Bay boch ban’en ni thilyeg e ulung u nap’an e re duw ney ni ayuweg e Piin Yad Ma Fil e Bible ni ngar liyorgad ngak Got nib taareban’rad. I tabab e The Watch Tower ni nge ngongliy boch e article ni be weliy fan e pi thin nu Bible ni yima weliy u nap’an fare muulung ni yima tay u gubin e wik ni fithingan e Muulung ko Meybil nge Ngan Pining e Sorok. Ki ngongliy e Piin Yad Ma Fil e Bible ba calendar ni bay e pi thin nu Bible riy ni fan nga reb e wik nge reb, nge reb e tang nrayog ni nge yon’ be’ u nap’an e fol Bible ni be tay ni yigoo ir nge fol Bible ni tabinaw.

Nap’an nra muulung e Piin Yad Ma Fil e Bible nga taabang ma yad ma weliy boch ban’en ni ke buch rorad u nap’an e machib, ara rogned fan ni yad be pining e magar ngak Jehovah, ara ron’ed reb e tang, ara ra meybilgad. Eva Barney nni taufenag ko duw ni 1923 u nap’an ni ke gaman 15 e duw rok e yog ni gaar: “Faanra ga baadag ni nga mog ban’en, ma aram e ngam sak’iy nga lang ma gog boch e thin ni bod ni nge lungum, ‘Gu baadag ni nggu pining e magar ngak Somol nga urngin ban’en nib manigil ni ke rin’ ni fan ngog.’” Bay boch e walag nri yad baadag ni yad ma yog boch e thin. Ki ulul Sister Barney ngay ni gaar: “Adow i Brother Godwin ni ke pilibthir e boor ban’en ni baadag ni ma pining e magar riy ngak Somol. Machane nap’an nra guy leengin ni ke kankanan’ fare walag ni pumoon ni be yarmiy e muulung, ma aram me teltel e mad rok figirngin ma aram me par nga but’.”

Ra reb e pul ma bay reb e re muulung ney ni fithingan e Muulung ko Meybil nge Ngan Pining e Sorok ni yugu ba thil ni ma tay gubin e ulung. I weliy e The Watch Tower ko April 1, 1923 murung’agen e re muulung ney ni gaar: “Baley ko re muulung ney e susun e nge weliy e pi walag riy murung’agen boch ban’en ni ke buch rorad u nap’an e machib ma yad be pi’ e athamgil nga lanin’rad. . . . Ba mich u wan’mad ni pi muulung ney e ra chugurnag e pi walag nga taabang.”

Rib ga’ angin e pi muulung ney ni yib ngak Charles Martin nreb e tamachib u Vancouver ni bay u Canada ni 19 e duw rok. Boch nga tomuren me yog ni gaar: “Ireray e gin nug fil riy ko som’on e n’en ni nggog u nap’an e machib u mit e tabinaw. Ba ga’ ni bayi n’en me weliy be’ e n’en ke buch rok u nap’an e machib u mit e tabinaw. Re n’ey e ayuwegeg ni nggu nang e n’en ni nggog nge rogon ni nggu fulweg lungun be’ ni ke togopuluw.”

“Pi rran ni yima machib riy” e ki ayuweg e ulung ni nge taareban’rad. I yog e The Watch Tower ko April 1, 1923 ni gaar: “Kan dugliy e rofen ni L’agruw Fen e  Maruwel ko May 1, 1923 ni ngan machib riy . . . , ya nge yag ni taareban’dad ko maruwel ni gad be rin’. Tomuren, ma bin som’on e L’agruw Fen e Maruwel u gubin e pul ni ngan yan riy ko machib . . . Gubin e girdi’ u gubin e ulung nsusun e nge un ko re maruwel ney.”

Mus ko Piin Yad Ma Fil e Bible ni ka yad bbitir nra uned ko re maruwel ney. I yog Hazel Burford ni ka fini gaman 16 e duw rok e ngiyal’ nem ni gaar: “Bay boch ban’en nrayog ni nga nog u nap’an e machib u lan fare babyor ni Bulletin ni gamad ma fil nge mit ngomad. a Gamow ma un Tutuw i rin’ gubin e pi n’ey u fithik’ e pasig.” Machane bay be’ ni togopuluw ngak Sister Burford nde lemnag nra togopuluw ngak. I yog ni gaar: “Bay reb e walag ni pumoon ni ke pilibthir ni lemnag nsusun e dab gu non ko girdi’. Ngiyal’ nem e bay boch e walag ndawori tamilang u wan’rad ni gubin e Piin Yad Ma Fil e Bible nib muun ngay e pi ‘pagel nge rugod’ nsusun e ngar pininged e sorok ngak e En Ke Sunmiydad.” (Ps. 148:​12, 13) Yugu aram rogon me ulul Sister Burford ko machib. Boch nga tomuren me un ko bin l’agruw e class ko fare Skul u Gilead, min pi’ nga Panama ni nge pigpig u rom ni ir reb e missionary. Munmun me thilyeg e pi walag ney e lem rorad u murung’agen e piin ka yad bbitir ni yad be un ko machib.

Pi convention ni un tay e ki ayuweg e pi walag ni nge taareban’rad. Boor e pi convention ney ni bay reb e rran riy ni yima yan riy ko machib. Bod nnap’an fare convention nni tay u Winnipeg ni bay u Canada, ma aram mi nog ngak urngin e piin kar bad ko re convention nem ni ngar uned ko machib ni yira tay u lan e re mach nem ko rofen ni March 31. Boor e girdi’ ni ki yag ni ngan mada’nagrad u nap’an e pi rran ney ni kan dugliy ni ngan machib riy, mab ga’ angin ni i yib. Nap’an e August 5, ma sogonap’an 7,000 e girdi’ ni kur uned nga reb e convention nni tay u Winnipeg. Aram e yay nth’abi yoor e girdi’ ni ke un nga reb e convention ni un tay u Canada e ngiyal’ nem.

Bin th’abi ga’ fan e convention ni tay e girdi’ rok Jehovah u nap’an e duw ni 1923 e nni tay u Los Angeles ni bay u California ko August 18-26. Pi wik u m’on ko re convention ney min tay murung’agen nga lan e pi shimbung, ma kub pag 500,000 noch yang i babyor ni i wereg e Piin Yad Ma Fil e Bible ni murung’agen e re convention ney. Kun gabdiy babyoren e re convention ney nga downgin e pi karrow ni ma fek e girdi’ ni yoor nge yug karrow.

Nap’an e Sabado ko August 25, me pi’ Brother Rutherford fare welthin ni kenggin e “Saf nge Kaming,” me  tamilangnag riy ni “saf” e be yip’ fan e piin nib m’agan’rad ngay ni ngar nanged e tin riyul’ ni yad ra par u paradis u fayleng. Ki beeg bangi babyor ni kenggin e “Ba Ginang.” Re gi babyor ney e gagiyelnag e n’en nib kireb ni be rin’ e Pi Yurba’ i Teliw ko Kristiano ni Googsur, miki pi’ e athamgil nga laniyan’ e piin yad baadag ni ngar nanged e tin riyul’ ni ngar chuwgad ko fare “Babylon nib gilbuguwan.” (Rev. 18:​2, 4) Boch nga tomuren miki wereg e Piin Yad Ma Fil e Bible u ga’ngin yang e fayleng bokum milyon e tract ni ku bay e thin ko gi babyor ney riy.

Nap’an e bin tomur e rran ko re convention nem, mab pag 30,000 e girdi’ nrung’aged fare welthin ni fan ko yoor ni pi’ Brother Rutherford ni kenggin e “Gubin e Nam ni Yad Be Sor i Yan ko Armageddon, Machane Bokum Milyon e Girdi’ ni Yad Ba Fos e Chiney e Dab Kur M’ad.” I sananag e Piin Yad Ma Fil e Bible nra yoor e girdi’ nra yib ni nge motoyil ko re welthin ney, ere aram fan nra pied puluwon fare tagil’ e gosgos ni ka nog e Los Angeles Coliseum ngay ni ngan tay e re muulung ney riy. I fanay e pi walag e speaker u lan e re tagil’ e gosgos nem ni aram boch e speaker ni ka fin nni ngongliy e ngiyal’ nem ni bochan e nge yag ni rung’ag urngin e girdi’ e welthin ni yibe pi’. Ku boor e girdi’ nra motoyilgad ko re muulung nem u radio.

Nap’an e duw ni 1923, me garer fare maruwel ni machib u Africa, nge Europe, nge India, nge South America. Immoy reb e walag ni pumoon u India ni ka nog A. J. Joseph ngak ni i un i ngongliy boch e babyor ni thin ni Hindi, nge Tamil, nge Telugu, nge Urdu, maku be ayuweg leengin nge nel’ e bitir ni fakrow.

Immoy l’agruw ni’ ni ku yow l’agruw e Piin Yad Ma Fil e Bible u Sierra Leone ni ka nog Alfred Joseph nge Leonard Blackman ngorow nra yolgow ko tochuch rodad u Brooklyn ni bay u New York ni yow be ning e ayuw. Nap’an e April 14, 1923, min fulweg lungurow. I yog Alfred ni gaar, “Bay reb e Sabado ni ke n’uw e nep’ ni callnageg be’ ndag lemnag.” Me rung’ag laman be’ ni ke non nib ga’ laman ni ke gaar, “Gur e kam yol ko Watch Tower Society ni ga be ning boch e tamachib?” Me gaar Alfred, “Arrogon.” Me gaar facha’, “I gag e kan pieg ku gub.” Cha’nem ni be non e ka nog William R. Brown ngak. Ka fini taw e rofen nem ni yad Antonia ni leengin nge Louise nge Lucy ni fakrow ni kar bad u reb e donguch ni bay u lan e Caribbean. Daki t’uf ni nge son e pi walag nge n’uw nap’an ni ngar mada’naged e re walag ney nge chon e tabinaw rok.

I ulul Alfred ngay ni gaar: “Faani bin migid e rran ngay ni kakadbul u nap’an ni gamow be weliy Leonard e Bible u taabang ni bod ni gamow ma rin’ u gubin e wik, ma aram ma gamow guy fon be’ ni keb i sak’iy nga langan e mab. Cha’nem e aram Brother  Brown. Bochan nrib pasig ko tin riyul’, ma aram e baadag ni nge yan i bin migid e rran nga tomuren me pi’ reb e welthin ni fan ko yoor.” De gaman reb e pul nga tomuren ma ke pi’ Brother Brown urngin ken e babyor ni fek ngaram. De n’uw nap’an nga tomuren min pi’ 5,000 ken e babyor nge yib ngak, me boch nga tomuren miki t’uf ni ngkun pi’ boch e babyor ngki yib. Machane gathi ir be’ ni yimanang ni ma pi’ e babyor ni chuway’. N’umngin nap’an ni i pigpig ngak Jehovah u fithik’ e pasig mab ga’ ni ma weliy boch e thin nu Bible u lan e welthin rok. Ere aram fan nib ga’ ni ma pining e girdi’ Bible Brown ngak.

Nap’an e re ngiyal’ i n’em ma dabki taw e pi walag ni yad ma maruwel u Bethel nga lan e bin baaram e branch ofis u Barmen ni bay u Chiyamen. Kur rung’aged ndab ki n’uw nap’an ma bay yib e salthaw nu France ra suweyed e re mach nem. Machane yan i pirieg e Piin Yad Ma Fil e Bible ba naun nib ga’ u Magdeburg nrayog ni ngaur printnaged e babyor riy. Ere nap’an e June 19 ma ke mu’ e pi walag i kunuy mam’en e masin ni yima fanay ni ngan printnag e babyor riy nge yugu boch e chugum rorad, ma aram ma ranod ra pared ko bin baaram e Bethel nib beech ni bay u Magdeburg. Faani bin migid e rran nga tomuren e rofen nrogned ko tochuch rodad ni aram e kar chuwgad u rom, me aw ko shimbung ni ke suwey yu France fare mach nu Barmen. I pining e pi walag nem e magar ngak Jehovah ni ke yororiyrad nde buch ban’en rorad miki ayuwegrad.

Bay reb e walag u Brazil ni ka nog George Young ngak ni boor e binaw ni ma yan ngay ni be machibnag fare thin nib fel’ ni ngongliy reb e branch nib beech me tabab i ngongliy Fare Wulyang ko Damit ko thin ni Portuguese. De gaman in e pul nga tomuren, mab pag 7,000 ken e babyor ni ke wereg. I felfelan’ Sarah Ferguson u nap’an ni yan Brother Young i guyrad chon e tabinaw rok. Ka nap’an e duw ni 1899 ni ma beeg Fare Wulyang ko Damit, machane dawori yag ni nge un ko taufe. Ere in e pul nga tomuren mar uned aningeg e bitir ni fak ko taufe.

Nap’an ni taw nga tungun e re duw nem, me weliy e The Watch Tower ko December 15, 1923 rogon angin ni ke yib ko Piin Yad Ma Fil e Bible ni bochan e kan thilyeg boch ban’en u rogon e muulung, nge machib, nge convention ni yad ma tay ni gaar: “Ba mom ni ngan guy ni ke gel e michan’ . . . ko pi walag u lan e ulung . . . Ere ngad fal’eged rogodad ni fan nga boch e maruwel ni ka bay, ma gad ulul ko pigpig ngak Got u fithik’ e pasig nge felfelan’ u lan e bin migid e duw ni bay yib.”

Fare duw ni 1924 e ki buch boch ban’en riy ni ki felfelan’ e Piin Yad Ma Fil e Bible ngay. Ke yan in e pul ni be rin’ e pi walag u Bethel boch e maruwel u daken bangi binaw ni bay u Staten Island nde palog ko tochuch rorad ni bay u Brooklyn. Ni mu’ i toy e naun u daken e gi binaw ney u tabolngin e duw ni 1924, ma re n’ey e ayuweg e pi walag ni ngar taarebgad mar machibnaged fare thin nib fel’ u boch e kanawo’ ndawor ni rin’ riy.