1. Beni n sɔi ti la kpe’em bo to ti to nana bɔ’ɔra?

 LA KPE’EM bo ho mɛ ti ho nana bɔ’ɔra? La yuun ani Naba David la bala ti a zusɛ Naayinɛ yeti: ‘Bo mam naŋa suure.’ (Ym. 51:12) David yuun nɔŋɛ la Yehowa . Hali la bala la, la yuun kelum kpe’em bo David mɛ ti a nana bɔ’ɔra. La ta’an ana tomam me bala. Bem zuo? Yia la, ton de be’emdoma la zuo ta’an basɛ ti to kan nana bɔ’ɔra. N yi’i, Sitaana kɔ’ɔn tiregera mɛ ti a pã’asɛ tɔ ti to da nana bɔ’ɔra wuu eŋa n ani se’em la. (2 Ko. 11:3) N tã’a, to laɣum naɛ la nɛresɛba n ka nani nɛreba bɔna. Nɛresɛba n iti bala la ‘tari la Sitaana vo’osum la ge me ka nana bɔ’ɔra.’ (Ep. 2:2) To nari ti to tiregɛ zabɛ la be’em la n boi to poan la ge me zaɣesɛ Kolekpabɛ’a la, la tingɔŋɔ la n pɛregeri tɔ ti to da nana bɔ’ɔra la. La nari ti to tiregɛ nana Yehowa ge me nana sɛba ti a loe ba ti ba bɔna to nɛŋa la.

2. To ‘kɔ’ɔn nana bɔ’ɔra’ vuurɛ? (Yames 3:17)

² Kaalɛ Yames 3:17. Baabule gulesegɔdaana wa yeti, nɛresɛba n tari yɛm la n ‘ni kɔ’ɔn nana.’ Ti’isɛ bisɛ bala vuurɛ n de sɛla. La nari ti to kɔ’ɔn nana sɛba ti Yehowa dekɛ kpe’eŋo bo ba la. Yehowa ka boti to nana sɛba n ka boti to dɔla A pa’alegɔ la.—Tm. 4:​18-20.

3. Beni n sɔi ti la yele pakɛ Yehowa ti to nana sɛba n tari kpe’eŋo la?

³ La ni dɛna la naana bɔ’ɔra tɔ ti to nana Yehowa gana asaala. Se’ere n sɔi la Yehowa pa’alegɔ kɔ’ɔn dɛna la tontɔɔ. (Ym. 19:7) Ge nɛresɛba n tari kpe’eŋo la ka di mi’a. Hali la bala za’a, Yehowa dekɛ la kpe’eŋo bo dɔɣereba, gɔmɛt nɛŋadoma la keendoma. (Mag. 6:20; 1 Tes. 5:12;1 Pe.  2:​13, 14) To san nana ba, to nani la Yehowa. Basɛ ya ti to geele ya bisɛ ton wan eŋɛ se’em ta’an nana nɛresɛba ti Yehowa bo ba kpe’eŋo la.

4. Beni n sɔi ti kɔma zo’e zo’e ka nana ba dɔɣereba?

⁴ Bunbilipaalesi naɛ mɛ la ba tadaandoma ‘n ka nani bɔ’ɔra bɔna.’ (2 Tim. 3:​1, 2) Beni n sɔi ti ba zo’e zo’e ka nana bɔ’ɔra? Basɛba ti’isɛ ti ba dɔɣereba dela nigum nigumdoma. Dɔɣereba ni bɔta la ba kɔma ita sɛla ge ti bamam mea ka ita bala. Kɔma basɛba ti’isɛ ti, ba dɔɣereba mɔbegeri ba mɛ ge ti ba ka’aŋɔ me ka tara vuurɛ. Ho san dɛna bunbilipaalega, la me ani hon la bala? La ni kpe’em bo kɔma zo’e zo’e mɛ ti ba dɔla Yehowa pa’alegɔ la n yeti: ‘Nana ya dɔɣereba Daana sore la poan. Bala n de tuunsoma’ la (Ep. 6:1) Beni n wan ta’an soŋɛ ya ti ya ta’an eŋɛ bala?

5. Wuu Luke 2:​46-52 n pa’alɛ se’em la, beni n sɔi ti la dɛna yelepakerɛ bɔ’ɔra tɔ la Yezu n yuun nani a dɔɣereba la?

⁵ Ho ta’an tɔɣesɛ Yezu n yuun nani bɔ’ɔra se’em la. (1 Pe. 2:​21-24) A yuun dela nɛra n ani kasi ge ti a dɔɣereba ka di mi’a. Ge Yezu yuun kelum nana a dɔɣereba mɛ hali ba san ni tue en bii ka bɔkɛ en. (Yɛh. 20:12) Basɛ ya ti to geele bisɛ sɛla n yuun eŋɛ Yezu n yuun ta dɛna yuun pia la ayi la. (Kaalɛ Luke 2:​46-52.) Yezu la a dɔɣereba yuun keŋɛ la Yerusalem. Ge ban yuun ta lɛbera kula la, ba yuun ka baŋɛ ti Yezu ka doli ba. De’eŋo la n yuun ta ba’asɛ la, la yuun dela Yosef la Mary zugbere yele ti ba bisɛ nyaa, ba kɔma la za’a doli ba kula. Yosef la Mary n yuun ta ɛ nyɛ Yezu la, Mary yuun nyɔ̃ni en mɛ la eŋa n yee pooren la. Yezu yuun ta’an yeti, bamam n tuɣum tue. Ge a yuun lebese ba la gilema sore poan. Ge Yosef la Mary ‘yuun ka bɔkɛ sɛla ti a tɔɣera bɔ’ɔra ba la.’ Hali la bala za’a, Yezu yuun ‘kɔ’ɔn siregera la amea bɔ’ɔra ba.’

6-7. Beni n wan ta’an soŋɛ bunbilipaalesi ti ba nana ba dɔɣereba?

⁶ Bunbilipaalesi wa, la ni kpe’em bo ya mɛ ti ya nana ya dɔɣereba ba san tue bii ka bɔkɛ ya? Beni n wan soŋɛ ya? Yia la, ti’isɛ bisɛ lan wan ana Yehowa se’em. Baabule la yeti, ya san nana ya dɔɣereba, ‘wana n ani soŋa bɔ’ɔra to Daana la.’ (Kol. 3:20) Yehowa mi ti saŋa ase’a, ya dɔɣereba ni ka bɔkera ya bii ba ta’an ni bo pa’alegɔ ti la kpe’em bo ya ti ya dɔla. Ge ya san kelum nana ba, Yehowa puurɛ wan pee.

⁷ Yi’i, ti’isɛ bisɛ la wan ana ho dɔɣereba se’em. Ho san nana ho dɔɣereba, ho wan basɛ ti ba puurɛ pee ge ti ba me dekɛ bamea delum hɔ. (Mag. 23:​22-25) Ho suure me wan kɛ̃ ba. Alexandre n ze’ele Belgium yeti, “Mam n yuun pɔsɛ nana mam dɔɣereba la, ti to suure yuun kɛ̃ taaba. To yuun tari la suma’asum la pupeelum.” b N tã’a, geele bisɛ ho san nana ho dɔɣereba nananawa, la wan soŋɛ ho se’em beere sa’am. Paulo n ze’ele Brazil yeti, “Mam n nani n dɔɣereba la soŋɛ mam mɛ, ti n nana Yehowa la kpɛ’ɛndoma.” Baabule la pa’alɛ sɛla n sɔi ti la nara ti ya nana ya dɔɣereba. La yeti: ‘La wan ana soŋa bɔ’ɔra ya ge ti ya ta’an vɔi yue tinparɛ wa zuo.’—Ep. 6:​2, 3.

8. Beni n sɔi ti bunbilipaalesi zo’e zo’e nana ba dɔɣereba?

 ⁸ Bunbilipaalesi zo’e zo’e nyɛ lan ni ana soŋa se’em bɔ’ɔra ba, ba san nana. Luiza n ze’ele Brazil yeti, Eŋa yuun nan ka bɔkɛ sɛla n sɔi ti a dɔɣereba yuun ka sakɛ ti a tara fon sankaŋa la. Se’ere n sɔi la, a tadaandoma zo’e zo’e yuun tari la fon. Ge pooren a baŋɛ ti a dɔɣereba yuun boti la ba te’ele en. A nyaa yeti, “Mam san nana n dɔɣereba, la soŋeri la mam meage la daɣɛ mɔbegeri.” La kelum kpe’em bo Elizabeth n de bunbilipaalega bɔna United States ti a nana a dɔɣereba saŋa ase’a. A yeti, “Mam san puɣum ka bɔkɛ sɛla n sɔi ti mam dɔɣereba bɔ’ɔra mam pa’alegɔ, mam ni tiɛ la ba pa’alegɔ n tabelɛ soŋɛ mam se’em.” Monica n ze’ele Armenia yeti, eŋa puurɛ ni pee mɛ, a san nana a dɔɣereba gana eŋa n zaɣesɛ ba nɔɔrɛ la.

9. La san dɛna ti ba nana lɔɔ, la ni ana nɛreba zo’e zo’e la wani?

⁹ Nɛreba zo’e zo’e bisɛ ti gɔmena kpɛ’ɛndoma yele pakɛ to mɛ ge ti la me nara ti to nana ‘sɛba n tari kpe’eŋo’ wa lɔɔ ase’a. (Arom 13:1) Ge nɛrebana mea nɔɔ ta’an kan nana lɔɔ ti ba ka bɔta bii ba ti’isɛ ti la dela kinkisum. Makerɛ, to geele lampo yele bisɛ. Europe tiŋa ayima nɛreba ti’isɛ ti, “La ka nari ti ho yɔ lampo ho san ti’isɛ ti la dela kinkisum.” Bala n sɔi ti tiŋa la nɛreba ka yɔɔra lampo la za’a ti gɔmɛt la bo nɔɔrɛ ti ba yɔɔra la.

10. Beni n sɔi ti to nana lɔɔ se’a ti to ka bɔta la?

¹⁰ Baabule la pa’alɛ ti asaala gɔmɛt boi la Sitaana nu’usin. Bamam n ta’asɛ ti namesegɔ bɔna, la me kan yue ba wan sa’am ba. (Ym. 110:​5, 6; Pa. 8:9; Lu. 4:​5, 6) Baabule la le yeti, ‘se’em n zaɣesɛ zuodoma la sɛba n sɔi to bisera nɔɔrɛ la, a daana me zaɣesɛ la Naayinɛ.’ Nananawa, Yehowa n bo yɔ’ɔ ti nɛresaaleba bisera tɔ, la wan eŋɛ se’em ti yɛla kena soŋa soŋa. A me boti la to nana ba. Bala la, la nari ti to dekɛ sɛla woo n de ba denɛ bo ba n de wuu to yɔɔra lampo, bɔ’ɔra ba gilema ge nana ba. (Arom 13:​1-7) To ta’an ti’isɛ ti lɔɔ wa ase’a ka nari, dɛna kinkisum ge me kpe’em ti to nana. Ge to nani kpɛ’ɛndoma wa mɛ se’ere n sɔi la Yehowa n yeti to nana ba, ba nɔɔrɛ la san ka giisɛ eŋa lɔɔ la.—Tm. 5:29.

11-12. Wuu Luke 2:​1-6 n pa’alɛ se’em la,Yosef la Mary yuun eŋɛ la bem ta’an nam lɔɔ n yuun kpe’em bo ba ge ba yuun nyɛ la bem kã’a? (Bisɛ foote la.)

 ¹¹ To ta’an tɔɣesa Yosef la Mary n yuun kɔ’ɔn nana kpɛ’ɛndoma hali lan yuun kpe’em bo ba la. (Kaalɛ Luke 2:​1-6.) Mary n yuun tari puurɛ ŋmaresi siwaɛ poan la, gɔmena la yuun bo la nɔɔrɛ ti ba eŋɛ sɛla n kpe’em. Augustus n yuun biseri Arom sɔ’ɔlum la yuun bo la nɔɔrɛ ti ba kaalɛ nɛreba la. Yosef la Mary yuun keŋɛ la kilomita 150 bii mɛɛla 93 doose kunkuma zuto ta paɛ Betlehem. Ba sore wa kenɛ yuun kpe’em mɛ bo ba yele yele wuu Mary. Yosef yuun ta’an fabela Mary la bia la n boi puuren la yele. Ge a san ta virige sore zuo, ba wan eŋɛ la wani? Bia la n boi puuren la dela beere sa’am Mɛzaaya la n bala. Ba yuun ta’an bo ni bamea buurɔ kan nam gɔmena la nɔɔrɛ?

¹² Yosef la Mary yuun ka basɛ ti yele ana wa gu ba ti ba kan nam lɔɔ la. Yehowa yuun kã bo ba la ban nam la. Mary yuun paɛ Betlehem soŋa ge dɔɣɛ ti daaŋɔ ka bɔna wuu Baabule la n puɣum tɔɣɛ biŋe se’em la!—Mik. 5:2.

13. To san nana bɔ’ɔra, la ni soŋɛ to mabiisi la wani?

¹³ To san nana kpɛ’ɛndoma, la soŋeri la tomam mea la nɛreba. Sore kani poan? Yele deyima dela, ba kan dɔlegɛ to tuberɛ wuu sɛba n ka doli lɔɔ la. (Arom 13:4) To san nana kpɛ’ɛndoma la, ba wan baŋɛ ti Yehowa Sɛɛradoma dela sɛba n nani lɔɔ. Makerɛ, yuuma ase’a n tole Nigeria tiŋa poan, soogɛpa n yuun kɛ̃ Na’am Pu’usegɔ Deo poan ti ba bɔna bim ita zamesegɔ ta ɛɛra sɛba n ka boti ba yɔ lampo la. Ge ba kpɛ’ɛma la n biseri ba la yele ba yeti, ba yese ge “Yehowa Sɛɛradoma ka zaɣeseri lampo yɔa.” To san nana lɔɔ saŋa woo, to iti pa’ala ti Yehowa Sɛɛradoma dela nɛresondoma. Bala me wan dɛna te’elego bɔ’ɔra to mabiisi la.—Mt. 5:16.

14. Beni n soŋɛ mabipɔka ayima ti a ‘kɔ’ɔn nana’ kpɛ’ɛndoma?

¹⁴ Ge daɣɛ saŋa woo ti to ni bɔta ti to nana kpɛ’ɛndoma. Joanna n ze’ele United States yeti, “La yuun ni kpe’em bo mam mɛ ti n nana bɔ’ɔra, se’ere n sɔi la kpɛ’ɛndoma tabelɛ tum mam yidoma la ŋmɛlema tuuma.” Ge Joanna tiregɛ bisɛ la eŋa n wan tee a puti’irɛ se’em. Yia la, a yuun ka le kaala social media yelese’a  n wan basɛ ti a sunsɔa nyie ti a kan nana kpɛ’ɛndoma la. (Mag. 20:3) N yi’i, a yuun le zusɛ ti Yehowa soŋɛ en ti a dekɛ amea delum en gana eŋa n wan ɛɛra ti asaala gɔmɛt tee yɛla. (Ym. 9:​9, 10) N tã’a, a yuun le kaala la tansugere gɔnɔ n pa’alɛ ton ka nari ti to dekɛ tomea pa’asɛ nalɛɣerɛ yɛla poan la. (Yon 17:16) Nananawa Joanna yeti, eŋa n nani ge bɔ’ɔra kpɛ’ɛndoma gilema la basɛ ti a tara la “suma’asum n ka tari makerɛ.”

15. Beni n sɔi ti la ta’an ni kpe’em bo to ti to nam Yehowa tigere la pa’alegɔ?

¹⁵ Yehowa yeti, to ‘nana sɛba n boi to nɛŋa’ tansugere la poan la. (Heb. 13:17) La boi bim ti to nɛŋadaana Yezu ani la kasi ge sɛba ti a basɛ ti ba bɔna to nɛŋa la ka ani kasi. La ta’an kpe’em bo to ti to nana ba, yele yele wuu ba san yeti to eŋɛ sɛla ti la kpe’em bo to. La yuun tabelɛ ana tuuntuna Peter la bala ti a ka bɔta ti a nam bɔ. Maleka n yuun yele en yeti, a ku dunse’esi ti Moses Lɔɔ la poan ba ka ɔbera la obe la, a yuun zaɣesɛ mɛ. Daɣɛ buyina ma’a ge sugumnɔɔrɛ butã ti a zaɣesɛ! (Tm. 10:​9-16) Beni n sɔi? Pa’alegɔ saaŋa wa yuun ka tari vuurɛ bɔ’ɔra en. La yuun dela sɛla ti a ka tabelɛ eŋɛ. La yuun san kpe’em bo Peter ti a nam maleka pa’alegɔ, bisɛ lan yi wan kpe’em bo tomam se’em ti to nam asaala n ka di mi’a la pa’alegɔ!

16. Paul yuun ta’an ti’isa ti, yɛm ka boi pa’alegɔ la poan ge a yuun eŋɛ la bem? (Tooma 21:​23, 24, 26)

¹⁶ Tuuntuna Paul yuun ‘kɔ’ɔn nana bɔ’ɔra mɛ’ hali ban yuun yeti a eŋɛ sɛla ti a ti’isɛ ti yɛm ka boi bim la. Ba yuun bibisi la Paul yɛla ti Yuda Kristakɔma wum. Ba yuun bibisi yeti, Paul ‘pa’alɛ la nɛreba ti ba da dɔla Moses Lɔɔ la’ ge me ka tara gilema bɔ’ɔra Lɔɔ la. (Tm. 21:21) Kristakɔma bunkureba n yuun boi Yerusalem la yuun yele Paul yeti, a dekɛ nɛreba banaasi keŋɛ pu’usegɔ deo la poan ta malum malema pa’alɛ ti a nani Moses Lɔɔ la. Ge Paul yuun mi ti Kristakɔma ka le dɔla Lɔɔ la, a me ka tue sɛsɛla. Ge la bala za’a, Paul yuun ka gu’um. Yiim beere ti ‘a yuun tari buraasi sinaasi la keŋɛ ta tum kisa tuuma la.’ (Kaalɛ Tooma 21:​23, 24, 26.) Paul n yuun nam la n yuun basɛ ti nɔyinɛ bɔna.—Arom 14:​19, 21.

17. Hon zamesɛ la bem Stephanie zi’irego poan yele la poan?

¹⁷ La yuun kpe’em bo la mabipɔka ayima yu’urɛ n de Stephanie ti a dɔla tigere yile la pa’alegɔ. Eŋa la a sira yuun keŋɛ la tiŋa kayima ta soŋera na’am mɔɔlegɔ tuuma la. Tigere yile la n yuun ta yeti ba basɛ gurup la, ba yuun basɛ ti eŋa la a sira tulege lebe la bamea tiŋa tansugere poan. Stephanie yeti, “Mam puurɛ yuun ka pee. Mam yuun ka sakɛ ti mam mea tiŋa eeri soŋerɛ.” Hali la bala za’a, a yuun sakɛ doose pa’alegɔ la. A yeti, “Pooren mam yuun baŋɛ ti, yɛm boi bim la ban yuun kɔ’ɛ ba puti’irɛ se’em la. To tansugere la poan, to nyaa dela dɔɣereba bo mabisɛba yidoma n ka pu’useri Yehowa la ge me kpɛmesa ba giila. Mam nyaa pa’ali la mabipɔka n tabelɛ ma’ɛ ge nyaa mu’ɛ nini. Nananawa, mam nyaa tari la saŋa zo’e zo’e ita n mea zamesegɔ.” A le yeti, “Mam nyaa tari la putɛkeeŋa n ani fa’a la mam n tiregɛ nam la.”

18. To san nana bɔ’ɔra, la wan soŋɛ to la wani?

¹⁸ To wan nyaŋɛ nana bɔ’ɔra. Yezu  yuun ‘tiregɛ nana bɔ’ɔra’ mɛ ge la yuun daɣɛ naana bɔ’ɔra en, ‘namesegɔ yuun paɛ en mɛ.’ (Heb. 5:8) Wuu Yezu la, saŋa ase’a tomam me ni tiregɛ mɛ nana bɔ’ɔra hali la san kpe’em bo to. Makerɛ, COVID-19 bã’a la n yuun wi’iri ti ba yeti to da le kena Na’am Pu’usegɔ Deon la na’am mɔɔlegɔ la, la yuun kpe’em bo ho mɛ ti ho sakɛ? Ge hon yuun nam la te’ele ho mɛ ti hon la mabiisi tara nɔyinɛ ti Yehowa puurɛ pee. To za’a waabi kɔ’ɔn maasum ti to dɔla pa’alegɔ woo ti ba wan bo to mɛlesekãtɛ la poan. To san nana bɔ’ɔra, to wan nyɛ faarɛ!—Yob 36:11.

19. Beni n sɔi ti hon bɔta ti ho nana bɔ’ɔra?

¹⁹ To zamesɛ baŋɛ ti to san nana bɔ’ɔra, to nyɛti la kã’a zo’e zo’e. Ge sɛla n sɔi ti to nana Yehowa dela, to nɔŋɛ en mɛ ge bɔta ti a puurɛ pee. (1 Yo. 5:3) To kan nyaŋɛ lebe yɔ Yehowa la itisoŋɔ la woo ti a eŋɛ bo to la. (Ym. 116:12) Ge to wan ta’an nana Yehowa la sɛba woo n tari kpe’eŋo la. To san nana bɔ’ɔra, la pa’alɛ ti to tari la yɛm. Nɛresɛba me n tari yɛm la basɛ ti Yehowa puurɛ n pɛɛra.—Mag. 27:11.