1. Pamodi ki pode ser difísil nu obi?

 ALVÊS bu ta atxa ma é difísil obi? Rei Davidi ta atxaba ma é difísil, pur isu el pidi Deus: ‘Labanta déntu mi kel vontadi di obi ku bo.’ (Sal. 51:12) Davidi ta amaba Jeová. Má simé, alvês el tevi ki sforsa pa obi, i nu debe faze mésmu kuza. Pamodi? Primeru, nu erda tendénsia di ka obi. Sugundu, Satanás ta sta sénpri ta tenta pô-nu ta rabela kóntra Jeová, sima el faze. (2 Kor. 11:3) Tirseru, kes algen na nos vólta ta krê rabela i es ten “kel spritu ki gósi sta ta kontrola kes algen dizobidienti.” (Efé. 2:2) Nu meste sforsa txeu pa ka peka i tanbê pa ka dexa kel preson ki Diabu i kel mundu li ta faze-nu, pô-nu ka ta obi. Nu debe sforsa pa obi ku Jeová i ku kes algen ki el da autoridadi.

2. Kuzê ki “sta prontu pa obi” krê fla? (Tiagu 3:17)

² Lé Tiagu 3:17. Jeová uza Tiagu pa skrebe ma kes algen ki ten sabedoria ta sta “prontu pa obi.” Pensa na kuzê ki kel-li krê fla. Nu debe tene gana di obi ku kes ki Jeová da algun autoridadi. É klaru ki Jeová ka ta spera pa nu obi ku un algen ki ta pidi-nu pa nu ka obi ku se mandamentus. — Atus 4:18-20.

3. Pamodi ki obi ku kes algen ki ten autoridadi é inportanti pa Jeová?

³ Pode ser más fásil nu obi ku Jeová di ki obi ku un algen, pamodi Jeová sénpri ta da orientasons perfeitu. (Sal. 19:7) Kes algen ki ten autoridadi, é ka perfeitu. Má simé, nos Pai na séu da pai ku mai, kes funsionáriu di govérnu i ansions algun autoridadi. (Pro. 6:20; 1 Tes.  5:12; 1 Ped. 2:13, 14) Óras ki nu ta obi ku es, na verdadi nu sta obi ku Jeová. Nu ben odja modi ki nu pode obi ku kes algen ki Jeová da autoridadi, sikrê alvês nu ka ta konkorda ku orientason ki es ta da ô nu ka ta krê sigi-s.

4. Pamodi ki txeu fidju ka ta obi ku ses pai ku ses mai?

⁴ Jóvens sta rodiadu di kolégas ki ten tendénsia pa ka “obi ku pai ku mai”. (2 Tim. 3:1, 2) Pamodi ki txeu di es ka ta obi? Alguns pai ku mai ta faze kes kuza ki es ta fla ses fidju pa es ka faze. I ses fidju ta atxa ma kel-li é injustu. Otus ta atxa ma konsedjus di ses pai ku ses mai dja pasa prazu, ka ta sirbi ô ma es é duru dimás. Si bo é jóven, dja bu kustuma xinti si? Txeu jóven ta atxa ma é difísil sigi lei di Jeová ki ta fla: “Nhos obi ku nhos pai i ku nhos mai sima Sinhor ta krê, pamodi kel-li é justu.” (Efé. 6:1) Kuzê ki pode djuda-u faze kel-li?

5. Pamodi ki Jizus é midjór izénplu di obidiensa pa jóvens? (Lukas 2:46-52)

⁵ Bu pode prende ser obidienti ku kel midjór izénplu, ki é di Jizus. (1 Ped. 2:21-24) El éra perfeitu, má se pai ku se mai éra inperfeitu. Jizus onra se pai ku se mai, sikrê es fadja i alvês es ka intende-l dretu. (Êxo. 20:12) Odja kuzê ki kontise kantu Jizus tinha 12 anu. (Lé Lukas 2:46-52.) Se pai ku se mai skese di el na Jiruzalen. Éra responsabilidadi di Juzé ku Maria djobe dretu ma tudu ses fidjus staba djuntu ku es kantu es staba ta volta pa kaza dipôs di kel fésta. Kantu Juzé ku Maria atxa Jizus, Maria poi kulpa na Jizus pamodi el fika na Jiruzalen. Jizus pode flaba ma kel-li éra injustu. Envês di kel-li, el da se pai ku se mai un respósta sinplis i ku ruspetu. Má, Juzé ku Maria “ka intende kuzê ki el staba ta fla-s.” Má simé, Jizus “kontinua ta obi ku es.”

6-7. Kuzê ki pode djuda un jóven obi ku se pai i ku se mai?

⁶ Jóven, bu ta atxa ma é difísil obi ku bu pai ku mai óras ki es ta fadja ô óras ki es ka ta intende-u dretu? Kuzê ki pode djuda-u? Primeru, pensa na modi ki Jeová ta xinti. Bíblia ta fla ma óras ki bu ta obi ku bu pai ku bu mai, “kel-li ta poi Sinhor kontenti.” (Kol. 3:20) Jeová sabe ma alvês bu pai ku bu mai ka ta intende-u dretu ô ma es ta kria régras ki é difísil pa bu sigi. Má, óras ki bu ta skodje obi ku es simé, bu ta poi Jeová ta fika kontenti.

⁷ Sugundu, pensa na modi ki bu pai ku bu mai ta xinti. Óras ki bu ta obi ku bu pai ku bu mai, bu ta pô-s ta fika kontenti i bu ta ganha ses kunfiansa. (Pro. 23:22-25) Talvês bu ta bira más ses amigu. Un irmon di Béljika, ki txoma Alexandri, fla: “Kantu N kumesa ta faze kuzê ki nha pai ku nha mai ta pidiba mi, nu bira más amigu di kunpanheru i nos éra filís.” b Tirseru, pensa na modi ki ser obidienti gósi ta ben djuda-u na futuru. Paulu, ki ta mora na Brazil, fla: “Prende obi ku nha pai i ku nha mai, djuda-m obi ku Jeová i ku otus algen ki ten autoridadi.” Palavra  di Deus ta da-u un motivu inportanti pa bu obi ku bu pai i ku bu mai. El ta fla: “Pa tudu kuza kóre dretu ku bo i pa bu kontinua txeu ténpu na téra.” — Efé. 6:2, 3.

8. Pamodi ki txeu jóven disidi obi ku ses pai i ku ses mai?

⁸ Txeu jóven ta odja modi ki kuzas ta kóre dretu ku es óras ki es ta obi. Luiza, ki tanbê ta mora na Brazil, na komésu ta atxaba difísil intende pamodi ki se pai ku se mai ka ta dexaba el ten un telemóvel duránti un ténpu. El ta pensaba asi pamodi kuazi tudu algen di se idadi tinha un telemóvel. Má, dipôs el da kónta ma se pai ku se mai staba ta proteje-l. El odja ma obi ku se pai i ku se mai é ka duru dimás, pamodi ses konsedjus é kel ki el meste. Elizabeti, ki é un irman jóven na Mérka, ti inda alvês el ta sforsa pa obi ku se pai i ku se mai. El fla: “Óras ki N ka ta intende dretu pamodi ki nha pai ku nha mai kria un régra, N ta pensa na kes ténpu ki ses régra proteje-m.” Mónika, ki ta mora na Arménia, fla ma kuzas sénpri ta koreba midjór óras ki el ta obiba ku se pai i ku se mai. Má kuzas ka ta koreba dretu óras ki el ka ta obiba ku es.

9. Kuzê ki txeu algen ta atxa sobri obi ku lei?

⁹ Txeu algen ta rekonhese ma nu meste di govérnu i ma nu debe obi ku peloménus alguns di kes lei di “autoridadi”. (Rom. 13:1) Omésmu ténpu, es pode ka ta krê obi ku un lei ki ta parse ma é injustu ô ma el ta iziji txeu dimás. Pur izénplu, pensa na inpostu ki nu ta paga. Na un país di Europa txeu algen ta fla ma si bu ta atxa ma un inpostu é injustu, bu ka debe paga-l. É pamodi kel-li ki na kel país kes algen ka ta paga tudu kes inpostu ki govérnu ta iziji.

10. Pamodi ki nu ta obi ti ku kes lei ki nu ka gosta?

¹⁰ Bíblia ta rekonhese ma Satanás sta ta kontrola govérnus di ómi i ma ka ta dura es ta ben distruídu. (Sal. 110:5, 6; Ecl. 8:9; Luk. 4:5, 6) Tanbê el ta fla-nu ma “ken ki ta fika kóntra autoridadi, ta fika kóntra órdi ki Deus poi.” Inda Jeová sta ta dexa govérnus di ómi governa pa pode ten órdi i el ta spera ma nu ta obi ku es. Pur isu, nu debe “da tudu algen kel ki es ten direitu”, kel-li ta inklui inpostu, ruspetu i obidiensa. (Rom. 13:1-7) Talvês nu ta atxa ma un lei ta trapadja-nu, ma é injustu ô ma é difísil di obi. Má nu ta obi ku autoridadi pamodi Jeová ta fla-nu pa nu faze kel-li. Nu ka ta obi ku es sô si es pidi-nu pa nu viola leis di Jeová. — Atus 5:29.

11-12. Kuzê ki Juzé ku Maria faze pa obi ku lei i kal ki foi rezultadu? (Lukas 2:1-6) (Odja dizenhu.)

 ¹¹ Nu pode prende ku izénplu di Juzé i Maria, ki staba prontu pa obi ku autoridadi, sikrê éra difísil pa es. (Lé Lukas 2:1-6.) Kantu Maria tinha uns 9 mês grávida, govérnu pidi pa el ku Juzé faze un kuza difísil. Augustu, ki ta governaba inpériu di Roma, manda tudu algen pa rejista. Juzé ku Maria tevi ki bai ti Belen, ki éra un viajen di más di 150 kilómetru na un kaminhu ki tinha txeu dixida i subida. Kel viajen li foi difísil, prinsipalmenti pa Maria. Talvês es staba preokupadu ku kuzê ki pode kontiseba si Maria tinha fidju na kaminhu. Kuzê ki es ta fazeba si kel-li kontiseba? Maria tinha kel algen ki ta ben sérba Misías déntu se bariga. Kel-li pode sérba un diskulpa pa es ka obiba ku govérnu?

¹² Enbóra Juzé ku Maria tinha motivus pa staba preokupadu, es obi ku lei. Jeová abênsua ses obidiensa. Maria txiga na Belen ku suguransa, se fidju nase dretu i ti el djuda kunpri un profesia di Bíblia. — Miq. 5:2.

13. Modi ki nos obidiensa pode afeta nos irmons?

¹³ Óras ki nu ta obi ku autoridadi, kel-li ta djuda-nu i ta djuda otus. Di ki manera? Nu ta ivita kes mau rezultadu di ka obi ku lei. (Rom. 13:4) Óras ki nu ta obi ku autoridadi, es ta odja ma Tistimunhas di Jeová é un povu obidienti. Pur izénplu, dja ten txeu anu ki trópas na Nijéria entra na un Salon di Reinu ta djobe kes algen ki staba ta faze manifestason kóntra paga inpostu. Má kel xéfi di trópas pidi kes trópa pa es sai di Salon i el fla: “Tistimunhas di Jeová sénpri ta paga ses inpostu”. Óras ki bu ta obi ku lei, bu ta djuda otus algen ten un bon ideia sobri Tistimunhas di Jeová i un dia kel-li pode djuda proteje bus irmon ku irmans — Mat. 5:16.

14. Kuzê ki djuda un irman sta prontu pa obi ku autoridadi?

 ¹⁴ Má simé, nu pode xinti gana di ka obi ku autoridadi. Juana, un irman na Mérka, fla: “Pa mi foi txeu difísil obi, pamodi alguns algen di nha família sufri injustisa na mô di autoridadi.” Má, Juana disidi ma el meste mudaba se manera di pensa sobri autoridadi. Primeru, el para di lé kes kuza na redi sosial ki ta papiaba kóntra autoridadi. (Pro. 20:3) Sugundu, el ora ta pidi Jeová pa djuda-l kunfia na el envês di na un mudansa di govérnu di ómi. (Sal. 9:9, 10) Tirseru, el lé artigus na nos publikason sobri ka mete na asuntus di mundu. (Juan 17:16) Pamodi gósi Juana ta ruspeta i el ta obi ku autoridadi, el ta xinti txeu kalmu i kontenti.

15. Pamodi ki talvês nu ta sforsa pa obi ku orientason ki ta ben di organizason di Jeová?

¹⁵ Jeová ta pidi-nu pa nu “obi ku kes ki ta orienta” kongregason. (Ebr. 13:17) Jizus é nos Líder i el é perfeitu. Má kes irmon ki el skodje pa orienta kongregason é inperfeitu. Nu pode sforsa pa obi ku es prinsipalmenti si es ta pidi-nu pa faze algun kuza ki nu ka krê faze. Apóstlu Pedru resebe un orientason ki na komésu el ka krê obiba. Kantu un anju fla-l pa el kume kes animal ki éra inpuru, di akordu ku Lei di Muizés, Pedru nega faze kel-li ka sô un bês, má três bês. (Atus 10:9-16) Pamodi ki el nega? Pamodi kel novu orientason ka ta fazeba sentidu pa el. El staba kustumadu na faze kuzas di un manera diferenti. Si Pedru atxa difísil obi ku orientason di un anju perfeitu, imajina modi ki pode ser difísil pa nos obi ku orientason di ómis inperfeitu!

16. Kuzê ki apóstlu Paulu faze enbóra el ta atxaba ma kel orientason ki el dadu ka ta fazeba sentidu? (Atus 21:23, 24, 26)

¹⁶ Apóstlu Paulu staba “prontu pa obi” sikrê óras ki el ta resebeba orientasons ki ta parse ma ka ta fazeba mutu sentidu. Kes irmon judeu obi alguns mintira sobri Paulu, ma el staba ta inxina kes judeu “bandona lei di Muizés” i ma el ka staba ta ruspeta Lei di Muizés. (Atus 21:21) Ansions di Jiruzalen orienta Paulu pa leba kuatu ómi pa ténplu i pa faze serimónia di purifikason pa mostra ma el staba ta obi ku Lei. Má Paulu sabia ma kes irmon ka staba dibaxu di Lei. I el ka fazeba nada mariadu. Má simé, Paulu obidese lógu. El ‘leba kes ómi ku el i el faze serimónia di purifikason djuntu ku es’. (Lé Atus 21:23, 24, 26.) Pamodi Paulu obi ku orientason el djuda irmons kontinua unidu. — Rom. 14:19, 21.

17. Kuzê ki bu prende ku spiriénsia di Stefanie?

¹⁷ Foi difísil pa Stefanie seta un disizon ki filial di se país toma. El ku se maridu staba kontenti ta sirbi na un grupu di língua stranjeru. Dipôs, filial kaba ku kel grupu i kel kazal diziginadu pa un kongregason di ses língua. Stefanie fla: “N ka fika kontenti. N ka ta atxaba ma tinha más nisisidadi na nos língua.” Má simé, el disidi apoia kel orientason novu. El fla: “Dipôs, N da kónta ma kel disizon tomadu ku sabedoria. Na nos kongregason tinha txeu algen ki ses pai ku ses mai ka éra Tistimunha di Jeová.  Nton nu bira sima ses pai ku ses mai. N sta ta studa ku un irman ki staba inativu i ki dja kumesa ta prega otu bês. I gósi, N ten más ténpu pa N faze studu pesoal. N tene konsénsia linpu pamodi N sabe ma N faze nha midjór pa N ser obidienti.”

18. Modi ki obi ta djuda-nu?

¹⁸ Nu pode prende obi. Jizus “prende ser obidienti,” ka pamodi el staba na un situason sábi, má pamodi “kes kuza ki el sufri.” (Ebr. 5:8) Sima Jizus, txeu bês nu ta prende obi óras ki nu sta na situasons difísil. Pur izénplu, na komésu di COVID-19, foi difísil pa bu obi kantu nu fladu pa nu para di sisti runion na Salon di Reinu i pa nu para pregason di kaza en kaza? Má, bu obidiensa proteje-u, djuda kongregason sta unidu i bu agrada Jeová. Gósi, nos tudu sta más ben priparadu pa obi ku kes orientason ki nu ta ben dadu na grandi tribulason. Nos vida pode ben dipende di kel-li! — Jó 36:11.

19. Pamodi ki bu krê obi?

¹⁹ Nu prende ma nu ta ten txeu bons rezultadu si nu obi. Má nu ta skodje obi ku Jeová, prinsipalmenti pamodi nu ta ama-l i nu krê pô-l ta fika kontenti. (1 Juan 5:3) Nunka nu ka ta konsigi paga Jeová pa tudu kes kuza ki dja el faze pa nos. (Sal. 116:12) Má nu pode obi ku el i ku kes ki ten autoridadi. Si nu obi, nu ta mostra ma nu ten sabedoria. I ken ki ten sabedoria ta poi korason di Jeová ta fika kontenti.— Pro. 27:11.