1. ¿Kʼãrẽa zarea baseabʉ ũrĩra?

 ¿BɄITARA zareabʉka ũrĩta? Nokʼo Davidʼitabida mawũã zareabasi, maʉ̃ kʼarea iya Jeowaʼa jarasi: «Kʼarebara mʉ̃a bʉa jarabʉta ũrĩkĩrã bʼaita» (Sal. 51:12). Davidʼitara edaʉde zarebasi ũrĩta Jeowaba jarabʉra, dayirãsida abarika berabaribʉ. ¿Kʼãrẽa? Nããra, dayirãra kayirua omia baera. Yi ũmeta, Diarubara kãgabʉ baera dayirãbida iyide kĩrãkʼa ũrĩ ẽ marẽã (2 Cor. 11:3). Yi ũbeata, ẽbẽrarã dayirã audu panʉrabara ũrĩkĩrã ẽ baera (Efes. 2:2). Zarea odaibara kayirua oẽ baita akʉza Diaruba, adewara naʉ̃ drʉadebemaba obʉ kĩrãkʼa oẽ baita. Akʉza ũrĩbara Jeowa bedʼeata, adewara ũrĩbara ẽbẽrarã Jeowaba dayirã zokʼamarẽã amaenara bedʼeasida.

2. ¿Kʼãrẽta jarakĩrãbʉ soiduba ũrĩkĩrã bʼaita? (Santiago 3:17).

² (Akʉra Santiago 3:17). Santiagoba jarasi ẽbẽra buru biabara soiduba ũrĩkĩrãbʉta. Maʉ̃ba jarakĩrãbʉ ũrĩña awabaibarata Jeowaba ẽbẽrarã dayirã zokʼamarẽã bʉedara bedʼeata. Mamina ẽbẽra abaʉba jarara Jeowaba kãgabʉ ẽãta omarẽã, maʉ̃ bedʼeara ũrĩ ẽ baibara (Hech. 4:​18-20).

3. ¿Jeowabara kʼãrẽa kãgabʉ dayirãba ũrĩnamarẽã iya jʉrʉdara bedʼeara?

³ Audre zare ẽ Jeowaba jarabʉ ũrĩra iya jarabʉra jõma aripebʉ baera, mamina ẽbẽrarãba jarabʉ ũrĩra zareabʉ (Sal. 19:7). Mawũãsidu Jeowaba zokʼabʉ dayirãba ũrĩnamarẽã dayirã yibarira bedʼeata, nokʼora bedʼeata, akʉza zõrãrã kongregasionebemara bedʼeata (Prov. 6:20; 1 Tes. 5:12; 1 Ped. 2:​13, 14). Dayirãba ãyi bedʼea ũrĩbʉrʉdera Jeowa bedʼeata ũrĩbʉ kĩrãkʼabayi. Akʉdaya sãwũã ũrĩseapanʉta Jeowaba ẽbẽrarã dayirã zokʼamarẽã jʉrʉdara bedʼeata  dayirãba ãyide kĩrãkʼa abarika krĩchapanʉ ẽ mina.

4. ¿Kʼãrẽa warrara mejãchaʉba ũrĩna ẽ ãyi yibarira bedʼeara?

⁴ Idi ewadera warrara audurabʉ ẽbẽrarã yi yibarira bedʼea ũrĩkĩrã ẽãta (2 Tim. 3:​1, 2). ¿Kʼãrẽa ʉ̃kʉrʉ warraraitara zareabʉ ãyi yibarira bedʼea ũrĩra? Ʉ̃kʉrʉba krĩchapanʉ baera ãyi yibarirabara oẽãta ãyaʼa omarẽã jarapanʉta akʉza awururaba krĩchapanʉ naʉ̃ ewarira audre awuara wã baera ãyi yibariraba ũrãgʼa diabʉra zeri ẽãta. Mawũã ẽ bʉrʉ krĩchapanʉ ãyi yibarirabara nekʼãrẽ aukʼara omarẽã jarapanʉta. ¿Bʉra mawũã sentibarika? Warrara mejãchaitara zare ũrĩta Jeowaba naʉ̃ bedʼea zokʼadata: «Warrara, mara yibari bedʼeara ũrĩdua Kristoba jarabʉ kĩrãkʼa, mawũã ora jipabayi» (Efes. 6:1). ¿Kʼãrẽba kʼarebaseabʉ maʉ̃ ũrĩta?

5. ¿Kʼãrẽa Jesura yiza bia warraraitara? (Lucas 2:​46-52).

⁵ Bʉara Jesu yiza biadeba kʼawuaseabʉ (1 Ped. 2:​21-24). Jesura nemitia okabasi, mamina iyi yibarirãra nemitia omiabasi, maʉ̃ba ãyara edaʉde nekʼãrẽ aña opanasi, mawũãsidu Jesubara ũrĩbasi ãya jarabʉra (Éx. 20:12). Akʉdaya kʼãrẽta berabarisita Jesu 12 poagabaside (akʉra Lucas 2:​46-52). Jesura wãsi Jerusalénʼena iyi yibarira kʼaidu. Mamina ãyi jẽda urudera yi yibarirabara kʼawua ẽ basi Jesura ãyi kʼaidu ze ẽ basita. Joséba Maríaʉ̃mebara ãyi wũãwũãra ãba jʉre erbaibarabasi deda wãi nãã. Maríaba Jesu ũdusidera kʼẽãsi, mamina Jesubara iyaʼa kĩrʉ panʉ ẽ basi, awuarabʉrʉ wawiata ũdubisi. Joséba Maríaʉ̃meba bia ũrĩ ẽ basimina Jesuba ãyaʼa kʼãrẽta jarakĩrãbadata, mawũãsidu Jesubara ãya jarabʉta obasi.

6, 7. ¿Kʼãrẽba kʼarebaseabʉ warraraba ãyi yibarira bedʼeata ũrĩmarẽã?

⁶ Warrara, ¿maraitara zareka ũrĩta mara yibariraba nekʼãrẽ aña obʉde, mawũã ẽ bʉrʉ ãya ũrĩ ẽãne kʼãrẽta jarakĩrãbʉta? ¿Kʼãrẽba kʼarebaseabʉ? Nããra krĩchara Jeowa sãwũã sentibʉta. Daizeze Bedʼeaba jarabʉ bʉa bʉ yibarira bedʼeata ũrĩbʉbʉrʉ Daizezeta sobiabibʉta (Col. 3:20). Jeowaba kʼawuabʉ edaʉde bʉ yibarirabara ũrĩ ẽãta bʉa kʼãrẽta jarakĩrãbʉra, mawũã ẽ bʉrʉ, ãya nekʼãrẽ omarẽã jarabʉra bʉma biga ẽãta. Mamina bʉa ãya jarabʉta ũrĩbʉbʉrʉ naʉ̃ba sobiabibʉ Jeowata.

⁷ Yi ũmeta, krĩchara bʉ yibarira sãwũã sentita bʉa ãyi bedʼea ũrĩbʉrʉde. Ãyira mejãcha sobiapanañi akʉza bʉ ʉ̃rʉ audre ĩjãnañi (Prov. 23:​22-25). Adewara audre ãyi kʼawabayi. Mebẽã Alexandre Bélgicadebemaba jarabʉ: «Mʉ̃a ũrĩbaside mʉ̃ yibariraba kʼãrẽ omarẽã jarabʉta, daira audre ãbapanasi». b Yi ũbeata, bʉa bʉ yibarira bedʼeata ũrĩbʉbʉrʉ, naʉ̃ba kʼarebayi nekʼãrẽ ʉ̃ra zeide. Paulo Brasildebemaba jarasi: «Mʉ̃ yibarira bedʼea ũrĩba kʼarebabʉ Jeowa bedʼea ũrĩta akʉza wuabemara ẽbẽrarãba jarabʉsida ũrĩta». Daizeze Bedʼeaba jarabʉ kʼãrẽa ũrĩbarata dayirã yibarira bedʼeara, jarabʉ: «Bia wãmarẽã mawũã dããra bʼaita naʉ̃ drʉade» (Efes. 6:​2, 3).

8. ¿Kʼãrẽa ʉ̃kʉrʉ warraraba ũrĩpanʉ ãyi yibarira bedʼeara?

⁸ Warrara mejãchaʉba ũdubʉda kʼãrẽa yibiata ũrĩta ãyi yibarira bedʼeata. Luiza Brasildebemaitara zarebasi ũrĩta yibariraba kʼãrẽa selular erbabi ẽ basita, iyi dauchabemara jõmaʉ̃ba erbasi baera  selularʼra. Mamina tẽã kʼawuasi yibarirabara iyira bia akʉkĩrãpanasita. Iya jarabʉ: «Mʉ̃a kʼawuabʉ mʉ̃ yibariraba mʉ̃aʼa kʼãrẽ omarẽã jarabʉbara, jarakĩrãbʉ ẽãta ãya kãga ẽãta mʉ̃a kãgabʉta omarẽã, awuarabʉrʉ ãya ũrãgʼa diabʉra yibia mʉ̃ita». Mebẽã Elizabeth Estados Unidosdebemaitara edaʉde zare iyi yibariraba kʼãrẽ omarẽã jarabʉ ũrĩra. Iya jarabʉ: «Mʉ̃a biʼia ũrĩ ẽ bʉrʉ mʉ̃ yibariraba kʼãrẽa nei omarẽã jarabʉta, krĩchabʉ sãwũã ãya nãã kʼãrẽ omarẽã jarada ũrĩnaba mʉ̃ kʼarebasita». Monica Armenianebemaba jarabʉ iya nekʼãrẽra audre bia obʉta iyi yibariraba jarabʉ ũrĩbʉrʉde iya ũrĩ ẽãira.

9. ¿Kʼãrẽta krĩchapanʉ ʉ̃kʉrʉraba nokʼoraba ley diabʉ ʉ̃rʉ?

⁹ Ẽbẽra mejãchaʉba krĩchapanʉ dayirãbara nesidapanʉta nokʼorata akʉza ãya ley diabʉta ũrĩbarata (Rom. 13:1). Mamina maʉ̃ra iyabaʉ ẽbẽrarãba krĩchapanʉ ũrĩ ẽ baita nokʼoraba jarabʉra, ãyi mara ʉ̃kʉrʉ leyʼra bigabʉ ẽ baera. Maʉ̃ra ley ãya ũrĩkĩrã ẽãne edabʉ, nokʼoraba plata widibʉta. Europade pʉwʉrʉ abaʉde ẽbẽrarãba krĩchapanʉ nokʼoraba plata widibʉra dia ẽ baita ãyima maʉ̃ta bigabʉ ẽ bʉrʉ. Maʉ̃ba maʉ̃ pʉwʉrʉdera ẽbẽrarãbara nokʼoraba plata widibʉra diada ẽ.

10. ¿Kʼãrẽa ũrĩpanʉ nokʼoraba jarabʉra dayirãba kãga ẽ mina?

¹⁰ Daizeze Bedʼeaba jarabʉ nokʼorabara ẽbẽrarã zʉbʉriabibʉta akʉza ãyira Diaruba zokʼabʉta, maʉ̃ba Jeowaba aranʉbai jõbiyi ãyira (Sal. 110:​5, 6; Ecl. 8:9; Luc. 4:​5, 6). Mamina jarabʉ dayirãbara nokʼora bedʼeara ũrĩbarata, mawũã Jeowaba jarabʉta ũrĩbʉ kĩrãkʼabʉ baera akʉza Jeowaba iduaribibʉ ãya dayirãta zokʼamarẽã, mawũã naʉ̃ drʉade jõma daucha bamarẽã. Maʉ̃ba dayirãba diaibara nokʼoraba widibʉta, platata, wawiata akʉza ũrĩbara ãya jarabʉta (Rom. 13:​1-7). Mamina dayirãba edaʉde krĩchaseapanʉ nokʼoraba jarabʉra aripebʉ ẽãta mawũã ẽ bʉrʉ zareta daya ũrĩta. Mamina dayirãbara maʉ̃ra nokʼoraba jarabʉra ũrĩpanʉ Jeowaba mawũã omarẽã jarabʉ baera akʉza ãya dayirã jarara Jeowaba kãga ẽãta omarẽã, maʉ̃nera ũrĩna ẽ dayirãbara (Hech. 5:29).

11, 12. Lucas 2:​1-6 bayeda jarabʉdebara ¿kʼãrẽta osida Joséba Maríaʉ̃mebara ũrĩta nokʼoraba jarabʉta ãyita zarebasimina akʉza kʼãrẽta ũdusida? (Akʉra potorata).

¹¹ José Maríaʉ̃mera jipade yiza bia, ãyara ũrĩsida nokʼoraba jarapanʉta ãyita zarebasimina (akʉra Lucas 2:​1-6). María tobodobaside, iya Joséʉ̃meba ũdubisida sãwũã ũrĩpanʉta nokʼoraba jarabʉta. Bari jaraita nokʼo Augustoba jarasi jõma ãyi toda drʉaeda wãmarẽã, mawũã mainʉ registraita. Maʉ̃ba Joséra Maríaʉ̃mera  wãibarabasi Belénʼena, naʉ̃ra jipade jĩgabasi akʉza katumata mejãcha berabaribarabasi ãyara. Mawũã wãira Maríaitara zarebasibaibara iyira biogobasi baera akʉza ãyira krĩcha osibaibara wũãwũã zake kʼarea akʉza María kʼarea. Maríaba wũãwũã abadara Dayirã ẽdrʉbibaribasi baera ãyara naʉ̃ ʉ̃rʉ krĩchasibaibara, ¿sãwũã oi ode wãne tora? ¿Ãyara maʉ̃ kʼarea ũrĩ ẽ baibasika nokʼoraba jarabʉra?

¹² Joséba Maríaʉ̃mebara bedʼea ũdusida mamina mawũãsidʉ ãyara ũrĩsida nokʼoraba jarapanʉta Jeowara mejãcha sobiabasi Joséba Maríaʉ̃meba maʉ̃ta ũrĩsida baera akʉza iya maʉ̃ kʼarea kʼarebasi ãyira. Adewara ãyira bia jʉ̃ẽsi Belénʼena akʉza wũãwũã zakesida neida berabari ẽ basi. Akʉza ãya kʼarebasida propesia Daizeze Bedʼeadebʉta aripe berabarimarẽã (Miq. 5:2).

13. ¿Dayiraʼa jarapanʉ ũrĩpanʉneba sãwũã kʼãrebapanʉ mebẽrãta?

¹³ Dayirãba nokʼoraba jarabʉta ũrĩpanʉbʉrʉ nebiata ũdudayi akʉza kʼarebadayi wuabemarabida nebiata ũdumarẽã. ¿Kʼãrẽ nebiata ũdupanʉ? Dayirãba ũrĩpanʉbʉrʉ dayirã omarẽã jarapanʉta mawũãra yi ũrĩkĩrã ẽãba kʼãrẽ kayirua ũdubʉta ũduda ẽ bayi (Rom. 13:4). Dayirãba nokʼoraba jarabʉta ũrĩpanʉbʉrʉ ãya ũdudayi Jeowa ʉ̃rʉ Kʼawuabipanʉrãbara jõma daucha okĩrãta. Bari jaraita poaga darããba pʉwʉrʉ Nigeriade ʉ̃kʉrʉ gorogororata eda jʉ̃ẽsida ãba yi jʉrebari deda, maʉ̃nera kongregasion aba ãba yi jʉrebasi. Ãyara jʉrʉ jʉ̃ẽsida ẽbẽrarã nokʼoraba plata widibʉ paga ẽãrata. Mamina ãyi gorogorora zokʼabʉba naʉ̃ra gorogorora jarasi wãnamarẽã mamaʉ̃bara, iya jarasi: «Jeowa ʉ̃rʉ Kʼawuabipanʉrãbara jõmaʉ̃ba badua diapanʉ nokʼoraba plata widibʉra». Bʉa ũrĩbʉbʉrʉ nokʼoraba jarabʉta, kʼarebayi Jeowa ʉ̃rʉ Kʼawuabipanʉrã ʉ̃rʉ ibia bedʼeadamarẽã akʉza mawũã ibia bedʼeapanʉba kʼarebayi dayirã mebẽrãsida (Mat. 5:16).

14. ¿Kʼãrẽba kʼarebasi mebẽã abaʉba nokʼoraba jarabʉta ũrĩñi awa bamarẽã?

 ¹⁴ Mamina dayirãbara nokʼoraba jarabʉra jõma ũrĩkĩrãpanʉ ẽ. Joanna mebẽã Estados Unidosdebemaba jarabʉ: «Mʉ̃itara zarebasi nokʼoraba jarabʉ ũrĩra, mʉ̃ mebẽrãra mejãcha zʉbʉria osida baera». Joannabara krĩchasi nokʼora ʉ̃rʉ sãwũã krĩchabʉra awuara krĩchaita. Iya naʉ̃ta osi: nããra, wua le ẽ basi kartarane nokʼora ʉ̃rʉ nekʼãrẽ imitia jarabʉta (Prov. 20:3). Yi ũmeta, iyira Jeowaʼa yiwidʼisi kʼarebamarẽã Jeowa ʉ̃rʉ audre ĩjãita akʉza iya widi ẽ basi Jeowaʼa awuru nokʼota bʉemarẽã (Sal. 9:​9, 10). Yi ũbeata, iyara le jʉ̃drʉsi kartara dayirã kʼaiare ba ẽ bai ʉ̃rʉ bedʼeabʉta (Juan 17:16). Joannaba jarabʉ iya nokʼoraba jarabʉta ũrĩbʉ baera akʉza wawia ũdubibʉ baera iyira atiara aduʼabʉta.

15. ¿Dayirãitara kʼãrẽa zarea baseabʉ Jeowa organizasionba nekʼãrẽ omarẽã jarabʉ ũrĩra?

¹⁵ Jeowaba dayirã jarabʉ: «Yi nãã panʉra bedʼeara ũrĩnaidua» (Heb. 13:17). Jesura dayirã nãã edebari, iyira kayirua oka. Mamina iya jʉrʉsi ẽbẽrarã nama udabemata, ãyira nekayirua omia. Edaʉde naʉ̃raba jarabʉ ũrĩra zarea baseabʉ, audre ãya dayirã omarẽã jarara nekʼãrẽ dayirãba okĩrã ẽãta. Ewari aba angelba Pedroʼa jarasi nei omarẽã, iya maʉ̃ra abedaedara okĩrã ẽ basi. Naʉ̃ angelba jarasi komarẽã chichi Moisés leyde kobe ẽã abʉta. Iyara maʉ̃ra ũbeabayeda jarasi ko ẽ baita (Hech. 10:​9-16). ¿Kʼãrẽa mawũã ũrĩamabasi iyara? Iyimara maʉ̃ angelba jaradara biga ba ẽ basi baera akʉza iyara nekʼãrẽra awuara obasi baera dããradeba. Pedroitara jipade zarebasi naʉ̃ angel nekayirua okaba iya nekʼãrẽ omarẽã jarabʉ ũrĩra. Maʉ̃ba dayirãitara audre zare ũrĩta ẽbẽrarã nemitia omiaba dayirã nekʼãrẽ omarẽã jarabʉta.

16. Pabloba krĩchaseabasi iyaʼa nekʼãrẽ omarẽã jarabʉra biga ẽãta, ¿mawũãsidu kʼãrẽta osi iyara? (Hechos 21:​23, 24, 26).

¹⁶ Pablobara ũrĩsi iya nekʼãrẽ omarẽã jaradapeadara. Naʉ̃ra iyimara biga ba ẽ basimina. Kristianora judiorabara ũrĩsida jarapanʉta Pablobara aña jaradianʉmʉta Moisés ʉ̃rʉ akʉza Moisés leyba jarabʉ ʉ̃rʉ akʉza Moisés leyba jarabʉta wawia ũdubi ẽãta (Hech. 21:21). Zõrãrã Jerusalénʼnebemaba Pabloʼa jarasida iyita akʉza yumakẽrãra kimareta wãmarẽã temploeda, mawũã nekʼãrẽ oita ãyi neneẽã baita leyba jarabada kĩrãkʼa. Mawũã ũdubita iyara ũrĩbʉta maʉ̃ leyba jarabʉta. Mamina Pablobara kʼawuabasi kristianora maʉ̃ ewadebemarabara ũrĩbara ẽ basita maʉ̃ leyba jarabʉra, mawũãsidu iyara ũrĩsi akʉza nrʉema maʉ̃ra kimareta edesi Daizeze kĩrãbita neneẽã baidebema ojʉ̃drʉita (akʉra Hechos 21:​23, 24, 26). Pabloba iyaʼa nekʼãrẽ omarẽã jaradapeadata ũrĩsi baera, naʉ̃ba kʼarebasi mebẽrã kongregasionebema ãbapanaita (Rom. 14:​19, 21).

17. ¿Kʼãrẽta kʼawuapanʉ Stephanie berabaridadeba?

¹⁷ Stephanieʼitara jipade zarebasi ũrĩta mebẽrã iyi pʉwʉrʉdebemaba omarẽã jaradara. Stephanieba yi kimaʉ̃mebara jaradiapanasi ẽbẽrarã ãyi bedʼea bedʼeabʉ ẽã. Mamina Betelba ãyaʼa jarasi wãmarẽã jaradiade ãyi bedʼea bedʼeabʉma. Stephanieba jarabʉ iyira sobia ba ẽ basita maʉ̃ kʼareara. Iya krĩchabasi baera kongregasion ãyi bedʼea bedʼeabʉdera mejãcha nesida neẽãta, mawũãsidu iyara ũrĩsi ãya nekʼãrẽ  omarẽã jaradapeadara. Iya jarabʉ: «Mʉ̃a tẽã kʼawuasi naʉ̃ra jipade yibiabasita. Dai kongregasione basi ʉ̃kʉrʉ mebẽrã Jeowa ode dobapanʉta, maʉ̃ba daira ãyitara ãyi yibarira kĩrãkʼapanesi akʉza mʉ̃a jaradia jʉ̃drʉsi mebẽã aba Jeowa ode kũrãzabada akʉza mʉ̃ra atiara audre ewari erbʉ mʉ̃yidoba estudiaita. Adewara mʉ̃ krĩchasida aduʼabʉ, kʼawuabʉ baera zarea ozebʉrʉta ũrĩta mʉ̃aʼa nekʼãrẽ omarẽã jarapanʉta».

18. Dayirãʼa nekʼãrẽ omarẽã jarapanʉba, ¿sãwũã kʼarebabʉ dayirãta?

¹⁸ Dayirãbida ũrĩ kʼawuaseapanʉ. Jesubara «kʼawuasi sãwũã ũrĩ kʼawuaita iyi zʉbʉriadadeba» (Heb. 5:8). Jesude kĩrãkʼa dayirãbida ũrĩ kʼawuaseapanʉ zʉbʉria ũdubʉdeba. Bari jaraita COVID-19 jʉ̃drʉsidera dayirã jarasida wua ãba yi jʉreda ẽ bamarẽã akʉza deza deza jaradia ẽ marẽã. ¿Bʉita maʉ̃ ũrĩra zarebasika? Dayirã jõmaʉ̃ba ũrĩsida baera zõrãrãba nekʼãrẽ omarẽã jarabʉta, kʼarebasi mebẽrãʉ̃me ãbapanaita akʉza Jeowata sobiabisida. Akʉza dayirãba ũrĩpanʉbʉrʉ ʉ̃ra zeide zʉbʉria zroma zebʉrʉdebida nekʼãrẽ omarẽã jarapanʉra ũrĩnañi (Job 36:11).

19. ¿Kʼãrẽa ũrĩkĩrãbʉ bʉa omarẽã jarapanʉta?

¹⁹ Dayirãba kʼawuatabeda dayirã nekʼãrẽ omarẽã jarapanʉta ũrĩpanʉbʉrʉ, nebia mejãcha ũdudaita akʉza dayirãba Jeowata kãgapanʉ baera akʉza iyita sobiabikĩrãbʉ baera ũrĩpanʉta iya nekʼãrẽ omarẽã jarabʉta (1 Juan 5:3). Jeowabara dayirã nemejãcha dia zebʉrʉ, maʉ̃ sãwũã pagaira neẽ dayirãbara (Sal. 116:12). Mamina dayirãbara ũrĩseapanʉ Jeowaba dayirã zokʼamarẽã jʉrʉdapeadara bedʼeata, maʉ̃ra bedʼeata ũrĩpanʉbʉrʉ ũdubidayi buru bia erpanʉta, adewara ẽbẽra buru biabara sobiabibʉ Jeowa sota (Prov. 27:11).