ATUAQQISSAAGASSAQ 42
‘Naalakkumasarpit’?
‘Ilisimassuseq pavannga pisoq naalakkumasarpoq.’ – JAAK 3:17.
ERINARSUUT 101 Ataasioqatigiilluta suleqatigiitta
QILANAARTUUT a
1. Naalannissarput sooq sapernartittarparput?
NAALANNISSAT sapernartittarpiuk? Daavip sapernartippaa, taamaattumik Guuti qinnuigaa naalakkumassuseqarteqqulluni: “Anersaaqartinnga Guutimut naalasseriartumik!” (Tuss 51:14) Daavip Jehova asavaa, taamaattorli ilaannikkut naalannissani ajornakusoortittarpaa, soorlu aamma uagut taamaattartugut. Sooruna? Siullertut, ajortiliunerput pissutigalugu naalanngeqqajaasaratta. Aappaattut, Saatanip pikitsitsisinniarsariuartarmatigut. Pingajuattut, inuit pikitsitsiumatuut ‘maanna naalanngitsunut sunniuteqartumik isiginnittaaseqartut’ avatangiisigalugit inuugatta. (Ef 2:2) Naammalluinnanngissuserput kisiat akiornagu aamma Diaavulup sunniiniarnera taassumalu silarsuaata naalannginnissamut tatisineri akiortuartariaqarpagut. Jehovap taassumalu oqartussaassusiligaanut naalannissarput ilungersuutigisariaqarparput.
2. Naalakkumaneq qanoq paasisariaqarpa? (Jaaku 3:17)
2 Jaaku 3:17 atuaruk. Jaaku isumassarsisitaalluni allappoq inuit ilisimassuseqartut ‘naalakkumasartut’. Tamanna qanoq isumaqartoq eqqarsaatigiuk. Jehovap oqartussaassusiligaanut kajumilluta naalakkumasariaqarpugut. Soorunalimi Jehovap kissaatiginngilaa peqqussutiminut naalanngeqqusisut naalattariaqarigut. – ApS 4:18-20.
3. Sooq Jehovap pingaartippaa uagutsinnut oqartussaassusiligaanut naalannissarput?
3 Jehova naalakkuminarnerutissinnaavarput peqqussutai tamarmik naammalluinnartuummata. (Tuss 19:8) Inuilli oqartussaassusillit naammalluinnanngitsuupput. Taamaakkaluartorli Ataatatta qilammiusup angajoqqaat, oqartussaasut, utoqqaanertallu oqartussaassusilersimavai. (Uss 6:20; Tes 1. 5:12; Pet 1. 2:13, 14) Taakku naalakkaangatsigit Jehova naalattarparput. Maannakkut sammeriartigu Jehovap oqartussaassusiligai qanoq naalassinnaanerigut, naak ilaannikkut peqqussutaat akueriuminaatsillugillu maleruaruminaatsissinnaagaluarlutigit.
ANGAJOQQAATIT NAALAKKIT
4. Sooq meerarpassuit angajoqqaatik naalattanngilaat?
4 Ullumikkut inuusuttoqarpoq ‘angajoqqaaminnut naalanngitsunik’. (Tim 2. 3:1, 2) Sooq taamaappa? Inuusuttut ilaat eqqarsartarput angajoqqaat marloqiusanik isumallit, tassa angajoqqaat iliuuserisinnaanngisaminnik piumaffigisaraatsik. Allat isumaqarput angajoqqaat siunnersuutaat ullutsinni tulluartuunngitsut, maleruaruminaatsut imaluunniit sukangavallaartut. Illit inuusuttuuguit taamatut misigisarpit? Amerlasuut Jehovap peqqussutaa una maleruaruminaatsittarpaat: “Angajoqqaasi naalassigit, taamaaliorussi Naalakkap piumasaatut iliorlusilu eqqortuliussaasi.” (Ef 6:1) Taamaaliornissannut suna iluaqutigisinnaaviuk?
5. Jiisusip angajoqqaaminut naalannera sooq maluginiarnarpa? (Lukkarsi 2:46-52)
5 Naalannermut maligassaalluarnerpaaq, Jiisusi, ilinniarfigisinnaavat. (Pet 1. 2:21-24) Taanna naammalluinnartuuvoq naammalluinnanngitsunik angajoqqaalik. Jiisusilli angajoqqaani kukkusaraluartut ilaannikkullu paatsoortaraluartut ataqqivai. (Mos 2. 20:12) Jiisusi aqqaneq-marlunnik ukioqartoq qanoq pisoqarnera eqqarsaatigiuk. (Lukkarsi 2:46-52 atuakkit). Jiisusip angajoqqaani Jerusalemmiliaqatigai, angerlamulli utertillutik Jiisusi ilaanersoq maluginianngitsoorpaat. Juuserfip Mariiallu qulakkeersimasariaqaraluarpaat meeqqami tamarmik ilagineraatsik. Juuserfip Mariiallu kiisami Jiisusi nassaarigamikku Mariiap naveerpaa ernumatimmatik. Mariiap pisuutitsinera Jiisusip eqqunngitsuunerarsimasinnaagaluarpaa. Angajoqqaanili saamasumik ataqqillugillu akivai, “oqaasiili paasinngilaat”. Jiisusilli ‘kajumilluni naalattuarpai’.
6-7. Suut pissutigalugit inuusuttut angajoqqaatik naalakkumassavaat?
6 Inuusuttuusutit, angajoqqaatit kukkugaangata imaluunniit paatsooraangatsit naalannissaat ajornakusoortittarpiuk? Qanoq iliorsinnaavit? Siullertut, eqqarsaatigisinnaavat Jehova qanoq misiginersoq. Biibilimimi allassimavoq angajoqqaatit naalakkaangakkit “Naalakkap iluarisaatut” iliortartutit. (Kol 3:20) Angajoqqaavit paatsooraangatsit iliuuseriuminaatsitannilluunniit peqqugaangatsit Jehovap ilisimasarpaa. Naalanniarlutit aalajangeraangavit Jehova nuannaartittarpat.
7 Aappaattut, angajoqqaatit qanoq misiginersut eqqarsaatigiuk. Naalakkaangakkit nuannaarlutillu tatiginerulertarpaatsit. (Uss 23:22-25) Aamma immissinnut qaninnerulissaasi. Qatanngut angut Belgiamiu Alexandremik atilik ima oqarpoq: “Angajoqqaama piumasai naalannerusalerakkit immitsinnut qaninnerulerpugut. Attaveqatigiinnerput nuannernerulerpoq.” b Pingajuattut, naalannerit illit qanoq iluaqutigisinnaanerlugu eqqarsaatigiuk. Paulo Brasiliami najugalik ima oqarpoq: “Angajoqqaannut naalannera Jehovamut oqartussaassusilinnullu allanut naalannissamut iluaqutigaara.” Illit angajoqqaavit naalannissaannut pissutissaqarluarnerit pillugu Biibilimi ima allassimavoq: “Taamaalioruit nunarsuarmi sivisuumik pitsaasumillu inuuneqassaatit.” – Ef 6:2, 3.
8. Inuusuttorpassuit sooq angajoqqaaminnut naalattarpat?
8 Inuusuttorpassuit naalannerup iluaqutissartai namminneq misiginikuuaat. Luizap Brasiliameersup paasiuminaatsissimagaluarpaa sooq piffissap ilaani mobileqaqqusaannginnini, peqatinimi amerlanerit mobileqarmata. Paasilerpaali angajoqqaami illersorniaraanni. Ima oqarpoq: “Angajoqqaannut naalanneq anulersorneqarsimasutullusooq isiginagu qitequtitut isumannaallisaatitut inuunermik annaassisinnaasutut isigaara.” Elizabeth qatanngut arnaq inuusuttoq USA-meersoq angajoqqaaminut naalannissaminik sapernartitsisoq ima oqarpoq: “Angajoqqaama killilersuutaat paasinngikkaangakkit eqqarsaatigisarpara siornatigut qanoq iluaqutigisimanerlugit.” Monica Armeniami najugalik oqarpoq angajoqqaaminut naalakkaangami nuannaarnerusarluni.
OQARTUSSAT NAALAKKIT
9. Inatsisinut naalannissaq inuppassuit qanoq isumaqarfigaat?
9 Inuppassuit nalunngilaat ‘oqartussaassusilinnik’ pisariaqartitsisugut inatsisiliaasalu ilaat naalattariaqarigut. (Rom 13:1) Inuilli taakku inatsisit sukangavallaartutut isigisatik nuannarinngisatilluunniit malinneq ajorpaat. Assersuutigalugu eqqarsaatigikkit akileraarutissat. Europami nunat ilaanni inuppassuit isumaqarput akileraarutinik sukangavallaarsorisaminnik akiliisariaqaratik. Tupinnanngitsumik nunami tassani innuttaasut akileraarutit akiligassatik 66 procentiinnaat akilertarpaat.
Juuserfip Mariiallu naalannerat qanoq ilinniarfigisinnaavarput? (Immikkoortut 10-12 takukkit) c
10. Sooq inatsisinut iluarinngisatsinnut naalattarpugut?
10 Biibilimit paasivarput inuit naalakkersuinerat naalliuutinut pisooqataasoq, Saatanimit aqunneqartoq aamma qanittukkut suujunnaarsinneqarumaartoq. (Tuss 110:5, 6; Oqal 8:9; Luk 4:5, 6) Aammali paasivarput ‘oqartussaasunik akerlilersuisut Guutip aaqqissuussaanik akerlilersuisuusut’. Naalakkersuisut aqutsinerat Jehovap akuerigallarpaa, naatsorsuutigaalu uagut naalassagigut. Taamaattumik ‘pisassaat tamaasa’ – ilaatigut akileraarutit, ataqqinninneq naalannerlu – tunniuttariaqarpagut. (Rom 13:1-7) Eqqarsarsinnaavugut naalannissamut naleqqutinngitsuusut, naapertuilluanngitsuusut akisuallaartullu. Uagulli Jehova naalattarparput, peqquaatigullu peqqussutiminut akerliunngikkaangata oqartussanut naalattaqqulluta. – ApS 5:29.
11-12. Juuserfi Mariialu inatsit naalakkumallugu qanoq iliorpat, qanorlu kinguneqartumik? (Lukkarsi 2:1-6) (Aamma assit takukkit).
11 Juuserfi Mariialu naalakkersuisunit imaannaanngitsumik piumaffigineqartut ilinniarfigisinnaavagut. (Lukkarsi 2:1-6 atuakkit). Mariia qaammatit qulingiluassaannik naartunermini Juuserfilu naalannermikkut misilinneqarput. Kaasari Augustus inatsisiliorpoq Romami innuttaasut tamarmik illoqarfimmut inunngorfigisaminnut nalunaarsortikkiartussasut. Juuserfi Mariialu 150 kilometerisut isorartutigisumik qaqqakkoorlutik Betlehemmimukartariaqarput. Angalaneq tamanna imaannaasimanavianngilaq, pingaartumik Mariiamut. Aappariit angalanermi ajutoortoqariataartoqarsinnaanera isumakuluutigisimassavaat. Ingerlaartillutimmi ernisuleraluarpat? Missiarsiusussarmi naarmioraa. Eqqarsarsinnaasimagaluarput naalattariaqaratik.
12 Juuserfip Mariiallu isumakuluuteqaraluarlutik inatsit taanna naalappaat. Jehovallu naalammata pilluaqquai. Betlehemmimut apuulluarput, Mariia peqqissumik ernertaarpoq, aammalu siulittuut Biibilimeersoq eqquutitippaat. – Mika 5:1.
13. Naalannerput qatanngutinut qanoq sunniuteqarsinnaava?
13 Oqartussat naalakkaangatsigit allanut uagutsinnullu iluaqutaasarpoq. Qanoq? Inatsisinik unioqqutitsisut pillaatissaat pinngitsoortissinnaavarput. (Rom 13:4) Aamma oqartussanut naalannerput Jehovap Nalunaajaasuisa isigineqarnerannut sunniuteqarsinnaavoq. Ukiorpassuit matuma siorna Nigeriami pisimasoq eqqarsaatigiuk. Sakkutuut akileraarutinik akiliinissamut akerlilersuisunik ujaasillutik ataatsimiinneq akornuserlugu isaapput. Sakkutuut naalagaata sakkutuut aneqquai oqarlunilu: “Jehovap Nalunaajaasui akileraarutinik akiliiuaannarput!” Inatsisinut naalakkaangavit Jehovap Nalunaajaasuisa ajunngitsumik tusaamaneqarnerat tapersersortarpat. Taamaaliornerit ullut ilaanni qatanngutit iluaqutigisinnaavaat. – Mat 5:16.
14. Qatanngutip arnap oqartussaasunut naalakkumalernerminut suut iluaqutigai?
14 Ilaannikkut oqartussaasunut naalannissarput ajornakusoortissinnaavarput. Joanna qatanngut arnaq USA-meersoq unneqqarilluni ima oqarpoq: “Ilaquttama oqartussaasunit eqqunngitsumik pineqarnerat pissutigalugu ilaannikkut oqartussaasunut naalannissara sapernartittarpara.” Joannali eqqarsartariaatsini allanngortinniarlugu iliuuseqarpoq. Siullermik, oqartussaasut pillugit internetikkut attaveqatigiittarfinnut ikkussukkat nuanninngitsut atuartarunnaarpai. (Uss 20:3) Aappassaannik, naalakkersuisut taarserneqarnissaat qinnutiginagu Jehovamik tatiginninnissani qinnutigisalerpaa. (Tuss 9:10, 11) Pingajussaannik, politikkimut akuliunnaveersaarnissaq pillugu Biibililersaarutitsinni allaaserisat atuartalerpai. (Joh 17:16) Joanna oqarpoq oqartussaasunik ataqqinninneq naalannerlu qamuuna eqqississutigisimallugit.
JEHOVAP PEQATIGIIFFIATA SIULERSUINERANUT NAALATTUUGIT
15. Sooq Jehovap peqatigiiffiata siulersuineranut naalannissarput ilaannikkut ajornakusoortissinnaavarput?
15 Jehovap peqquaatigut ilagiinni siulersuisut naalaqqullugit. (Hebr 13:17) Siulersuisorsuarput, Jiisusi, naammalluinnartuuvoq, qatanngutilli angutit siulersuisussatut toqqagai naammalluinnanngitsuupput. Imaassinnaavoq naalannissaat ajornakusoortikkipput, pingaartumik nangaassutigisatsinnik iliuuseqaqqugaangatigut. Apustilip Petrusip peqqussummut aalajangersimasumut naalannissani aallaqqaammut nangaassutigaa. Moorsisip inatsisai naapertorlugit uumasunik minguttuunik inngilimit nereqquneqarami nerinissani ataasiaannarani pingasoriarlunili itigartippaa! (ApS 10:9-16) Sooq? Peqqussut nutaaq sungiusimasaminit allaanerungaartoq paasinnginnamiuk. Petrusip inngilimit naammalluinnartumit ilitsersorneqarnini ajornakusoortippagu tupinnanngilaq uagut angutinit naammalluinnanngitsunit ilitsersorneqarnitsinnut naalannissarput ajornakusoortissinnaagipput!
16. Paulusi ilitsersorneqarnini tulluarsorinngikkaluarlugu qanoq iliorpa? (Apustilit Suliaat 21:23, 24, 26)
16 Apustili Paulusi tulluarsorinngisaminik ilitsersorneqarami naalakkumavoq. Kristumiut juutiusut Paulusi ‘Moorsisip inatsisaanik tunussinissamik ilinniartitsisoq’ tusarsimavaat. (ApS 21:21) Tamannali ilumuunngilaq. Taamaakkaluartoq kristumiut utoqqaanertat Jerusalemmimiittut Paulusi peqquaat angutinik sisamanik ilaqarluni guutisiorfimmut ileqqulersuutit malillugit minguersariartoqqullugu taamaalilluni inatsisinik maleruaanini erserseqqullugu. Paulusilli nalunngilaa Moorsisip inatsisai kristumiunit maleruarneqartariaqarunnaartut aammalu nammineq kukkussuteqarsimanani. Paulusili akerliunngilaq. “Aqaguani Paulusip angutit taakku ileqqulersuutit malillugit minguersaqatigai.” (Apustilit Suliaat 21:23, 24, 26 atuakkit). Paulusip naalannera qatanngutit ataasioqatigiinnerannut iluaqutaavoq. – Rom 14:19, 21.
17. Stephaniep misigisaanit suna ilikkarpiuk?
17 Qatanngutip arnap Stephaniemik atillip immikkoortortaqarfimmi qatanngutit akisussaasut aalajangiinerat akueriuminaatsippaa. Uinilu oqaluussisartoqatigiinni allamiusut oqaasilinni nuannarisaminni kiffartorput. Oqaluussisartoqatigiit taakku immikkoortortaqarfimmit matuneqarput, aappariillu taakku ilagiinnut immissut oqaasilinnut uterlutik. Stephanie ima oqarpoq: “Pakatseqaanga. Isumaqanngilanga ilagiinni immisut oqaasilinni pisariaqartitsisoqartoq.” Taamaakkaluartorli peqquneqarnermissut iliorput. Ima oqaluttuarpoq: “Kingusinnerusukkut paasivara qatanngutit aalajangiinerat silatusaarnerusoq. Ilagiinni anersaakkut ilaqutaqanngitsunut anersaakkut angajoqqaanngorpugut. Qatanngummik unittooqqasimasumik atuaqqissaaqateqartalerpunga. Uangalu nammineq misissueqqissaartarnera piffissaqarfiginerulerpara. Ilerasuuteqanngilanga nalunnginnakku sapinngisamik naalanniarsimallunga.”
18. Naalanneq qanoq iluaqutigisarparput?
18 Naalanneq ilikkarsinnaavarput. Jiisusip naalanneq pissutsini nuannersuinnarni ilikkarnagu naalliunnermigut ilikkarpaa. (Hebr 5:8) Uaguttaaq pissutsini artornartorsiorfiusuni Jiisusitut naalanneq ilikkartarparput. Assersuutigalugu COVID-19-imik nappaalanersuaqalermat Naalagaaffilersaarfitsinni ataatsimiittarnerit aamma illumiit illumut oqaluussisarnerit unitsinneqarmata ilitsersuut akueriuminaatsippiuk? Taamaattorli naalannerit illersuutigaat, qatanngutitsinnik ataasiussuseqalissutigaat Jehovalu nuannaartillugu. Annikilliornartussarsuarmi ilitsersuutigineqartussanut naalannissamut tamatta maannakkut piareersarneqarpugut. Naalakkuttalu ilitsersuutit taakku annassutigissavagut! – Job 36:11.
19. Sooq naalakkumavit?
19 Paasivarput naalanneq iluaqutaangaartartoq. Naalattarpugulli pingaarnermik Jehova asagatsigu nuannaartikkusukkatsigulu. (Joh 1. 5:3) Jehovap uagut pilluta iliuuserisimasarpassui utertillugit akilersinnaanngilagut. (Tuss 116:12) Jehovali uagutsinnullu oqartussaassusillit naalassinnaavagut. Taamaalioruttalu takutissavarput ilisimassuseqarluta. Ilisimassusillit Jehovap uummataa nuannaartittarpaat. – Uss 27:11.
ERINARSUUT 89 Naalakkuit pilluaqqusaassaatit
a Naammalluinnanngitsuugatta ilaannikkut naalannissarput sapernartittarparput, allaat ilitsersuisoq uagutsinnut eqqortumik oqaraluarpalluunniit. Allaaserisami sammissavarput angajoqqaanut, oqartussaasunut, ilagiinnilu siulersuisunut naalanneq qanoq iluaqutigisinnaagipput.
b Angajoqqaavit qanoq oqaloqatigisinnaanerinik siunnersuuteqarpoq jw.org-mi videumi uani: “Angajoqqaakka qanoq oqaloqatigisinnaavakka?”
c ASSINI MALUGISASSAT: Juuserfip Mariiallu kaasarip Betlehemmimut nalunaarsortikkiartoqqusinera naalappaat. Ullumikkullu kristumiut angallannermi inatsisit, akileraaqqusinerit oqartussallu peqqissutsimut malittarisassiaat naalattarpaat.