1. ¿Nda̱chun kivi ixayo̱ʼvi̱ña xíʼinyó kuniso̱ʼoyó?

 ¿Á ÍXAYO̱ʼVI̱ÑA xíʼún kuniso̱ʼún ña̱ káʼa̱nna xíʼún? Sava yichi̱ i̱xayo̱ʼvi̱ña xíʼin ta̱ David kandíxara. Ña̱kán ni̱ka̱ʼa̱nra xíʼin Ndióxi̱: “Taxi ña̱ ná kunii̱ kandíxai̱ yóʼó” (Sal. 51:12). Ni xi̱kuʼvi̱ní-ini ta̱ David xi̱xinira Ndióxi̱, soo sava yichi̱ i̱xayo̱ʼvi̱níña xíʼinra kuniso̱ʼora ña̱ xi̱ka̱ʼa̱nra xíʼinra, ta ki̱ʼva saá ndóʼo miíyó. ¿Nda̱chun? Ña̱ nu̱ú, saáchi kúúyó na̱ yiví ku̱a̱chi xa̱ʼa̱ ña̱kán íxayo̱ʼvi̱ña xíʼinyó kandíxayó. Ña̱ u̱vi̱, ta̱ Ndi̱va̱ʼa kúni̱ra ña̱ ndiʼi tiempo ná ixaso̱ʼoyó táki̱ʼva kéʼé miíra (2 Cor. 11:3). Ña̱ u̱ni̱, na̱ yiví na̱ íyo tiempo vitin va̱ása xíínna kuniso̱ʼona ña̱ káʼa̱n inkana xíʼinna ta “nda̱a̱ táki̱ʼva íyo ta̱chí saá íyoña chi iníí ndíka̱a̱ña ta chíka̱a̱ña-inina ña̱ va̱ása kandíxana ña̱ káʼa̱n Ndióxi̱” (Efes. 2:2). Ña̱kán, ña̱ va̱ʼa kandíxayó ña̱ káʼa̱n Jehová xíʼin ña̱ káʼa̱n na̱ nda̱kaxinra kuniʼi yichi̱ nu̱úyó ti̱xin congregación, kǒo xíniñúʼu keʼéyó ña̱ kúni̱ ta̱ Ndi̱va̱ʼa ni na̱ yiví na̱ kéʼé ña̱ kini.

2. ¿Nda̱chun xíniñúʼu koo tu̱ʼvayó ña̱ kandíxayó? (Santiago 3:17).

² (Kaʼvi Santiago 3:17). Ta̱ Santiago ni̱ka̱ʼa̱nra, na̱ yiví na̱ ndíchi íyo tu̱ʼvana ña̱ “kandíxana ña̱ káʼa̱nna xíʼinna”. ¿Ndáaña kúni̱ kachi ña̱yóʼo? Ña̱ xíniñúʼu chikaa̱yó ndee̱ ña̱ kuniso̱ʼoyó na̱ ta̱xi Jehová kuniʼi yichi̱ nu̱úyó. Soo Jehová kǒo kúni̱ra ña̱ ná kuniso̱ʼoyó ña̱ va̱ása va̱ʼa káʼa̱n na̱ yiví xíʼinyó keʼéyó (Hech. 4:​18-20).

3. ¿Nda̱chun ndáyáʼviní kuniso̱ʼoyó na̱ níʼi yichi̱ nu̱úyó?

³ Kǒo íxayo̱ʼvi̱víña xíʼinyó kuniso̱ʼoyó ña̱ káʼa̱n Jehová chi ndiʼi ña̱ káʼa̱nra va̱ʼaníña, soo ña̱ kuniso̱ʼoyó ña̱ káʼa̱n na̱ yiví íxayo̱ʼvi̱vaña xíʼinyó (Sal. 19:7). Soo na̱ yiví na̱ ta̱xi Ndióxi̱ chiñu ndaʼa̱ na̱ ku̱a̱chiva kúúna. Tá kúú, na̱ chiñu, na̱ íyo se̱ʼe, ta saátu na̱ anciano (Prov. 6:20; 1 Tes. 5:12; 1 Ped. 2:​13, 14). Tá  xíniso̱ʼoyó na̱yóʼo nda̱a̱ táki̱ʼva íyo na̱ xíniso̱ʼo Jehová saá íyoyó. Ná kotoyó ndáaña xíniñúʼu keʼéyó ña̱ va̱ʼa kuniso̱ʼoyó na̱ ta̱xi Jehová chiñu ndaʼa̱ ni sava yichi̱ íxayo̱ʼvi̱ña xíʼinyó kuniso̱ʼoyóna.

4. ¿Nda̱chun ku̱a̱ʼání na̱ va̱lí va̱ása xíínna kuniso̱ʼona ña̱ káʼa̱n na̱ yivána?

⁴ Na̱ va̱lí na̱ sákuaʼa xa̱ʼa̱ Ndióxi̱, ti̱xin escuela kítáʼanna xíʼin ku̱a̱ʼá na̱ va̱lí na̱ va̱ása xíniso̱ʼo ña̱ káʼa̱n na̱ yivána (2 Tim. 3:​1, 2). ¿Nda̱chun íyo ku̱a̱ʼání na̱ kéʼé saá? Savana xítona ña̱ va̱ása va̱ʼa ejemplo chínúu na̱ yivána nu̱úna ña̱kán kǒo xíínna kuniso̱ʼonana. Ta inkana ndákanixi̱nína ña̱ yo̱ʼvi̱ní consejo ña̱ táxi na̱ yivána ndaʼa̱na ta túvina ña̱ va̱ása chíndeétáʼanña xíʼinna. Na̱ va̱lí, ¿á xa̱a̱ ndóʼondó saá sava yichi̱? Íxayo̱ʼvi̱níña xíʼin sava na̱ va̱lí ña̱ kuniso̱ʼona consejo yóʼo: “Kuniso̱ʼondó ña̱ káʼa̱n na̱ yivándó xíʼinndó nda̱a̱ táki̱ʼva kúni̱ tátayó, chi va̱ʼaní ña̱yóʼo nu̱ú Ndióxi̱” (Efes. 6:1). ¿Ndáaña kivi chindeétáʼan xíʼún keʼún ña̱yóʼo?

5. Táki̱ʼva káchi Lucas 2:​46-52, ¿nda̱chun va̱ʼaní yichi̱ sa̱ndákoo ta̱ Jesús nu̱úyó?

⁵ Va̱ʼaní yichi̱ sa̱ndákoo ta̱ Jesús nu̱úyó, ña̱ kuniso̱ʼoyó ña̱ káʼa̱n na̱ yiváyó xíʼinyó (1 Ped. 2:​21-24). Ta̱ Jesús su̱ví ta̱ ku̱a̱chi níxi̱yora, soo na̱ yivára na̱ ku̱a̱chiva xi̱kuuna, soo ni saá va̱ʼaníva i̱xato̱ʼorana. Ni sava yichi̱ va̱ása va̱ʼa ña̱ xi̱keʼéna á kǒo níxi̱kunda̱a̱-inina xíʼin ña̱ xi̱ndoʼora (Éx. 20:12). Ná kotoyó ndáaña ndo̱ʼora tá xi̱kuumiíra 12 ku̱i̱ya̱ (kaʼvi Lucas 2:​46-52). Ta̱ Jesús ni̱xa̱ʼa̱nra xíʼin na̱ veʼera ñuu Jerusalén saáchi ku̱i̱ya̱ tá ku̱i̱ya̱ xi̱keʼéna vikó. Tá xa̱a̱ ndi̱ʼi vikó, ta xa̱a̱ nda̱kiʼinna ku̱a̱ʼa̱nna veʼena ta̱ José xíʼin ñá María ki̱ʼinna kuenta ña̱ kǒora ku̱a̱ʼa̱n xíʼinna. Na̱ yivá ta̱ Jesús xi̱niñúʼu kiʼinna kuenta á ndi̱kó ndiʼi na̱ se̱ʼena xíʼinna. Ña̱kán tá xi̱ni ñá María ña̱ kǒo ta̱ Jesús ku̱a̱ʼa̱n xíʼinna ni̱yi̱ʼvíníñá ta xa̱ʼa̱ ña̱kán chi̱kaa̱ ku̱a̱chiñára. Kiviva ka̱ʼa̱n ta̱ Jesús xíʼinna ña̱ su̱ví ku̱a̱chira níxi̱kuuña, nu̱úka ña̱yóʼo to̱ʼóní nda̱kuiinra yuʼúna. Soo ni saá “va̱ása níkunda̱a̱-inina xíʼin ña̱ ni̱ka̱ʼa̱nra xíʼinna”. Ni saá xi̱ndoʼo ta̱ Jesús, “xi̱keʼévara ña̱ xi̱ka̱ʼa̱nna xíʼinra”.   

6, 7. ¿Ndáaña chindeétáʼan xíʼin na̱ va̱lí ña̱ kuniso̱ʼona ña̱ káʼa̱n na̱ yivána?

⁶ Tá kǒo chínúu na̱ yivándó iin ejemplo va̱ʼa nu̱úndó á tá kǒo kúnda̱a̱-inina xíʼin ña̱ ndóʼondó, ¿á íxayo̱ʼvi̱ña xíʼinndó kuniso̱ʼondó ña̱ káʼa̱nna? ¿Ndáaña kivi chindeétáʼan xíʼinndó tá ndóʼondó ña̱yóʼo? Ña̱ nu̱ú, kiʼinndó kuenta nda̱saa ndóʼo Jehová. Biblia káʼa̱nña, ña̱ tá xíniso̱ʼo na̱ va̱lí ña̱ káʼa̱n na̱ yivána, sákusi̱ínína-ini Jehová (Col. 3:20). Tá na̱ yiváún va̱ása kúnda̱a̱-inina xíʼún á tá káʼa̱nna xíʼún keʼún iin ña̱ʼa ña̱ íxayo̱ʼvi̱ xíʼún, Jehová kúnda̱a̱-inira xíʼin ña̱ ndó’ún. Ña̱kán, sakúsi̱íníún-inira tá ná keʼún ña̱ káʼa̱n na̱ yiváún ni sava yichi̱ íxayo̱ʼvi̱ña xíʼún.

⁷ Ña̱ u̱vi̱, tá xíniso̱’ún ña̱ káʼa̱n na̱ yiváún xíʼún, sakúsi̱íníún-inina ta kundaaka-inina yóʼó (Prov. 23:​22-25). Tá saá ná keʼún va̱ʼaníka kutáʼún xíʼinna. Iin ta̱ hermano ta̱ ñuu Bélgica ta̱ naní Alexandre káchira: “Tá ki̱xáʼíi̱ kándíxai̱ na̱ yivái̱, va̱ʼaníka ki̱xáʼa kítáʼanndi̱ ta xi̱kusi̱íka-inindi̱”. b Ña̱ u̱ni̱, ndakaʼán chi tá kándíxaún ña̱ káʼa̱n na̱ yiváún, ña̱yóʼo va̱ʼaní chindeétáʼanña xíʼún chí nu̱únínu. Ta̱ Paulo ta̱ íyo ñuu Brasil káchira: “Xa̱ʼa̱ ña̱ sa̱kúaʼi̱ kuniso̱ʼi̱ ña̱ káʼa̱n na̱ yivái̱, ña̱yóʼo chíndeétáʼanña xíʼi̱n ña̱ kuniso̱ʼi̱ ña̱ káʼa̱n Jehová ta saátu inka na̱ kúúmií chiñu ña̱ ndáyáʼvi”. Tu̱ʼun Ndióxi̱ káʼa̱nña xíʼún nda̱chun kúú ña̱ xíniñúʼu kuniso̱ʼún ña̱ káʼa̱n na̱ yiváún: “Ña̱ va̱ʼa kana ndiʼi ña̱ kéʼún ta ku̱a̱ʼání tiempo koún nu̱ú ñuʼú yóʼo” (Efes. 6:​2, 3).

8. ¿Nda̱chun ku̱a̱ʼání na̱ va̱lí xíniso̱ʼona ña̱ káʼa̱n na̱ yivána xíʼinna?

 ⁸ Ku̱a̱ʼání na̱ va̱lí xítona ña̱ ku̱a̱ʼání ña̱ va̱ʼa ndákiʼinna tá xíniso̱ʼona ña̱ káʼa̱n na̱ yivána. Ñá Luiza ñá íyo ñuu Brasil káʼa̱nñá ña̱ kǒo níxi̱kunda̱a̱-iniñá nda̱chun kǒo níxi̱taxi na̱ yiváñá ña̱ kuumiíñá iin celular, saáchi ndiʼi na̱ va̱lí na̱ xi̱kuumií ku̱i̱ya̱ñá xi̱kuumiívanaña. Soo tándi̱ʼi ki̱ʼinñá kuenta ña̱ va̱ʼava kúú ña̱ xi̱keʼé na̱ yiváñá saáchi xi̱kuni̱na kundaanañá. Ñáyóʼo káchiñá: “Vitin kíʼi̱n kuenta ña̱ su̱ví na̱ káʼa̱n sana mií kúú na̱ yivái̱ xíʼi̱n, saáchi tá táxina iin consejo ndaʼíi̱, kúni̱na vií koo ña̱ ndaka̱xin keʼíi̱”. Iin ñá loʼo ñá ñuu Estados Unidos ñá naní Elizabeth íxayo̱ʼvi̱níña xíʼinñá kuniso̱ʼoñá ña̱ káʼa̱n na̱ yiváñá. Ñáyóʼo káʼa̱nñá xa̱ʼa̱ ña̱ kéʼéñá: “Tá káʼa̱n na̱ yivái̱ xíʼi̱n ña̱ keʼíi̱ iin ña̱ʼa ta kǒo kúnda̱a̱-inii̱ nda̱chun kúni̱na keʼíi̱ña. Saá kúúña ndákaʼíi̱n xa̱ʼa̱ ndiʼi yichi̱ ña̱ xi̱niso̱ʼi̱ ña̱ ni̱ka̱ʼa̱nna ta va̱ʼaní ka̱na ña̱ ke̱ʼíi̱”. Ñá Monica ñá ñuu Armenia, káʼa̱nñá ña̱ va̱ʼaníka kána ndiʼi ña̱ kéʼéñá tá xíniso̱ʼoñá ña̱ káʼa̱n na̱ yiváñá.

9. ¿Ndáaña ndákanixi̱ní ku̱a̱ʼánína xa̱ʼa̱ ley ña̱ kúúmií na̱ chíñu?

⁹ Na̱ yiví káʼa̱nna ña̱ ndáyáʼviva na̱ chíñu ta xíniñúʼu kuniso̱ʼoyó sava ley ña̱ káʼa̱nna (Rom. 13:1). Soo tá túvina ña̱ iin ley va̱ása va̱ʼa íyoña á ku̱a̱ʼání ña̱ʼa ndúkúña nu̱úna íxayo̱ʼvi̱níña xíʼinna kandíxanaña. Tá kúú, ná ka̱ʼa̱nyó xa̱ʼa̱ ña̱ cháʼvina impuesto. “Ku̱a̱ʼání na̱ yiví na̱ íyo país ña̱ Europa káʼa̱nna ña̱ yaʼviní cháʼvina impuesto ta xa̱ʼa̱ ña̱yóʼo ndákanixi̱nína ña̱ su̱ví ku̱a̱chiví kúúña tá va̱ása chaʼvinaña”. Xa̱ʼa̱ ña̱yóʼo, ku̱a̱ʼání na̱ yiví na̱ ndóo ñuu kán kǒo cháʼvina ndiʼi xu̱ʼún ña̱ ndúkú na̱ chíñu nu̱úna.

10. ¿Nda̱chun kándíxayó ña̱ káʼa̱n na̱ chíñu ni túviyó ña̱ va̱ása va̱ʼa íyo ley ña̱ kéʼéna?

¹⁰ Biblia káʼa̱nña ña̱ na̱ chíñu na̱ íyo nu̱ú ñuʼú yóʼo sáxo̱ʼvi̱nína na̱ yiví saáchi ta̱ Ndi̱va̱ʼa kúú ta̱ xíniñúʼuna ta si̱lóʼo tiempo ndiʼi-xa̱ʼa̱vana (Sal. 110:​5, 6; Ecl. 8:9; Luc. 4:​5, 6). Soo, saátu káʼa̱nña “na̱ kǒo xíín kandíxa ña̱ káʼa̱n na̱ chíñu kǒo xíínna kandíxana ña̱ káʼa̱n Ndióxi̱”. Soo táxivara ña̱ koona, ña̱ va̱ʼa kiʼinna kuenta xíʼin na̱ yiví, ta kúni̱ra ña̱ ná ixato̱ʼóyó na̱yóʼo. Xa̱ʼa̱ ña̱kán xíniñúʼu kuniso̱ʼoyó ña̱ káʼa̱nna, ña̱yóʼo kúni̱ kachiña ña̱ xíniñúʼu chaʼviyó impuesto ta saátu ña̱ ixato̱ʼóyóna (Rom. 13:​1-7). Sana ndákanixi̱níyó ña̱ va̱ása chíndeétáʼanví ley ña̱ kúúmií na̱ chíñu yóʼo xíʼinyó saáchi ku̱a̱ʼání xu̱ʼún cháʼviyó. Soo xíniso̱ʼoyó ña̱ káʼa̱n Jehová ta kúni̱ra ña̱ ná kuniso̱ʼoyó ña̱ káʼa̱nna, nani tá va̱ása yáʼandosóyó ña̱ káʼa̱n leyra (Hech. 5:29).

11, 12. Táki̱ʼva káchi Lucas 2:​1-6, ¿ndáaña ke̱ʼé ta̱ José xíʼin ñá María ña̱ va̱ʼa kuniso̱ʼona iin ley ña̱ ni̱ka̱ʼa̱n ta̱ chíñu? Ta, ¿ndáaña va̱ʼa nda̱kiʼinna? (Koto na̱ʼná).

¹¹ Ku̱a̱ʼání ña̱ kivi sákuaʼayó xíʼin ña̱ ke̱ʼé ta̱ José xíʼin ñá María. Na̱yóʼo chi̱kaa̱na ndee̱ ña̱ kuniso̱ʼona ña̱ ni̱ka̱ʼa̱n na̱ chíñu ni i̱xayo̱ʼvi̱ña xíʼinna keʼénaña (kaʼvi Lucas 2:​1-6). Tá kúú,  tá xa̱a̱ ku̱a̱ʼa̱n i̱i̱n yo̱o̱ ña̱ ñúʼu se̱ʼe ñá María, ta̱ emperador romano César Augusto ni̱ka̱ʼa̱nra ña̱ keʼéna iin censo. Ta ña̱ va̱ʼa ke̱ʼé ta̱ José xíʼin ñá María ña̱yóʼo xi̱niñúʼu ku̱ʼu̱nna ñuu Belén, ta xi̱niñúʼu kakana 150 kilómetro (93 milla) ña̱ va̱ʼa xa̱a̱na. Ña̱kán yo̱ʼvi̱ní ni̱xi̱yo ña̱yóʼo nu̱ú ñá María, ta sana ni̱ndi̱ʼi̱ní-inina xa̱ʼa̱ ña̱yóʼo. Saáchi, ¿ndáaña keʼé ta̱ José tá yichi̱ ki̱xáʼa kúni̱ kaku se̱ʼe ñá María? Ta̱ loʼo ta̱ kaku kán ta̱ Mesías xa̱a̱ra koora. ¿Á xa̱ʼa̱ ña̱kán kindo̱ona ta va̱ása ku̱ʼu̱nna ñuu Belén ña̱ ka̱ʼyi̱ ki̱vi̱na nu̱ú ña̱ censo?

¹² Ta̱ José xíʼin ñá María kǒo nítaxina ña̱ kasi nda̱a̱ iin ña̱ʼa nu̱úna ña̱ kuniso̱ʼona ña̱ ni̱ka̱ʼa̱n ta̱ chíñu kán. Jehová ta̱xira ña̱ va̱ʼa ndaʼa̱na xa̱ʼa̱ ña̱ xi̱niso̱ʼona ña̱ ni̱ka̱ʼa̱nra. Ñá María ni̱xa̱a̱ñá ñuu Belén, ta kán ka̱ku se̱ʼeñá, ta xa̱ʼa̱ ña̱ ke̱ʼéñá ña̱yóʼo va̱ʼa ni̱xi̱nu iin profecía (Miq. 5:2).

13. ¿Ndáaña va̱ʼa ndákiʼin inka na̱ hermano tá xíniso̱ʼoyó ña̱ káʼa̱n na̱ chíñu?

¹³ Tá xíniso̱ʼoyó ña̱ káʼa̱n na̱ chíñu íyo ña̱ va̱ʼa ndákiʼinyó ta saátu inka na̱ yiví. ¿Nda̱chun káʼa̱nyó ña̱yóʼo? Saáchi tá kǒo xíniso̱ʼoyó ley ña̱ táxi na̱ chíñu kivi kixi tu̱ndóʼo nu̱úyó (Rom. 13:4). Ta saátu tá kándíxayó ña̱ káʼa̱n na̱ chíñu, ña̱yóʼo chindeétáʼan xíʼinna ña̱ vií ndakanixi̱nína xa̱ʼa̱ na̱ testigo Jehová. Ña̱yóʼo kúú ña̱ ku̱u ñuu Nigeria xa̱a̱ íyo ku̱a̱ʼá ku̱i̱ya̱ chí sa̱tá. Iin tiʼvi na̱ soldado ni̱ki̱ʼvina ti̱xin Salón tá íyo reunión. Na̱yóʼo xi̱nandukúna na̱ yiví na̱ xi̱ka̱ʼa̱n kúáchi xa̱ʼa̱ impuesto ña̱ xi̱xiyo ñuu kán. Soo ta̱ soldado ta̱ xáʼndachíñu nu̱ú na̱ soldado yóʼo ni̱ka̱ʼa̱nra xíʼinna ña̱ ná kǒo keʼéna na̱ testigo Jehová, ka̱chira: “Na̱ testigo Jehová kǒo káʼa̱n kúáchivína xíʼin na̱ chíñu xa̱ʼa̱ impuesto”. Ña̱kán tá xíniso̱ʼún ña̱ káʼa̱n na̱ chíñu, ña̱yóʼo chíndeétáʼanña xíʼin na̱ ñuu Ndióxi̱ ña̱ ka̱ʼa̱n va̱ʼana xa̱ʼa̱na. Ta sana ña̱yóʼo chindeétáʼan xíʼin na̱ hermano chí nu̱únínu (Mat. 5:16).

14. ¿Ndáaña ke̱ʼé iin ñá hermana ña̱ va̱ʼa kuniso̱ʼoñá ña̱ káʼa̱n na̱ chíñu?

¹⁴ Sava yichi̱ kivi ixayo̱ʼvi̱ña xíʼinyó ña̱ kuniso̱ʼoyó ña̱ káʼa̱n na̱ chíñu. Iin ñá hermana ñá íyo ñuu Estados Unidos ñá naní Joanna  káʼa̱nñá: “Íxayo̱ʼvi̱níña xíʼi̱n ña̱ kuniso̱ʼi̱ ña̱ káʼa̱n na̱ chíñu, saáchi xa̱a̱ xóʼvi̱ní na̱ veʼi̱ xa̱ʼa̱ ña̱ va̱ása va̱ʼa kéʼéna”. Soo ñá Joanna chi̱kaa̱-iniñá ña̱ nasamañá ña̱ ndákanixi̱níñá xa̱ʼa̱ na̱yóʼo. ¿Ndáaña ke̱ʼéñá? Ña̱ nu̱ú, kǒo níkaʼvikañá ña̱ va̱xi nu̱ú Internet nu̱ú káʼa̱nna ña̱ va̱ása va̱ʼa xa̱ʼa̱ na̱ chíñu (Prov. 20:3). Ña̱ u̱vi̱, ni̱ka̱ʼa̱nñá xíʼin Jehová ña̱ chindeétáʼanra xíʼinñá ña̱ kundatuñá ña̱ miíra ndasavií ndiʼi ña̱ʼa ta su̱ví na̱ chíñu (Sal. 9:​9, 10). Ta ña̱ u̱ni̱, ki̱xáʼañá káʼviñá tutu ña̱ tává na̱ ñuu Ndióxi̱, ña̱ káʼa̱n ndáa ki̱ʼva xíniñúʼu ndakanixi̱níyó xa̱ʼa̱ na̱ chíñu (Juan 17:16). Ñá Joanna káʼa̱nñá ña̱ vitin va̱ʼaní kúniñá, saáchi ixato̱ʼóñá ta kándíxañá ña̱ káʼa̱n na̱ chíñu.

15. ¿Nda̱chun sava yichi̱ ixayo̱ʼvi̱ña xíʼinyó kuniso̱ʼoyó ña̱ káʼa̱n na̱ ñuu Ndióxi̱?

¹⁵ Jehová kúni̱ra ná kuniso̱ʼoyó ña̱ káʼa̱n na̱ níʼi yichi̱ nu̱úyó ti̱xin congregación (Heb. 13:17). Ta̱ Jesús ta̱ níʼi yichi̱ nu̱úyó kǒo ku̱a̱chira, soo na̱ yiví na̱ nda̱kaxinra kuniʼi yichi̱ nu̱úyó na̱ ku̱a̱chiva kúúna. Ña̱kán, sana ixayo̱ʼvi̱ña xíʼinyó kuniso̱ʼoyó ña̱ káʼa̱nna. Tá kúú, tá káʼa̱nna xíʼinyó keʼéyó iin ña̱ʼa ña̱ kǒo kúni̱yó keʼéyó. Saá kúú ña̱ ndo̱ʼo ta̱ apóstol Pedro. Iin ángel ni̱ka̱ʼa̱n xíʼinra ña̱ ná kuxura kití tí xi̱ka̱ʼa̱n ley ta̱ Moisés ña̱ kǒo xíniñúʼu kuxuna. Soo ta̱ Pedro u̱ni̱ví yichi̱ ni̱ka̱ʼa̱nra ña̱ kǒo níxi̱kuni̱ra keʼéra ña̱yóʼo (Hech. 10:​9-16). Nda̱kanixi̱níra ña̱ su̱ví ña̱ va̱ʼa kúú ña̱ ni̱ka̱ʼa̱n ta̱ ángel xíʼinra keʼéra. Ta̱ ángel ta̱ ni̱ka̱ʼa̱n xíʼin ta̱ Pedro kǒoví ku̱a̱chira, soo ni saá i̱xayo̱ʼvi̱ña xíʼin ta̱ Pedro kuniso̱ʼora ña̱ ni̱ka̱ʼa̱nra. Ña̱kán sava yichi̱ kivi ixayo̱ʼvi̱ña xíʼinyó kuniso̱ʼoyó ña̱ káʼa̱n na̱ níʼi yichi̱ nu̱úyó ti̱xin congregación.

16. ¿Ndáaña ke̱ʼé ta̱ apóstol Pablo tá ni̱ka̱ʼa̱n na̱ anciano xíʼinra ña̱ ku̱ʼu̱nra ndaya̱kúnra miíra ti̱xin templo? (Hechos 21:​23, 24, 26).

¹⁶ Ni i̱xayo̱ʼvi̱ña xíʼin ta̱ apóstol Pablo keʼéra ña̱ ni̱ka̱ʼa̱n Jehová xíʼinra, soo ni saá ke̱ʼévaraña. Sava na̱ cristiano na̱ xi̱kuu judío ku̱ndaa̱-inina ña̱ va̱ása íxato̱ʼó ta̱ Pablo ley ta̱ Moisés (Hech. 21:​21, nota). Na̱ anciano ñuu Jerusalén ni̱ka̱ʼa̱nna xíʼin ta̱ Pablo ña̱ ná na̱ʼa̱ra nu̱ú ndiʼi na̱ cristiano ña̱ kándíxara ley. Xa̱ʼa̱ ña̱kán xi̱niñúʼu ku̱ʼu̱nra xíʼin ku̱mí ta̱a ti̱xin templo ta kán ndaya̱kúnra miíra nda̱a̱ táki̱ʼva xi̱ka̱ʼa̱n ley ta̱ Moisés. Soo ta̱ Pablo kǒo nda̱a̱ ni iin ku̱a̱chi níki̱ʼvira. Ta saátu xi̱kunda̱a̱-inira ña̱ na̱ cristiano kán va̱ása níxiniñúʼuka kundiku̱nna ley ta̱ Moisés. Soo ni saá ndi̱ku̱n kama xi̱niso̱ʼora ta ke̱ʼéra ña̱ ni̱ka̱ʼa̱n na̱ anciano xíʼinra. Biblia káʼa̱nña: “Tá inka ki̱vi̱ ta̱ Pablo nda̱kiʼinra na̱yóʼo ku̱a̱ʼa̱n xíʼinra ta nda̱yakúnna miína nda̱a̱ táki̱ʼva káʼa̱n Ley ta̱ Moisés” (kaʼvi Hechos 21:​23, 24, 26). Ta xa̱ʼa̱ ña̱ va̱ʼaní xi̱niso̱ʼora, ña̱yóʼo chi̱ndeétáʼan xíʼin na̱ cristiano ña̱ va̱ʼaní kutáʼanna (Rom. 14:​19, 21).

17. ¿Ndáaña kivi sákuaʼún xíʼin ña̱ ndo̱ʼo ñá Stephanie?

¹⁷ Iin ñá hermana ñá naní Stephanie i̱xayo̱ʼvi̱níña xíʼinñá kandíxañá ña̱ nda̱kaxin na̱ Betel keʼéna. Miíñá xíʼin yii̱ñá xi̱kusi̱íní-inina xi̱ñuʼuna iin grupo loʼo nu̱ú xi̱ka̱ʼa̱nna inka tu̱ʼun. Na̱ Betel ni̱ka̱ʼa̱nna xíʼinna ña̱ kǒoka grupo yóʼo koo, ta ni̱ka̱ʼa̱nna xíʼinna ña̱ ná ndikóna congregación nu̱ú káʼa̱nna tu̱ʼun miína. ¿Ndáa ki̱ʼva ku̱ni ñá Stephanie? Ñáyóʼo káchiñá: “Ku̱suchíní-inii̱ tá ni̱ka̱ʼa̱nna ña̱yóʼo xíʼinndi̱, ta saátu kǒo níxi̱ndakanixi̱níi̱ ña̱ na̱ congregación nu̱ú xi̱ka̱ʼa̱nna tu̱ʼun miíndi̱ xi̱xiniñúʼuna na̱ chindeétáʼan xíʼinna”. Soo ni saá, ñáyóʼo xi̱niso̱ʼoñá ña̱ ni̱ka̱ʼa̱n na̱ Betel. Ñáyóʼo káchiñá: “Tá ni̱ya̱ʼa tiempo ki̱ʼi̱n kuenta ña̱ va̱ʼaníva íyo ña̱ nda̱kaxin na̱ hermano. Saáchi congregación nu̱ú ni̱xa̱a̱ndi̱, ku̱a̱ʼání na̱ hermano va̱ása ndásakáʼnu na̱ veʼena Jehová, ña̱kán ni̱xa̱a̱ndi̱ ndu̱undi̱ nda̱a̱ táki̱ʼva íyo yivána. Saátu káʼvii̱ xíʼin iin ñá hermana ñá ni̱xi̱yo inactiva. Ta saátu kúúmiíi̱ ku̱a̱ʼá tiempo ña̱ kaʼvii̱ tu̱ʼun Ndióxi̱ ta nandukúi̱ xa̱ʼa̱ña”. Ta ñáyóʼo  káchikañá: “Chíkaa̱níi̱ ndee̱ ña̱ kuniso̱ʼi̱ ña̱ káʼa̱n na̱ ñuu Ndióxi̱ xíʼi̱n, xa̱ʼa̱ ña̱kán va̱ʼa kúni̱i̱ ta kúsi̱í-inii̱”.

18. Tá xíniso̱ʼoyó ña̱ káʼa̱n na̱ ñuu Ndióxi̱, ¿ndáa ki̱ʼva chindeétáʼan ña̱yóʼo xíʼinyó?

¹⁸ Ndiʼiyó xíniñúʼu sakúaʼayó kuniso̱ʼoyó. Ta̱ Jesús va̱ʼaní yichi̱ sa̱ndákoora nu̱úyó saáchi “sa̱kuaʼara ña̱ viíní kandíxara xa̱ʼa̱ ndiʼi ña̱ʼa ña̱ ni̱xo̱ʼvi̱ra”, ta su̱ví xa̱ʼa̱ ña̱ va̱ʼaní ni̱xi̱yora (Heb. 5:8). Xíniñúʼu sakúaʼayó kuniso̱ʼoyó tá yáʼayó nu̱ú tu̱ndóʼo. Ná ndakaʼányó ndáaña ku̱u tá ndeéní xi̱ndikaa̱ COVID-19. Ni̱ka̱ʼa̱n na̱ ñuu Ndióxi̱ xíʼinyó ña̱ va̱ása ndakutáʼankayó ti̱xin Salón ña̱ koo reunión ta saátu ni̱ka̱ʼa̱nna ña̱ va̱ása ku̱ʼu̱nkayó veʼe tá veʼe ña̱ natúʼunyó xa̱ʼa̱ Ndióxi̱. ¿Ndáaña ndo̱ʼún xa̱ʼa̱ ña̱yóʼo? ¿Á i̱xayo̱ʼvi̱ña xíʼún kuniso̱ʼún? Ña̱ xi̱niso̱ʼún kúú ña̱ chi̱ndeétáʼan xíʼún ña̱ kǒo ña̱ níndoʼún, ta saátu chi̱ndeétáʼanña xíʼún ña̱ va̱ʼaka kutáʼún xíʼin Jehová ta saátu xíʼin na̱ hermano. Ta ña̱yóʼo kúú ña̱ chindeétáʼan xíʼinyó ña̱ kuniso̱ʼoyó ña̱ ka̱ʼa̱n na̱ ñuu Ndióxi̱ xíʼinyó tá ná kixáʼa ña̱ gran tribulación. Ta ña̱ kuniso̱ʼoyó kúú ña̱ chindeétáʼan xíʼinyó ña̱ ka̱kuyó (Job 36:11).

19. ¿Ndáa xa̱ʼa̱ kúú ña̱ kúni̱ún kuniso̱ʼún?

¹⁹ Sa̱kúaʼayó ña̱ ku̱a̱ʼání ña̱ va̱ʼa ndakiʼinyó tá xíniso̱ʼoyó ña̱ káʼa̱n na̱ ñuu Ndióxi̱. Soo saátu xa̱ʼa̱ ña̱ kúʼvi̱-iniyó xíniyó Jehová ta kúni̱yó sakúsi̱íyó-inira kúú ña̱ xíniso̱ʼoyó ña̱ káʼa̱nra (1 Juan 5:3). Va̱ása kuchiñuyó chaʼviyó ndaʼa̱ Jehová xa̱ʼa̱ ndiʼi ña̱ va̱ʼa kéʼéra xa̱ʼa̱yó (Sal. 116:12). Soo íyo iin ña̱ kivi keʼéyó: ña̱ kuniso̱ʼoyó ndiʼi ña̱ káʼa̱n Jehová xíʼinyó xíʼin ña̱ káʼa̱n na̱ nda̱kaxinra kuniʼi yichi̱ nu̱úyó. Tá xíniso̱ʼoyó ndiʼi ña̱ káʼa̱n Jehová xíʼinyó saá náʼa̱yó ña̱ kúúyó na̱ ndíchi ta saátu sákusi̱íyó-inira (Prov. 27:11).