Hito nga tuig, an organisasyon naghimo hin mga pagbag-o nga nakabulig nga magkaurosa ha pagsingba an mga Estudyante han Biblia. An The Watch Tower nagtikang magpublikar hin mga pagsaysay ha mga teksto nga ira ginhihisgotan ha ira sinemana nga Katirok Para Mag-ampo Ngan Magdayaw kan Jehova. Dugang pa, an mga Estudyante han Biblia nag-imprinta hin kalendaryo nga may teksto para ha tagsa nga semana ngan may kanta nga mahimo nira kantahon ha panahon han ira personal nga pag-aram o pagsingba han pamilya.

Ha ira mga katirok, an mga Estudyante han Biblia naghahatag hin mga “testimonya” nga nag-uupod hin eksperyensya ha pagsangyaw, kapahayagan han ira pagpasalamat kan Jehova, kanta, o bisan pag-ampo. Hi Eva Barney, nga nabawtismohan han 1923 ha edad nga 15, nagsiring: “Kon karuyag mo maghatag hin testimonya, matindog ka ngan magtitikang pagyakan sugad han, ‘Karuyag ko pasalamatan an Ginoo tungod han iya pagkamaopay ha akon.’” May mga bugto nga naruruyag paghatag hin testimonya. Hi Sister Barney nagpadayon: “An amon hinigugma ngan edaran na nga bugto nga hi Brother Godwin damu gud an karuyag igpasalamat ha Ginoo. Pero han napansin han iya asawa nga an brother nga nagdudumara diri na namumurayaw, ginkakaptan han iya asawa an iya bado, salit naundang na hiya pagyinakan ngan nalingkod.”

Makausa kada bulan, an tagsa nga kongregasyon may-ada espesyal nga Katirok Para Mag-ampo Ngan Magdayaw kan Jehova. Basi ihulagway ini nga katirok, an The Watch Tower han Abril 1, 1923, nagsiring: “An katunga nga bahin han katirok dapat igahin ha mga komento ngan eksperyensya parte ha pagsangyaw nga buruhaton ngan ha pagparig-on ha mga magwarali. . . . Natoo kami nga ini nga makaparig-on nga mga katirok nakakabulig basi magin mas duok an kabugtoan ha usa kag usa.”

Hi Charles Martin, nga usa nga 19 anyos nga magwarali ha kongregasyon ngan tikang ha Vancouver, Canada, nakapahimulos gud tikang hini nga mga katirok. Ha urhi hiya nagsiring: “Dida hito ako siyahan nga nahibaro kon ano an igsisiring ha pagsangyaw ha balay-balay. Kasagaran na nga may nagsusumat hin eksperyensya ha pagbalay-balay. Naghatag ini ha akon hin mga ideya kon ano an igsisiring ngan kon paonan-o babatunon an iba-iba nga mga pagriwa.”

An kabugtoan mas nagkaurosa liwat tungod han pagkaada nira mga “adlaw han pagsangyaw.” An Abril 1, 1923, nga isyu han The Watch Tower nagsiring:  “Basi magkaurosa kita ha uusa la nga buruhaton . . . , an Martes, Mayo 1, 1923, ginpili sugad nga adlaw han pagsangyaw para ha ngatanan. Katapos hito, an kada siyahan nga Martes han bulan magigin adlaw han pagsangyaw . . . An tagsa nga membro ha kada kongregasyon dapat magkaada bahin hini nga buruhaton.”

Bisan an mga batan-on nga Estudyante han Biblia nakigbahin hini nga buruhaton. Hi Hazel Burford, nga 16 anyos la hito nga panahon, nagsiring: “An Bulletin may-ada sampol nga mga pakiistorya nga amon mimemoryahon. a Kaupod hi Lolo, bug-os ako nga nakigbahin hini ngatanan nga buruhaton.” Pero hi Sister Burford nahipausa ha reaksyon han usa nga brother mahitungod ha iya pagsangyaw. Hiya nagsiring: “Usa nga edaran na nga brother an kinontra ha akon pakiistorya ha mga tawo. Hito nga panahon, diri nasasabtan han pipira nga an ngatanan nga Estudyante han Biblia, upod na an ‘batan-on nga mga lalaki ngan batan-on nga mga babaye,’ kinahanglan makigbahin ha pagdayaw ha aton Harangdon nga Maglalarang.” (Sal. 148:12, 13) Pero hi Sister Burford waray umundang. Ha urhi ineskwela hiya ha ikaduha nga klase han Gilead School ngan nagin misyonera ha Panama. Paglabay han panahon, ginbag-o hito nga kabugtoan an ira panhunahuna may kalabotan ha mga batan-on nga nakikigbahin ha ministeryo.

An mga kombensyon nakabulig liwat nga magkaurosa an kabugtoan. An damu hini nga kombensyon may-ada mga adlaw han pagsangyaw, sugad han ginhimo ha Winnipeg, Canada. Pananglitan, han Marso 31, ha kombensyon ha Winnipeg, Canada, an ngatanan nga inatender gin-imbitar nga magsangyaw hito nga syudad. Tungod hini nga mga pagsangyaw, mas damu nga tawo an nakaistorya ngan nagkaada ini mag-opay nga resulta. Han Agosto 5, ginbabanabana nga 7,000 ka tawo an inatender ha usa pa nga kombensyon ha Winnipeg. Hito nga panahon, ito an may pinakadamu nga inatender hin kombensyon ha Canada.

Usa nga importante gud nga kombensyon han katawohan ni Jehova han 1923 an ginhimo han Agosto 18-26, ha Los Angeles, California. Pipira ka semana antes hito nga kombensyon, iginpahibaro ha mga dyaryo ito nga okasyon ngan an mga Estudyante  han Biblia nanhatag hin sobra 500,000 nga handbill. Nagbutang liwat hira hin mga baner ha panpubliko ngan pribado nga mga sarakyan nga nagpapahibaro mahitungod hito nga kombensyon.

Han Sabado, Agosto 25, iginpresentar ni Brother Rutherford an pahayag nga “Mga Karnero Ngan mga Kanding,” diin matin-aw nga iginpakilala niya nga an mga “karnero” amo adton may husto nga disposisyon nga maukoy ha paraiso nga tuna. Ginbasa liwat niya an resolusyon nga “Usa nga Pahamangno.” Ginkondenar hini nga resolusyon an Kakristianohan ngan gin-aghat an mga tawo nga tangkod an kasingkasing nga bumulag ha “Babilonya nga Gamhanan.” (Pah. 18:2, 4) Ha urhi, an madasigon nga mga Estudyante han Biblia ha bug-os nga kalibotan nanaltag hin minilyon nga tract diin mababasa ini nga resolusyon.

Ha ultimo nga adlaw han kombensyon, an inatender nga sobra 30,000 nakabati han pahayag publiko ni Brother Rutherford nga “An Ngatanan nga Nasud Nagmamartsa Tipakadto ha Armagedon, Pero Minilyon nga Nabubuhi Yana an Diri Na Gud Mamamatay.” Tungod kay ginlalaoman han mga Estudyante han Biblia nga damu an maatender, ginpletehan nira an bag-o la nga gintukod nga Los Angeles Coliseum. Basi masiguro nga makabati an ngatanan, gin-gamit han kabugtoan an makusog nga mga speaker han Coliseum, nga bag-o nga teknolohiya hito nga panahon. Ngan mas damu an nakabati hito nga programa ha radyo.

Han 1923, may makapainteres nga pag-uswag han pagsangyaw nga buruhaton ha Africa, Europa, India, ngan South America. Ha India, samtang gin-aataman ni A. J. Joseph an iya asawa ngan unom nga anak, binulig hiya ha pag-imprinta hin mga literatura ha Hindi, Tamil, Telugu, ngan Urdu.

Ha Sierra Leone, an mga Estudyante han Biblia nga hira Alfred Joseph ngan Leonard Blackman nagsurat ha world headquarters ha Brooklyn, New York, basi maghangyo hin bulig. Han Abril 14, 1923, ginbaton ito. “Usa ka gab-i han Sabado,” siring ni Alfred, “may tumawag ha akon nga diri ko ginlalaoman.” Nakabati hiya hin daku nga tingog nga nagpapakiana, “Ikaw ba an nagsurat ha Watch Tower Society basi maghangyo hin mga parasangyaw?” “Oo,” siring ni Alfred. “Ako an ira ginpadara.” An iya nakaistorya amo hi William R. Brown. Tikang ha Caribbean inabot hiya hito nga adlaw upod an iya asawa nga hi Antonia ngan an ira duha nga anak nga babaye, nga hira Louise ngan Lucy. An kabugtoan waray na maghinulat hin maiha basi makilala hi Brother Brown ngan an iya pamilya.

 Hi Alfred nagpadayon: “Kinabuwasan, samtang naghihisgot kami ni Leonard hin Biblia sugad han amon ginhihimo kada semana, tigda nga may nakita kami nga hitaas nga tawo ha may purtahan. Hi Brother Brown ito. Sobra gud an iya kadasig ha kamatuoran ngan tungod hito karuyag niya maghatag hin pahayag publiko kinabuwasan dayon.” Waray pa mag-usa ka bulan, naipanaltag na ni Brother Brown an ngatanan nga literatura nga iya dara. Waray pag-iha nakakarawat hiya hin 5,000 pa nga libro, pero naubos dayon ito ngan mas damu pa nga libro an kinahanglan. Pero hi Brother Brown diri kilala sugad nga parabaligya hin libro. Ha maiha niya nga pag-alagad sugad nga madasigon nga surugoon ni Jehova, pirme niya gin-gagamit an Kasuratan ha iya mga pahayag, salit gintawag hiya nga Bible Brown.

Ha Germany naman, an kabugtoan nagdesisyon nga an sanga nga opisina ha Barmen, ibalhin kay sobra ito kagutiay ngan nabatian nira nga hirani na sulungon han kasundalohan han France ito nga syudad. An mga Estudyante han Biblia nakabiling hin bilding ha Magdeburg nga baga hin angayan gud para ha pag-imprinta hin mga literatura. Han Hunyo 19, natapos han kabugtoan an pag-impake han printing equipment ngan han iba pa nga mga gamit ngan binalhin hira ha bag-o nga Bethel ha Magdeburg. Kinabuwasan gud la katapos masumatan an world headquarters nga nakabalhin na hira, iginbalita ha mga dyaryo nga nasakop na han France an syudad han Barmen. Para ha kabugtoan, ito nga pagbalhin pamatuod han bendisyon ngan proteksyon ni Jehova.

Ha Brazil, hi George Young, nga nabiyahe ha higrayo nga lugar basi ipasamwak an maopay nga sumat, nagtukod hin bag-o nga sanga nga opisina ngan nagtikang pagpublikar hin The Watch Tower ha Portuguese. Ha sulod la hin pipira ka bulan, nakapanaltag hiya hin sobra 7,000 nga literatura. An iya pag-abot ha Brazil nakabulig liwat kan Sarah Ferguson. Nagbibinasa na hi Sarah hin The Watch Tower tikang pa han 1899, pero waray pa gud hiya mabawtismohi. Paglabay hin pipira ka bulan, hi Sister Ferguson ngan an iya upat nga anak nabawtismohan na.

Ha ikatarapos han tuig, ginhulagway han The Watch Tower han Disyembre 15, 1923, kon paonan-o nakaapekto ha mga Estudyante han Biblia an mga pagbag-o ha ira katirok, pagsangyaw, ngan kombensyon. Nasiring ito: “Nakikita gud nga an mga kongregasyon . . . may marig-on nga espirituwalidad . . . Pag-andam kita para ha damu pa nga buruhaton ngan magpadayon ha pag-alagad ha Dios ha sunod nga tuig nga may kalipay ngan kadasig.”

An sumunod nga tuig magigin eksayting gud para ha mga Estudyante han Biblia. An kabugtoan ha Bethel pipira na ka bulan nga nagtutukod hin pasilidad ha usa nga lote ha Staten Island, nga hirani ha ira headquarters ha Brooklyn. Natapos an pagtukod ha siyahan nga bahin han 1924, ngan nakabulig ito basi magkaurosa an kabugtoan ngan maipasamwak an maopay nga sumat ha mga paagi nga diri gud posible hadto.