1. Ngenyi mukuvo umweni tinovona kuti zvinonesa kuzwira?

 IMWIMWI makanasiririka kuti muzwire? Mambo Dhavhidhi, waivona kudaro. Ndiyo ndava wakaita mukumbiro kuna Mwari eciti: ‘Itanyi kuti ndive no cido co kumuzwira.’ (Nduyo 51:12) Dhavhidhi waida Jehovha. Pikija zvakadaro, zvainesa maningi kwaari kuti amuzwire. Ndizvona zvinoitikavo na itusu. Ngenyi? Cokutanga, tiri vandhu vacizivi kukwana nokutizve takabahwa no cido cokutama kuzwira. Cocipiri, Sathana ari kuita zvese zvaanokwanisa kuti tipandukire Jehovha, inga zvaakaita. (2 Vakorinte 11:3) Cocitatu, ngokuti takatendenejwa ngo vandhu vanoda kuita zvakashata, “mujimu uri kushanda mu vana vacikazwiri.” (Vaefeso 2:2) Tinodikana kuvangisira maningi kuti tinyise cido cokuda kuita zvakashata no kuhwisana no kuvangirijwa kwatiri kuithwa ndi Sathana no nyika ino kuti titame kuzwira. Tinodikanazve kuvangisira kuti tizwire Jehovha na vayani vanozvigaro.

2. Zvinorevenyi kuva mundhu wakanasiririka kuti azwire? (Jakobo 3:17)

² Verenganyi Jakobo 3:17. Mutari Jakobo ngo kufemehwa wakananga kuti muzivi wakanasiririka kuti “azwire.” Izvi zvinorevenyi? Zvinoreva kuti tinodikana kuva vandhu vakanasiririka kuti tizwire vese vaya vokuti vakapuwa zvigaro ndi Jehovha. Zvokadi kuti Jehovha aaveteri kuti tizwire vandhu pavanotikumbira kuti tiite zviro zvicikazwirani no mutemo jake.—Mabasa o Vapostori 4:​18-20.

3. Ngenyi kuna Jehovha zvinosisira kuti tizwire vaya vanozvigaro?

³ Ndizvona kuti zvakareruka kuzwira Jehovha kusiyapo mundhu. Jehovha nguva jese anopekeja ndhungamiriro jakakwana. (Nduyo 19:7) Zvecivoneka kuti vandhu vano zvigaro avazivi kukwana, nguva jimweni vanopekeja ndhungamiriro jicizivi  kurungama. Pikija zvakadaro, Jehovha wakapekeja mutoro jakadaro kuno vabari, vandhu vanoshanda ku utongi pamwepo no vakuru. (Mazwi Akangwara 6:20; 1 Vatesaronika 5:12; 1 Pedhru 2:​13, 14) Kudari tikavazwira tinonga tecizwiravo Jehovha. Mu cijijo ici, tinozovona kuti tingaitisa kudini kuti tizwire vaya vakapuwa zvigaro ndi Jehovha, pikija nguva jimweni zvinonga zvecinesa kuzwira ndhungamiriro jatinopuwa ndivona.

4. Ngenyi vana vazinji avazwiri vabari?

⁴ Majaha akatendenejwa no vadoni vokucikora “vacikazwiri vabari.” (2 Timoti 3:​1, 2) Ngenyi majaha mazinji aazwiri? Majaha amweni anovona kuti vabari vanovakumbira zviro zvokuti ivona vabarivo avazviiti. Majaha amweni anovona kuti nyika yacinja maningi, nokutizve vabari vavo avazivi zvizinji. Mazano avo aacashandizve nyamasi kana akavanga maningi. Munorangarira kudaro? Vazinji vanovona kuti zvinonesa maningi kuzwira zvakananga Jehovha paakati: “Zwiranyi vabari venyu mu njira inodakajisa Mambo.” (Vaefeso 6:1) Zvicinyi zvinozomubesera kuti muite izvi?

5. Mukuzwirana na Ruka 2:​46-52; ngenyi Jesu ndi muezaniso wakanaka wo kuzwira vabari?

⁵ Imwimwi mungajijira kuzwira ngokutevejera muezaniso wo mundhu wakanaka maningi, Jesu. (1 Pedhru 2:​21-24) Iyena wainga mundhu wakakwana asi vabari vake vainga vacizivi kukwana. Iyena waireremeja vabari vake pikija paya pokuti ivona vainga veciposa kana pavainga vacikanasi kuzwisisa. (Exodo 20:12) Vonanyi zvakaitika Jesu paainga no makore anokwana kuita 12. (Verenganyi Ruka 2:​46-52.) Vabari vake vainga ku Jerusarema. Vabari vake pavainga vecihwirira kumuzi avazivi kuzwisisa kuti Jesu aacaingepo. Josefa na Mariya vakapsaka Jesu, povakazomuwana, Mariya wakamupa ndava ngo basa rese raakavapa. Jesu waizotonanga kuti izvi zvainga zvakashata. Ngokuti vabari ndivona vainga no mutoro wokuvona kuti vana vese vainga pamwepo vacito vatanga kuita hwendo. Kusiyapo zvondhozvo, Jesu wakadavira mu njira icikanesi pamwepo no nderemejo. Asi Josefa na Mariya “ivona avacaizvibata zvaaivavhunjaro.” Pikija zvakadaro, Jesu “wakaenderera mberi ecivazwira.”

6-7. Zvicinyi zvinozobesera majaha kuti azwire vabari vavo?

⁶ Majaha munovona kuti zvinonesa kuzwira vabari venyu pavanoposa kana pavanotama kumuzwisisa? Zvicinyi zvingamubesera? Cokutanga, vonanyi kuti Jehovha anojizwa kudini. Bhaibheri rinonanga kuti kudari mukazwira vabari venyu, izvi “zvinodakajisa Mambo.” (Vakorose 3:20) Jehovha anoziva kuti vabari venyu nguva jimweni vangatama kumuzwisisa kana vangadira mutemo jamunovona kuti ajina shwiro. Pikija zvakadaro, kudari mukazwira vabari venyu munozodakajisa Jehovha.

⁷ Cocipiri, rangariranyi kuti vabari venyu vanojizwa kudini. Kudari mukazwira vabari venyu munozovasiya vakadakara nokutizve vanozomuthemba. (Mazwi Akangwara 23:​22-25) Kusiyapo zvondhozvo, munozova no ushamwari hwo phedo navo. Mujaha umweni anogara ku Bherijhika anozwi Areshandre, wakananga kudari: “Pondakatanga kuita zvaidiwa ngo vabari vangu, ushamwari hwedu hwakacinja. Zvondhozvo zvakaita kuti tese tidakare.” b Zivanyi kuti kuzwira nyamasi uno kunozomubesera kumbejiyo. Pauro anogara ku Bharaziri, wakananga kudari: “Kujijira  kuzwira vabari vangu kwakandibesera kuzwira Jehovha pamwepo no vamweni vanozvigaro.” Inga zvinobhuiwa mu Bhaibheri, imwimwi muno thangwe rakanaka kuti muzwire vabari. Irona rinoti: “Kuti zvese zvikufambire ushoni, urarame mazuva akawanda pa nyika.”—Vaefeso 6:​2, 3.

8. Ngenyi vana vazinji vakheta kuzwira vabari?

⁸ Majaha akawanda akazwisisa kuti ciro caushoni cavangaita ndi kuzwira vabari. Ruiza, anogara ku Bharaziri, pokutanga wakavona kuti zvinonesa maningi kwaari kuzwisisa kuti ngenyi aacainga no foni. Iyena waivhunja vabari vake kuti vazinji vomupira wake vainga no foni. Pejisire wakazozwisisa kuti vabari vake vaida kumungwaririra. Iyena anoziva kuti kuzwira vabari vake asipi kubzinyirihwa, asi i mbhangiro yaanoda kamare. Musikana anozwi Erizabheti anogara ku Estadhus Unidhus, anovona kuti zvinonesa maningi kuzwira vabari. Iyena anoti: “Pavhaza jese jandicikazwisisi kuti ngenyi vabari vangu vadira mutemo, ndinoeja kuceukija mutemo javakambodira jokuti andicaijizwisisepi asi jakandibesera.” Monika anogara ku Arimeniya, wakananga kuti waivona zvese zvicimufambira ushoni paya paiizwira vabari vake.

9. Vazinji vanorangarirenyi ngo pamusoro po kuzwira mutemo?

⁹ Vandhu vazinji vanozviziva kuti vanoda besero ro vatongi, nokutizve zvinosisira kuzwira mutemo munganani jinodihwa ngo “vatongi.” (Varoma 13:1) Asi vandhu vondhovo vanodakarira kutama kuzwira mutemo javanovona kuti ajizivi kurungama. Vonanyi basi ngo pamusoro po kushaba. Ku nyika imweni yo Europa, “mundhu umwe pavarongomuna, anovona kuti zviri nane kutama kupagari mushabo waanovona kuti auzivi kurungama.” Ngo kudaro, vandhu vanogara mu nyika yondhoyo avashabi mushabo jese jinokumbihwa ngo utongi.

10. Ngenyi itusu tinozwira mutemo pikija jaticikadakariri?

¹⁰ Bhaibheri rinonanga kuti utongi hwo vandhu unotongwa ndi Sathana no kuviisa matambujiko kuno vandhu, unozoparajwa sambiri pano. (Nduyo 110:​5, 6; Mucumaeri 8:9; Ruka 4:​5, 6) Irona rinonangazve kuti “wiya anohwisana no utongi ari kuhwisana na Mwari.” Jehovha ari kutendera kuti utongi huwanike kuti zviro zvive zvakarongeka iyena anotenderazve kuti tiuzwire. Ngo kudaro, tinodikana kuvapa ‘zvavanofanera,’ kubatanijavo mushabo, nderemejo no kuvazwira. (Varoma 13:​1-7) Kangaije nguva jimweni tingavona kuti mutemo javanodira ajizivi kurungama, ajisisiri kana jinonesa kuzwira. Asi itusu tinozwira Jehovha nokutizve iyena anotivhunja kuti tinodikana kuzwira vatongi, asi atizovazwiri kudari ivona vakatikumbira kuita zviro zvicikazwirani no mutemo jake.—Mabasa o Vapostori 5:29.

11-12. Mukuzwirana na Ruka 2:​1-6; Josefa na Mariya vakaitenyi kuti vakhombije kuti vanozwira mutemo, ngowapi wakazova muviyo? (Vonanyi foto.)

 ¹¹ Tingajija zvakawanda ngo pamusoro po muezaniso wa Josefa pamwepo na Mariya, avo vainga vakanasiririka kuti vazwire vatongi pikija pozvaivanesera. (Verenganyi Ruka 2:​1-6.) Vonanyi muejo wo vakahwisana nawo Mariya paainga no mimba. Mutongi wo Ciroma Augusto wakadira mutemo wokuti vese vaidikana kuhwirira ku nyika yovakabarihwa vaende kotaririswa. Josefa na Mariya vakadikana kuita hwendo hwakakura mbhera Bheterehema. Vaiita hwendo hwakakura maningi wo 150 wo makiromita nokufamba mu ndau jakakhwirira no jakaterera. Hwendo uhu hwainga hwecinesa maningi kuna Mariya. Zvecivoneka kuti wainga no mimba yo mweji mupfumbamwe. Ngozvapi zvavaizoita kudari naakabara vari mugwanja? Kangaije ivona vakaneseka ngo uhomi hwa Mariya pamwepo no hwo mwana. Mwana uwu waizova Mesiya. Kudari ivona no vaida, iri raizova thangwe raushoni ro kutama kuzwira utongi.

¹² Josefa na Mariya avazivi kutendera kuti zvineso zvavo zvivaite kuti vatame kuzwira utongi. Jehovha wakakomborera kuzwira kwavo. Mariya wakazoguma ushoni ku Bhterehema wobara mwana ano uhomi hwaushoni no kubesera kukwanirisa ciporofita co mu Bhaibheri.—Mikeya 5:2.

13. Ngenyi kuzwira kwedu kunobesera hama jedu?

¹³ Kudari tikazwira utongi tinozobesereka itusu no kunbeseravo vamweni. Kuitisa kudini? Ciro cokutanga ngo cokuti atizovi no muviyo jakashata jinova no vaya vacikazwiri mutemo. (Varoma 13:4) Kuzwira kwedu kunozobesera kuti vatongi vave no mavonero akanaka ngo pamusoro po Zvapupu zva Jehovha. Inga muezaniso, makore manganani adarika ku Nijheriya, masoca akanghwina mu Nyumba yo Umambo musongano pawainga weciithwa, vecipsaka vandhu vairamba kushaba. Asi mutungamiriri wo masoca aya wakakumbira kuti vabude mu Nyumba yo Umambo o vavhunja kudari: “Zvapupu zva Jehovha mukuvo wese zvinoshaba.” Pamunozwira mutemo,  Zvapupu zva Jehovha zvinozoenderera mberi zvecizivika inga vandhu vaushoni, mugariro uwu unozobesera kujivirira hama no hamabzaji jedu kumbejiyo.—Mateu 5:16.

14. Zvicinyi zvakabesera hambzaji kuti ive yakanasiririka kuti izwire “vatongi?”

¹⁴ Pikija zvakadaro, azvirevi kuti nguva jese takanasiririka kuti tizwire vatongi. Hambzaji Jhoana, vanogara ku Estadhus Unidhus vakati: “Kwandiri zvainga zviro zvinonesa maningi kuzwira” ngokuti “vamweni vopaukama hwangu vainga vakatajwa ngo njira icikazivi kurungama ngo vatongi.” Asi hambzaji Jhoana vakavona kuti vaidikana kucinja mavonero avo. Ciro cokutanga cavakaita, ikuima kuvona zviro zvakashata zvaibhuiwa ngo pamusoro po utongi ngo mu interneti. (Mazwi Akangwara 20:3) Cocipiri, vakaita mukumbiro kuna Jehovha vecikumbira besero kuti vakwanise kucinja mavonero avo kusiyapo kuti utongi ucinje. (Nduyo 9:​9, 10) Cocitatu, ivona vakaverenga musoro wo mabhuku edu unobhuya ngo pamusoro po kutama kuva no kotakapeyamira. (Johani 17:16) Kuzwira no kureremeja kovari kuita utongi kuri kuvabesera kuti vave “no runyararo no kuva vakagajana.”

15. Ngenyi mukuvo umweni zvinganesa kwatiri kuzwira ndhungamiriro jatinopuwa musangano ra Jehovha?

¹⁵ Jehovha anokumbira kuti tive vandhu “vanozwira vaya vanotungamirira” mukati mo ungano. (Vahebheru 13:17) Pikija mutungamiriri wedu Jesu wakakwana, vaya vanoshandiswa ndiyena kuti vatungamirire vandhu vake pasi pano avazivi kukwana. Ngo iro thangwe zvinganesa kuvazwira, maningi-ningi paya pavanotikumbira kuti tiite ciro cokuti itusu atidi kuciita. Pavhaza imweni mupostori Pedhru wakanesehwavo kuzwira. Iyena wakaashira ndhungamiriro yaivha kuno ngirozi yokuti waidikana kuha zvinyama zvicizivi kucena mukuzwirana no mutemo wa Mosi, asi mupostori Pedhru wakaramba kuzwira haiwa kamwe asi katatu. (Mabasa o Vapostori 10:​9-16) Asi ngenyi Pedhru wakaita izvi? Ngokuti acainasa kuzwisisa ndhungamiriro imbza iyi. Iyena aacaingepi waroveja kuita zviro mu njira iyi. Mupostori Pedhru wakanesehwa kuzwira mbhangiro yaakapuwa no ngirozi yakakwana, zvingatineseravo maningi kuzwira ndhungamiriro jatinopuwa no vandhu vacikazivi kukwana.

16. Ngozvapi zvakaita mupostori Pauro pikija paakavona kuti ndhungamiriro yaakapuwa aicaingepi ushoni? (Mabasa o Vapostori 21:​23, 24, 26)

¹⁶ Mupostori Pauro wainga wakanasiririka kuti “azwire” ndhungamiriro pikija wainga ecijivona kuti ajiziki. Makristu o Cijudha ainga azwa marehwa-rehwa ngo pamusoro pa Pauro kuti wainga ecicumaera vandhu kuti “vatame kuzwira Mutemo wa Mosi.” (Mabasa o Vapostori 21:21) Makristu aitungamirira o ku Jerusarema, akavhunja mupostori Pauro kuti atore vanarume vanokwana kuita varongomuna, kuti aende navo kuthemberi, kuti ajicenese mukuzwirana no mutemo. Ngokuita kudaro, mupostori Pauro waizokhombija kuti iyena anozwira mutemo. Asi Pauro waizviziva kuti Makristu aacaidikanazve kuzwira mutemo. Iyena aacaingepi waita ciri cese cakashata, pikija zvakadaro, iyena wakazwira. ‘Pa njiku yakatevera mupostori Pauro wakatora vanarume vayani ojicenesa pamwepo na ivona mukuzwirana no Mutemo.’ (Verenganyi Mabasa o Vapostori 21:​23, 24, 26.) Kuzwira kwakaita Pauro kwakabesera kuti mu ungano muve no rubatano.—Varoma 14:​19, 21.

17. Ngozvapi zvamajija kuvha ku muezaniso wa hambzaji Stefani?

¹⁷ Hambzaji Stefani vakanesehwa kuzwira civaringo cainga cakatemwa ngo vaitungamirira  vo basa ro nyika yo vanogararo. Ivona no mwamunavo vainga vakadakara vecibesera gurupu rinobhuya ndimi yo nyika imweni. Asi bheteri rakaimisa gurupu iri, varovorani ava vakagajwa kuti vaende kobesera ungano inobhuya ndimi yavo. Hambzaji Stefani vakati: “Ndakanyangajwa maningi.” “Andizivi kuvona kuti ungano yangu yaidiwa maningi vabeseri.” Pikija zvakadaro, ivona vakatema civaringo cokuzwira. Pakufamba ko nguva, takazwisisa kuti bheteri rakatema civaringo co ungwaru. “Takagumira pakuva vabari mu ungano yondhoyo kuno vazinji vainga vacina vabari mu cokwadi. Wari ndiri kujija no hambzaji yakaima kucumaera. Kunasa kunanga, wari ndino nguva yakawanda yokuita jijo yo mundhu ega.” Ivona vakanangazve kudari: “Wari ndino hana yakacena ngokuti ndaita zvandinokwanisa kuti ndizwire.”

18. Tinobesereka kudini ngo kuva vandhu vanozwira?

¹⁸ Itusu tingajijira kuva vanozwira. Jesu “wainga mwana, wakajija kuzwira,” haiwa pamugariro waushoni asi kuvhira ku “matambujiko aakasongana nawo.” (Vahebheru 5:8) Kazinji inga ndi Jesu, tinodikana kuva vanozwira pikija pamugariro jinonesa. Inga muezaniso, mutungu wo korona vhiru powakatanga, takapuwa ndhungamiriro yokuti tiime kuenda kumusongano ku Nyumba yo Umambo no kucumaera nyumba ngo nyumba, imwimwi makanesehwa kuzwira? Asi kuzwira kwenyu kwakabesera imwimwi no kubesera kuti ungano ienderere mberi yakabatana no kudakajisa Jehovha. Tese takanasiririka kuti tinase kuzwira ndhungamiriro jatinozopuwa dambujiko guru parinozotanga. Kuzwira ndhungamiriro iji ndikona kunozoponesa upenyu hwedu.—Jobe 36:11.

19. Ngenyi munoda kuzwira?

¹⁹ Itusu takwanisa kuvona kuti kuzwira kunoviisa makomborero akawanda. Thangwe rokutanga rinotiita kuti tizwire ngorokuti, tinoda maningi Jehovha no kuda kumudakajisa. (1 Johani 5:3) Narini atizokwanisi kupagari zvese zvatakaitihwa ndi Jehovha. (Nduyo 116:12) Asi itusu tingakwanisa kumuzwira no kuzwira vaya vanozvigaro. Kudari tikaita izvi tinozokhombija kuti tiri vandhu vakangwara no vanodakajisa Jehovha.—Mazwi Akangwara 27:11.