1. Чьрʹа щара чәтьн ә гӧһдар бьн?

 ГӘЛО ԛә ӧса дьбә кӧ щара тәрʹа чәтьн ә гӧһдар би? Әв йәк бона Даԝьд Пʹадша жи нә һеса бу, ләма жи әԝи Хԝәдерʹа дӧа кьр: «Бь рʹӧһʹәки рʹази [һазьрбуне, ДТʹ] мьн бьнгәһ кә» (Зәбур 51:12). Даԝьд Йаһоԝа һʹәз дькьр. Ле диса жи, бона Даԝьд щара нә һеса бу гӧһ бьдә рʹебәрийе, у әв йәк щара бона мә жи нә һеса йә. Гәло чьрʹа? Йа пешьн, нәгӧһдарибун дәрбази сәр мә һʹәмуйа буйә. Йа дӧда, Мире-щьна тʹьме һәр тьшти дькә, ԝәки әм чʹәʹв бьдьнә ԝи у мьԛабьли Йаһоԝа дәрен (2 Корьнтʹи 11:3). Йа сьсийа, әм нава мәрьвед ӧсада дьжин, «йед кӧ нә гӧрʹа Хԝәдеда» ньн (Әфәси 2:2). Әм гәрәке жь алийе хԝәда һәр тьшти бькьн, ԝәки нә кӧ тʹәне һьмбәри хԝәстьнед хԝәйә гӧнәкʹар шәрʹ бькьн, ле ӧса жи һьмбәри һʹӧкӧме Мире-щьна у дьнйа ԝи. Ӧса жи, әм гәрәке гӧһ бьдьнә Йаһоԝа у ԝан мәрьва, кʹижанарʹа Әԝи һʹӧкӧм дайә.

2. Чь те һʹәсабе гӧһдар бьн? (Аԛуб 3:17)

² Бьхунә Аԛуб 3:17. Аԛуб жь бина бәр Хԝәде ньвиси, ԝәки мәрьвед билан һазьр ьн гӧһдар бьн. Бьфькьрә әв йәк чь те һʹәсабе. Әм гәрәке жь дьл һазьр бьн гӧһ бьдьнә ԝан мәрьва, кʹижанарʹа Йаһоԝа һʹӧкӧм дайә. Һәмьки, Йаһоԝа нахԝазә ԝәки әм гӧһ бьдьнә ԝи мәрьви, йе кӧ жь мә дәʹԝа дькә, ԝәки әм ԛанунед Ԝи бьтʹәрьбиньн (Кʹаред Шандийа 4:18-20).

3. Йаһоԝа чьрʹа дьхԝазә ԝәки әм гӧһ бьдьнә кәсед хԝәйиһʹӧкӧм?

³ Дьбәкә мәрʹа дьһа һеса йә гӧһ бьдьнә Йаһоԝа, нә кӧ мәрьва. Гәло чьрʹа? Чьмки Йаһоԝа тʹьме рʹебәрийа беԛьсур дьдә мә (Зәбур 19:7). Ле мәрьвед хԝәйиһʹӧкӧм ԛьсурдар ьн. Диса жи, Баве мәйи әʹзмана һʹӧкӧм у щабдари дайә де-бава, сәрԝеред дәԝләте у рʹуспийед щьвате (Мәтʹәлок 6:20; 1 Тʹесалоники 5:12; 1 Пәтрус 2:13, 14). Гава әм гӧһ  дьдьнә ԝан, бь ве йәке әм гӧһ дьдьнә Йаһоԝа. Һәрге щара мәрʹа һеса нибә жи, әм ча дькарьн гӧһ бьдьнә рʹебәрийа мәрьвед хԝәйиһʹӧкӧм?

4. Чьрʹа гәләк зарʹ гӧһ надьнә де-баве хԝә?

⁴ Иро дор-бәре щаһьла гәләк щаһьлед ӧса һәнә, йед кӧ «нә гӧрʹа де-бавада» ньн (2 Тимотʹейо 3:1, 2). Гәло чьрʹа? Әԝана дьфькьрьн, ԝәки де-бав тьштед кӧ хԝәха накьн, жь ԝана дәʹԝа дькьн. Һьнәк жи дьфькьрьн кӧ ширәтед де-баве ԝан ида керһати ниньн, чьмки дьнйа һатийә гӧһастьне, йан жи дьфькьрьн кӧ ширәтед ԝана гәләк сәрт ьн. Һәрге тӧ щаһьл и, гәло тӧ жи ӧса дьфькьри? Дьԛәԝьмә щаһьларʹа һеса нинә гӧһ бьдьнә ве тʹәмийа Йаһоԝа: «Чаԝа баԝәрмәндед Хӧдан гӧрʹа де у баве хԝәда бьн, чьмки әв йәк рʹаст ә» (Әфәси 6:1). Ле чь дькарә али тә бькә, ԝәки гӧһ бьди де-баве хԝә?

5. Чьрʹа Иса мәсәләкә баш ә ве йәкеда, кӧ ча гӧһ бьдьнә де-баве хԝә? (Луԛа 2:46-52).

⁵ Тӧ дькари жь Иса, демәк жь мәсәла һәри баш, дәрһәԛа гӧһдарибуне һин би (1 Пәтрус 2:21-24). Әԝ йәки беԛьсур бу, ле де-баве ԝи мәрьвнә ԛьсурдар бун. Щара ԝана Иса нәрʹаст фәʹм дькьр, йан жи шаши бәрʹдьдан, ле диса жи әԝи ԛәдьре ԝан дьгьрт (Дәркʹәтьн 20:12). Ԝәрә әм дина хԝә бьдьнә ве дәрәще, кӧ чь ԛәԝьми гава Иса 12 сали бу (Бьхунә Луԛа 2:46-52). Чахе де-баве ԝи паши щәжьне, жь Оршәлиме вәдьгәрʹийанә мал, ԝана дина хԝә нәдайе кӧ Иса тʹәви ԝан нибу. Әԝана борщдар бун кӧ дина хԝә бьдьне, һәла һʹәму зарʹед ԝан тʹәви ԝан ьн, йан на. Чахе Усьв у Мәрйәме Иса дитьн, Мәрйәме Иса нәһәԛ кьр, кӧ рʹуйе ԝида әԝана тьрсийан у бәр хԝә кʹәтьн! Иса дькарьбу ԝанрʹа бьгота, кӧ әԝана нәһәԛ ьн. Дәԝса ве йәке, әԝи рʹьһʹәт у бь ԛәдьр щаба ԝан да, «ле ԝана фәʹм нәкьр әԝи чь гот», диса жи Иса «гӧрʹа ԝанда бу».

6-7. Чь дькарә али щаһьла бькә, ԝәки гӧһ бьдьнә де-баве хԝә?

⁶ Щаһьлно, гава де-баве ԝә шашийа дькьн, йан жи ԝә фәʹм накьн, гәло ԝәрʹа чәтьн ә гӧһ бьдьнә ԝан? Һәрге чәтьн ә, чь дькарә али ԝә бькә? Йа пешьн, бьфькьрьн кӧ Йаһоԝа чь сәр хԝә тʹәхмин дькә, гава һун гӧрʹа де-баве хԝә дькьн. Кʹьтеба Пироз дьбежә, кӧ әв йәк «ль Хӧдан хԝәш те» (Колоси 3:20). Йаһоԝа занә кӧ де-баве ԝә щара ԝә фәʹм накьн, йан жи ԛәйдед ӧса датиньн, кӧ ԝәрʹа һеса нинә гӧһ бьдьнә ԝан ԛәйда. Ле диса жи, гава һун гӧһ дьдьнә де-баве хԝә, һун дьле Хԝәде ша дькьн.

⁷ Йа дӧда, бьфькьрьн кӧ де-баве ԝә чь сәр хԝә тʹәхмин дькьн, гава һун гӧрʹа ԝан дькьн. Чахе һун гӧһ дьдьнә ԝан, һун дьле ԝан ша дькьн у әԝана дьһа зедә итʹбарийа хԝә ԝә тиньн (Мәтʹәлок 23:22-25). Ӧса жи, һуне дьһа незики һәвдӧ бьн. Бьре мә бь наве Александьр, йе кӧ жь Белжике йә, дьбежә: «Чахе мьн дәстпекьр дьһа зедә гӧһ бьдьмә де-баве хԝә, әм һе незики һәв бун у дьһа бәхтәԝар бун». b Йа сьсийа, бьфькьрьн кӧ гӧһдарибуна ԝә чаԝа ахьрийеда жи ԝе кʹаре ԝәрʹа бинә. Пауло, йе кӧ Бразилйайеда дьжи, дьбежә: «Әз һин бумә гӧһ бьдьмә де-баве хԝә, ләма жи иро мьнрʹа дьһа һеса йә гӧһ бьдьмә Йаһоԝа у кәсед хԝәйиһʹӧкӧм». Хәбәра Хԝәде мәʹникә фәрз дьдә, кӧ чьрʹа һун гәрәке гӧһ бьдьнә де-баве хԝә. Әԝ ӧса дьбежә: «Ԝәки чәрха тә рʹаст бә у сәр әʹрде әʹмьре тә дьреж бә» (Әфәси 6:2, 3).

8. Гәләк щаһьл чьрʹа гӧһ дьдьнә де-баве хԝә?

 ⁸ Гәләк щаһьла тедәрхьстийә, кӧ гӧһдарибун гәләк керһати йә. Луиза, йа кӧ Бразилйайеда дьжи, пешийе фәʹм нәдькьр кӧ чьрʹа де-баве ԝе изьн нәдьдан, ԝәки сәр ԝәхтәки тʹела ԝе һәбә. Әԝе заньбу кӧ һʹәчʹи зәʹф щаһьлед ԛаси ԝе, тʹеле дьдьнә хәбате. Ле паше әԝе фәʹм кьр, кӧ де-баве ԝе дьхԝазьн ԝе бьпʹарезьн. Ньһа әԝ занә кӧ гава әԝ гӧрʹа де-баве хԝә дькә, әв йәк нә кӧ ле синор дькә, ле кʹаре жерʹа тинә. Хушкәкә щаһьлрʹа, бь наве Ельзабет, йа кӧ Америкайеда дьжи, һʹәта ньһа щара чәтьн ә гӧрʹа де-баве хԝә бькә. Әԝ дьбежә: «Гава әз бь тʹәмами фәʹм накьм, кӧ де-баве мьн чьрʹа ԛәйда датиньн, әз тиньм бира хԝә кӧ әв ԛәйдә бәре чаԝа мьн хԝәй дькьрьн». Моника, йа кӧ Әрмәнистанеда дьжи, дьбежә кӧ гава әԝе гӧһ дьда де-баве хԝә, һәр тьшт тʹьме баш бу.

9. Гәләк мәрьв дәрһәԛа ԛәдандьна ԛануна чь дьфькьрьн?

⁹ Гәләк мәрьв ԛәбул дькьн, кӧ әм һʹәԝще сәрԝера нә у әм гәрәке һәма гӧрʹа һьнә ԛанунед ԝан бькьн (Рʹомайи 13:1). Ле дьбәкә әԝ мәрьв гӧрʹа ван ԛануна нәкьн, тʹәви кʹижана әԝана рʹази ниньн, йан жи кʹижан кӧ әԝана һʹәсаб дькьн, кӧ бь һәԛи ниньн. Мәсәлә ԝәрә әм дина хԝә бьдьнә хәрщдайине. Ԝәлатәки Әԝропайеда гәләк мәрьв һʹәсаб дькьн, кӧ «һәрге тӧ дьфькьри ԝәки хәрщдайин бь һәԛи нинә, тӧйе рʹаст бьки һәрге ви хәрщи нәди». Ләма жи, әʹщебмайи нинә, ԝәки бажарванед ԝи ԝәлати нә һʹәму хәрща дьдьн, кʹижан кӧ сәрԝеред дәԝләте жь ԝан дәʹԝа дькьн.

10. Чьрʹа әм гӧрʹа ԝан ԛануна жи дькьн, кʹижан кӧ дьле мә хԝәш найен?

¹⁰ Кʹьтеба Пироз дьбежә, ԝәки сәрԝеред мәрьва дьбьн сәбәбед кӧл-дәрда, әԝана бьн контрола Мире-щьнада ньн у ԝе дәмәкә незикда бенә ԛьрʹкьрьне (Зәбур 110:5, 6; Ԝаиз 8:9; Луԛа 4:5, 6). Ӧса жи, ль гора Хәбәра Хԝәде, «кʹи кӧ бәр һʹӧкӧмәтийе рʹадьбә, әԝ бәр әʹмьре Хԝәде рʹадьбә». Йаһоԝа изьне дьдә сәрԝеред дәԝләте, ԝәки сәрԝертийе бькьн, сәва кӧ һәр тьшт бь тʹәрбәти бә, у әԝ дьхԝазә кӧ әм гӧрʹа ԝан бькьн. Ләма жи, әм гәрәке «кʹерʹа чь дькʹәвә» бьдьн, демәк хәрщ, ԛәдьр у гӧһдарибун (Рʹомайи 13:1-7). Дьԛәԝьмә әм ԛанунәке нә һеса һʹәсаб кьн у бьфькьрьн кӧ әв бь һәԛи нәһатийә дайине у ԝе гьран сәр мә рʹуне. Ле диса жи, һʹәта кӧ әԝ ԛанун мьԛабьли ԛанунед Йаһоԝа нинә, әм гӧһ дьдьне, чьмки Йаһоԝа ве йәке жь мә дьхԝазә (Кʹаред Шандийа 5:29).

11-12. Ль гора Луԛа 2:1-6, сәва кӧ Усьв у Мәрйәм гӧһ бьдьнә ԛануне, ԝана чь кьр у ахьри чь бу? (Бьньһерʹә ӧса жи шькьл.)

¹¹ Әм дькарьн жь мәсәла Усьв у Мәрйәме һин бьн. Ԝанрʹа чьԛас чәтьн бу жи,  йәкә әԝана һазьр бун гӧһ бьдьнә ԛанунед дәԝләте (Бьхунә Луԛа 2:1-6). Гава Мәрйәм һʹәмләбуна хԝәда незики нәһ мәһа бу, әԝ у Усьв рʹасти щерʹьбандьнәке һатьн. Аԝгусто, йе кӧ сәрԝере Империйа Рʹоме бу, ԛанун дәрхьст, ԝәки һәр кәс һәрʹә бажаре хԝә кӧ бе навньвисаре. Бона ве йәке, Усьв у Мәрйәм кʹәтьнә рʹекә дьреж у чунә Бәйтләһʹме, кʹижан кӧ ԝәкә 150 километр дур бу. Әв рʹийа дур у дьреж, илаһи бона Мәрйәме гәләк зәʹмәт бу. Дьԛәԝьмә ԝана бона сьһʹәт-ԛәԝата Мәрйәме у зарʹа нәбуйи хәм дькьрьн. Һәрге рʹеда санщу ле бьгьрта, гәло ԝана ԝе чь бькьра? Әԝана гәрәке ве зарʹе бьбуна хԝәйи, чьмки әԝ Мәсиһе создайи бу, йе кӧ ԝе жь Мәрйәме бьһата буйине. Гәло ԝана әв йәк кьрә мәʹни, сәва кӧ гӧһ нәдьн сәрԝер?

¹² Чьԛас жи хәмед Усьв у Мәрйәме һәбун, ԝана диса жи гӧрʹа ве ԛануне кьр. Йаһоԝа гӧһдарибуна ԝан кʹәрәм кьр. Мәрйәм сах-сьламәт гьһиштә Бәйтләһʹме, әԝе кӧрʹе хԝә хер-сьламәт ани, у бь сайа ве йәке пʹехәмбәртийа Кʹьтеба Пироз һатә сери! (Миха 5:2)

13. Гӧһдарибуна мә ча сәр хушк-бьред мә һʹӧкӧм дькә?

¹³ Гава әм гӧрʹа сәрԝера дькьн, әв йәк һьм мәрʹа һьм жи кәсед дьнрʹа кʹаре тинә. Гәло чаԝа? Мәрьвед кӧ гӧһ надьн ԛануна, тенә щәзакьрьне, ле әм мәрьвнә гӧһдар ьн, ләма жи жь ве йәке хԝәйкьри нә (Рʹомайи 13:4). Чахе әм гӧрʹа сәрԝеред дәԝләте дькьн, мәрьвед хԝәйиһʹӧкӧм дьбежьн, кӧ Шәʹдед Йаһоԝа мәрьвнә баш ьн. Мәсәлә, гәләк сал пешда, ль Нижәрйайе, әскәр кʹәтьнә Ода Щьвате, чахе щьват дәрбаз дьбу. Ԝана мәрьвед ӧса дьгәрʹийа, йед кӧ нәдьхԝәстьн хәрщед дәԝләте бьдьн. Ле сәрәскәр әскәрарʹа гот, кӧ жь ԝедәре дәрен у ӧса жи гот: «Шәʹдед Йаһоԝа тʹьме хәрщед дәԝләте дьдьн». Бәле, һәр щар гава тӧ гӧһ дьди ԛануне, тӧ дькари наве хьзмәткʹаред Йаһоԝа бьльнд ки. Дәрәщәкә чәтьнда, әв йәк дькарә хушк-бьред мә бьпʹарезә (Мәтта 5:16).

14. Чь али хушка мә Щоана кьр, ԝәки гӧһ бьдә сәрԝеред дәԝләте?

 ¹⁴ Ле диса жи, щара һеса нинә кӧ әм гӧһ бьдьн сәрԝера. Хушка мә Щоана, йа кӧ жь Америкайе йә, ӧса дьбежә: «Һьнә нәфәред малбәта мьн, жь алийе сәрԝеред дәԝләте рʹасти нәһәԛийе һатьн. Ләма жи мьнрʹа чәтьн бу ԛәдьре сәрԝера бьгьрьм». Ле Щоана сәр хԝә дьхәбьти, ԝәки фькьред хԝә бьгӧһезә. Пешийе, сәва кӧ дьле ԝеда нәфрʹәти һьндава сәрԝеред дәԝләте пешда нәйе, әԝе сафи кьр ԝан нучәйа интернетеда нәхунә, йед кӧ дәрһәԛа сәрԝеред дәԝләте әʹламәтийед нәбаш бәла дькьрьн (Мәтʹәлок 20:3). Йа дӧда, дәԝса кӧ жь Йаһоԝа лава кә, ԝәки сәрԝере дәԝләте бе гӧһастьне, әԝе дӧа дькьр, кӧ Йаһоԝа али ԝе бькә дьһа зедә итʹбарийа хԝә Ԝи бинә (Зәбур 9:9, 10). Йа сьсийа, әԝе әʹдәбйәтед мәда готаред дәрһәԛа тʹәвнәбуйине хԝәнд (Йуһʹәнна 17:16). Щоана дьбежә, кӧ ньһа «дьле ԝе рʹьһʹәт ә», чьмки әԝ гӧрʹа сәрԝеред дәԝләте дькә у ԛәдьре ԝан дьгьрә.

15. Чьрʹа щара мәрʹа чәтьн ә рʹебәрийа тʹәшкиләта Йаһоԝа ԛәбул кьн?

¹⁵ Йаһоԝа мәрʹа дьбежә: «Гӧһдарийа рʹебәред хԝә бькьн» (Ибрани 13:17). Рʹебәре мә Иса беԛьсур ә, ле әԝ бьред, кʹижана кӧ әԝ дьдә хәбате ԝәки рʹебәрийа мә бькьн, мәрьвнә ԛьсурдар ьн. Дьбәкә щара мәрʹа чәтьн ә гӧһ бьдьнә ԝан, илаһи һәрге әԝана нә ль гора дьле мә тьштәки жь мә дьхԝазьн. Щарәке, Пәтрусе шанди жь мәләке Хԝәде рʹебәри станд, кʹижан кӧ пешийе әԝи нәхԝәст бинә сери. Әԝи гәрәке гоште һʹәйԝанед кӧ ль гора Ԛануна Муса ԛәдәхәкьри бун, бьхԝара. Пәтрус әв рʹебәри нә тʹәне щарәке, ле се щара инкʹар кьр! (Кʹаред Шандийа 10:9-16) Гәло чьрʹа? Чьмки әв рʹебәрийа тʹәзә, бона ԝи тьштәки нәтʹәбийәти бу. Тʹәмамийа әʹмьре хԝәда, әԝи тьштәки ӧса ԛә нәкьрьбу. Һәрге бона Пәтрус гәләк чәтьн бу рʹебәрийа мәләкәки беԛьсур ԛәбул кә, дә бьдьнә һʹәсабе хԝә, кӧ бона мә чьԛас чәтьн ә гӧрʹа рʹебәрийа бьред щабдар бькьн, йед кӧ ԛьсурдар ьн!

16. Паԝлосе шанди ча гӧһ да рʹебәрийа, кӧ бона ԝи нә тʹәбийәти бу? (Кʹаред Шандийа 21:23, 24, 26)

¹⁶ Паԝлосе шанди һазьр бу ԝи чахи жи гӧһ бьдә рʹебәрийе, гава әԝ йәк бона ԝи нә тʹәбийәти бу. Мәсиһийед Щьһу бьһистьбун, кӧ Паԝлос һӧрмәте надә Муса пʹехәмбәр у мәрьва һелан дькә, ԝәки пьшта хԝә бьдьнә Ԛануна Муса (Кʹаред Шандийа 21:21). Оршәлимеда, меред әʹмьрда мәзьн кӧ Мәсиһи бун, Паԝлосрʹа готьн, ԝәки әԝ тʹәви чар мера һәрʹә пʹарьстгәһе у ԝедәре хԝә ль гора Ԛануне паԛьж кә. Бь ве йәке Паԝлос ԝе бьда кʹьфше, ԝәки әԝ Ԛануне ԛәбул дькә. Ле әԝи заньбу кӧ Мәсиһи ида бьн һʹӧкӧме Ԛануна Мусада ниньн. У әԝи тʹӧ шаши нәкьрьбу. Ле диса жи, Паԝлос дәрберʹа гав авит. Әԝи «әԝ мәри рʹожа дьне һьлдан, тʹәви ԝан паԛьж бу» (Бьхунә Кʹаред Шандийа 21:23, 24, 26). Паԝлос гӧһ да рʹебәрийе у бь ве йәке йәкти хԝәй кьр (Рʹомайи 14:19, 21).

17. Тӧ жь сәрһатийа Стефани чь һин дьби?

¹⁷ Хушкәкерʹа бь наве Стефани, чәтьн бу сафикьрьнед бьред щабдар ԛәбул кә. Әԝе тʹәви малхе хԝә бь шабуне кʹомәкә сәр зьмане хәрибда хьзмәт дькьр. Паше, филиале әԝ кʹом бәла кьр, у әԝана щьватәкеда һатьнә кʹьфшкьрьне, йа кӧ сәр зьмане ԝан бу. Стефани дьбежә: «Әз гәләк бәр хԝә кʹәтьм. Әз ԛайил нибум ԝәки сәр зьмане мә һʹәԝщәтикә мәзьн һәбу». Ле диса жи, хушка мә сафи кьр, ԝәки пьштгьрийа ве рʹебәрийа тʹәзә бькә.  Әԝ дьбежә: «Ԝәʹдә шунда мьн фәʹм кьр, ԝәки әԝ сафикьрьнәкә билан бу. Щьвата тʹәзәда һәбун һьнә хушк-бьред ӧса, йед кӧ жь малбәта хԝә тʹәне әԝана нава рʹастийеда бун, у әм бона ԝан бунә де-баве рʹӧһʹани. Мьн дәстпекьр тʹәви хушкәке һинбуне дәрбаз кьм, кʹижан кӧ диса вәгәрʹийа щьвате. Ньһа ида һе зедә ԝәʹде мьн һәйә бона лекʹолина шәхси. У исафа мьн рʹьһʹәт ә, чьмки мьн һәр тьшт кьр, сәва кӧ гӧһ бьдьмә рʹебәрийе».

18. Гӧһдарикьрьн чь кʹаре мәрʹа тинә?

¹⁸ Әм дькарьн һин бьн ԝәки гӧһдар бьн. Иса «бь ԝан щәфайед хԝә гӧһдарийе һин бу» (Ибрани 5:8). Мина Иса, әм жи гәләк щар дәрәщед чәтьнда һини гӧһдарийе дьбьн. Мәсәлә, дәстпека пандәмийа коронавируседа, гава щьватед мә Одед Щьватада у хьзмәтийа мал бь мал һатьнә сәкьнандьне, гәло тәрʹа чәтьн бу ве сафикьрьне ԛәбул ки? Бәле, әв йәк кӧ тә гӧһ да ве рʹебәрийе, тә чаԝа хԝә, ӧса жи кәсед дьн пʹараст, пьштгьрийа йәктийа щьвате кьр у дьле Йаһоԝа ша кьр. Бәле, ньһа ида һәр кәс жь мә һе баш һазьр ә гӧһ бьдә һʹәму рʹебәрийа, кʹижана кӧ әме ԝәʹде тәнгасийа мәзьн бьстиньн. Һәрге әм гӧһ бьдьнә ԝан рʹебәрийа, әме хьлаз бьн! (Ибо 36:11)

19. Тӧ чьрʹа дьхԝази гӧһдар би?

¹⁹ Ве готареда әм пеһʹәсийан, ԝәки гӧһдарибун мәрʹа кʹарәкә мәзьн тинә. Ле әм гӧһ дьдьнә Йаһоԝа, чьмки әм Ԝи һʹәз дькьн у дьхԝазьн ԝәки Әԝ жь мә рʹази бә (1 Йуһʹәнна 5:3). Йаһоԝа бона мә һʹәмуйа, гәләк тьштед ԛәнщ кьрийә у әме тʹӧ щар нькарьбьн бьн ԛәнщийа Ԝи дәрен (Зәбур 116:12). Ле әм дькарьн гӧһ бьдьнә Ԝи у кәсед хԝәйиһʹӧкӧм. Һәрге әм ӧса бькьн, әме биланийе бьдьнә кʹьфше. У әԝ мәрьве кӧ биланийе дьдә кʹьфше, дьле Йаһоԝа ша дькә (Мәтʹәлок 27:11).