1. Соске шај те овел аменге пхаро те ова послушна?

 ДАЛИ понекогаш туке пхаро те ове послушно? Е цареске е Давидеске сине, адалеске молинѓа е Девле: „Бајрар ки манде желба те керав тли волја“ (Пс. 51:12). О Давид мангела сине е Јехова. Сепак, понекогаш сине леске пхаро те овел послушно, адава тано случај аменцар да. Соске? Јекх причина тани адаја со наслединѓем и погрешно желба те ова непослушна. Дујто бути, о Сатана цело време пробинела те чхивел амен те бунина амен против о Девел, исто сар со керѓа ов (2. Кор. 11:3). Хем трито, живинаја ко свето коте со иси бунтовно стави, о „духо кова со акана влијајнела ко непослушна чхаве“ (Еф. 2:2). Адалеске мора бут те трудина амен на само те борина амен против амаре грешна желбе, него хем против о притисок таро Сатана хем таро акава свето со керена ле упри аменде те шај те ова непослушна. Амен мора те трудина амен те ова послушна е Јеховаске хем околенге каске со ов денѓа авторитети.

2. Со значинела „спремно те шуна“? (Јаков 3:17).

² Читин Јаков 3:17. О Јаков сине водимо таро духо те пишинел кај о мудра мануша тане „спремна те шунен“. Со значинена акала лафија? Амен ваљани те манга те шуна околен каске со о Јехова денѓа одредено авторитети хем адава те кера ле спремно. Џанѓола пе, о Јехова на очекујнела амендар те ова послушна некаске со родела амендар те на икера амен ко лескере заповедија (Апо. 4:18-20).

3. Соске е Јеховаске тано важно те ова послушна околенге каске со ов денѓа авторитети?

³ Бут пути аменге полокхо те ова послушна е Јеховаске, него несаве манушеске. Адава тано аѓаар адалеске со о Јехова секогаш дела амен совршено водство (Пс. 19:7). Ама  нане исто е манушенцар колен со иси несаво авторитети адалеске со нане совршена. Сепак, амаро небесно Дад денѓа одредено авторитети е родителенге, е властенге хем е старешиненге (Изр. 6:20; 1. Сол. 5:12; 1. Пет. 2:13, 14). Кеда сием послушна ленге адалеа сием послушна е Јеховаске. Акана те дикха сар шај те ова послушна е манушенге коленге со о Јехова денѓа несаво авторитети, иако понекогаш аменге пхаро те прифатина хем те ова послушна ко упатствија со дена лен.

4. Соске бут чхаве на шунена пле родителен?

⁴ О терне авдиве дикхена сар јавера терне на шунена пумаре родителен (2. Тим. 3:1, 2). Соске бут лендар нане послушна? Несаве мислинена кај ленгере родителија тане лицемерна адалеске со вакерена ленге те керен нешто со ола коркори на керена. А јавера мислинена кај о советија таро ленгере родителија тане старомодна, нане практична или бут строга. Ако сиан терно, дали ту да некогаш мислинѓан аѓаар? Бутенге тано пхаро те икерен пе ки е Јеховаскири заповед: „Шунен тумаре родителен сар сој е Господарескири волја, соске адава тано праведно“ (Еф. 6:1). Со шај те поможинел туке те кере адава?

5. Соске о Исус тано најшукар пример баши послушност? (Лука 2:46-52).

⁵ Шај бут те сикљове баши послушност таро Исус кова сој најшукар пример башо адава (1. Пет. 2:21-24). Ов сине совршено мануш, а сине ле несовршена родителија. Ама о Исус поштујнела сине пле родителен чак кеда керена сине грешке хем кеда погрешно хаљовена ле сине ко несаве прилике (2. Мој. 20:12). Те дикха со случинѓа пе кеда е Исусе сине ле 12 берш. (Читин Лука 2:46-52.) Кеда иранена пе сине таро празнико таро Ерусалим, о Јосиф хем и Марија приметинѓе кај о Исус на сине ленцар. Џанѓола пе, ленгири одговорност сине те проверинен дали са ленгере чхаве тане ки група колаја со патујнена сине. Ама кеда о Јосиф хем и Марија ко крајо аракхле е Исусе, и Марија ле керѓа криво кај керѓа ленге проблемија. О Исус шај сине локхесте те вакерел лаке кај нане ко право. Наместо адава адалеа сар одговоринѓа пле родителенге сикавѓа кај поштујнела лен. Ама о Јосиф хем и Марија на халиле со значинена адала лафија. Сепак, о Исус понадари да сине ленге послушно.

6-7. Со шај те поможинел е терненге те овен послушна пумаре родителенге?

⁶ Тернален, дали понекогаш туменге пхаро те шунен тумаре родителен кеда ола грешинена или на хаљовена тумен? Ако оја, со шај те поможинел туменге? Прво, размислинен сар осетинела пе о Јехова. И Библија вакерела кеда шунена тумаре родителен, керена адава со „мангела о Господари“ (Кол. 3:20). О Јехова џанела кај понекогаш тумаре родителија нане те хаљовен тумен или ка чхивен туменге правилија кола со нане те овен туменге локхе те шунен лен. Ама кеда биринена те шунен лен чак ко асавке ситуацие, тегани радујнкерена е Јехова.

⁷ Дујто, размислинен сар осетинена пе тумаре родителија. Кеда шунена тумаре родителен адалеа радујнкерена лен хем иси лен побари доверба ки туменде (Изр. 23:22-25). Адава исто аѓаар ка керел те овен ленцар попаше. Јекх пхрал тари Белгија кова со викинела пе Александар вакерела: „Кеда почминѓум те шунав мле родителен тегани уљум ленцар попаше хем сием сине порадосна“. b Трито, адава со ка овен послушна тумаре родителенге акана, ка поможинел туменге ки иднина. О Пауло таро Бразил вакерела:  „Адава со сиклиљум те овав послушно мле родителенге поможинѓа манге те овав послушно е Јеховаске хем е јаверенге со иси лен авторитети“. Ко е Девлескоро Лафи иси јекх бут важно причина соске ваљани те овен послушна тумаре родителенге. Адатхе пишинела: „Те шај те овел туке шукар хем те ачхове бут време ки пхув“ (Еф. 6:2, 3).

8. Соске бут терне биринена те шунен пумаре родителен?

⁸ Бут терне дикхле кај тано башо ленгоро шукарипе те овен послушна. И Луиза таро Бразил, кола со иси 16 берш, сине лаке пхаро те хаљовел соске лакере родителија на дозволинѓе лаке несаво време те овел ла телефони, иако лакере врсникон сине лен телефони. Ама тегани ој халили кај лакере родителија адалеа заштитинена ла. Акана ој вакерела: „Адава со сиум послушно мле родителенге на пхандела ме васта, него адава шај те спасинел мло живото исто сар јекх заштитно појас“. Е Елизабетаке таро САД, кола со иси 18 берш, понекогаш лаке пхаро те шунел пле родителен. Ој вакерела: „Кеда на хаљовава целосно соске мле родителија чхивена несаве правилија тегани сетинава ман ко ситуацие кеда ленгере правилија заштитинѓе ман“. И Моника тари Ерменија, кола со иси 17 берш, вакерела кај секогаш сине порадосно кеда шунела сине пле родителен него кеда на шунела лен сине.

9. Со мислинена бут џене башо адава те ова послушна е законеске?

⁹ Бут џене признајнена кај тано шукар со иси световна владе хем кај ваљани те шуна барем несаве законија со дена адала владе (Рим. 13:1). Ама адала иста мануша на мангена те шунен о законија со на свиџинена пе ленге или кола со мислинена кај нане праведна. На пример, размислин башо адава те платинел пе данок. Ки јекх европско пхув бут мануша мислинена кај „тано исправно те на платинел пе данок ако мислинела пе кај нане фер“. Адалеске нане чудно со ки адаја пхув о мануша на платинена са о данокија кола со и влада родела лендар.

10. Соске сием послушна ко несаве законија, чак кеда аменге пхаро?

¹⁰ И Библија вакерела кај о манушикане владе анена муке, кај о Сатана владинела ленцар хем кај панда хари ка овен уништиме (Пс. 110:5, 6; Проп. 8:9; Лука 4:5, 6). Исто аѓаар вакерела аменге кај „окова со противинела пе баши несави власт противинела пе башо адава со о Девел дозволинѓа“. Аканаске, о Јехова дозволинела те постојнен о манушикане владе те шај те овел редо хем очекујнела амендар те шуна лен. Адалеске мора те шуна и библиско заповед: „Ден секаске адава со припадинела“, коте сој вклучиме о данокија, о поштовање хем и послушност (Рим. 13:1-7). Шај те мислина аменге кај несаво закони нане практично, нане фер хем кај  ка коштинел амен бут ако сием послушна. Ама, амен шунаја е властен соске о Јехова родела те шуна лен са џикоте на родена те кера нешто против лескере заповедија (Апо. 5:29).

11-12. Спрема Лука 2:1-6, со керѓе о Јосиф хем и Марија те шај те овен послушна е законеске, хем саво сине о резултати? (Дикх хем и слика.)

¹¹ Шај бут те сикљова таро пример е Јосифескоро хем е Маријакоро кола со сине спремна те шунен е властен чак кеда на сине ленге локхо. (Читин Лука 2:1-6.) Кеда и Марија сине ко ењато масек кхамни, о Август, о Римско императори заповединѓа ки цело Римско територија те керел пе попис. Адалеске о Јосиф хем и Марија ваљанѓе те џан ко Витлеем кова со сине дур 150 километрија а ко друмо сине бут брегија. Адава друмо ни хари на сине локхо, посебно е Маријаке. Ола сигурно секиринена пе сине ма те случинел пе нешто лаја или е бебеа џикоте сине ко друмо. Со ако астарена ла о дукха? Сепак, ко воги пхиравела сине е бебе кова со ваљани сине те овел о Месија. Дали акава шај сине те овел ленге оправдување те на шунен о закони?

¹² Иако е Јосифе хем е Марија сине лен шукар причине те секиринен пе, сепак ола сине послушна ко адава закони. О Јехова благословинѓа лен баши ленгири послушност. И Марија ресља састи ко Витлеем хем бијанѓа јекхе састе бебе, чак поможинѓа те исполнинел пе јекх библиско пророштво! (Мих. 5:2).

13. Сар шај амари послушност те влијајнел упро амаре пхраља?

¹³ Кеда сием послушна е властенге, адава тано башо амаро шукарипе хем е јаверенгоро. Соске вакераја аѓаар? Сар прво нане те ова казниме ако шунаја о закони (Рим. 13:4). Кеда сием послушна е властенге, поможинаја е јаверенге шукар те дикхен ко е Јеховаскере сведокија. На пример, англедер бут берша ки Нигерија џикоте икерела пе сине состанок, ки дворана кхувѓе војникија те роден бунтовникија кола со на мангена сине те платинен  данок. Ама о офицери вакерѓа е војниконге те џан песке адатхар, соске е Јеховаскере сведокија секогаш платинена данок. Секогаш кеда сиан послушно е законеске поможинеа те икерел пе чисто о анав е Јеховаскере сведоконгоро хем јекх диве адава шај те заштитинел те пхрален хем те пхењен (Мат. 5:16).

14. Со поможинѓа јекхе пхењаке спремно те шунел е властен?

¹⁴ Сепак, шај нане секогаш те манга те ова послушна е властенге. И Џоана јекх пхен тари Америка, признајнела: „Сине манге бут пхаро те овав послушно адалеске со несаве тари мли фамилија трпинѓе неправда околендар со сине ки власт“. Ама и Џоана свесно трудинѓа пе те променинел пло мислење башо властија. Сар керѓа адава? Прво, ој чхинавѓа те читинел ко социјална мреже информацие кола со керена негативно лафи башо властија (Изр. 20:3). Дујто, ој молинѓа е Јехова те поможинел ла те овел ла доверба ки лесте а на ки несави неви манушикани власт (Пс. 9:9, 10). Трито, ој читинѓа статие ко амаре публикацие баши неутралност (Јован 17:16). Акана и Џоана вакерела кај адалеске со поштујнела е властен иси ла мир кова со нашти те опишинел пе лафенцар.

15. Соске шај те овел аменге пхаро те ова послушна ко упатствија со авена тари е Јеховаскири организација?

¹⁵ О Јехова родела амендар те ова послушна „адаленге со водинена“ ко собрание (Евр. 13:17). Амаро Водачи о Исус тано совршено, ама окола со користинела лен акате теле ки пхув те шај те водинен тане несовршена. Шај нане аменге локхо те шуна лен, посебно кеда родена нешто амендар со на мангаја те кера. О апостол Петар ки јекх прилика добинѓа упатство кова со ко почеток на мангља те прифатинел ле. Кеда јекх ангели вакерѓа леске те хал животне кола со сине нечиста спрема е Мојсеескоро закони, о Петар одбинѓа те керел адава — хем адава на јекх пути, него трин пути! (Апо. 10:9-16). Соске одбинѓа? О неве упатствија на сине леске логична. Адава сине бут поразлично таро адава со сиклило те керел цело пло живото. Ако е Петареске сине пхаро те шунел упатствија таро јекх совршено ангели, кобор повише шај те овел аменге пхаро те шуна упатствија таро несовршена мануша!

16. Иако о упатствија со добинѓа лен о Павле шај на сине леске разумна, сепак со одлучинѓа те керел? (Апостолија 21:23, 24, 26).

¹⁶ О апостол Павле сине „спремно те шунел“ чак кеда несаве упатствија шај на сине леске разумна. О Евреија со сине христијања шунѓе лафија кај о Павле сикавела е христијанен со на сине Евреија „те циден пе таро Мојсеј“ хем кај на поштујнела е Мојсеескоро закони (Апо. 21:21). Адалеске о старешине таро Ерусалим вакерѓе леске те лел пеа штаре џенен хем те џал ко храми те чистинел пе спрема о обред те шај те сикавел кај икерела пе ко Закони. Ама, о Павле џанља кај о христијања на ваљани сине више те икерен пе ко Закони. Освен адава, ов на керѓа нешто со сине погрешно. Сепак о Павле одма керѓа адава со родинѓе лестар о старешине. Ки Библија пишинела: „О Павле тајсутно диве леља пеа е манушен хем чистинѓа пе спрема о обред заедно ленцар“. (Читин Апостолија 21:23, 24, 26.) Е Павлескири послушност поможинѓа те икерел пе о јекхипе машкар о пхраља (Рим. 14:19, 21).

17. Со сикљоваја тари Стефани?

¹⁷ Јекхе пхењаке со викинела пе Стефани сине пхаро те прифатинел и одлука со анѓе о одговорна пхраља ки лакири пхув. Ој хем лакоро ром уживинена сине те служинен ки јекх група со сине ки јавер чхиб. Пало несаво време о Бетел одлучинѓа те на овел  више група хем ола сине доделиме ко јекх собрание ки ленгири чхиб. И Стефани признајнела: „Сиум сине бут разочарими, мислинава сине кај нане добором бари потреба те иранен амен ко подрачје ки амари чхиб“. Сепак, ој одлучинѓа те поддржинел о неве упатствија. Ој вакерела: „Покасно халиљум соске е пхраленгири одлука сине мудро. Ко амаро нево собрание улем духовна родителија буте џененге кола сој тане коркори ко чачипе. Исто аѓаар проучинава јекхе пхењаја со ули палем активно. Хем акана иси ман бут повише време баши мли лично студија хем иси ман чисто совест соске џанава кај денѓум са мандар те овав послушно“.

18. Сави корист иси амен таро адава со сием послушна?

¹⁸ Секова јекх амендар шај те сикљовел те овел послушно. О Исус „сиклило те овел послушно“, ама на адалеске со сине ле идеална условија, него адалеске со цидинѓа муке (Евр. 5:8). Слично сар о Исус, амен да бут пути сикљоваја те ова послушна кеда накхаја таро пхаре ситуацие. На пример, дали сине туке пхаро те ове послушно кеда почминѓа и пандемија КОВИД-19 хем вакерѓе аменге те на џа више ки дворана хем ки служба таро кхер ко кхер? Сепак тли послушност заштитинѓа тут, керѓа те овел јекхипе ко собрание хем радујнкерѓа е Јехова. Акана сием поспремна те шуна секова упатство со ка добина ле ки бари неволја. Амаро живото ка зависинел таро адава! (Јов 36:11).

19. Соске мангеа те ове послушно?

¹⁹ Дикхлем кај и послушност анела бут благословија. Ама о благословија нане и главно причина соске шунаја е Јехова, него адалеске со мангаја ле хем мангаја те кера лескири волја (1. Јов. 5:3). Никогаш нашти те ирана е Јеховаске о шукарипе со керѓа аменге (Пс. 116:12). Ама амен шај те ова леске послушна хем околенге со денѓа авторитети. Ако сием послушна, сикаваја кај сием мудра, а о мудро радујнкерела е Јеховаскоро вило (Изр. 27:11).