Ló ízcu, xcudx Jehová bitzaʼ xidal cós par gocné a Estudiantes de la Biblia par ñenyibu Jehová toibsi. The Watch Tower goleʼ guiich ro golexabu texto ni sieed ló la Biblia ni bisuidyibu ló Reunión de Oración, Alabanza né Testimonio, ni góc guirá xomal. Láaca, Estudiantes de la Biblia goleʼyibu toib calendario ro birecaa texto par tigaaga xomal né toib canción par guirá dzú ni labúu ñony cantaryibu órni nasuidyibu xquiichyibu toibyibu o órni nasuidyibu né xfamilyibu.

Ló reunión, Estudiantes de la Biblia bidudyibu «testimonios», ni radudy diitz, que goniʼyibu mod goyeeni layibu ló predicación, bidudyibu guixquix Jehová, buny cantaryibu toib canción o dada bunyibu oración. Eva Barney, ni goyonis íz 1923 dzú gopbu 15 íz, goniʼbu: Pal toibtica ná guidudy toib testimonio, rasagaʼbu né rasalóbu raniʼbu ndeʼ «Nainy naʼ guidudi guixquix Señor por guirá galnatzaay ni ma bislooybu naʼ...». Tipnés herman nigolú bioladx guidudy testimonios. Hermana Barney goniʼ: «Hermano Godwin ni ronladxgoluʼdo gócbu toib herman golien ni guirá ór gop xidal cós por ni bidudybu guixquix Señor. Per órni tzeelbu rabiʼ que hermano ni sané reunión ma cadopy xpaseins, godabiobu xton hermano Godwin, né hermano reʼ rabúca».

Tibuelt ló tibeʼo, tigaaga clase (congregación) bunyibu toib Reunión de Oración, Alabanza né Testimonio ni nigolú gosac. The Watch Tower 1 de abril íz 1923 golexa xi láani góc ló reunióncu: «Galaʼ reunióncu gocni par naniʼyibu ximod goyeeni layibu ló predicación né par nadudyibu ánimo guirá ni rony dxiin […]. Ronyno crer que órni guiráno ronyno ngúca amig raguaʼ toibsi».

Guirá reunión reʼ nigolú gocnéni Charles Martin, toib trabajador de clase (o publicador) de 19 íz de gudx Vancouver (Canadá). Goniʼ: «Cuu bisudi xi naniya ló predicación. Casi guirá ór toib herman goniʼ ni gosaclóo órni goniʼ xtiitz Dios yoʼ por yoʼ. Ngú gocné naʼ par ñaana xi naniya né ximod nacaabi órni buñ nacaló naʼ».

«Dzú ni bireʼyibu predicación» gocnéni par naguaʼ herman toibsi. The Watch Tower 1 de  abril íz 1923 bisetlaa: «Par guiguaʼdo toibsi ló toibsi dxiin […], dzú marty 1 de may íz 1923 sácni toib dzú par guireʼdo guirádo predicación. Né modcu sácni guirá primer marty de guirá beʼo […]. Guidopy clases non guiniʼyibu xtiitz Dios dzúcu».

Guirá Estudiantes de la Biblia ni más nilas láaca goniʼyibu xtiitz Dios. Toib hermana ni góc laa, Hazel Burford, ni gop 16 íz ló íz 1923, goniʼ: «Guiich Bulletin bitnéni xidal mod ni labúu guinino xtiitz Dios ni non ñanno de memory. a Bixiogola né naʼ nigolú bioladxdo bunydo guirá ndeʼ». Per toib buñ ni Hazel diti golés cualó láabu: «Toib herman golien diti bioladx que naʼ naniya de fe xtuni né stipnés buñ. Ló dzúcu, tipnés diti bieen que guirá Estudiantes de la Biblia, dada mbioxhlas buñguieeu né mbioxhlas buñgonaʼ, ñonyxiroʼyibu ni Bisaʼ lóono» (Sal. 148:12, 13). Per láabu goniʼrabu xtiitz Dios. Chop tzón íz después goyeebu ni rarop Escuela de Galaad né gócbu misionera gudx Panamá. Bidxin midid herman bitzaʼyibu mod bunyibu pensary de mbioxhlas né predicación.

Ló samblia ro goyee herman de toibsi gudx né de stipnés gudx láaca bunyni que herman naguaʼ toibsi. Ló xidal samblia goyoʼ dzú goniʼyibu xtiitz Dios, xomod ni góc Winnipeg (Canadá). Ló 31 de marz góc toib «Bombardeo lainy Winnipeg», ni radudy diitz, toib dzú ro guirá ni goyee sambliacu labúu naniʼ xtiitz Dios. Né galán goyeeni layibu. Ló stoib samblia ni góc Winnipeg 5 de agost íz cuca, bidop midid 7.000 buñ. Dipa ma goyoʼ dzú bidop xidal buñ ló toib samblia lainy gudx Canadá.

18 a 26 de agost íz 1923, góc toib samblia ni rasacgoluʼ lainy gudx Los Ángeles (California). Chop tzón xomal antes ni ñac samblia reʼ bireʼ ló periódicos que gac samblia né Estudiantes de la Biblia biquisyibu más de 500.000 invitaciones. Láaca bicaʼyibu tipnés guiich laidy xcamionyibu né laidy stipnés camión ro cuá que gac samblia.

 Sábda 25 de agost, hermano Rutherford goloʼ toib discurs «Xiil né chiv», ro golexabu que «xiil» nacyibu buñ ni ná guicaʼ galnabany tipzó né ni ná guibany ló toib Gudxlio móz. Láaca goniʼbu toib ro guirá buñ nagoʼ guic ñony ni góc laa, «Amonestación», ro goniʼbu guirá cós mal ni rony Cristiandad né ro buny animaryibu ni natzaay xcalnabany nareʼ de «Babilonia la Grande» (Apoc. 18:2, 4). Después bireʼ toib tratad ló guiich ro birecaani, né por ló guidopynac Gudxlio Estudiantes de la Biblia bikiʼsyibu né gan xidal millón de láani.

Último dzú de samblia, más de 30.000 buñ bicadiag discurs ni goloʼ hermano Rutherford, ni góc laa, «Guirá gudxrop seeyibu ronoʼ Armagedón, per xidal millón de buñ ni nabany nigoreʼ dipa saityibu». Herman gon que nadop xidal buñ, por ngú Estudiantes de la Biblia godixyibu Coliseo ni noʼ lainy gudx Los Ángeles, toib estadio ni diti xidzú de goloʼ goyaʼ. Herman biquiin sonido ni goyoʼ ló estadiocu ni góc tecnología ni más nicopy ni goyoʼ ló dzúcu, par labúu nacadiag guirá ni ñee samblia. Láaca xidal buñ bicadiag sambliacu ló radio.

Íz 1923 más xidal buñ goniʼ xtiitz Dios lainy gudx África, Europa, India né Sudamérica. Lainy gudx India, Adavimannathu Joseph, ni gop tzeʼel né ni goyoʼ xhoop xiin, gocnébu par nareʼ xidal guiich ló diitz hindi, tamil, telugu né urdu.

Lainy gudx Sierra Leona, Alfred Joseph né Leonard Blackman bicaʼyibu guiich ló central mundial Brooklyn (Nueva York) ro gonabyibu galrracné. 14 de abril íz 1923, ni gonab Estudiantes de la Biblia reʼ cuáni galrracapy. Alfred goniʼ: «Gocni toib sábda goxin né ma godzu láani, goyoʼ toib llamada ni diti golésa». Né toib buñ gonabdiitz láabu: «¿Looy ngú ni bicaʼ guiich ló Sociedad Watch Tower ro canab buñ guiniʼ xtiitz Dios la?». «Scú», cuapy Alfred. «Bay, bixelyibu naʼ». ¿Ximod góc laa hermanocu? William Brown. Mer dzúcu bidxinbu de gudx Caribe né tzeelbu Antonia né chop xiindzapyenbu, Louise né Lucy. Herman diti golésyibu xidzú tiemp par nimbuyibu famil reʼ.

Alfred goniʼra: «Ló stoib rosilcú laʼga Leonard né naʼ casuidydo la Biblia xomod ronydo láani guirá xomal, toib buñ birecaa ro puert:  gócbu William Brown. Nigolú gondxiʼbu galnigolú por ngú goniiny natudybu toib discurs stoib dzúcu». Diti bisaʼ tibeʼo, órni hermano Brown bikiʼsbu guirá publicaciones ni gopbu. Diti xidzú, cuábu saa más 5.000 libros, né biquiin ñapbu más. Par buñ diti gócbu toib buñ ni ratoʼ libros. Ló guirá íz ni goyodieʼbu ló xchiin Jehová, guirá ór biquiimbu la Biblia órni bitudybu discurs, por ngú, buñ bimbu láabu xomod Brown ni raquiin Biblia.

Laʼga cayac guirá ngú, sucursal de Barmen (Alemania) gocni mit né mápa mer ñoʼ soldad francés lainy gudxcu. Estudiantes de la Biblia bidzelyibu stipnés yoʼ lainy gudx Magdeburgo ni labúu biquiinyibu par ñac imprimir guiich. 19 de juny herman bilox goloʼ xcós lainy malet, dada equipo xtuny imprenta, né goyeeyibu Betel copy ni goyoʼ lainy gudx Magdeburgo. Tipdzú después ni gochyibu central mundial que ma bidxinyibu Magdeburgo bireʼ ló periódico que Francia ma goyoʼyibu lainy gudx Barmen. Herman gosac que Jehová bisiab xcalnasác ronoʼyibu né que gop layibu.

Lainy Brasil, George Young goniʼbu xtiitz Dios ló guidopynac gudxrop cu. Cu gocnébu par ñoʼ toib sucursal né gosaló bireʼ revista The Watch Tower ló guiich ló diitz portugués. Ló chop tzónsi beʼo, ma bigasyibu más de 7.000 publicaciones. Dzú bidxinyibu gudx Brasil láaca bidudyni Sarah Ferguson toib oportunida ni rasacgoluʼ. Desde íz 1899 hermana reʼ bíil The Watch Tower, per dipa ma labúu goyonisbu dzúcu. Chop tzón beʼo de goloʼ bidxin George Young, láabu né tap xiimbu labúu goyonisyibu.

Dzú ma guilox ízcu, The Watch Tower de 15 de diciembre íz 1923 goniʼni ximod birebuʼ guirá cós ni bidzaʼ ló reunión, ló predicación né ló samblia. Bisetlani: «Diti naganni guibiʼno que guirá clases reʼ […] noʼni dxich ló sentido espiritual […]. Guiquiinno armadura xtunyno né gonyno xchiin Dios né gan né guibaladxno ló íz ni mápa mer guidxin».

Íz 1924 gocni toib íz ni nigolú gosac par Estudiantes de la Biblia. Herman ni goyoʼ central mundial lainy Brooklyn ma sanéyibu xidal beʼo cayonyibu dxiin ló toib layoo ni biaʼan gaxca lagarycu, lainy Staten Island. Bilox goyaʼ yoʼcu órni gosaló íz 1924. Guirá yoʼcu gocnéni par naguaʼ herman toibsi né par naniʼ buñ xtiitz Dios de tipnés mod ni diti labúu bunyibu dada dzúcu.