ບົດຄວາມສຶກສາທີ 42
ເຈົ້າ “ພ້ອມຈະເຊື່ອຟັງ” ບໍ?
“ສະຕິປັນຍາຈາກທາງເທິງນັ້ນ . . . ແມ່ນ . . . ພ້ອມຈະເຊື່ອຟັງ.”—ຢກບ. 3:17
ເພງ 101 ເຮັດວຽກຮ່ວມກັນຢ່າງເປັນນ້ຳໜຶ່ງໃຈດຽວ
ໃຈຄວາມສຳຄັນ a
1. ເປັນຫຍັງຈຶ່ງເປັນເລື່ອງຍາກທີ່ເຮົາຈະເຊື່ອຟັງ?
ບາງເທື່ອເຈົ້າຮູ້ສຶກວ່າຍາກບໍທີ່ຈະເຊື່ອຟັງ? ກະສັດດາວິດກໍຮູ້ສຶກແບບນັ້ນ ລາວຈຶ່ງອະທິດຖານເຖິງພະເຈົ້າວ່າ: “ຂໍພະອົງຊ່ວຍກະຕຸ້ນລູກໃຫ້ເຕັມໃຈເຊື່ອຟັງພະອົງ.” (ເພງ. 51:12, ລ.ມ) ດາວິດຮັກພະເຢໂຫວາ ແຕ່ບາງເທື່ອລາວກໍຮູ້ສຶກວ່າຍາກທີ່ຈະເຊື່ອຟັງເພິ່ນ. ເຮົາກໍຄືກັນ. ຍ້ອນຫຍັງ? ເຫດຜົນທີ 1 ເຮົາມີແນວໂນ້ມທີ່ຈະເປັນຄົນບໍ່ເຊື່ອຟັງມາຕັ້ງແຕ່ເກີດ. ເຫດຜົນທີ 2 ຊາຕານພະຍາຍາມເຮັດໃຫ້ເຮົາເປັນຄົນຂືນອຳນາດພະເຢໂຫວາຄືກັບມັນ. (2ກຣ. 11:3) ເຫດຜົນທີ 3 ເຮົາຢູ່ໃນໂລກທີ່ຄົນມີນ້ຳໃຈມັກຂືນອຳນາດ. “ນ້ຳໃຈນີ້ . . . ກຳລັງມີອິດທິພົນຕໍ່ຄົນທີ່ບໍ່ເຊື່ອຟັງ.” (ອຟຊ. 2:2) ດັ່ງນັ້ນ ເຮົາຕ້ອງອອກຄວາມພະຍາຍາມຫຼາຍແທ້ໆທີ່ຈະຕໍ່ສູ້ກັບຄວາມບໍ່ສົມບູນແບບຂອງໂຕເຮົາເອງ ຕໍ່ສູ້ກັບຊາຕານແລະໂລກນີ້ ເພື່ອຈະເຊື່ອຟັງພະເຢໂຫວາແລະຜູ້ທີ່ເພິ່ນຍອມໃຫ້ມີອຳນາດ.
2. ການ “ພ້ອມຈະເຊື່ອຟັງ” ໝາຍຄວາມວ່າແນວໃດ? (ຢາໂກໂບ 3:17)
2 ອ່ານຢາໂກໂບ 3:17. ຢາໂກໂບໄດ້ຮັບການດົນໃຈໃຫ້ຂຽນວ່າ ຄົນສະຫຼາດ “ພ້ອມຈະເຊື່ອຟັງ.” ຄຳເວົ້ານີ້ໝາຍຄວາມວ່າແນວໃດ? ໝາຍຄວາມວ່າເຮົາຄວນພ້ອມແລະເຕັມໃຈເຊື່ອຟັງຜູ້ທີ່ພະເຢໂຫວາໃຫ້ອຳນາດໃນລະດັບໜຶ່ງ. ແນ່ນອນວ່າພະເຢໂຫວາບໍ່ໄດ້ຄາດໝາຍໃຫ້ເຮົາເຊື່ອຟັງຜູ້ທີ່ບອກເຮົາບໍ່ໃຫ້ເຮັດຕາມຄຳສັ່ງຂອງເພິ່ນ.—ກຈກ. 4:18-20
3. ເມື່ອເຮົາເຊື່ອຟັງຜູ້ທີ່ມີສິດອຳນາດ ເປັນຫຍັງຈຶ່ງສຳຄັນສຳລັບພະເຢໂຫວາ?
3 ເຮົາອາດຮູ້ສຶກວ່າການເຊື່ອຟັງພະເຢໂຫວາງ່າຍກວ່າການເຊື່ອຟັງມະນຸດ ຍ້ອນການຊີ້ນຳຂອງພະເຢໂຫວາດີສະເໝີ. (ເພງ. 19:7) ເຖິງວ່າມະນຸດທີ່ມີສິດອຳນາດບໍ່ສົມບູນແບບ ແຕ່ພະເຢໂຫວາກໍໃຫ້ອຳນາດໃນລະດັບໜຶ່ງກັບພໍ່ແມ່ ອຳນາດການປົກຄອງ ແລະຜູ້ດູແລ. (ສຸພາ. 6:20; 1ທຊ. 5:12; 1ປຕ. 2:13, 14) ເມື່ອເຮົາເຊື່ອຟັງເຂົາເຈົ້າກໍສ່ຳກັບວ່າເຮົາເຊື່ອຟັງພະເຢໂຫວາ. ໃຫ້ເຮົາມາເບິ່ງວິທີທີ່ເຮົາຈະເຊື່ອຟັງຜູ້ທີ່ພະເຢໂຫວາໃຫ້ສິດອຳນາດ ເຖິງວ່າບາງເທື່ອເຮົາອາດຮູ້ສຶກບໍ່ເຫັນດີກັບການຊີ້ນຳຂອງເຂົາເຈົ້າ ຫຼືເຮົາອາດຮູ້ສຶກວ່າບໍ່ຢາກເຮັດຕາມການຊີ້ນຳນັ້ນ.
ເຊື່ອຟັງພໍ່ແມ່
4. ເປັນຫຍັງເດັກນ້ອຍກັບໄວລຸ້ນຈຶ່ງບໍ່ເຊື່ອຟັງພໍ່ແມ່?
4 ເດັກນ້ອຍກັບໄວລຸ້ນຕ້ອງຢູ່ກັບຄົນລຸ້ນດຽວກັນທີ່ “ບໍ່ເຊື່ອຟັງພໍ່ແມ່.” (2ຕມ. 3:1, 2) ເປັນຫຍັງຫຼາຍຄົນຈຶ່ງບໍ່ເຊື່ອຟັງ? ບາງຄົນຮູ້ສຶກວ່າພໍ່ແມ່ບໍ່ໄດ້ເຮັດຕາມທີ່ສອນ. ເຂົາເຈົ້າຄາດໝາຍໃຫ້ລູກເຮັດຕາມທີ່ເຂົາເຈົ້າສອນ ແຕ່ເຂົາເຈົ້າເອງພັດບໍ່ເຮັດແນວນັ້ນ. ສ່ວນຄົນອື່ນໆຮູ້ສຶກວ່າຄຳແນະນຳຂອງພໍ່ແມ່ຫຼ້າສະໄໝ ໃຊ້ບໍ່ໄດ້ ຫຼືເຄັ່ງຄັດໂພດ. ຖ້າເຈົ້າເປັນເດັກນ້ອຍຫຼືໄວລຸ້ນ ເຈົ້າເຄີຍຮູ້ສຶກແບບນັ້ນບໍ? ມັນອາດຍາກທີ່ຈະເຮັດຕາມຄຳສັ່ງຂອງພະເຢໂຫວາທີ່ “ໃຫ້ເຊື່ອຟັງພໍ່ແມ່ຕາມທີ່ພະເຈົ້າຢາກໃຫ້ເຮັດ ເພາະນັ້ນເປັນສິ່ງທີ່ຖືກຕ້ອງໃນສາຍຕາພະອົງ.” (ອຟຊ. 6:1) ສິ່ງໃດຈະຊ່ວຍເຈົ້າໃຫ້ເຮັດຕາມຄຳສັ່ງນີ້ໄດ້?
5. ຕາມລູກາ 2:46-52 ເປັນຫຍັງພະເຢຊູຈຶ່ງເປັນຕົວຢ່າງທີ່ດີໃນເລື່ອງການເຊື່ອຟັງພໍ່ແມ່?
5 ເຈົ້າສາມາດຮຽນຮູ້ທີ່ຈະເຊື່ອຟັງຈາກຕົວຢ່າງຂອງພະເຢຊູ ເຊິ່ງເປັນຕົວຢ່າງທີ່ດີທີ່ສຸດ. (1ປຕ. 2:21-24) ເພິ່ນເປັນຄົນສົມບູນແບບ ແຕ່ພໍ່ແມ່ຂອງເພິ່ນບໍ່ສົມບູນແບບ. ເຖິງວ່າເປັນແນວນັ້ນ ພະເຢຊູກໍໃຫ້ກຽດເຂົາເຈົ້າເມື່ອບາງເທື່ອເຂົາເຈົ້າເຮັດຜິດແລະເຂົ້າໃຈເພິ່ນຜິດ. (ອພຍ. 20:12) ໃຫ້ເບິ່ງສິ່ງທີ່ເກີດຂຶ້ນຕອນພະເຢຊູອາຍຸ 12 ປີ. (ອ່ານລູກາ 2:46-52) ພະເຢຊູໄປສະຫຼອງເທດສະການຢູ່ເມືອງເຢຣູຊາເລັມກັບພໍ່ແມ່. ແຕ່ຕອນທີ່ເດີນທາງກັບເມືອເຮືອນ ເຂົາເຈົ້າບໍ່ໄດ້ສັງເກດວ່າພະເຢຊູບໍ່ໄດ້ມານຳ. ໂຢເຊັບກັບມາຣີຄວນກວດເບິ່ງວ່າລູກທຸກຄົນຢູ່ນຳເຂົາເຈົ້າ. ເມື່ອໂຢເຊັບກັບມາຣີຊອກພະເຢຊູເຫັນແລ້ວ ມາຣີກໍເວົ້າໃຫ້ພະເຢຊູວ່າເຮັດໃຫ້ເຂົາເຈົ້າວຸ່ນວາຍ. ພະເຢຊູອາດເວົ້າຄືນກໍໄດ້ວ່າມາຣີເວົ້າແບບນັ້ນບໍ່ຖືກ. ແທນທີ່ຈະເຮັດແບບນັ້ນ ພະເຢຊູຕອບພໍ່ແມ່ສັ້ນໆດ້ວຍຄວາມນັບຖື. ແຕ່ໂຢເຊັບກັບມາຣີ “ບໍ່ເຂົ້າໃຈວ່າເພິ່ນເວົ້າເລື່ອງຫຍັງ.” ເຖິງຈະເປັນແນວນັ້ນ ພະເຢຊູກໍ “ເຊື່ອຟັງພວກເຂົາສະເໝີ.”
6-7. ສິ່ງໃດຈະຊ່ວຍເດັກນ້ອຍກັບໄວລຸ້ນໃຫ້ເຊື່ອຟັງພໍ່ແມ່?
6 ເດັກນ້ອຍແລະໄວລຸ້ນ ເຈົ້າເຄີຍຮູ້ສຶກວ່າຍາກບໍທີ່ຈະເຊື່ອຟັງພໍ່ແມ່ເມື່ອເຂົາເຈົ້າເຮັດຜິດຫຼືເຂົ້າໃຈເຈົ້າຜິດ? ຖ້າເປັນແນວນັ້ນ ສິ່ງໃດຈະຊ່ວຍໄດ້? ສິ່ງທຳອິດໃຫ້ຄິດເບິ່ງວ່າພະເຢໂຫວາຮູ້ສຶກແນວໃດ. ຄຳພີໄບເບິນບອກວ່າ: “ຄົນທີ່ເປັນລູກ ໃຫ້ເຊື່ອຟັງພໍ່ແມ່ຕາມທີ່ພະເຈົ້າຢາກໃຫ້ເຮັດ.” (ອຟຊ. 6:1) ພະເຢໂຫວາຮູ້ວ່າບາງເທື່ອພໍ່ແມ່ບໍ່ເຂົ້າໃຈເຈົ້າ ຫຼືບາງເທື່ອກໍຕັ້ງກົດຍາກໂພດທີ່ຈະເຮັດຕາມ. ແຕ່ຖ້າເຈົ້າເລືອກທີ່ຈະເຊື່ອຟັງພໍ່ແມ່ ເຈົ້າກໍເຮັດໃຫ້ພະເຢໂຫວາມີຄວາມສຸກ.
7 ສິ່ງທີ 2 ໃຫ້ຄິດເຖິງຄວາມຮູ້ສຶກຂອງພໍ່ແມ່. ເມື່ອເຈົ້າເຊື່ອຟັງພໍ່ແມ່ ເຈົ້າກໍເຮັດໃຫ້ພວກເພິ່ນມີຄວາມສຸກແລະພວກເພິ່ນຈະໄວ້ໃຈເຈົ້າຫຼາຍຂຶ້ນອີກ. (ສຸພາ. 23:22-25) ເຈົ້າຈະໃກ້ຊິດກັບພໍ່ແມ່ຫຼາຍຂຶ້ນຄືກັນ. ພີ່ນ້ອງຊາຍທີ່ຊື່ອາເລັກຊັນເດີຈາກແບນຊິກເວົ້າວ່າ: “ເມື່ອຂ້ອຍເລີ່ມເຮັດໃນສິ່ງທີ່ພໍ່ແມ່ຂໍໃຫ້ເຮັດ ພວກເຮົາກໍໃກ້ຊິດກັນຫຼາຍຂຶ້ນແລະມີຄວາມສຸກຫຼາຍຂຶ້ນຄືກັນ.” b ສິ່ງທີ 3 ໃຫ້ຄິດເບິ່ງວ່າຖ້າເຈົ້າເຊື່ອຟັງພໍ່ແມ່ໃນຕອນນີ້ ມັນຈະເປັນປະໂຫຍດສຳລັບເຈົ້າແນວໃດໃນອະນາຄົດ. ເປົາໂລທີ່ຢູ່ເບຣຊິນເວົ້າວ່າ: “ການຮຽນຮູ້ທີ່ຈະເຊື່ອຟັງພໍ່ແມ່ຊ່ວຍຂ້ອຍໃຫ້ເຊື່ອຟັງພະເຢໂຫວາແລະຄົນອື່ນໆທີ່ມີສິດອຳນາດ.” ຄຳພີໄບເບິນໃຫ້ເຫດຜົນທີ່ສຳຄັນທີ່ຈະຕ້ອງເຊື່ອຟັງພໍ່ແມ່. ຄຳພີໄບເບິນບອກວ່າ: “ເຈົ້າຈະຢູ່ດີມີສຸກແລະຈະມີອາຍຸຍືນຍາວໃນໂລກ.”—ອຟຊ. 6:2, 3
8. ເປັນຫຍັງເດັກນ້ອຍກັບໄວລຸ້ນຫຼາຍຄົນຈຶ່ງເລືອກທີ່ຈະເຊື່ອຟັງພໍ່ແມ່?
8 ເດັກນ້ອຍກັບໄວລຸ້ນຫຼາຍຄົນໄດ້ເຫັນວ່າການເຊື່ອຟັງພໍ່ແມ່ເກີດຜົນທີ່ດີ. ລູອິຊາຈາກເບຣຊິນຮູ້ສຶກວ່າ ຕອນທຳອິດກໍບໍ່ເຂົ້າໃຈເຫດຜົນທີ່ພໍ່ແມ່ບໍ່ໃຫ້ມີໂທລະສັບໄລຍະໜຶ່ງ. ລາວຫາເຫດຜົນວ່າ ຄົນທີ່ອາຍຸສ່ຳລາວສ່ວນຫຼາຍພາກັນມີໂທລະສັບໝົດທຸກຄົນ. ແຕ່ຕໍ່ມາລາວກໍເຂົ້າໃຈວ່າທີ່ຈິງແລ້ວພໍ່ແມ່ກຳລັງປົກປ້ອງລາວ. ຕອນນີ້ລາວເວົ້າວ່າ: “ຂ້ອຍເຫັນວ່າການເຊື່ອຟັງພໍ່ແມ່ບໍ່ແມ່ນການຈຳກັດອິດສະຫຼະ ແຕ່ເປັນຄືກັບການໃສ່ສາຍແອວນິລະໄພທີ່ປົກປ້ອງຊີວິດຂ້ອຍໄວ້. ເອລີຊາເບັດຈາກອາເມຣິກາຍັງຮູ້ສຶກວ່າບາງເທື່ອກໍຍາກທີ່ຈະເຊື່ອຟັງພໍ່ແມ່. ລາວອະທິບາຍວ່າ: “ເມື່ອຂ້ອຍບໍ່ເຂົ້າໃຈແທ້ໆວ່າເປັນຫຍັງພໍ່ແມ່ຈຶ່ງຕັ້ງກົດບາງຢ່າງ ຂ້ອຍຈະຄິດຄືນຫຼັງເຖິງຕອນທີ່ກົດຕ່າງໆຂອງພໍ່ແມ່ປົກປ້ອງຂ້ອຍໄວ້.” ໂມນິກາທີ່ຢູ່ອາກເມນີເວົ້າວ່າ ການເຊື່ອຟັງພໍ່ແມ່ເກີດຜົນດີກວ່າການບໍ່ເຊື່ອຟັງເຂົາເຈົ້າ.
ເຊື່ອຟັງ “ຄົນທີ່ມີອຳນາດປົກຄອງ”
9. ຫຼາຍຄົນຮູ້ສຶກແນວໃດຕໍ່ກັບການເຊື່ອຟັງກົດໝາຍ?
9 ຄຳພີໄບເບິນເອີ້ນລັດຖະບານຕ່າງໆວ່າ “ຄົນທີ່ມີອຳນາດປົກຄອງ.” (ຣມ. 13:1) ຫຼາຍຄົນຍອມຮັບວ່າເປັນສິ່ງທີ່ດີທີ່ຈະມີລັດຖະບານຕ່າງໆແລະເຂົາເຈົ້າອາດເຊື່ອຟັງກົດໝາຍບາງຂໍ້ທີ່ລັດຖະບານເຫຼົ່ານີ້ຕັ້ງຂຶ້ນ. ແຕ່ຄົນກຸ່ມດຽວກັນນີ້ອາດບໍ່ເຊື່ອຟັງກົດໝາຍທີ່ເຂົາເຈົ້າບໍ່ມັກຫຼືຮູ້ສຶກວ່າບໍ່ຍຸຕິທຳຕໍ່ເຂົາເຈົ້າ. ຕົວຢ່າງເລື່ອງເສຍພາສີ. ໃນການສຳຫຼວດຢູ່ປະເທດໜຶ່ງໃນເອີຣົບ ຫຼາຍຄົນເຊື່ອວ່າມັນຖືກຕ້ອງທີ່ຈະບໍ່ເສຍພາສີ “ຖ້າເຈົ້າຄິດວ່າພາສີເຫຼົ່ານັ້ນບໍ່ຍຸຕິທຳ.” ຍ້ອນແນວນີ້ ໃນປະເທດນັ້ນປະຊາຊົນຈຶ່ງບໍ່ຈ່າຍພາສີເຕັມຕາມທີ່ລັດຖະບານຮຽກຮ້ອງໃຫ້ເຂົາເຈົ້າຈ່າຍ.
ເຮົາຮຽນຮູ້ຫຍັງຈາກໂຢເຊັບກັບມາຣີໃນເລື່ອງການເຊື່ອຟັງ?(ເບິ່ງຂໍ້ 10-12) c
10. ເປັນຫຍັງເຮົາຕ້ອງເຊື່ອຟັງເຖິງວ່າເຮົາບໍ່ມັກກົດໝາຍບາງຢ່າງ?
10 ຄຳພີໄບເບິນຍອມຮັບວ່າລັດຖະບານຕ່າງໆຂອງມະນຸດເຮັດໃຫ້ເກີດຄວາມທຸກລຳບາກ. ລັດຖະບານເຫຼົ່ານີ້ຢູ່ພາຍໃຕ້ການຄວບຄຸມຂອງຊາຕານແລະອີກຈັກໜ້ອຍຈະຖືກທຳລາຍ. (ເພງ. 110:5, 6; ຜູ້ປ. 8:9; ລກ. 4:5, 6) ຄຳພີໄບເບິນຍັງບອກເຮົາວ່າ: “ຜູ້ທີ່ຕໍ່ຕ້ານອຳນາດປົກຄອງກໍຕໍ່ຕ້ານການຈັດກຽມຂອງພະເຈົ້າ.” ຕອນນີ້ພະເຢໂຫວາຍອມໃຫ້ລັດຖະບານຕ່າງໆປົກຄອງເພື່ອຮັກສາຄວາມເປັນລະບຽບຮຽບຮ້ອຍແລະເພິ່ນກໍຄາດໝາຍໃຫ້ເຮົາເຊື່ອຟັງລັດຖະບານເຫຼົ່ານີ້. ດັ່ງນັ້ນ ເຮົາ “ຕ້ອງໃຫ້ທຸກຄົນຕາມທີ່ພວກເຂົາສົມຄວນໄດ້ຮັບ” ລວມເຖິງການເສຍພາສີ ການໃຫ້ຄວາມນັບຖື ແລະການເຊື່ອຟັງ. (ຣມ. 13:1-7) ເຮົາອາດຮູ້ສຶກວ່າກົດໝາຍບາງຢ່າງຍາກທີ່ຈະເຊື່ອຟັງ ບໍ່ຍຸຕິທຳ ຫຼືມີຄ່າໃຊ້ຈ່າຍສູງ. ແຕ່ເຮົາຕ້ອງເຊື່ອຟັງລັດຖະບານເຫຼົ່ານີ້ຍ້ອນພະເຢໂຫວາບອກເຮົາໃຫ້ເຊື່ອຟັງ. ເຮົາຈະບໍ່ເຊື່ອຟັງເຂົາເຈົ້າຖ້າເຂົາເຈົ້າບອກເຮົາບໍ່ໃຫ້ເຮັດຕາມຄຳສັ່ງຂອງພະເຢໂຫວາ.—ກຈກ. 5:29
11-12. ຕາມລູກາ 2:1-6 ໂຢເຊັບແລະມາຣີໄດ້ເຮັດຫຍັງທີ່ສະແດງວ່າເຂົາເຈົ້າເຊື່ອຟັງກົດໝາຍ ເຖິງວ່າມັນຈະບໍ່ງ່າຍ? ແລະຜົນເປັນແນວໃດ? (ເບິ່ງຮູບ)
11 ເຮົາສາມາດຮຽນຈາກຕົວຢ່າງຂອງໂຢເຊັບກັບມາຣີທີ່ພ້ອມຈະເຊື່ອຟັງຄົນທີ່ມີອຳນາດປົກຄອງ ເຖິງວ່າມັນບໍ່ງ່າຍທີ່ຈະເຮັດຕາມ. (ອ່ານລູກາ 2:1-6) ຕອນທີ່ມາຣີຖືພາໄດ້ 9 ເດືອນ ລາວກັບໂຢເຊັບເຈິການທົດສອບເລື່ອງການເຊື່ອຟັງ. ໂອຄຸໂຕທີ່ປົກຄອງຈັກກະວັດໂຣມອອກຄຳສັ່ງໃຫ້ນັບຈຳນວນຄົນ. ໂຢເຊັບກັບມາຣີຈຶ່ງຕ້ອງເດີນທາງໄປເມືອງເບັດເລເຮັມ ເຂົາເຈົ້າຕ້ອງເດີນທາງ 150 ກິໂລແມັດແລະຂຶ້ນພູລົງພູຫຼາຍໜ່ວຍ. ການເດີນທາງແບບນັ້ນບໍ່ສະດວກເລີຍ ໂດຍສະເພາະມາຣີ. ທັງສອງອາດຈະກັງວົນເລື່ອງຄວາມປອດໄພຂອງມາຣີແລະລູກທີ່ຢູ່ໃນທ້ອງ. ເຂົາເຈົ້າຈະເຮັດແນວໃດຖ້າມາຣີເກີດລູກນຳທາງ? ເຂົາເຈົ້າຄືຊິອຸກໃຈເລື່ອງຄວາມປອດໄພຂອງແອນ້ອຍທີ່ຢູ່ໃນທ້ອງ ຍ້ອນລາວຈະເປັນເມຊີອາຕາມທີ່ພະເຢໂຫວາສັນຍາໄວ້. ເຂົາເຈົ້າຊິບໍ່ເຊື່ອຟັງອຳນາດການປົກຄອງຍ້ອນເຫດຜົນເຫຼົ່ານີ້ບໍ?
12 ເຖິງວ່າໂຢເຊັບກັບມາຣີມີເຫດຜົນທີ່ຈະກັງວົນ ແຕ່ເຂົາເຈົ້າກໍເຊື່ອຟັງກົດໝາຍ. ພະເຢໂຫວາໄດ້ອວຍພອນທີ່ເຂົາເຈົ້າເຊື່ອຟັງ ແລະເພິ່ນໄດ້ເບິ່ງແຍງເຂົາເຈົ້າ. ມາຣີໄປຮອດເມືອງເບັດເລເຮັມຢ່າງປອດໄພແລະເກີດລູກທີ່ແຂງແຮງ ແລະທັງໄດ້ເຮັດໃຫ້ຄຳພະຍາກອນໃນຄຳພີໄບເບິນເກີດຂຶ້ນແທ້!—ມກ. 5:2
13. ເມື່ອເຮົາເຊື່ອຟັງ ອາດສົ່ງຜົນແນວໃດຕໍ່ພີ່ນ້ອງຂອງເຮົາ?
13 ເມື່ອເຮົາເຊື່ອຟັງຜູ້ທີ່ມີອຳນາດປົກຄອງ ເຮົາເອງຈະໄດ້ຮັບປະໂຫຍດແລະຄົນອື່ນກໍຈະໄດ້ຮັບປະໂຫຍດຄືກັນ. ເປັນຫຍັງຈຶ່ງເປັນແບບນັ້ນ? ເຫດຜົນໜຶ່ງກໍຄື ເຮົາຈະບໍ່ຖືກລົງໂທດຍ້ອນບໍ່ເຊື່ອຟັງກົດໝາຍ. (ຣມ. 13:4) ເມື່ອເຮົາເຊື່ອຟັງອຳນາດການປົກຄອງ ເຂົາເຈົ້າກໍຈະເຫັນວ່າພະຍານພະເຢໂຫວາເປັນຄົນທີ່ເຊື່ອຟັງ. ຫຼາຍປີມາແລ້ວຢູ່ນີເຊເຣຍ ພວກທະຫານໄດ້ບຸກເຂົ້າໄປຫໍປະຊຸມຕອນທີ່ກຳລັງປະຊຸມຢູ່. ເຂົາເຈົ້າຊອກຫາຜູ້ທີ່ກໍ່ຄວາມວຸ່ນວາຍທີ່ປະທ້ວງຍ້ອນບໍ່ຢາກເສຍພາສີ. ແຕ່ຫົວໜ້າທະຫານໄດ້ບອກພວກທະຫານອອກໄປຈາກຫໍປະຊຸມ. ລາວເວົ້າວ່າ: “ພະຍານພະເຢໂຫວາເສຍພາສີຕະຫຼອດ.” ທຸກເທື່ອທີ່ເຈົ້າເຊື່ອຟັງກົດໝາຍ ເຈົ້າກໍຊ່ວຍຮັກສາຊື່ສຽງທີ່ດີຂອງພະຍານພະເຢໂຫວາໄວ້. ມື້ໃດມື້ໜຶ່ງຊື່ສຽງທີ່ດີແບບນີ້ອາດຊ່ວຍປົກປ້ອງພີ່ນ້ອງຮ່ວມຄວາມເຊື່ອຂອງເຈົ້າກໍໄດ້.—ມທ. 5:16
14. ສິ່ງໃດຊ່ວຍພີ່ນ້ອງຍິງຄົນໜຶ່ງໃຫ້ “ພ້ອມທີ່ຈະເຊື່ອຟັງ” ຄົນທີ່ມີອຳນາດປົກຄອງ?
14 ເຮົາອາດບໍ່ຢາກເຊື່ອຟັງຄົນທີ່ມີອຳນາດປົກຄອງໃນທຸກເລື່ອງ. ໂຈແອນນາພີ່ນ້ອງຍິງຢູ່ອາເມຣິກາຍອມຮັບວ່າ: “ມັນຍາກຫຼາຍສຳລັບຂ້ອຍທີ່ຈະເຊື່ອຟັງ ຍ້ອນບາງຄົນໃນຄອບຄົວຂອງຂ້ອຍເຈິຄວາມບໍ່ຍຸຕິທຳຈາກອຳນາດການປົກຄອງ.” ແຕ່ລາວຮູ້ວ່າລາວຕ້ອງປ່ຽນຄວາມຄິດທີ່ມີຕໍ່ອຳນາດການປົກຄອງ. ດັ່ງນັ້ນ ລາວຈຶ່ງເຮັດສິ່ງຕໍ່ໄປນີ້. ສິ່ງທຳອິດ ລາວເຊົາອ່ານສື່ສັງຄົມອອນລາຍທີ່ກະຕຸ້ນຄວາມຮູ້ສຶກໃນແງ່ລົບທີ່ລາວມີຕໍ່ອຳນາດການປົກຄອງ. (ສຸພາ. 20:3) ສິ່ງທີ 2 ລາວອະທິດຖານຂໍໃຫ້ພະເຢໂຫວາຊ່ວຍລາວໃຫ້ໄວ້ວາງໃຈເພິ່ນແທນທີ່ຈະເພິ່ງການປ່ຽນແປງຈາກລັດຖະບານຂອງມະນຸດ. (ເພງ. 9:9, 10) ສິ່ງທີ 3 ລາວອ່ານບົດຄວາມຕ່າງໆໃນປຶ້ມຂອງອົງການເລື່ອງຄວາມເປັນກາງ. (ຢຮ. 17:16) ໂຈແອນນາເວົ້າວ່າ ຍ້ອນລາວນັບຖືແລະເຊື່ອຟັງອຳນາດການປົກຄອງ ຕອນນີ້ລາວຈຶ່ງຮູ້ສຶກສະຫງົບໃຈຫຼາຍ.
ເຊື່ອຟັງການຊີ້ນຳຈາກອົງການຂອງພະເຢໂຫວາ
15. ເປັນຫຍັງເຮົາອາດຮູ້ສຶກວ່າຍາກທີ່ຈະເຊື່ອຟັງການຊີ້ນຳທີ່ມາຈາກອົງການຂອງພະເຢໂຫວາ?
15 ພະເຢໂຫວາບອກເຮົາ “ໃຫ້ເຊື່ອຟັງແລະຍອມຮັບອຳນາດຄົນທີ່ນຳໜ້າ” ໃນປະຊາຄົມ. (ຮຣ. 13:17) ເຖິງວ່າພະເຢຊູເປັນຜູ້ນຳທີ່ສົມບູນແບບ ແຕ່ຜູ້ທີ່ພະເຢຊູໃຊ້ໃຫ້ນຳໜ້າຢູ່ໃນໂລກນີ້ບໍ່ສົມບູນແບບ. ເຮົາອາດຮູ້ສຶກວ່າຍາກທີ່ຈະເຊື່ອຟັງເຂົາເຈົ້າ ໂດຍສະເພາະຖ້າເຂົາເຈົ້າຂໍໃຫ້ເຮົາເຮັດບາງສິ່ງທີ່ເຮົາບໍ່ຢາກເຮັດ. ມີເທື່ອໜຶ່ງອັກຄະສາວົກເປໂຕຮູ້ສຶກວ່າຍາກທີ່ຈະເຮັດຕາມຄຳແນະນຳທັນທີ. ຕອນທີ່ທູດສະຫວັນບອກໃຫ້ລາວກິນສັດທີ່ບໍ່ສະອາດຕາມກົດໝາຍຂອງໂມເຊ. ລາວປະຕິເສດບໍ່ກິນສັດເຫຼົ່ານັ້ນບໍ່ແມ່ນແຕ່ເທື່ອດຽວ ແຕ່ຮອດ 3 ເທື່ອ! (ກຈກ. 10:9-16) ຍ້ອນຫຍັງ? ຍ້ອນການຊີ້ນຳໃໝ່ນີ້ມັນແປກສຳລັບລາວ ແລະລາວບໍ່ເຄີຍເຮັດແບບນີ້ມາກ່ອນ. ຖ້າເປໂຕຮູ້ສຶກວ່າຍາກທີ່ຈະເຊື່ອຟັງການຊີ້ນຳຈາກທູດສະຫວັນທີ່ດີພ້ອມທຸກຢ່າງ ມັນກໍບໍ່ແປກທີ່ບາງເທື່ອເຮົາອາດຮູ້ສຶກວ່າຍາກທີ່ຈະເຊື່ອຟັງການຊີ້ນຳຂອງມະນຸດທີ່ບໍ່ສົມບູນແບບ.
16. ເຖິງວ່າອັກຄະສາວົກໂປໂລຄິດວ່າຄຳແນະນຳທີ່ລາວໄດ້ຮັບບໍ່ມີເຫດຜົນ ແຕ່ລາວໄດ້ເຮັດຫຍັງ? (ກິດຈະການ 21:23, 24, 26)
16 ອັກຄະສາວົກໂປໂລ “ພ້ອມທີ່ຈະເຊື່ອຟັງ” ແມ່ນແຕ່ຕອນທີ່ລາວໄດ້ຮັບຄຳແນະນຳທີ່ລາວອາດຮູ້ສຶກວ່າບໍ່ມີເຫດຜົນ. ຄລິດສະຕຽນທີ່ເປັນຄົນຢິວໄດ້ຍິນຂ່າວລືກ່ຽວກັບໂປໂລວ່າ ລາວກຳລັງສອນເລື່ອງ “ໃຫ້ຖິ້ມກົດໝາຍຂອງໂມເຊ” ແລະບໍ່ໃຫ້ນັບຖືກົດໝາຍຂອງໂມເຊ. (ກຈກ. 21:21) ພວກຜູ້ດູແລໃນເມືອງເຢຣູຊາເລັມແນະນຳໂປໂລໃຫ້ພາຜູ້ຊາຍ 4 ຄົນໄປວິຫານນຳແລະເຮັດໃຫ້ໂຕເອງສະອາດຕາມພິທີກຳພ້ອມກັບເຂົາເຈົ້າເພື່ອສະແດງໃຫ້ເຫັນວ່າລາວຍັງເຊື່ອຟັງກົດໝາຍຂອງໂມເຊຢູ່. ໂປໂລຮູ້ວ່າຄລິດສະຕຽນບໍ່ໄດ້ຢູ່ພາຍໃຕ້ກົດໝາຍຂອງໂມເຊແລ້ວ ແລະລາວກໍບໍ່ໄດ້ເຮັດຫຍັງຜິດ. ແຕ່ລາວກໍເຮັດຕາມຄຳແນະນຳນັ້ນທັນທີ. ລາວ “ພາ 4 ຄົນນັ້ນໄປນຳແລະຊຳລະຕົວຕາມພິທີກຳພ້ອມກັບພວກເຂົາ.” (ອ່ານກິດຈະການ 21:23, 24, 26) ຍ້ອນໂປໂລເຊື່ອຟັງຄຳແນະນຳ ລາວຈຶ່ງຊ່ວຍຮັກສາຄວາມເປັນນ້ຳໜຶ່ງໃຈດຽວກັນໃນພວກພີ່ນ້ອງ.—ຣມ. 14:19, 21
17. ເຈົ້າຮຽນຫຍັງຈາກປະສົບການຂອງພີ່ນ້ອງສະເຕຟານີ?
17 ພີ່ນ້ອງສະເຕຟານີຮູ້ສຶກວ່າຍາກຫຼາຍທີ່ຈະຍອມຮັບການຕັດສິນໃຈຂອງສຳນັກງານສາຂາທີ່ຢູ່ໃນປະເທດຂອງລາວ. ລາວກັບຜົວຮັບໃຊ້ຢ່າງມີຄວາມສຸກໃນກຸ່ມພາສາຕ່າງປະເທດ. ແຕ່ຕໍ່ມາສຳນັກງານສາຂາໄດ້ຍຸບກຸ່ມນັ້ນແລະລາວກັບຜົວຖືກມອບໝາຍໃຫ້ໄປຢູ່ປະຊາຄົມທີ່ໃຊ້ພາສາຂອງເຂົາເຈົ້າເອງ. ສະເຕຟານີຍອມຮັບວ່າ: “ຂ້ອຍບໍ່ມີຄວາມສຸກເລີຍ. ຂ້ອຍບໍ່ເຊື່ອວ່າພາສາຂອງຂ້ອຍຈະມີຄວາມຈຳເປັນຫຼາຍກວ່າພາສາຕ່າງປະເທດ.” ເຖິງຈະເປັນແນວນັ້ນ ລາວກໍຕັດສິນໃຈທີ່ຈະສະໜັບສະໜູນການຊີ້ນຳໃໝ່ນີ້. ລາວເວົ້າວ່າ: “ຕໍ່ມາຂ້ອຍໄດ້ເຂົ້າໃຈວ່າ ການຕັດສິນໃຈຂອງພີ່ນ້ອງເປັນການຕັດສິນໃຈທີ່ສະຫຼາດ. ໃນປະຊາຄົມໃໝ່ທີ່ພວກເຮົາຢູ່ ເຮົາໄດ້ເປັນພໍ່ແມ່ທາງດ້ານຄວາມເຊື່ອຂອງຫຼາຍຄົນທີ່ຢູ່ໃນຄວາມຈິງຜູ້ດຽວ. ຂ້ອຍກຳລັງສຶກສາກັບພີ່ນ້ອງຍິງຄົນໜຶ່ງທີ່ຖືກຮັບກັບເຂົ້າມາໃນປະຊາຄົມ. ຕອນນີ້ຂ້ອຍມີເວລາສຶກສາສ່ວນຕົວຫຼາຍຂຶ້ນ.” ລາວເວົ້າຕື່ມວ່າ: “ຂ້ອຍມີໃຈຮູ້ຜິດຮູ້ຖືກທີ່ສະອາດຍ້ອນຮູ້ວ່າຂ້ອຍໄດ້ເຮັດດີທີ່ສຸດໃນການເຊື່ອຟັງ.”
18. ເຮົາໄດ້ຮັບປະໂຫຍດຍັງຈາກການເຊື່ອຟັງ?
18 ເຮົາສາມາດຮຽນຮູ້ທີ່ຈະເຊື່ອຟັງ. ພະເຢຊູ “ຮຽນຮູ້ທີ່ຈະເຊື່ອຟັງ“ ບໍ່ແມ່ນໃນສະພາບການທີ່ສະບາຍໆແຕ່ໃນຕອນທີ່ເພິ່ນ “ຕ້ອງທົນທຸກລຳບາກ.” (ຮຣ. 5:8) ຄືກັບພະເຢຊູ ຫຼາຍເທື່ອເຮົາຮຽນຮູ້ທີ່ຈະເຊື່ອຟັງເມື່ອຢູ່ພາຍໃຕ້ສະພາບການທີ່ຫຍຸ້ງຍາກ. ຕອນທີ່ພະຍາດໂຄວິດ-19 ເລີ່ມລະບາດໃໝ່ໆເຮົາຖືກຂໍບໍ່ໃຫ້ໄປປະຊຸມຢູ່ຫໍປະຊຸມແລະໃຫ້ເຊົາປະກາດຕາມບ້ານ. ມັນຍາກສຳລັບເຈົ້າບໍທີ່ຈະເຊື່ອຟັງ? ຍາກແທ້ ແຕ່ການເຊື່ອຟັງປົກປ້ອງເຈົ້າ ເຮັດໃຫ້ເຈົ້າເປັນນ້ຳໜຶ່ງໃຈດຽວກັນກັບພີ່ນ້ອງຮ່ວມຄວາມເຊື່ອ ແລະເຮັດໃຫ້ພະເຢໂຫວາພໍໃຈ. ຕອນນີ້ເຮົາທຸກຄົນຖືກຝຶກໃຫ້ພ້ອມຫຼາຍຂຶ້ນທີ່ຈະເຊື່ອຟັງການຊີ້ນຳອັນໃດກໍຕາມທີ່ຈະໄດ້ຮັບໃນໄລຍະຄວາມທຸກລຳບາກຄັ້ງໃຫຍ່. ການເຊື່ອຟັງການຊີ້ນຳເຫຼົ່ານີ້ຈະປົກປ້ອງຊີວິດເຮົາໄວ້!—ໂຢບ 36:11
19. ເປັນຫຍັງເຈົ້າຈຶ່ງຢາກເຊື່ອຟັງ?
19 ເຮົາໄດ້ຮຽນວ່າການເຊື່ອຟັງເຮັດໃຫ້ເຮົາໄດ້ຮັບປະໂຫຍດຫຼາຍຢ່າງ. ແຕ່ເຫດຜົນສຳຄັນທີ່ເຮົາເລືອກເຊື່ອຟັງພະເຢໂຫວາແມ່ນຍ້ອນເຮົາຮັກເພິ່ນແລະຢາກເຮັດໃຫ້ເພິ່ນພໍໃຈ. (1ຢຮ. 5:3) ເຮົາບໍ່ມີທາງຕອບແທນພະເຢໂຫວາໄດ້ສຳລັບທຸກສິ່ງທີ່ເພິ່ນໄດ້ເຮັດເພື່ອເຮົາ. (ເພງ. 116:12) ແຕ່ເຮົາສາມາດເຊື່ອຟັງເພິ່ນແລະຜູ້ທີ່ເພິ່ນໃຫ້ສິດອຳນາດເໜືອເຮົາ. ຖ້າເຮົາເຊື່ອຟັງກໍສະແດງໃຫ້ເຫັນວ່າເຮົາເປັນຄົນສະຫຼາດ. ຄົນສະຫຼາດຈະເຮັດໃຫ້ພະເຢໂຫວາມີຄວາມສຸກ.—ສຸພາ. 27:11
ເພງ 89 ຟັງ ເຮັດຕາມ ແລ້ວຈະໄດ້ພອນ
a ຍ້ອນເຮົາບໍ່ສົມບູນແບບ ບາງເທື່ອກໍຍາກທີ່ເຮົາຈະເຊື່ອຟັງ ເຖິງວ່າຜູ້ທີ່ໃຫ້ການຊີ້ນຳມີສິດອຳນາດທີ່ຈະເຮັດແບບນັ້ນ. ໃນບົດຄວາມນີ້ເຮົາຈະຮຽນວ່າ ເຮົາຈະໄດ້ຮັບປະໂຫຍດແນວໃດເມື່ອເຊື່ອຟັງພໍ່ແມ່ “ຄົນທີ່ມີອຳນາດປົກຄອງ” ແລະພີ່ນ້ອງທີ່ນຳໜ້າໃນປະຊາຄົມ.
b ສຳລັບຄຳແນະນຳວິທີລົມກັບພໍ່ແມ່ເລື່ອງກົດຕ່າງໆທີ່ເຈົ້າຮູ້ສຶກວ່າມັນຍາກທີ່ຈະເຊື່ອຟັງ ໃຫ້ເບິ່ງບົດຄວາມ “ຂ້ອຍຈະລົມກັບພໍ່ແມ່ແນວໃດດີເລື່ອງກົດໃນບ້ານ?” ໃນເວັບໄຊ jw.org. (ພາສາໄທ)
c ຄຳອະທິບາຍຮູບ: ໂຢເຊັບກັບມາຣີເຊື່ອຟັງຄຳສັ່ງຂອງເຊຊາທີ່ໃຫ້ໄປຈົດທະບຽນສຳມະໂນຄົວຢູ່ເມືອງເບັດເລເຮັມ. ຄລິດສະຕຽນໃນທຸກມື້ນີ້ກໍເຊື່ອຟັງ “ຄົນທີ່ມີອຳນາດປົກຄອງ” ກ່ຽວກັບກົດຈາລະຈອນ ການເສຍພາສີ ແລະຄຳແນະນຳເລື່ອງສຸຂະພາບ.
