1923 წანას მოხვალამირ ნამთინე ორგანიზაციულ ცვლილებაქ ხე შეუნწყუ თის, ნამდა ბიბლიაშ მარკვიებელეფქ გაერთიანებულო ცესკო თაყვან იეჰოვა ღორონთის. თე წანაშე მოჸუნაფილ, „გინაჯინალ კოშკის“ იბეშტუდ ბიბლიურ მუხლიშ ენწყუმა, მუდგაშ გარჩიება მიშჷ „ლოცვაშ, განდიდებაშ დო დამოწმებაშ ირმარიან შეხვალამას“. თეს გეძინელ, კინ თე წანას, ბიბლიაშ მარკვიებელეფქ ქიდიჭყეს კალენდარიშ გიშაშქუმალა, სოდეთ მოჩამილ რდჷ თითოულ მარას გარჩიებელ ბიბლიურ მუხლ დო თეწკუმა ართო, თითოულ დღაშო მერჩქინელ ობირეშ, ნამდგაშ ბირა ბიბლიაშ მარკვიებელეფს პირად გურაფაშ ვარდა ოჯახურ თაყვანიშცემაშ დროს შეულებდეს.

„ლოცვაშ, განდიდებაშ დო დამოწმებაშ შეხვალამას“ ბიბლიაშ მარკვიებელეფ იბირდეს, ლოცულენდეს დო იჩიებდეს მსახურებას მოხვალამირ შემთხვევეფს დო თის ხოლო, მუშენ რდეს მარდულ იეჰოვაშ. ართ და, ევა ბარნი, მიდგაქ 1923 წანას, 15 წანერ რდუნ თეშ ინათ, იშინანს: «შეხვალამას სიტყვათ გიშულა ქუგოკოდ-და, კუჩხშა ოკო გეიდგინუდკო დო ჩიება თეცალ სიტყვეფით ოკო დიჭყუკო: „მადლობა ჩქიმ უფალს ირფელშო, მუთ ჩქიმო აკეთ!“» ნამთინეს მანგარო უჸორდჷ თე შეხვალამას მონაწილებაშ მეღება დო სიტყვათ გიშულა. და ევა აგრძელენს: „ართ ძვირფას, ხანშამიშულირ ჯიმა პჸუნდეს, მიდგას იეჰოვაშ მიმართ გურ მარდულობათ აფუდ ეფშა დო ოკოდ, თენა ირნერო გეგმოხანტუკო. მარა მინშა, სიტყვათ გიშულაშ დროს ჩიება თეშ ეგრძელებუდ, ნამდა შეხვალამაშ თავმჯდომარე ხოლო იწუხებუდ. თე დროს თე ჯიმაშ ოსურ თის კოსტუმშა მუქანჩუანდჷ დო თინა ხოლო ხეთეშე მიოტალენდჷ ჩიებას“.

თუთაშე ართშა თითოულ კლას „ლოცვაშ, განდიდებაშ დო დამოწმებაშ შეხვალამას“ განსაკუთრებულო ატარენდჷ. 1923 წანაშ 1 აპრილიშ „გინაჯინალ კოშკის“ თე შეხვალამაშ გურშენ თეცალ მუდგარენ ჭარუდ: „შეხვალამაშ გვერდ ნაწილს მსახურებას მოხვალამირ შემთხვევეფიშ გურშენ ოკო იფჩუათ დო ართიანს გურშა ოკო ელუკინათ. ბჯერა, ნამდა თე შეხვალამეფ ხეს შეუნწყუნს ართობას დო ხოლო უმოსო დუმაახლოვენა ართიანწკუმა“.

თე შეხვალამეფქ ჯგირობუაშ მუმაღალარქ იჸუ 19 წანერ ჩარლზ მარტინშო, მით კანადაშ ქალაქ ვანკუვერშე რდჷ დო ართ-ართ კლასიშ წევრ რდჷ (კრებაშ მაუწყებელ). თიქ თეცალ სიტყვეფ თქუ: „ზუსტას თე შეხვალამას დიბგურე პირველო, მუ ოკო ფთქვიკო კარდოკარ მსახურებაშ დროს. ხშირას, ნამთინე ბიბლიაშ მარკვიებელ კარდოკარ მსახურებას მოხვალამირ შემთხვევეფიშ გურშენ იჩიებუდ. თექ მიმეხვარ თიშ ინონჭაფას, მუ ოკო ფთქვიკო კარდოკარ მსახურებაშ დროს დო მუჭო ოკო ვუპასუხკო საწინააღმდეგო აზრის“.

ღორონთიშ ხალხიშ ართობას თიქ ხოლო შეუნყუ ხე, ნამდა კონკრეტულ დღალეფქ იჸუ მერჩქინელქ  სამქადაგებლო საქმეს გაერთიანებულო მონაწილებაშ მიოღებელო. 1923 წანაშ 1 აპრილიშ „გინაჯინალ კოშკის“ თეცალ განცხადებაქ იჸუ კეთებულქ: „სამქადაგებლო საქმე უმოს გაერთიანებულო შევასრულათინ თიშო, პირველ მესშე მოჸუნაფილ, ირ თუთაშ თახაშხამოდღას, გაერთიანებულო მიბღენთ მონაწილებას მსახურებას. თითოულ კლასიშ წევრიქ ირნერო ოკო ეცადას, მონაწილება მიღას თე ღონისძიებას“.

სამქადაგებლო საქმეს ახალგაზრდა ბიბლიაშ მარკვიებელეფ ხოლო ღებულენდეს მონაწილებას. ჰაზელ ბურფორდიქ, მით თიმ დროს 16 წანერ რდჷ, თეცალ მუდგარენ გიშინ: «„ბიულეტენს“ მოჩამილ რდჷ მარტივ შეთავაზებეფ, ნამუთ ოკო დემაფხსოვრითკო. a ბაბწკუმა ართო მთელ მონდომათ ბღებულენდჷ მონაწილებას სამქადაგებლო საქმეს». მარა და ჰაზელქ ართ წინააღმდეგობას ქეშეხვად. თინა იშინანს: «ართ ძვირფას, ხანშამიშულირ ჯიმა ითხინდჷ, ნამდა ხალხწკუმა სახიოლო ამბეშ ქადაგება მივოტეკო. თიმ პერიოდის ნამთინე ბიბლიაშ მარკვიებელს ვარჩქილედ, ნამდა არძაქ ოკო განადიდკო იეჰოვა ღორონთ, თინეფ შქას „ახალგაზრდა ბოშეფქ დო ცირასქუალეფქ ხოლო“» (ფსალმ. 148:12, 13). თე წინააღმდეგობაშ უმკუჯინუო, და ჰაზელს ქადაგება ვემუტებ. უმოს გვიანო, თინა „სკოლა გალაადიშ“ მაჟია კლასშა მიწვიეს დო მისიონერო მსახურენდჷ პანამას. დროშ მიკულაწკუმა ართო, ჯიმალეფქ დითირუეს დამოკიდებულება დო ქიმეხვადეს, ნამდა ახალგაზრდეფს ხოლო უღდეს უფლება, მონაწილება მიღესკო მსახურებას.

ღორონთიშ ხალხიშ ართობას კონგრესეფქ ხოლო შეუნწყუ ხე. კონგრესეფიშ პერიოდის მსახურებაშო კონკრეტულ დღალეფ რდჷ გიშართილ. მაგალთო, ართშა, კანადაშ ქალაქ უინიპეგის, 31 მარტის კონგრესშა მოულირ სტუმარეფს უწუეს, ნამდა მონაწილება მიღესკო მსახურებას, ნამუთ დაგეგმილ რდჷ თი ქალაქის. თე სამქადაგებლო ღონისძიებას „უინიპეგიშ ეჭოფუა“ გიოდვეს. თე ღონისძიებას ბრელქ მიღჷ მონაწილება, მუდგას სარკო შედეგეფქ მაჸუნ. მაგალთო, 5 არგუსოს უინიპეგის ხოლო ართშა ჩატარებულ კონგრესის სოდგარენ 7 000 ადამიანქ დესწრჷ. თენა კანადას ჩატარებულ კონგრესეფიშ ისტორიას დამსწრეეფიშ არძაშ უდიდაშ რიცხვ რდჷ.

არძაშ უმოს მნიშვნელოვან კონგრესიქ 1923 წანაშ 18—26 არგუსოს კალიფორნიაშ ქალაქ ლოს-ანჯელესის ჩეტარ. მუსხირენ მარათ ადრე გაზეთეფს იბეშტუდ თე კონგრესიშ ჩატარებაშ გურშენ დო ბიბლიაშ  მარკვიებელეფქ 500 000-შე უმოს მაწვიებელ გავრცელეს. თეს გეძინელ, თინეფ კონგრესშა ხალხის აპატიჟენდეს საზოგადოებრივ ტრანსპორტის დო პირად მანქანეფს კეთებულ ბანერეფიშ საშვალებათ.

საბატონს, 25 არგუსოს, ჯიმა რუტერფორდიქ გიშელ მოხსენებათ, ნამდგაშ სათაურ რდჷ „შხურეფ დო თხალეფ“. თე მოხსენებას თიქ არგამათ ქაძირუ, ნამდა „შხურეფშა“ მიშულა თინეფ „მიდგაშ გურ მარადიულ ცხოვრებაშ მიოღებელო რე განწყობილ“ დო იცხოვრენა სამოთხეთ გინორთელ დედამიწას. თეს გეძინელ, წარადგინ რეზოლუცია, სახელო „გაფრთხილება“, სოდეთ გიმაარგამ ქრისტიანულ სამყარო დო ალალ გურიშ კათას ელუჩ, გეგშართესკო „დიდ ბაბილონშე“ (გამოცხ. 18:2, 4). უმოს გვიანო, ბიბლიაშ გურგედვალირ მარკვიებელეფქ თე რეზოლუციაშ მილიონობით ასლ გავრცელეს მთელ მსოფლიოს.

კონგრესიშ ბოლო დღას 30 000-შე უმოს ადამიანქ მირჩქილუ ჯიმა რუტერფორდიშ საჯარო მოხსენება, ნამდგაშ სათაურ რდჷ „არძა ერ არმაგედონშა მეურს, მარა ამდღა მახორუ მილიონეფ დღას ვა ღურნა!“ ბიბლიაშ მარკვიებელეფ თე კონგრესის ქიანაშ სტუმარს ელდეს. ათეშენ, თინეფქ ლოს-ანჯელესის დექირეს სტადიონ, ნამუთ ახალ გონწყუმილ რდჷ. კონგრესიშ პროგრამა არძაქ ჯგირო მირჩქილუკონ თიშენ, ჯიმალეფქ გიმირინეს ხუმაშ გუმაძლიერებელ სისტემა, ნამუთ თიმ პერიოდის ახალ ტექნოლოგია რდჷ. ბრელქ თე პროგრამა რადიოთ ხოლო მირჩქილუ.

1923 წანას სამქადაგებლო საქმექ დიდ მასშტაბეფს ქიმიოჭირინუ აფრიკას, ევროპას, ინდოეთის დო სამხრეთ ამერიკას. მაგალთო, ინდოეთის მახორუ ართ ჯიმა, ჯოზეფ, ოსურშა დო ამშვ ბაღანაშა მიკოჯინაწკუმა ართო, მონაწილებას ღებულენდჷ ლიტერატურაშ გიშაშქუმალაშ საქმეს ჰინდი, ტამილურ, ტელუგუ დო ურდუ ნინეფშა.

სიერა-ლეონეს მახორუ ბიბლიაშ მარკვიებელეფქ, ალფრედ ჯოზეფიქ დო ლეონარდ ბლექმენქ, ბრუკლინშა, მთავარ სამართველოშა, წერილ მიდაჯღონეს დო თხის, სამქადაგებლო საქმეს ქიმეხვარესკო. 1923 წანაშ 14 აპრილს, საბატონს, გვიან სერს, ალფრედის დურეკეს. მუჭოთ თინა იშინანს, ტელეფონ გეჭოფუნ მიდგარენქ ცოცხალ ხონარით კითხჷ: «სი რექო თინა, მიდგაქ „გინაჯინალ კოშკიშ საზოგადოებას“ მეჭარ, თქვანდა მაქადაგებელეფ ქუმაშქვესკო?» ალფრედიქ უპასუხ: „ქო, მა ვორექ“. თიქ უწუ: „ოდა, მა ვორექ თინა, მით თქვანდა გუტეს“. თე ჯიმა უილიამ ბრაუნ რდჷ. თინა მუშ მეუღლე ანტონიაწკუმა დო ჟირ ცირასქუა ლუის დო ლუსიწკუმა ართო თიმ დღაშ მუნაულა რდჷ კარიბიშ ზღვაშ კუნძულეფშე. ათეშენ, ჯიმალეფს ბრელ ხან ვაჸიდეს ოჯინე თიწკუმა შეიოხვამლაფარო.

ალფრედ იჩიებ: „მაჟია ოჭმარეს, მუჟამსით მა დო ლეონარდ ბიბლიას იბრკვიენდით, მუდგას ირ მარას ვორთუდით, მინაულარ კარს ართ მაღალ კოჩიქ  ქადირთჷ, თენა უილიამ ბრაუნ რდჷ. თინა თიცალ მონდომებულ რდჷ, ნამდა მაჟია დღას საჯარო მოხსენებაშ კეთება ოკოდ“. თიქ მსახურებას ხოლო ხეთეშე ქიდიჭყჷ აქტიურო მონაწილებაშ მეღება დო ართ თუთაშე ნაკლებ დროს გავრცელ არძა პუბლიკაცია, მუთ მოღალირ აფუდ. თის 5 000-შე უმოს წიგნ ხოლო მეუჯღონეს, მარა თინეფ ხოლო უცფას გავრცელ დო კინ დესაჭირ ახალ პუბლიკაციეფქ. მართალ რე, ბრელ პუბლიკაციას ავრცელენდჷ, მარა ჯიმა ბრაუნს ვეჩინენდეს პიროვნებათ, მით უბრალოთ წიგნეფს არიგენდჷ. თინა გურგედვალირო ომსახურუდ იეჰოვას დო ხალხწკუმა ჩიებაშ დროს ირიათო ბიბლიურ მუხლეფს ირინუანდჷ, მუდგაშ გურშენ ზედმეტსახელო „ბიბლიაშ ბრაუნ“ გიოდვეს.

ეშობას, გერმანიაშ ქალაქ ბერმენიშ ფილიალს მსახურენდესინ თი თანაქრისტიანეფ შხვადო გინაულარო ინწყუაფუდეს. მუშენდა თი ფილიალს ბრელ მსახურენდჷ, მარა ტერიტორია მანგარ ჭიჭე რდჷ დო თეს გეძინელ, ჯიმალეფს გაგებულ აფდეს, ნამდა საფრანგეთიშ ჯარს თე ქალაქშა მიშაჭკირუა ულამუდ. ბიბლიაშ მარკვიებელეფქ ქალაქ მაგდებურგის დოგორეს ართ შენობა, ნამუთ იდეალურ ადგილ რდჷ ლიტერატურაშ ობეშტალო. ათეშენ გეგნოჭყვიდეს, ბეთელ თექ გეგნიღესკო. 19 ივანობას თინეფქ დოჩოლეს ჯვეშ ბეთელ დო ობეშტალ მოწყობილობეფ, ავეჯ დო შხვა ირფელ, მუთ თექ უღდეს, გეგნიღეს მაგდებურგშა, ახალ ბეთელშა. მთავარ სამართველოს გინულაშ თებაშ ამბე ქუგაგებაფუესინ თიშ უკულ მაჟია დღას, გაზეთეფს დიბეშტჷ, ნამდა საფრანგეთიქ გეჭოფ გერმანიაშ ქალაქ ბერმენ. თე შემთხვევაშე ჯიმალეფქ ჯგირო ქოძირეს, მუჭო დოთხილუ თინეფ იეჰოვაქ.

თე წანას ჯიმა ჯორჯ იანგიქ, მით შხვადოშხვა ქიანას გურგედვალირო ქადაგენდჷ სახიოლო ამბეს, ახალ ფილიალ გონწყჷ ბრაზილიას დო ქიდიჭყჷ „გინაჯინალ კოშკიშ“ გიშაშქუმალა პორტუგალიურ ნინაშა. მუსხირენ თუთაშა თიქ 7 000-შე უმოს ჟურნალ დო ბუკლეტ გიშაშქვჷ. ჯიმა ჯორჯიქ ქიმიაკითხუ სარა ფერგიუსონს, მით 1899 წანაშე მოჸუნაფილ რეგულარულო კითხულენდჷ ჟურნალ „გინაჯინალ კოშკის“ დო იეჰოვაშა ხოლო აფუდ დუდ მეძღვინელ, მარა ვა მიაჩ შესაძლებლობაქ, თენა სახალხოთ ხოლო ქაძირუკო ნათუათ. მუშო ოკო რაგად, სარას დო თიშ ოჯახიშ წევრეფს მანგარო ახიოლედეს ჯიმა ჯორჯიშ მეულა. მუსხირენ თუთაშა, სარაქ მუშ ოთხ სქუაწკუმა ართო დინათ.

წანაშ ბოლოს, 1923 წანაშ 15 დეკემბერიშ „გინაჯინალ კოშკის“ ეჭარილ რდჷ, მუჭო შეუნწყუ ხე ღორონთიშ ხალხიშ ართობას შეხვალამეფქ, მსახურებაქ დო კონგრესეფქ. თექ ჭარუდ: „არგამათ იძირე, ნამდა კრებეფს და დო ჯიმალეფს ძალიერ რწმენა დო ართობა უღნა. მორთ, მთელ მონდომათ, გაახალებურ ძალეფით დო ხიოლით ვემსახურათ იეჰოვას 1924 წანას ხოლო!“

1924 წანაქ ხოლო ბრელ ჯგირობუა მოუღ ბიბლიაშ მარკვიებელეფს. ჯიმალეფ მუსხირენ თუთაშ დინახალე სტეიტენ-აილენდის, ნამუთ ბრუკლინს მთავარ სამართველოწკუმა ხოლოს რდჷ, აშენენდეს შენობეფს, მუდგაქ 1924 წანაშ დაჭყაფუს ითუ. თე შენობეფქ ხე შეუნწყუ საჯიმალოშ ართობას დო სახიოლო ამბეშ გავრცელებას თიცალ მასშტაბეფით, ნამუთ აიშახ დღას ვა ჸოფე.