1. Mukonda dyahi kitena kutubhonza kubelesela?

 O KWILA sayi ithangana kikubhonza kubelesela? Kiki kyabhitile ni Sobha Davidi, kyenyiki wasambe kwa Nzambi: “Ngi fikidile ni vondadi ya ku ku tumaka.” (Jisá. 51:12) Davidi wazolele Jihova. Maji sayi ithangana, kyexile mumubhonza kumubelesela, kyene we kimoxi n’etu. Maji mukonda dyahi? Kyadyanga, mukonda twalundula o ukexilu wa kuxibhaka. Kayadi, Satanaji usota kutufwinyisa kubhukumukina Jihova, kala kyabhange mwene. (2 Ko. 11:3) Katatu, twatungu ku mundu wezala ni “athu abhukumuka.” (Efe. 2:2) Kyenyiki, phala tutene kubelesela Jihova ni yo a abhana o ungana wa kutumina kwa mwene, twatokala kubhanga nguzu yavulu phala kudibhana kana ngo ni ukexilu wetu wa ituxi, maji we ni ijijidiku ya Dyabhu ni mundu we.

2. Ihi ilombolola o kukala muthu “ubelesela”? (Tiyaku 3:17)

² Tanga Tiyaku 3:17. Bhukaxi ka nzumbi ikola Tiyaku wasoneka kwila o athu akwa unjimu ‘abelesela.’ Kiki kilombolola ihi? Etu twatokala kukala polondo phala kubelesela yo a abhana o ungana wakutumina kwa Jihova. Kidi kwila Jihova ka mesena kwila tubelesela muthu utubhinga phala kubhukumukina o itumu Ye. —Ika. 4:​18-20.

3. Mukonda dyahi kubelesela yo a abhana o ungana wa kututumina kwala ni valolo phala Jihova?

³ Nange kitubhonza kubelesela o athu, maji o kubelesela Jihova kana. O itendelesu ibhana Jihova yayuka ithangana yoso. (Jisá. 19:7) Maji o yo ala ni ungana ki athu ayuka kana. Maji ne kiki o Tata yetu ya dyulu wabhana ungana wa kutumina ku jitata, ku jinguvulu ni ku tufunga. (Jisa. 6:20; 1 Te. 5:12; 1 Ph. 2:​13, 14) Kyoso kitwabelesela, mu kidi twamubelesela Jihova.  Twanda mona kyebhi kitutena kubelesela o athu a abhana ugana kwa Jihova, ne mwene kyoso kitudivwa kwila o itendelesu yatubhana yabhonzo mba ki twamesena kuyikayela.

4. Mukonda dyahi twana twavulu twene mubhukumukina o jitata jawu?

⁴ O minzangala yetu ala bhwaxaxi ka minzangala ni akwa, ala ni ulexilu wa ‘kuxibhaka o jitata.’ (2 Ti. 3:​1, 2) Mukonda dyahi avulu mudya ene muxibhaka? Sayi jitata kene mubhanga o ima yene mutendelesa ku twana twa. Kyenyiki o twana twa adivwa kwila o jitaja ja akwa mangonya. Amukwa amona o itendelesu ya jitata ja kala yokulu, kiyala dingi ni valolo mba yabhonzo kyavulu. Se eye umunzangala, o kwila wadivwile kya kiki? Avulu kya abhonza kubelesela o kitumu kya Jihova kyamba: “Beleselenu o jitata jenu kala kyamesena Nzambi, mukonda kiki kima kyambote bhu pholo yê.” (Efe. 6:1) Ihi itena ku kukwatekesa phala ku kibelesela?

5. Mukonda dyahi twamba kwila Jezú mwene o phangu yabeta kota ya munzangala wabelesela o jitata je? (Luka 2:​46-52)

⁵ Eye utena kudilonga o kubelesela bhukaxi ka phangu yabeta kota—Jezú. (1 Ph. 2:​21-24) Mwene wexile muthu wayuka exile mumusasa ku jitata akwa ituxi. Maji Jezú wexile muxila o jiata je, ne mwene kyoso ene kyexile mutondala, mba kexile mumutendela. (Mak. 20:12) Tala yabhiti kyos Jezú kyexile ni 12 a mivu. (Tanga Luka 2:​46-52.) Jezú ni jitata je ayile ku Jeluzaleme, maji kyoso kyexile muvutuka kubhata, ene ka mono kwila Jezú waxala kudima. Zuze ni Madiya atokalele kutonginina phala kwijiya se twana twawu twoso exile kumoxi ni ene, kyoso kyexile muvutuka kubhata, kyabhu o fesa mu Jeluzaleme. Kyoso Zuze ni Madiya kyasange Jezú, Madiya wamutatela mukonda dya kuxala kudima! Jezú wejitena kuzwela kwila ki kyexile kikuma kye. Muveji dya kiki, mwene watambwijila o jitata jen i kuxila kwoso. Maji Zuze ni Madiya, “katongolola o ima ya zwelele mwene.” Ne kiki, Jezú ‘wasuluka mu kwa belesela.’

6-7. Ihi itena kukwatekesa o minzangala kubelelsela o jitata jawu?

⁶ Minzangala, o kwila kyene mumibhonza kubelesela o jitata jenu kyoso kyata itondalu mba kya kamba kumitendela? Ihi itena kukwatekesa? Kyadyanga, xinganeka kyebhi kidivwa Jihova. O Bibidya yamba kwila kyoso ki ubelesela o jitata je, “kiki kyene kisangulukisa Ngana.” (Kol. 3:20) Jihova wejiya kwila sayi ithangana o jitata je kene mukutendela mba sayi bhabha a kubhana itendelesu ibhonza ku ibelesela. Maji kyoso ki usola kwabelesela sumbala ni ibhidi yiyi, Jihova usanguluka kyavulu.

⁷ Kyakayadi, xinganeka kyebhi kidivwa o jitata je. Kyoso ki ubelesela o jitata je, ene asanguluka anga akudyelela kyavulu. (Jisa. 23:​22-25) O ukamba wenu wandakola dingi we. Sayi phange ya diyala amwixana Alexandre, mukwa Bélgica, wambe: “Kyoso kingamateka kubelesela o jitata jami, mukubhanga o ima yangibhinga, ngamono kwila twadizukama dingi mudyetu, ni kwila twasangulukile dingi.” b Kyakatatu, xinganeka mu mbote iwandakatula ku hadya, se ubelesela o jitata je kindala. Phange Phawulu, watungu ku Brazil, wambe: “O kudilonga kubelesela o jitata jami, kwene mungikwatekesa kubelesela Jihova ni athu amukwa ala ni ungana.” O Bibidya itutangela se mukonda dyahi kima kyambote kubelesela o jitata. Yene yamba: “Kyenyiki o ima yoso yanda kubhita kyambote, ni unangenene mu ixi.”—Efe. 6:​2, 3.

8. Mukonda dyahi minzangala yavulu asola kubelesela o jitata jawu?

 ⁸ Minzangala yavulu ene mumona o mbote ijila mu kubelesela. Phange Lwiza, watungu we ku Brazil, ku dimatekenu kyamubhonzele kutendela se mukonda dyahi sayi kithangana kamwehelele kukala ni mutelembe wa kafwetele. Mwene wexile mumona kwila athu avulu a kitala kye exile ni mutelembe. Maji mu kusuluka mwene watendela kwila o jitata je, mu kidi exile mumulanga. Kindala phange Lwiza wejiya kwila mukubelesela o jitata je, kabhingi kudivwa kala amumufidisa kubhanga kima, mukonda o itendelesu yawu yene mwene yabhindamena. Phange Elizabeth, munzangala wa muhatu watungu ku Estados Unidos, sayi ithangana kimubhonza hanji kubelesela o jitata. Mwene wajimbulula: “Kyoso ki ngikamba kutendela kyambote se mukonda dyahi jitata jami angibhana kitendelesu, ngixinganeka kyebhi o itendelesu yangibhele kya m’ukulu yangilange.” Phange Monica, watungu mu ixi ya Armênia, wambe kwila ithangana yoso yexile mubelesela o jitata je, wexile muditunda kyambote, maji ki kyene kyexile mubhita kyoso kyakambele kubelesela.

9. Kyebhi kidivwa athu avulu yalungu ni kubelesela o itumu?

⁹ Athu avulu axikina kwila twabhindamena kukala ni jinguvulu, ni kwila kwala itumu itubhana o “maungana” enya, itwatokala kubelesela. (Lom. 13:1) Maji nange ene ka xikina kubelesela o itumu kayiwabhela mba yafika kwila ki yafwama. Mu kifika, xinganeka mu kitumu kyalungu ni kufuta o lubhaku. Sayi ixi ku Europa, athu avulu axikina kwila “se udivwa kwila o lubhaku ki lwafwama, ki wabhingi kulufuta.” Mukonda dya kiki, athu avulu mu ixi yenyoyo kene mufuta o malubhaku moso a bhinga o jinguvulu.

10. Mukonda dyahi tubelesela kate mwene o itumu ki twayiwabhela?

¹⁰ O Bibidya itutangela kwila o jinguvulu ja ngongo jibhekela hadi ku athu, a mujitumina kwala Satanaji, ni kwila kwakambe ngo anda jibwika. (Jisá. 110:​5, 6; Ndo. 8:9; Luk. 4:​5, 6) Maji yene itutangela we kwila “woso ubhukumukina o maungana, wa mu bhukumukina Nzambi.” Kindala hanji, Jihova wamukwehela o jinguvulu kutumina phala ima yoso ki ikale mu kavwanza. Mwene phe ukingila kwila tujitumaka. Kyenyiki, twatokala ‘kubhana ku athu oso, yoso ya atokala,’ kala o malubhaku, o kuxila, ni kubelesela. (Lom. 13:​1-7) Nange sayi itumu tu imona kala ki yafwama, mba yabhonzo ku ibelesela. Maji ne kiki, etu tubelesela o maungana enya mukonda Jihova watubhingi phala kukibhanga. Tudituna ngo se atubhinga kubhukumukina o itumu ya Jihova.—Ika. 5:29.

11-12. Kala kyosoneke mu Luka 2:​1-6, ihi yabhange Zuze ni Madiya phala kubelesela o kitumu, ni ihi yabhiti? (Tala we ojifoto.)

¹¹ Tutena kukatula mbote ku phangu ya Zuze ni Madiya. Ene exile polondo phala kubelesela  o maungana ne mwene se kya abhonzele kukibhanga. (Tanga Luka 2:​1-6.) Kyoso Madiya kyemitine, mukubhita nange divwa dya jimbeji, o nguvulu wabhingile kima kyabhonzele kyavulu phala Zuze ni Madiya kukibhanga. O nguvulu Sézalu dya Nguxi, wabhele kitumu kya kwila athu oso exile mwatumina ku akwa Loma, atokalele kuya mu ji mbanza mwavwalela phala kudisonekesa. Kyenyiki, Zuze ni Madiya abhingile kwenda 150 a jikilometulu, mu njila yezalele milundu, phala kubhixila ku Beleme. O njila yiyi yejibhonza, bengebenge phala Madiya. Kiyadi kuyawu nange a thandanganyele ni sawidi ya Madiya ni ya mona mu mala. Ene nange exile ni woma walungu ni ibhidi yejitena kumoneka se o jindolo ja kuvwala jimukwatela mu njila. Ku mbandu yamukwa, o yo kexile mona wosowoso kana, wexile o Mexiya amukanene kwa Jihova. O kwila mukonda dya kiki ene kejibelesela dingi o nguvulu?

¹² Zuze ni Madiya kehela o hele yexile nayu kwafidisa kubelesela o kitumu. Jihova wa abesowala mukonda dya kubelesela. Madiya wabhixila kyambote mu Beleme, wavwala mona wadisanza, kate wakwatekesa kukumbidila kikanenu kya Bibidya!—Mik. 5:2.

13. O kubelesela kwetu kutena kubhekela ihi ku jiphange jetu?

¹³ Kyoso kitubelesela o mautuminu, tubhekela mbote phala etu ni akwetu we. Kyebhi? O kubelesela kwetu kufidisa kutukaxtikala kala kyene mubhita ni yo akamba kubelesela. (Lom. 13:4) Kyoso kitubelesela o jinguvulu, ene andamona kwila o Jimbangi ja Jihova athu ambote. Mu kifika, mivu yavulu kudima ku ixi ya Nigéria, masoladi abokona um Kididi kya Ubhezelu mu kithangana kya kyonge, ya exile musota o athu kandalele kufuta o malubhaku. Maji o chefe ya masoladi wa atangela phala kutunda, mwene wambe: “O Jimbangi ja Jihova ene mufuta o malubhaku ithangana yoso.” Mu kiki, kyoso ki ubelesela o itumu, wamukwatekesa o athu kumona o ukexilu wambote wala nawu o Jimbangi ja Jihova. Sayi kizuwa o ukexilu yu utena kukwatekesa kulanga o jiphange je.—Mat. 5:16.

14. Ihi yakwatekesa phang’yetu ya muhatu kukala muthu “ubelesela” o maungana?

 ¹⁴ Maji ne kiki, sayi ithangana kitena kutubhonza kubelesela o mautuminu. Phange Joanna, ku ixi ya Estados Unidos, wambe: “Kyangibhonzele kyavulu kubelesela, mukonda amoxi ku jindandu jami a atalesa hadi yavulu ku jinguvulu.” Maji phange Joanna wabhange nguzu phala kulungulula o ixinganeku ye. Kyadyanga, mwene weha kutanga o ima yosoneke mu internete, izwela kyayibha yalungu ni jinguvulu. (Jisa. 20:3) Kyakayadi, mwene wasambe kwa Jihova phala kumukwatekesa kudyelela kwa Mwene muveji dya kulungulula o jinguvulu. (Jisá. 9:​9, 10) Kyakatatu, mwene watange milongi mu madivulu metu izwela yalungu kukamba kudita mu maka a jinguvulu. (Nzw. 17:16) Kuma kindala Phange Joanna wene muxila ni kubelesela o maungana, kiki kimubhekela kutululuka ni kisangusanu.

15. Mukonda dyahi sayi ithangana nange kitubhonza kubelesela o itendelesu itubhana o kilunga kya Jihova?

¹⁵ Jihova utubhinga phala ‘kubeleselea yó atukala kupholo’ mu kilunga. (Jih. 13:17) Sumbala o Mutwameni wetu, Jezú, muthu wayuka, o yo asolo mwene phala kukala kupholo akwa ituxi. Kitena kutubhonza ku abelesela, bengebenge se atubhingi kubhanga kima maji etu ki twandala kukibhanga. Sayi kizuwa poxolo Phetele kudimatekenu ka mesenene kubelesela o kitendelesu kyamubhele. Kyoso o anju yamutangela phala kudya o xitu ya yama yafidisile mu Kijila kya Mozé, Phetele waditunu—ki lumoxi ngo, maji lutatu! (Ika. 10:​9-16) Maji mukonda dyahi waditunu? O itendelesu yoyo ya ubhe, wayimwene kala ki kyawabhele. Mwene wejidile kya kubhanga o ima mu ukexilu wengi. Se Phetele kyamubhonzele kubelesela o kitendelesu kyatundile kwa anju yayuka, ki kima kya kudiwana se sayi ithangana kitubhonza we kubelesla o itendelesu ya athu akwa ituxi!

16. Sumbala poxolo Phawulu nange wadivwile kwila o itendelesu yamubhele ki yafwamene, maji ihi yabhange? (Ikalakalu 21:​23, 24, 26)

¹⁶ O poxolo Phawulu wexile mukwa ‘kubelesela’ ne mwene kyoso kyatambwile itendelesu yedile kala ki ya unjimu. O Jikidistá exile Jijudé, evwile jimbwembwe ja lungu ni Phawulu, kwila wexile mulonga phala “kuxisa o Kijila kya Mozé,” ni kwila mwene kexile we muxila o Kijila kiki. (Ika. 21:21) Sayi phange yadiyala mwadyakime mu Jeluzaleme, watendelesa Phawulu phala kwambata mayala atatu mu tembulu, ni kudizelesa phala kulondekesa kwila mwene wexile mu kumbidila o Kijila. Maji Phawulu wejidile kwila o Jikidistá ka bhingile dingi kukayela o Kijila kya Mozé. Ku mbandu yamukwa, mwene ka bhangele kima kyayibha. Maji ne kiki, Phawulu wabelesela ni lusolo. “Mu kizuwa kya kayela Phawulu wambata o mayala, yu wa dizelesa kumoxi ni ene.” (Tanga Ikalakalu 21:​23, 24, 26.) O kubelesela kwa Phawulu kwabhangesa o jiphange kukala ni muxima umoxi.— Lom. 14:​19, 21.

17. Ihi iwadilongo ku musoso wa phange Stephanie?

¹⁷ Sayi phange ya muhatu amwixana Stephanie, sayi kizuwa kyamubhonzele kuxikina o kima kyasolele kubhanga o jiphange ala kupholo mu kilunga mu ixi ye. Mwene ni mwadi we asangulukile mu kusidivila mu kibuka kya dimi dyengi. Maji bhenyobho, o Betele yatendelesa kujika o kibuka, anga o dikaza a atumikisa dingi mu kilunga kya dimi dyawu dya uvwalukilu. Phange Stephanie wambe: “Ngaluwalele kyavulu, ngexile mumona kwila mu kilunga kya dimi dyetu dya uvwalukilu ki mwabhindamene kikwatekesu.” Ne kiki, mwene wasolo kukayela o itendelesu. Mwene wixi: “Ithangana kupholo, ngatendela se mukonda  dyahi o kima kyasolele o jiphange kyexile kya unjimu. Jiphange javulu mu kilunga kyetu, ku miji yawu ene ngo amubheza Jihova. Kyenyiki etu twadibhange tu jitata, tu mwiji phala ene, ni kwila twene mu aswinisa. Ngamudilonga o Bibidya ni phange ya muhatu wazozele mu nzumbi. Kindala ngala dingi ni kithangana kya kudilonga ubheka. Ngala ni kitongolwelu kyazele, mukwijiya kwila ngabhange yoso i ngatena phala kubelesela.”

18. Mbote yahi itukatula mu kubelesela?

¹⁸ Etu tutena kudilonga kubelesela. Jezú “wadilongo kutumaka,” ki mukonda dya kukala mu ithangana yambote, maji “bhukaxi ka hadi yatale.” (Jih. 5:8) Kala kyabhiti ni Jezú, mu veji javulu, o ithangana ya ibhidi itulonga kubelesela. Mu kifika, kudimatekenu dya dibhebhu dya COVID-19, kyoso kyatutendelesele kweha kudyongeka mu Ididi ya Ubhezelu ni kuboka inzo ni inzo, o kwila kyakubhonzele kubelesela? Ne kiki, eye wabelesela. O kubelesela kwe phe kwakulange, kwakwatekesa o kilunga kukala ni muxima umoxi, ni kwasangulukisa Jihova. Kindala etwenyoso twala polondo phala kubelesa kabasa kitendelesu kitwanda tambula mu kithangana kya hadi ya dikota. O kubelsela o itendelesu yenyoyo, kwanda bhulula o myenyu yetu!—Jobe 36:11.

19. Mukonda dyahi wamesena kukala muthu ubelesela?

¹⁹ Twadilongo kwila o kubelesela kutubhekela mabesá avulu. Maji tusola kudyanga kubelesela Jihova mukonda twamuzolo, ni kwila twamesena kumusangulukisa. (1 Nz. 5:3) Etu nuka twandatena kufuta Jihova mu mbote yoso yene mutubhanga. (Jisá. 116:12) Maji tutena kumubelesela ni kubelesela we yo a abhana o ungana wa kututumina. Se tubelesela, twanda londekesa kwila tu jinjimu. O jinjimu phe, jisangulukisa o muxima wa Jihova.—Jisa. 27:11.