1. Wuarom kaun ons daut schwoa sennen to jehorchen?

 ES DIE daut eenjemol schwoa to jehorchen? Fa dän Kjennich David wia daut, un doawäajen bäd hee: “Jeff mie eenen Jeist, dee die jehorchen well” (Psa. 51:14). David leewd Jehova. Oba am wia daut doawäajen eenjemol schwoa to jehorchen, un veleicht jeit ons daut uk soo. Wuarom es daut soo? Na, wie haben ieeschtens aula soone Natua, waut jeweenlich jäajenaun es. Un tweedens prooft de Fient ons dän Tiet äwa bat doa to brinjen, daut wie ons jäajen Jehova stalen, soo aus hee selfst deed (2. Kor. 11:3). Un dreddens läw wie en eene Welt, wua de mieeschte sikj jeweenlich jäajenaun stalen, wiels dee haben “dän Jeist, dee en dee wirkjt, dee Gott nich jehorchen” (Efs. 2:2). Wie motten ons sea aunstrenjen un jäajen onse Onvolkomenheit schaufen un dän Druck von dän Fient un von dise Welt wadastonen, om Jehova to jehorchen un uk dee, waut hee äwa ons aunjestalt haft.

2. Waut bediet daut, reedsennen to jehorchen? (Jakobus 3:17).

² Läs Jakobus 3:17, NW. Jehova leet derch Jakobus oppschriewen, daut weise Menschen, “reed to jehorchen” sent. Waut bediet daut? Wie sellen wellich reedsennen, deejanje to jehorchen, waut Jehova äwa ons aunjestalt haft. Oba daut bediet nich, daut Jehova von ons velangt, daut wie uk dan jehorchen motten, wan dee von ons waut haben wellen, waut jäajen Jehova es (Apj. 4:18-20).

3. Wuarom well Jehova, daut wie dee jehorchen, waut hee äwa ons aunjestalt haft?

³ Veleicht späat sikj ons daut leichta, Jehova to jehorchen enne Städ Menschen. Jehova jeft ons emma dän basten Rot, wäajen hee volkomen es (Psa. 19:8). Oba Menschen, waut een Aumt haben, sent nich volkomen. Un doch haft ons himlischa Voda de Elren, Beaumte un Eltestasch eene jewesse Macht jejäft (Spr. 6:20; 1. Tess. 5:12; 1. Pet. 2:13-14). Wan  wie dee jehorchen, dan jehorch wie enne Werkjlichkjeit Jehova. Well wie nu mol seenen, waut ons halpen kaun, soone Menschen to jehorchen, wan ons daut bieaun uk schwoa felt, daut notokomen, waut dee sajen.

4. Wuarom jehorchen väl junge Menschen äare Elren nich?

⁴ Junge Menschen kjennen daut foaken seenen, daut aundre “de Elren nich jehorchen” wellen (2. Tim. 3:1-2). Wuarom wellen väl Jugentliche nich jehorchen? Eenje feelen sikj aunjeschmäat von äare Elren. Wäajen foaken velangen dee waut von äare Kjinja, waut dee selfst nich nokomen. Noch aundre talen daut, waut äare Elren von an velangen, fa ooltmootsch un too strenj. Wan du junk best, hast du die uk aul mol soo jefeelt? Väle es daut schwoa, dit Jeboot notokomen, waut doa sajcht: “June Christenpflicht es, june Elren to jehorchen, wiels daut es daut rajchte to doonen” (Efs. 6:1). Waut kaun die doabie halpen?

5. Wuarom es Jesus daut baste Biespel doarenn, de Elren to jehorchen? (Lukas 2:46-52).

⁵ Daut baste Biespel äwa jehorchen es Jesus (1. Pet. 2:21-24). Hee wia volkomen, oba hee haud onvolkomne Elren. Oba hee deed doawäajen siene Elren ieren, wan dee uk Fäla muaken un am eenjemol nich vestonen kunnen (2. Mo. 20:12). Well wie mol seenen, waut Jesus beläwd, aus hee 12 Joa wia (läs Lukas 2:46-52). Josef un Maria wieren met äare Kjinja toop opp een Fast en Jerusalem. Un aus dee trigjjinjen, worden dee daut nich en, daut Jesus en Jerusalem jebläwen wia. Daut wia Josef un Maria äare Veauntwuatunk, doano to seenen, daut aul äare Kjinja metkjeemen oppem Trigjwajch. Aus dee am dan fungen, jeef Maria Jesus de Schult, daut see am musten sieekjen! Jesus wudd an haben kunt sajen, woo ojjerajcht daut wia, oba enne Städ daut wees hee an Respakjt un räd leeftolich to an. Josef un Maria “vestunden nich, waut hee doamet meend”, oba Jesus bleef “an unjadon.”

6-7. Waut kaun junge Menschen halpen, äare Elren to jehorchen?

⁶ Es die daut aus junga Mensch schwoa, diene Elren to jehorchen, wiels dee Fäla moaken ooda die nich krakjt vestonen kjennen? Waut kaun die halpen? Ieeschtens, denkj doaräwa no, woo Jehova denkjt. De Schreft sajcht, “daut jefelt däm Harn”, wan du diene Elren jehorchen deist (Kol. 3:20). Jehova weet, daut diene Elren die nich emma vestonen kjennen un daut dee bieaun Räajlen oppstalen, waut nich leicht sent to jehorchen. Oba wan du dee doawäajen jehorchst, dan moakst du Jehova schaftich.

⁷ Tweedens, denkj doaräwa no, woo diene Elren sikj feelen. Wan du dee jehorchst, dan moakst du dee schaftich un dee woaren dolla opp die vetruen (Spr. 23:22-25). Du woascht die veleicht bäta met dee vestonen. Alexandre, een Brooda von Belgien, sajcht: “Aus ekj aunfunk, miene Elren to jehorchen, haud wie een bätret Veheltnis un wie wieren schaftja”. b Dreddens, denkj doaräwa no, woo die daut lota togood komen woat, wan du nu jehorchst. Paulo, waut en Brasilien wont, sajcht: “Wiels ekj jelieet hab, miene Elren to jehorchen, haft mie daut jeholpen, Jehova un uk aundre to jehorchen.” De Schreft jeft eenen gooden Grunt doafäa, wuarom du diene Elren jehorchen saust. Daut sajcht: “Daut die daut  goot jeit un du lang oppe Ieed läwen kaust” (Efs. 6:2-3).

8. Wuarom jehorchen väl Jugentliche äare Elren?

⁸ Väl Jugentliche haben utjefungen, woo goot daut utkjemt, wan see jehorchen. Luiza, waut uk von Brasilien es, wia daut schwoa to vestonen, wuarom äare Elren ar fa eene jewesse Tiet nich daut Fon leeten. Ar wia daut schwoa, wiels aule aundre Jugentliche een Fon hauden. Oba dan kunn see vestonen, daut äare Elren ar bloos beschitzen wullen. See weet nu, wan see äare Elren jehorcht, brukt see sikj nich soo feelen, aus wan dee ar aul äare Frieheit wajchnämen, oba daut dee äa Rot krakjt daut es, waut ar fält. Elizabeth, eene Sesta von de Stäts, es daut bieaun noch emma schwoa, äare Elren to jehorchen. See sajcht: “Wan ekj nich krakjt vestonen kaun, wuarom miene Elren eene jewesse Räajel oppstalen, dan denkj ekj trigj, woo mie dee äare Räajlen aul ea jeholpen haben.” Monica, waut en Armeenien läft, sajcht, daut ar daut emma bäta utkjeem, de Elren to jehorchen, aus wan see dee nich jehorcht.

9. Woo denkjen eenje äwa de Jesazen?

⁹ Väl Menschen stonen daut too, daut ons daut aun Rejierungen fält un daut wie oppet weinichste jewesse Jesazen, waut “de Rejierunk” oppstalt, jehorchen sellen (Reem. 13:1). Oba wan daut om Jesazen jeit, waut dee nich jleichen ooda waut sikj dee nich jerajcht väakjemt, dan denkjen dee aundasch doaräwa. Räd wie biejlikj mol von Taks tolen. Eemol worden Menschen en een Launt von Europa äwa dit befroacht. Een Vieedel von dee säden, “wan eena jleeft, daut eene Sort Taks ojjerajcht es, dan brukt eena dän nich betolen.” Daut es uk nich toom wundren, daut de Menschen von dit Launt lang nich aulen Taks betolen, waut de Rejierunk doa foddat.

10. Wuarom jehorch wie uk soone Jesazen, waut wie nich jleichen?

¹⁰ De Schreft wiest ons, daut de menschelje Rejierungen Lieden brinjen, daut dee unja dän Soton siene Kontroll sent un daut dee boolt woaren venicht woaren (Psa. 110:5-6; Liera 8:9, NW; Luk. 4:5-6). Oba dee sajcht uk, daut “deejanja jäajen Gott siene Ordnunk [es], dee jäajen de Rejierunk es”. Jehova lat daut nu noch too, daut de Menschen rejieren, om eene jewesse Ordnunk to hoolen, un hee well, daut wie dee sellen jehorchen. Doawäajen sajcht daut: “Tolt aulem, waut jie an schuldich sent”, un doa es met en, daut wie Taks tolen, de Rejierunk achten un dee jehorchen (Reem. 13:1-7). Veleicht denkj wie, daut een Jesaz ojjerajcht es ooda ons daut bloos toosat. Oba soo lang aus de Rejierungen nich waut von ons velangen, waut jäajen Jehova siene Jesazen es, jehorch wie dee, wiels Jehova daut haben well (Apj. 5:29).

11-12. (a) Waut deeden Josef un Maria, om een Jesaz notokomen, wan daut uk väl opp sikj haud? (Lukas 2:1-6). (b) Woo kjeem daut ut? (See uk de Bilda.)

 ¹¹ Wie kjennen von Josef un Maria äa Biespel lieren, waut reed wieren, de Rejierunk to jehorchen, wan daut uk noch waut opp sikj haud (läs Lukas 2:1-6). Aus Maria rom näajen Moonat schwanga wia, wort daut oppe Proow jestalt, aus see un Josef jehuarsom wieren. De Harscha von daut reemische Rikj, waut Augustus heet, velangd, daut aule sikj sullen en dee Staut enschriewen loten, wua see häastaumden. Josef un Maria musten doatoo derch de Boaj no Betlehem reisen, waut 150 Kilomeeta (93 Miel) auf wia. Dise Reis wudd sea ommaklich sennen, besonda fa Maria. Secha muaken dee sikj groote Sorjen doaräwa, woo ar un uk daut ojjebuarne Bäbe daut gonen wudd. Waut, wan see daut Bäbe hinjawäajes kjrieen wudd? Dit Bäbe sull je de Messias woaren! Oba leeten dee sikj von aul dit aufhoolen, de Rejierunk to jehorchen?

¹² Josef un Maria leeten sikj von aul dise Sorjen nich aufhoolen, daut Jesaz to jehorchen. Jehova säajend an doafäa. Maria kjeem goot en Betlehem aun un brocht doa een jesundet Bäbe to Welt un holp mau rajcht met, daut eene biblische Profezeiunk sikj kunn erfellen! (Micha 5:1).

13. Woo kaun onse Breeda daut togood komen, wan wie jehorchen?

¹³ Wan wie de Rejierungen jehorchen, kjemt ons daut togood un uk aundre. Wuarom kjenn wie daut sajen? Na, een mol wäajen wie de Strof utem Stich gonen, waut deejanje kjrieen, waut de Jesazen nich nokomen (Reem. 13:4). Wan wie jehorchen, kaun daut waut doaraun doonen, woo de Beaumte äwa Jehova siene Zeijen denkjen. Biejlikj en Nigeria kjeemen Joaren trigj mol Soldoten en een Vesaumlungshus nenn, aus doa jroz een Toopkomen wia. Dee sochten no soone Menschen, waut sikj doajäajen stalden, Taks to tolen. Oba de Väaschta von dee schekjt de Soldoten fuat un säd: “Jehova siene Zeijen betolen emma  äaren Taks.” Jiedatsmol, wan du de Jesazen nokjemst, halpst du met, daut Jehova siene Zeijen eenen gooden Nomen kjrieen. Un dis gooda Nomen kaun veleicht eenen Dach diene Breeda un Sestren beschitzen (Mat. 5:16).

14. Waut holp eene Sesta reedtosennen, de Rejierunk to jehorchen?

¹⁴ Ons woat daut veleicht nich emma jankren, de Rejierunk to jehorchen. Joanna, eene Sesta enne Stäts, sajcht: “Fa mie wia daut sea schwoa to jehorchen, wäajens eenje von mien Frintschoft sea ojjerajcht behaundelt worden von Beaumte.” Oba Joanna strenjd sikj aun, aundasch äwa de Rejierungs-Menschen to denkjen. Waut deed see? Ieeschtens: See hieed opp, soont em Internet to läsen, waut ar bat doa brocht, sikj äwa de Rejierunk to oajren (Spr. 20:3). Tweedens: See bäd doarom, daut Jehova ar halpen mucht, opp am to vetruen, enne Städ doaropp, daut de menschelje Rejierungen sikj wudden endren (Psa. 9:10-11). Un dreddens: See läsd Artikjels en onse Bieekja, waut wiesen, daut wie ons enne Politikj opp kjeene Sied stalen (Joh. 17:16). Joanna sajcht, wäajen see nu de Rejierunk achten un jehorchen deit, feelt see sikj väl bäta un haft ennalichen Fräd.

15. Wuarom kaun daut schwoa sennen, daut to jehorchen, waut Jehova siene Organisazion sajcht?

¹⁵ Jehova sajcht to ons: “Horcht no june Liera”. Daut sent dee, waut en de Vesaumlunk veroppgonen (Heb. 13:17). Ons Leida Jesus es volkomen. Oba dee, waut hee hia oppe Ieed aunjestalt haft toom ons aunleiden, sent onvolkomen. Daut kaun schwoa sennen, dee to jehorchen, besonda dan, wan dee waut sajen, waut wie nich doonen wellen. Soo jinkj dän Apostel Petrus daut mol. Aus een Enjel to am säd, daut hee sull waut Tieren äten, waut no daut Jesaz Moses no orrein wieren, säd Petrus daut nich bloos een mol auf, oba dree mol! (Apj. 10:9-16). Wuarom? Daut wia waut nieet fa am. Hee kunn nich vestonen, wuarom hee daut doonen sull. Hee wia daut aundasch jewant. Wan daut fa Petrus aul schwoa wia, eenen volkomnen Enjel to jehorchen, woo väl schwanda kaun daut dan fa ons sennen, onvolkomne Menschen to jehorchen!

16. Waut deed de Apostel Paulus, wan hee veleicht uk docht, daut de Rot, waut hee kjrieech, nich to vestonen wia? (Aposteljeschicht 21:23-24, 26).

¹⁶ De Apostel Paulus wia “reed to jehorchen”, wan von am uk waut velangt wort, waut hee nich vestonen kunn. De judische Christen säden, daut see soont jehieet hauden, daut Paulus de Menschen minkj lieed, “von Moses auftofaulen” un daut Jesaz Moses nich to achten (Apj. 21:21). De christelje, elre Mana en Jerusalem säden to Paulus, daut hee sull met vea Mana nom Tempel gonen un sikj doa reinjen, soo aus daut Jesaz Moses daut velangd. Doaderch wudd hee wiesen, daut hee daut Jesaz nokjeem. Oba Paulus wist, daut de Christen nich mea unja daut Jesaz wieren, oba hee deed daut doawäajen, wan hee uk nuscht orrajchtet jedonen haud. “Dän näakjsten Dach neem Paulus de Mana un reinjd sikj met an toop” (läs Aposteljeschicht 21:23-24, 26). Wäajen Paulus jehorcht, wia doa Eenichkjeit manke Breeda (Reem. 14:19, 21).

17. Waut lieet die daut, waut Stephanie beläwd?

¹⁷ Een Sesta, waut Stephanie heet, wia daut schwoa, eene Entscheidunk auntonämen, waut von daut Betel kjeem. See un äa Maun deenden schaftich en eene Grupp opp eene aundre Sproak. Oba aus de Grupp toojemoakt wort, worden see trigj no eene Vesaumlunk jeschekjt, waut  opp äare Muttasproak wia. See sajcht: “Ekj wia nuscht nich schaftich. Ekj jleewd nich, daut daut opp onse Sproak mea aun Help fäld.” Oba see wort sikj doawäajen eenich, dise Entscheidunk notokomen. See sajcht: “Lota kunn ekj seenen, wuarom de Entscheidunk, waut de Breeda muaken, goot wia. Väle Breeda un Sestren en onse Vesaumlunk haben nich Famielje, waut enne Woarheit sent. Un wie sent soo aus Elren fa dee jeworden. Ekj studia nu met eene Sesta, waut noch mau korz wada met de Vesaumlunk toop prädjen jeit. Un ekj hab nu uk mea Tiet, fa mie perseenlich to studieren.” See sajcht noch: “Ekj hab een reinet Jewessen, wiels ekj weet, daut ekj mien bastet deed toom jehorchen.”

18. Woo kjemt ons daut togood, jehuarsom to sennen?

¹⁸ Wie kjennen daut lieren, jehuarsom to sennen. Jesus “lieed doch derch lieden jehuarsom [to] sennen” un nich en Tieden, wua aules jlei rand (Heb. 5:8). Soo aus Jesus lia wie foaken en schwoare Tieden, jehuarsom to sennen. Biejlikj aum Aunfank von de COVID-19-Krankheit wort ons jesajcht, daut wie nich mea kunnen em Vesaumlungshus toopkomen, un wie kunnen uk nich mea von Hus to Hus prädjen gonen. Wia die daut schwoa, daut notokomen? Oba daut du jehorchen deetst, wia een Schutz fa die un du wieescht uk met diene Breeda un Sestren veeent un Jehova freid sikj doaräwa. Nu sent wie aula väl bäta reed, Aunwiesungen to jehorchen, waut wie en de groote Liedenstiet kjrieen woaren. Un daut kaun ons daut Läwen raden! (Hiob 36:11).

19. Wuarom west du jehuarsom sennen?

¹⁹ Wie haben jelieet, daut daut een deel goodet met sikj brinjt, jehuarsom to sennen. Oba daut mieeschte, wuarom wie Jehova wellen jehuarsom sennen es, wäajen wie am leewen un am jefaulen wellen (1. Joh. 5:3). Wie woaren Jehova kjeenmol sooväl trigjjäwen kjennen, aus hee fa ons jedonen haft (Psa. 116:12). Oba wie kjennen am jehorchen un uk dee, waut hee äwa ons aunjestalt haft. Wan wie jehuarsom sent, wies wie, daut wie weis sent un de Weise moaken Jehova sien Hoat froo (Spr. 27:11).