Mu gore ra 1923, sangano rakaita cinjo dzakabetsera Afundi e Bhaibheri kuti arumbwe akabatana pakunamata. Torre de Vigia yakatanga kubudisa masoko aipanganidza tsamba yaizofundhwa sumana yese pa musangano wakaringana no Munamato, Rukudzo uye Upupuri. Afundi e Bhaibheri akadhinda karendariyo yaipangidza tsamba yaizofundhwa ngezvayo pa sumana iyona, uye ngoma yaizoembhwa zuwa no zuwa no hama no hanzvadzi pa fundo yawo ye munhu ega kana kuti pakunamata kawo ke mhuri.

Pa misangano ii, Afundi e Bhaibheri aipanganidza maesperiensiya aainga asongana nawo mu basa re kuparidzira, zviro zvaaipfarira kuti atende Djehovha, aiemba ngoma, uye pamweni paya aitoita munamato kamare. Eva Barney, wakabhabhatidzwa no makore 15 muna 1923 unoedzurira kuti: “Munhu paaidikana kureketa ciro, waidikana kutanga amuka uye obhuya masoko akaita hinga aya: ‘Inini ndinoda kutenda Tenzi ngo zviro zvese zvakanaka zvaanondiitira.’” Uye hama dzimweni dzaitopfarirawo kuita izvona. Hanzvadzi Barney anoenderera eciti: “Ndiciri kuedzirira kuti zuwa rimweni hama imweni inodiwa maningi inozwi Godwin waitenda Tenzi ngo zviro zvakawanda maningi. Asi mukadzi wawo paakaona kuti hama yainga iri pa cikuwa yainga isikacazvipfariri, iyena wakakweya macira o mwamuna wake uye mwamunewo wakaima kureketa uye wakagara pasi.”

Musangano we Munamato, we Rukudzo uye Upupuri waiizwa kamwe pa mwedzi wainga uno dii rinokosha. Tecibhuya ngezve musangano uu waiizwa nge ungano dzese, Torre de Vigia ya 1 ya Abriri ya 1923, yakati: “Hafu yo musangano ngeye kupasa mhinduro, kubhuya ngezve maesperiensiya e mu basa re kuparidzira uye kubambisa hama no hanzvadzi. . . . Isusu tinotenda kuti musangano uu unobambisa ucaita kuti tibatane uye tigare dhuze no umwe na umwe wedu.”

Charles Martin we ku Vancouver, ku Canadá, wainga ano makore 19 uye wainga ari museenzi we krasi (mazuwa ano zvaakuziikanwa hinga muparidzi). Kaari, misangano idzi dzaikosha maningi. Iyena unoedzurira kuti: “Ndipo pandakatanga kufundira zviya zvandaidikana kubhuya pa nyumba pa samuzi. Zvainga zvakadjairika kuti umwe na umwe apanganidze esperiensiya yaakasongana nayo pa nyumba pa samuzi, uye izvona zvaindibetsera kuona zviro zvandaidikana kureketa uye mushobo wandaidikana kudaira kana samuzi akaramba kana kuti akandipasa mubvunzo.”

Ciro cimweni cakabetsera kuti hama dzinyase kubatana “mazuwa e basa.” Pa mazuwa awona, anhu aikohomedzeswa kuti abude pamwepo mu basa re kuparidzira. Torre de Vigia ya 1 ya Abriri ya 1923 yakaziisa kuti: “Tese ticabatana pa basa rimwero . . . , Cipiri, 1 ya Mayo ya 1923, yakasanangurhwa kuti igare zuwa re basa. Uye kubvira ipona, mu Zvipiri zvese zvekutanga zve mwedzi umwe na umwe rinonga riri zuwa re basa . . . Anhu ese e mu ungano aidikana kubuda mu basa re kuparidzira pa zuwa irona.”

Kunyazi Afundi e Bhaibheri ecidjaha aibudawo mu basa re kuparidzira. Hanzvadzi Hazel Burford ainga ano makore 16 pa nguwa iyona aciri kuedzurira kuti: “Ci Boletim cainga cino makani e kuezanisira ataidikana kubata no musoro. a Inini na Tsekuru angu taibuda maningi mu basa re kuparidzira.” Asi Hanzvadzi Burford akabatana nokuteererhwa ku mbuto yaainga asikakariri. Iyona inoti: “Hama imweni yacembera yainga isikambotenderi kunyazi padoko kuti inini ndirekete no anhu. Anhu amweni pa nguwa iyona ainga asikazwisisi kuti Afundi ese e Bhaibheri kutobatanidzawo ‘arumbwana no asikana’ aidikanawo kubuda mu basa re kuparidzira ecikudza Musiki wedu Mukuru.” (Pis. 148:12, 13, Versão Rei Jaime) Asi Hanzvadzi Burford aazi kuremba. Pakupedzesera, awona akazokursari turma yecipiri ye Cikora ce Giriyadhi uye akaenda kooseenza hinga misionariya ku Panamá. Nokuhamba ke nguwa, hama idzi dzakazocinja maonero adzo ekusama kuda kuti madjaha abude mu basa re kuparidzira.

Magungano akabetserawo maningi kuti hama dzibatane. Magungano akawanda ainga ano zuwa rakasanangurhwa re basa. Ngo muezaniso, ku gungano rakaizwa ku Winnipeg, ku Canadá apurutani ese akapikwa kuti aparidzire mu thaundiro pa zuwa ra 31 ya Marso. Zuwa irona rakaziikanwa hinga zuwa “Rinokosha Rakanyanya kuparidzirhwa ku Winnipeg.” Zviitiko zvinokosha zvakaita hingana izvi zvakabetsera pakukura ke basa. Mu 5 ya Agosto, anhu anokwana kuita 7000 akapinda gungano rimweni ku Winnipeg. Pa nguwa iyona, gungano iri ndirona rakapindhwa ngo anhu akawanda maningi pa magungano ese akamboizwa ku Canadá.

Rimwe re magungano anokosha maningi akaitika muna 1923 rakaitika ku Los Angeles, ku Califórnia mumazuwa 18-26 a Agosto. Masumana manganani gungano iri risati raitika, majornari aibudisa masoko  anocokuita no ciitiko ici uye Afundi e Bhaibheri akakoanisa mipiko dzinodarika 500 000. Makartaji aibhuya ngezve gungano iri akanamirhwa mu makaru ese.

Mu Sabudu, 25 ya Agosto, Hama Rutherford akaita mharidzo ino musoro waiti: “Mabira no Mbudzi,” uye ndipona paakabhuya pamhene kuti “mabira” ainga ari anhu ano unatsi aizorarama mu paraizo pa nyika pano. Pedzepo awona akaita mharidzo uye akaerenga “Ciziiso.” Ciziiso ici caibhuya ngezve magereja e kunyepa uye caikumbira anhu ano mwoyo unoda kuti abude mu “Bhabhironi Guru.” (Zvak. 18:2, 4) Mumasure me cinguwa, Afundi e Bhaibheri aiseenza no simba aizokoanisa mu nyika yese makopiya e tratadho irona raibhuya ngezve kubuda mu magereja e kunyepa.

Pa zuwa rekupedzesera re gungano, anhu anodarika 30 000 akapurutana Hama Rutherford eciita mharidzo ino musoro unoti: “Anhu e Madzinza Ese Arikuhamba Ecienda ku Amagedhoni, asi Anhu Arikurarama Zvino, Aazombofi.” Ngekuti aiziya kuti anhu aizopurutana anonga akawanda, Afundi e Bhaibheri akarugari mbuto yainga yabva kuwakwa yaizwi Los Angeles Coliseum. Kuti anhu ese anyase kuzwa zvakanaka, hama dzakaseenzesa makuruna anodusa izwi e pa mbuto iyona, uye iwona wainga uri mushobo upsva we zviro zve magetsi pa nguwa iyona. Anhu amweni akawanda maningi akazwa mharidzo uye urongwa uwona peciseenzeswa radhiyo.

Muna 1923, basa re kuparidzira rakakura maningi mu África, Europa, Índia no América do Sul. Ku Índia, hama imweni inozwi A. J. Joseph pane kuti icengetedze basi mukadzi wayo no ana ayo atanhatu, iyona yaibetserawo pa basa rekubudisa mabhuku mu mureketero we ci Hindi, Tâmil, Télugo, uye Urdu.

Ku Serra Leoa, Afundi e Bhaibheri anozwi Alfred Joseph na Leonard Blackman akatarira ecikumbira rubetso ku sedhi mundirayi ye Brooklyn, ku Nova York. Mu 14 ya Abriri ya 1923, cikumbiro cawo cakadairhwa. Alfred unoti: “Mu Sabudu co usiku, thurufunu yangu yakarira uye wainga waa usiku kamare.” Ku dii rimweni re thurufunu, pano munhu wakabvunzisa no izwi guru eciti: “Ndiwe wakatarira ku Sociedade Torre de Vigia wecikumbira rubetso?” Alfred wakadaira eciti: “Honde, ndini.” Uye munhu umweni wainga ari pa dii wakati: “Awona akatumira kuno.” Izwi iri rainga riri ra William R. Brown. Iyena wainga aguma pa zuwa irona kamare kubva ku Caribe no mukadzi wake Antonia uye no ana ake airi e asikana anozwi Louise na Lucy. Pasati patodarika nguwa yakareba, hama no hanzvadzi dzakaziya hama Brown no mhuri yawo.

Alfred unoenderera mberi eciti: “Pa zuwa rakateera, cemacibesi, inini na Leonard taicedza ngezve  Bhaibheri hinga zvataiita masumana ese. Tisikakariri, isusu takaona mwanarume umweni akareba akaima pa musuwo. Wainga ari William R. Brown. Iyena wainga ari mwanarume uno shigaira zvekuti waitoda kutoita mharidzo pa zuwa raizoteera.” Mwedzi usati wapera, Hama Brown akapangidza mabhuku ese aainga anawo. Uye iwona akazopaswa mabhuku amweni anodarika 5000. Asi pasati padarika nguwa yakareba, iwona ainga oodazve mabhuku amweni. Asi Hama Brown aazi kuziikanwa hingana munhu waitengesa mabhuku. Pa upenyu wawo wese hinga museenzi wa Djehovha unoseenza no simba, awona aireketa zvinobhuiwa no Bhaibheri mu mharidzo yawo, ndiyo ndaa anhu aiadainza kuti Bhaibheri Brown.

Ku Alemanha hama dzakasanangura kucinja Bheteri re thaundi ro Barmen, ngekuti ikona kainga kusisina mbuto inokwana anhu ese. Kusiya izvona, awona ainga azwa kuti anyahondo e França aizopinda mu thaundiro. Afundi e Bhaibheri akaona ma predhiyo akawanda akanaka aikwanisa kuabetsera kuti akwanise kuita basa rawo rekudhinda mabhuku mu thaundi re Magdeburgo. Mu 19 ya Junyo, hama dzainga dzapedza kurongedza zvaaiseenzesa pakudhinda no zviro zvimweniwo uye kufuruka kuenda ku Bheteri re Magdeburgo. Pedzepo, mumasure mekuti sedhi mundiyari yaziiswa kuti cinjo yaizwa, majornari akaziisa kuti masurudado e França ainga apinda mu thaundi re Barmen. Hama no hanzvadzi dzakaona ciitiko ici hinga makomborero uye cidziiriro ca Djehovha.

Ku Brasil, George Young wainga ahamba ku mbuto dzakawanda eciparidzira masoko akanaka, wakatanga Bheteri ripsva uye wakatanga kubudisa Torre de Vigia mu Ciputukezi, (mazuwa ano, zvaakuzwi Murindiri). Ke mwedzi minganani basi, iyena wakakwanisa kukoanisa anhu mabhuku anodarika 7000. Kuguma kaakaita ku Brasil, kakaunzisa mupfaro ku mhuri ya Sarah Ferguson. Iyena wainga aakuerenga Torre de Vigia kubvira muna 1899, asi wainga asati aona mukana kuti apangidze kudzipira kake nge kubhabhatidzwa. Mumasure me mwedzi minganani, Hanzvadzi Ferguson pamwepo no ana awo arongomuna akaita danho iri rinokosha re kubhabhatidzwa.

Mukupera ke gore irona, Torre de Vigia ya 15 ya Dezembro ya 1923 yakabhuya kuti: “Afundi e Bhaibheri akabetsereka kudini ngo cinjo dzakaizwa pa misangano, mu basa re kuparidzira uye pa magungano.” Iyona yakabhuyawo kuti: “Zviri pamhene kuti ungano . . . dzakabamba pano cokuita no zve kunamata . . . tinodikana kugara takagadzirira pa basa riri kuuya mberi tecirumbwa teciseenzera Mwari no simba uye tecipfara.”

Gore ra 1924 rakagarawo rinokosha ku Afundi e Bhaibheri. Hama dze Bheteri dzakapedza mwedzi dzeciseenza ku Staten Island dhuze no Bheteri re Brooklyn. Basa iri re kuwaka rakapera mukutanga ke gore ra 1924, uye rakabetsera kuti hama dzitunhudzire kubatana uye kuparidzwa ke masoko akanaka kainga kusikakarirhwi.