimau,” kāti se tala mai te galuega talai, se fakaasiga o te loto fiafia ki a Ieova, se pese, io me se ‵talo. A Eva Barney, telā ne papatiso i te 1923 kae ko 15 ana tausaga, ne fai mai: “Kafai e manako koe o fai sau molimau, e ‵tau koe o tu ki luga ko kamata ei o faipati atu a pati penei, ‘E fia fakafetai au ki te Aliki mō mea ‵lei katoa ne fai ne ia ki a au.’” E isi ne taina ko latou loa ko fia‵fia o fai olotou molimau. Ne toe fai mai te tuagane ko Barney: “Te taina matua kae pele ko Godwin ko ia loa ko uke ana mea e fia fakafetai atu ki te Aliki. Kae kafai ko lavea ne tena avaga a te taina e fai ne ia te takitakiga e se nofo ‵toka, ko ‵futi ei ne tou fafine te peleue o tena avaga, ko sagasaga ei ki lalo.”

E fai ne fakapotopotoga takitasi a te Fakatasiga ‵Talo mo Vikiga ki a Ieova i masina takitasi. Ne fakamatala mai i The Watch Tower i a Apelila 1, 1923, a mea e uiga ki te fakatasiga tenei: “A te āfa o te fakatasiga e ‵tau o fakaaoga ki te faiga o molimau e uiga ki te galuega talai kae fakamalosi a tino ga‵lue. . . . E tali‵tonu matou me i fakatasiga fakamalosi loto konei ka fai ei ke ‵pili malosi atu a taina mo tuagane.”

Ne maua ne Charles Martin, se tino talai i te fakapotopotoga telā ko 19 ana tausaga mai Vancouver, Kanata, a mea aoga e uke mai fakatasiga konei. Ne fai fakamuli mai a ia: “Tenei te koga ne tauloto ei ne au a pati ke fai atu i fale o tino. E masani o tu aka se tino o fai sena tala i te galuega mai fale ki fale. Kae ne maua ne au a manatu ‵gali ki aku pati ke fai atu mo auala ke tali atu ki manatu ‵teke mai tino.”

“Aso talai” ne aoga foki ki te faiga ke ‵kau fakatasi te fakapotopotoga kātoa. Ne fai mai The Watch Tower i a Apelila 1, 1923: “Ko te mea ke  mafai o ‵kau fakatasi i te faiga o se galuega . . . , ko oti ne fakatoka te Aso Lua, Me 1, 1923, mō fai se aso fakapitoa mō te galuega talai. E penā foki mo te Aso Lua muamua o masina katoa ki tua ifo . . . A tino katoa i fakapotopotoga takitasi e ‵tau o isi se lotou tusaga ki te galuega tenei.”

Ke oko ki Tino A‵koga i te Tusi Tapu kolā koi fo‵liki ne ‵kau katoa ki te galuega tenei. A Hazel Burford, telā ko 16 fua ana tausaga i te taimi tenā, ne fai mai: “Ne isi ne canvasses (tai ‵pau mo manatu fesoasoani mō sau‵talaga) ke tauloto ne matou. a Ne ga‵lue malosi eiloa māua mo toku tupuna tagata i galuega katoa konei.” Kae ne fepaki te tuagane ko Burford mo ‵tekemaiga mai se koga seki fakamoemoegina. Ne fai mai tou fafine: “Ne ‵teke malosi mai se taina matua kae pele, kae fai mai me e se ‵tau mo au o faipati ki tino. I te taimi tenā, ne seki malamalama a nisi tino me i Tino A‵koga ki te Tusi Tapu katoa, e aofia i ei a ‘tamataene mo tamafine,’ e ‵tau o aofia i te avatuga o vikiga ki te Mafuaga Sili.” (Sala. 148:​12, 13) Kae ne tumau eiloa te tuagane ko Burford i te talai atu. Ne kau atu a ia ki te vasega lua i te Akoga i Kiliata kae ne tavini pelā me se misionale i Panama. Fakamuli ifo, ne mafuli te kilokiloga a taina konā ki te ‵kau atu o talavou ki te galuega talai.

Ne fesoasoani atu foki a fono fo‵liki mo fono ‵lasi i te faiga ke ‵kau fakatasi a taina. Ne aofia i fono e uke konei a aso mō te galuega talai, e pelā mo te mea ne fai i Winnipeg, Kanata. I a Mati 31, ne aofia i te polokalame te vaega ko te “Se Taua Fakapito i Winnipeg,” telā e olo atu ei a tino katoa ne ‵kau ki te fono o talai. A aso talai penei ne fakatoka i ei te fakavae mō galuega e uke fakamuli ifo. I a Aokuso 5, e nofo ki se 7,000 tino ne ‵kau ki te suā fono lasi i Winnipeg. Tenei eiloa te ‵toe aofaki lasi o tino ne ‵kau ki se fono lasi i te taimi tenā i Kanata.

A te ‵toe fono tāua a tino o Ieova i te 1923 ko te fono ne fai i a Aokuso 18-26, i Los Angeles, California. I vaiaso mai mua o te fono, ne fai a faka‵pulaga i nusipepa kae ne tufatufa atu ne Tino A‵koga ki te Tusi Tapu a pepa ‵kami e silia atu mo te 500,000. E isi ne faka‵pulaga ‵lasi ne faka‵piki  ki luga i mea fakatele‵tele mo motoka totino a tino.

I te Aso Ono, Aokuso 25, ne fai ne te taina ko Rutherford a te lāuga “Mamoe mo Kouti,” telā ne fakamatala faka‵lei mai ne ia a “mamoe” e pelā me ko tino amio‵tonu kolā ka ola i te lalolagi palataiso. Ne isi foki se ikugā fono ne fai ne ia e fakaulutala penei “Se Faka‵pulaga Tāua.” Ne taku fakamasei i te ikugā fono tenei a Lotu ‵Se kae fakamalosi atu ki tino loto ‵lei ke ‵vae kea‵tea mai “Papelonia te Sili.” (Faka. 18:​2, 4) Fakamuli ifo, ne ‵kau fakatasi a Tino A‵koga ki te Tusi Tapu i te lalolagi kātoa o tufatufa atu a te fia miliona o ‵kopi o te ikugā fono tenei.

I te ‵toe aso o te fono, ne fakalogo‵logo a te 30,000 tupu o tino ki te lāuga a te taina ko Rutherford telā e fakaulutala penei “Ko Māti Atu a Atufenua Katoa ki Amaketo, Kae e Lau i Miliona a Tino e Ola Nei ka se Toe ‵Mate.” Ne iloa ne latou me ka tokouke a tino e ‵kau mai, tenā ne ‵togi ei ke fakaaoga ne latou te koga ta‵fao i Los Angeles. Ko te mea ke lagona ne tino katoa te polokalame, ne fakaaoga ne taina a mea faka‵lasi leo i te koga ta‵fao, kolā ne mea faigaluega ‵fou i te taimi tenā. E tokouke foki a tino ne fakalogo‵logo ki te polokalame e auala i te letio.

I te 1923, ne salalau malosi atu te galuega talai ki Afelika, Eulopa, Initia, mo Amelika ki Saute. I Initia, ne tausi atu a A. J. Joseph ki tena avaga mo ana tama‵liki e tokoono, kae onoono foki ki te faitega o tusi i te ‵gana Hindi, Tamil, Telugu mo te Urdu.

I Sierra Leone, ne tusi atu a Tino A‵koga ki te Tusi Tapu ko Alfred Joseph mo Leonard Blackman ki te ‵tou laumua i Brooklyn, New York, o fakamolemole atu ke uga atu ne tino talai ke fesoasoani ki a lāua. I a Apelila 14, 1923, ne maua te tali ki te lā fakamolemole. “I te valuapo o te Aso Ono e tasi,” ko pati a Alfred, “ne telefoni fakapoi mai se tino.” Ne lagona ne ia se leo maluga e fesili atu, “Ko koe ne tusi mai ki te Watch Tower Society o fakamolemole ke uga atu ne tino talai?” “Ao,” ko te tali a Alfred. “Io, tenei ne uga mai ne latou au.” A te leo tenā i o William R. Brown. Ne fatoa oko atu a ia i te aso tenā mai te Caribbean fakatasi mo tena avaga ko, Antonia, mo lā tama‵liki fāfine fo‵liki ko Louise mo Lucy. Ne seki manakogina ke faka‵tali a taina ki se taimi leva ke fetaui mo tino ‵fou konā ne fatoa oko atu.

 Ne toe fai mai a Alfred: “I te suā aso, kae koi fai ne māua mo Leonard a te mā sukesukega ki te Tusi Tapu telā e masani o fai i vaiaso katoa, ne tu mai se tagata loa i te mataloa. Ko te taina ko Brown. Ne lasi tena loto finafinau mō te munatonu kae ne manako ke fai ne ia te lāuga mō tino katoa i te suā aso.” E seki oti te masina, kae ko palele ne tufa ne te taina ko Brown a tusi katoa kolā ne vau mo ia. Ne maua fakamuli ne ia a tusi e 5,000, kae seki leva ne toe manakogina foki a nisi tusi. Kae ne seki lauiloa a te taina ko Brown e pelā me se tino ‵togi tusi. I tena galuega e pelā me se tavini a Ieova, ne fakaaoga faeloa ne ia te Tusi Tapu i ana lāuga, tenā ne lauiloa ei a ia me ko Bible Brown.

I te taimi tenā, ne gasolo o tokouke a tino ga‵lue i te ofisa lagolago i Barmen, Siamani, kae ‵logo atu foki me i te fenua pili mai ko Falani e taumafai o taua mai ki te fenua. Ne maua ne Tino A‵koga ki te Tusi Tapu se fale i Magdeburg telā e fetaui ‵lei eiloa mo te lotou galuega ‵lomi tusi. I a Iuni 19, ne toka a taina o fakaga‵sue olotou masini ‵lomi tusi mo nisi mea aka ki te Peteli fou i Magdeburg. I te aso eiloa ne fakailoa atu ki te ‵tou laumua me ko oti katoa latou ne ga‵sue, kae faka‵pula mai i nusipepa me ko oti ne puke ne Falani a te fakai ko Barmen. Ne ‵kilo atu a taina ki te fakaikuga ke ga‵sue e pelā me se fakamaoniga o te fakamanuiaga mo te puipuiga a Ieova.

I Brazil, a George Young, telā ne faimalaga sāle o folafola te tala ‵lei, ne fakatu ne ia se ofisa lagolago fou kae kamata o ‵lomi The Watch Tower i te ‵gana Portuguese. I loto i nai masina, ne tufatufa atu ne ia a tusi e 7,000 tupu. Ne fiafia malosi a Sarah Ferguson i te asiatuga a te taina ko Young ki te lotou kāiga. Ne faitau faeloa tou fafine ki The Watch Tower talu mai te 1899, kae ne seki mafai eiloa o fakamailoga tena tukuatuga e auala i te papatisoga ki te vai. I nai masina fakamuli ifo, ne mafai ei o papatiso a te tuagane ko Ferguson fakatasi mo ana tama‵liki e tokofa.

I te fakaotiotiga o te tausaga, ne fakamatala mai i The Watch Tower i a Tesema 15, 1923 a te aoga ki Tino A‵koga ki te Tusi Tapu a fakama‵fuliga ne fai: “E faigofie ke lavea atu me i te fakapotopotoga . . . e ma‵losi ‵lei i te feitu faka-te-agaga . . . Ke na ‵pei nei ‵tou gatu tau kae ke na tavini atu tatou mo te loto finafinau i te tausaga tenei i ‵tou mua, kae ke ga‵lue mo te fia‵fia.”

A te tausaga mai tua ifo se tausaga tāua ki Tino A‵koga ki te Tusi Tapu. Ne ga‵lue malosi i se fia masina a taina i te Peteli i se potu laukele i Staten Island, telā e pili fua ki te ‵tou laumua i Brooklyn. A fale ne faite i te laukele fou tenā ne palele i te kamataga o te 1924, kae ne fesoasoani atu ki te faiga ke ‵kau fakatasi a taina kae ke folafola atu te tala ‵lei i auala seki fakamoemoegina.