1. Ngei nguwa dzimweni zvingatishuphira kuzwira?

 IMWIMWI munorangarira kuti nguwa dzimweni zvinoshupha kuzwira here? Mambo Dhavhidhi wairangarira kudaro. Ndiyo ndaa, iyena wakanamata kuna Mwari eciti: “Itai kuti ndigare no cido cekukuzwirai.” (Pis. 51:12) Dhavhidhi waida Djehovha. Kunyazi zvakadaro, nguwa dzimweni zvaimushuphira kuti iyena amuzwire. Uye zviro zvimwezvo zvingaitikawo katiri. Ngei? Cekutanga, ngekuti tiri anhu asikazi kukwana uye takabarhwa no cido cekuda kutama kuzwira. Cecipiri, ngekuti Sathani nguwa dzese unoedza kuti isusu tisagare ku dii ra Djehovha hingana zvaakaita. (2 Ako. 11:3) Uye cecitatu, takatendererhwa no migariro yekutama kuzwira ye nyika ino, “mwiya uri kuseenza mu ana asikazwiri.” (Aef. 2:2) Isusu tinodikana kupeta masimba akakura kuti tirhwisane no cido cedu cekuda kuita zvakashata uye tirhwisane no zviro zvakashata zvatinokhandirirhwa na Sathani uye no nyika ino kuti tisazwire. Tinoita izvona nge kuzwira Djehovha uye no aya aakagadza hinga atungamiriri.

2. Zvinoreyei kugara munhu “wakagadzirira kuzwira”? (Tiyago 3:17)

² Erengai Tiyago 3:17. Mutari Tiyago ecifemerhwa iyena wakatara kuti, munhu uno ungwaru “wakagadzirira kuzwira.” Asi izvi zviri kuda kureyei? Zvinoreya kuti tinodikana kugara takagadzirira kuti tizwire anhu aya akagadzwa na Djehovha kuti agare atungamiriri. Asi izvirokwazvo kuti Djehovha aaetseri kuti isusu tizwire munhu uya unotibvunza kuti tiite zviro zvisikapindirani no nhungamiriro dza Djehovha.—Zvii. 4:18-20.

3. Ngei zvinokosha kuna Djehovha kuti tizwire aya aakapasa masimba?

³ Izvirokwazvo kuti zviri nyore kuzwira Djehovha pano kuzwira munhu wakaita hinga isusu. Uye tinoziya kuti Djehovha unopasa nhungamiriro dzakakwana. (Pis. 19:7) Asi anhu ano  simba rekutungamirira, i anhu asikazi kukwana uye anguwapi dzese dzaanotipasa nhungamiriro dzakanaka. Kunyazi zvakadaro, Djehovha akapasa simba ku abereki, ku akuru uye ku aya anoseenza ku govherno. (Zvie. 6:20; 1 Ate. 5:12; 1 Ped. 2:13, 14) Patinoazwira zvezvirokwazvo tinonga tecizwira Djehovha. Mufundo ino, ticaona kuti tingazwira kudini anhu akapaswa simba na Djehovha kunyazi nguwa dzimweni zvecishupha kuzwira nhungamiriro dzawo.

4. Ngei ana akawanda asikazwiri abereki?

⁴ Madjaha akatendererhwa no shamwari dzekucikora “dzisikazwiri abereki awo.” (2 Ti. 3:1, 2) Ngei madjaha akawanda asikazwiri? Madjaha amweni anorangarira kuti abereki awo anoakumbira kuti aite zviro zvekuti awona aakwanisi kuzviita. Amweni anorangarira kuti nyika yacinja maningi uye kuti abereki awo akasarira sure zvekuti mazano awo aacabetseri kana kuti akanyanya kuoma. Imwimwi munorangarirawo kudaro here? Anhu akawanda anoona hinga kuti zvinoshupha maningi kuzwira zano rakatarhwa mu bhuku ra Aefeso 6:1 inoti: “Zwirai abereki enyu muna Tenzi, ngokuti izvi zvakanaka.” Ngazvipi zvingamubetserai kuti muite kudaro?

5. Maererano na Ruka 2:46-52, ngei Djesu ndi muezaniso wakanaka we mwana wakazwira abereki?

⁵ Imwimwi mungafundira kuzwira nge kuteedzera muezaniso wakanyasa kunaka kupinda dzese—Djesu. (1 Ped. 2:21-24) Iyena ainga ari munhu akakwana, asi abereki ake ainga asikazi kukwana. Kunyazi zvakadaro, iyena waireremedza abereki ake pa nguwa yaishaisha uye pa nguwa yaainga asikanyasi kuzwisisa. (Eki. 20:12) Onai zvakaitika pa nguwa yekuti iyena ainga aano makore 12 e kubarhwa. (Erengai Ruka 2:46-52.) Mhuri yake yainga iri ku Djerusarema. Asi abereki ake paaihwirira kumba aazi kuona kuti Djesu ainga asiripi pakati pawo. Zuzee na Mariya akapsvaka Djesu uye paakamuona, Mariya wakamupasa ndaa nge ndaa yekunetsa kaainga aita abereki ake! Djesu angadai akabhuya kuti zvaaita zvainga zvisiripi zve unatsi ngekuti wainga uri mutoro ku abereki kugara no cokwadi cekuti ana ese aripo pacikwata asati atanga kuenda kumba. Pano kudaro, Djesu akapasa mhinduro iri nyore uye ecipangidza rureremedzo. Asi Zuzee na Mariya “aazi kuzwisisa zvaibhuiwa na Djesu.” Kunyazi zvakadaro, Djesu “akarumbwa ecidzikanda pasi pawo.”

6-7. Zvinyi zvingabetsera madjaha kuzwira abereki awo?

⁶ Kodi imwimwi munoona kuti zvinoshupha kuzwira abereki enyu paanoita cishaishi kana kuti paasikamuzwisisi? Ngazvipi zvingamubetserai? Cekutanga, rangaridzai kuti Djehovha anozwa kudini. Bhaibheri rinobhuya kuti kana mukazwira abereki enyu nguwa dzese “izvi zvinopfadza Tenzi.” (Ako. 3:20) Djehovha anoziya kuti nguwa dzimweni abereki enyu angatama kumuzwisisa kana kuti nguwa dzimweni angamupasa mitemo inoita hinga isina basa. Kunyazi zvakadaro, kana mukazwira abereki enyu munosiya Djehovha ecipfara.

⁷ Cecipiri, rangaridzai kuti abereki enyu anozwa kudini kana mukaazwira. Zvezvirokwazvo awona anopfara uye anotanga kumugondai. (Zvie. 23:22-25) Kusiya izvona, munokhwedera dhuze nawo. Mudjaha umweni unozwi Alexandre unogara ku Bélgica unopanganidza kuti: “Pandakatanga kuita zviya zvaidiwa no abereki angu, ushamwari wedu wakacinja. Takatanga kuzwa tiri dhuze no padhuze uye taipfara maningi.” b Cecitatu, rangaridzai  kuti kuzwira kamunoita zvino kucamubetserai kudini muno ramangwana. Paulo unogara ku Brasil, unoti: “Kuzwira abereki angu kakandibetsera kuti ndizwire Djehovha kutobatanidzawo no aya ano simba re kutungamirira.” Hinga zvinorekethwa no Bhaibheri, imwimwi munocikonzero cakanaka cekuti muzwire abereki enyu. Irona rinoti: “Kuti zvese zvikuhambire zvakanaka uye kuti urarame ke nguwa yakareba panyika.”—Aef. 6:2, 3.

8. Ngei madjaha akawanda akasanangura kuzwira abereki awo?

⁸ Madjaha akawanda akaona kuti ciro cakanyanya kunaka kaari i kuzwira abereki awo. Luiza unogara ku Brasil, pakutanga wairangaridza kuti zvaishupha kuzwisisa kuti ngei iyena wainga asikadikani kugara no thurufunu. Iyena waibvunza abereki ake kuti ana ese e thunga rake ano thurufunu. Asi iyena wakakwanisa kuona kuti zvezvirokwazvo abereki ake aida kumudziirira. Zvino iyena unopanganidza kuti: “Inini ndinoona kuti kuzwira abereki angu akuzi kuita hinga hanzu yekubambidzira, asi kakaita hingana sintu ye seguransa ingaponesa upenyu.” Kuna Elizabeth mudjaha umweni weku Estados Unidos, nguwa dzimweni zviciri kumushuphira kuzwira abereki ake. Iyena unopanganidza kuti: “Paya pandisikanyasi kuzwisisa kuti ngei abereki angu andipasa mitemo, ndinoedza kuedzurira ngezve nguwa yekuti mitemo yawo yakandidziirira.” Monica unogara ku Armênia, wakaguma pakuona kuti zviro zviri nyore zvaibudirira kana iyena akazwira abereki ake.

9. Anhu akawanda anorangarirei ngezve kuzwira mitemo ye anyautongi?

⁹ Anhu akawanda anoziya kuti anoda anyautongi uye anoona kuti zvinobetsera kupurutana mitemo minganani yaanonga apaswa no “anhu ano masimba.” (Aro. 13:1) Asi anhu amwe-amwewo anoramba kuzwira mitemo iyona kana asikaipfariri kana kuti paanoiwona hinga isina unatsi. Ngo muezaniso, onai mutemo wakaringana no kuripa musoho. Mu nyika imweni yeku Europa, pa anhu arongomuna umwe “unorangarira kuti azvizi kunaka kuripa musoho.” Ndiyo ndaa, anhu anogara mu nyika iyona aaripi misoho yese inokumbirhwa no anyautongi.

10. Ngei isusu tecizwira mitemo kunyazi iya yatisikapfariri?

¹⁰ Bhaibheri rinobhuya kuti anyautongi anokonzera matambudziko anoonererhwa na Sathani Dhiyabhurosi uye acaparadzwa mbai-mbai pano. (Pis. 110:5, 6; Mup. 8:9; Ruka 4:5, 6) Rinoenderera reciti: “Munhu wese unoshora ano masimba ari kurhwisana no urongwa wa Mwari.” Parizvino, Djehovha anotendera kuti ayautongi e anhu agarepo kuti zviro zvirumbwe zvakarongeka uye iyena unoetsera kuti tiazwire. Hino, ‘tinodikana kupasa zviro  zvese zvaanodikana kupaswa’ zvinobatanidza musoho, rureremedzo uye kuzwira. (Aro. 13:1-7) Nguwa dzimweni, tingarangarira kuti mitemo imweni aina basa, aina unatsi kana kuti icatishuphira. Asi isusu tinozwira Djehovha uye iyena anotibvunza kuti tinodikana kuzwira anyautongi. Tinosiya basi kuazwira kana mutemowo usikapindirani no zviya zvinodiwa na Djehovha.—Zvii. 5:29.

11-12. Maererano na Ruka 2:1-6, Zuzee na Mariya akadikana kuitei kuti azwire mutemo, uye mugumisiro wakhona ngaupi? (Onaiwo mafoto.)

¹¹ Tingafunda no miezaniso ya Zuzee na Mariya, awona ainga akagadzirira kuzwira mitemo ye anyautongi kunyazi zveciashuphira. (Erengai Ruka 2:1-6.) Onai muedzo wekuzwira waakabatana nawo, Mariya paainga anopamwiri. Mutungamiriri we ku Roma waizwi Augustus, wakagadza mutemo wekuti anhu ese ahwirire ku thaundi raakabarirhwa kuti ataririswe. Zuzee na Mariya aidikana kuita rhwendo rekuenda ku Bheterehema, rhwendo rino makirometro anodarika 150. Gwanza rainga rakadzara no matunhu uye miterero. Rhwendo iri rainga risiripi nyore, maka-maka kuna Mariya wainga ano pamwiri pe mwedzi dzinokwana kuita 9. Zvinyi zvaizoitika kana akatanga kurhwadziwa ngokuda kubara mugwanza? Pamweni awona akanetseka maningi nge ndaa ye uthongo wa Mariya no mwana wainga ari mundani, ngekuti iyena ndiye waizogara Mesiya. Izvi zvaizoita here kuti awona atame kuteerera anyautongi?

¹² Zuzee na Mariya aazi kusiya kuti anetseke nge zviro zvaaibatana nazvo, awona akapurutana anyautongi. Uye Djehovha akakomborera kuzwira kawo. Mariya wakaguma ku Bheterehema akacengeteka uye wakabara mwana uno uthongo wakanaka uye wakatobetsera kuti umwe we uphorofiti udzadzike!—Mik. 5:2.

13. Ngei kuzwira kedu kunobetsera hama dzedu?

¹³ Kuzwira mutemo we anyautongi, kunobetsera isusu no amweni. Kuitisa kudini? Cekutanga, isusu atiphanicwi hinga kuphanicwa  kunoita amweni asikazwiri mutemo. (Aro. 13:4) Uye kuzwira kedu kungabata-bata maonero aanoita apupuri a Djehovha hinga cikwata. Ngo muezaniso, makore akadarika ku Nigéria masurudado akapinda mu Nyumba ye Umambo ecipsvaka anhu asikadi kuripa misoho. Asi mutungamiriri we masurudado wakakumbira kuti masurudado abude mu Nyumba ye Umambo uye wakabhuya kuti: “Apupuri a Djehovha nguwa dzese anoripa musoho.” Pese patinopurutana mitemo ye anyautongi, anhu anoona zvakanaka miitiro ye aseenzi a Djehovha uye mune ramangwana pamweni miitiro ii yakanaka ingakwanisa kudziirira hama dzedu.—Mat. 5:16.

14. Cinyi cakabetsera hanzvadzi imweni “pakugadzirira kuzwira” anyautongi?

¹⁴ Kunyazi zvakadaro, pamweni atizi kugadzirira kuzwira anyautongi. Joanna hanzvadzi yeku Estados Unidos inopanganidza kuti: “Kandiri zvaishupha maningi kuzwira ngekuti amweni e mu mhuri mangu ainga akabathwa zvisina unatsi no anyautongi.” Hanzvadzi Joanna akaona kuti aidikana kucinja maonero awo. Cekutanga, yakasiya kuerenga zviro zvaibudiswa pa maredhi sosiyari zvaishora zviro zvaiizwa no atongi. (Zvie. 20:3) Cecipiri, yakaita munamato yecikumbira simba kuti igonde Djehovha haiwa kuetsera cinjo ku anyautongi. (Pis. 9:9, 10) Cecitatu, iyona yakaerenga mabhuku edu anoreketa ngezve kutama kugara no dii ratinotsigira. (Juau 17:16) Nyamasi uno, Joanna unoti kuzwira uye kureremedza anyautongi kunoita kuti azwe ari “mu runyararo uye akaterama.”

15. Ngei pamweni paya zvingatishuphira kuzwira nhungamiriro dze sangano ra Djehovha?

¹⁵ Djehovha anokumbira kuti “tizwire aya ano ubaba wekutungamirira mu ungano.” (Aheb. 13:17) Kunyazi mutungamiriri wedu Djesu akakwana, anhu aya aanoseenzesa pakutungamirira pa nyika pano, anhu asikazi kukwana. Ndiyo ndaa, nguwa dzimweni tingaona zvecishupha kuazwira maka-maka paanotikumbira kuti tiite ciro catisikadi kuita. Pa nguwa imweni Pedru wakabatana no cinetso cekutama kuzwira. Iyena wakapaswa nhungamiriro no ngirozi kuti arhye zvinyama zvimweni zvisikazi kucena maererano no mutemo wa Mozesi, asi Pedru wakaramba kuzwira—haiwa kamwe basi asi katatu kese! (Zvii. 10:9-16) Asi ngei Pedru wakaramba kuzwira? Nhungamiriro ipsva ii, yaiita hingana isina basa. Yainga yakasiyana nge mushobo wainga wakadjairhwa na Pedru. Kana zvakashuphira Pedru kuzwira nhungamiriro dzaakapaswa no ngirozi yakakwana, rangaridzaiwo kuti zvingashupha kudini katiri kuzwira munhu usikazi kukwana!

16. Pauro wakaitei kunyazi nhungamiriro yaakapaswa yaiita hingana isina musoro? (Zviito 21:23, 24, 26)

¹⁶ Muphostori Pauro wainga “akagadzirira kuzwira” nhungamiriro dzekuti dzaioniwa hinga dzisina basa. Akristu e ku Djudha ainga azwa mapsveda e kuti iyena waiparidzira zviro zvainga “zvisikapindirani no zviro zvakabhuiwa na Mozesi” uye kuti wainga asikareremedzi Mutemo wa Mozesi. (Zvii. 21:21) Atungamiriri e Cikristu e ku Djerusarema akabvunza Pauro kuti atore anarume arongomuna kuti awona aceneswe uye izvona zvaizopangidza kuti Pauro waireredza Mutemo wa Mozesi. Asi Pauro waiziya kuti Akristu ainga asikadikanizve kuteerera Mutemo uye iyena wainga asikazi kushaisha. Kunyazi zvakadaro, iyena wakazwira asikabvunzisi zvakawanda. Iyena “wakatora anarume aya oenda nawo, pedzepo oceneswa pamwepo nawo.” (Erengai Zviito 21:23, 24, 26.) Kuzwira ka Pauro kakaita kuti paoneke kubatana pakati pe hama.—Aro. 14:19, 21.

17. Mafundei no muezaniso wa Stephanie?

¹⁷ Hanzvadzi imweni inozwi Stephanie, yakashuphirhwa maningi kutendera cisananguro cainga caizwa no hama dzaionerera ngezve basa raiizwa mu nyika yawo. Iyona no mwamuna wayo, aiseenzera mucikwata ce mireketero ye nyika ye kunza uye aipfara maningi ikona. Asi Bheteri yakaita kuti cikwata ici cifungwe uye kazado ii yakagadzwa kuti ihwirire ku ungano ye mureketero wawo. Stephanie unopanganidza kuti: “Ndakatsukwara maningi. Inini ndairangaridza kuti kuparidza mumureketero wedu waikosha maningi.” Kunyazi zvakadaro, iyena wakasanangura kuzwira. No kuhamba ke nguwa Stephanie unoti: “Ndakazozwisisa kuti ngei hama dzakaita cisananguro ici. Isusu takazogara hinga abereki ku hama dzakawanda dzainga dzisina hama dziri mu cokwadi uye ndiri kufundawo Bhaibheri no hanzvadzi yainga isikacaiti basa ke nguwa yakareba ndisikareketi kuti zvino ndaano nguwa yakawanda yekuita fundo ye munhu ega. Ndino hana yakacena ngekuti ndakapeta masimba kuti ndizwire Djehovha.”

18. Ngei kuzwira kakatinakira?

¹⁸ Isusu tingafundira kuzwira. Djesu aazi kufundira kuzwira pa migariro yakanaka, asi “wakafundira kuzwira” kubva pa “migariro inoshupha yaakabatana nayo.” (Aheb. 5:8) Kuitawo hinga Djesu, isusu tinofundira kuzwira patinobatana no migariro inoshupha. Ngo muezaniso, pakutanga ke nhenda ye COVID-19 isusu takapaswa nhungamiriro yekuti tiime kuungana pa Nyumba ye Umambo uye kuparidzira nyumba no nyumba. Imwimwi makagara no cinetso ce kutondoedza nhungamiriro ii here? Asi kutondoedza kenyu kakamudziirirai, kakabetsera ungano kuti irumbwe yakabatana uye makapfadza Djehovha. Zvino, tese isusu tanyasa kugadzirira kutondoedza nhungamiriro ipi hayo pamweni yaticapaswa panonga peciitika dambudziko guru. Uye nge kuteerera nhungamiriro idzi, ndizvona zvicaita kuti tiponese upenyu wedu!—Djobo 36:11.

19. Ngei imwimwi mecida kuzwira?

¹⁹ Taona kuti kutondoedza nhungamiriro kunounzisa makomborero. Asi cikonzero cikuru cekuzwira Djehovha, ngecekuti tinomuda maningi uye tinoda kumupfadza. (1 Juau 5:3) Isusu atizombokwanisi kuripa Djehovha nge zviro zvakanaka zvatakaizirhwa naye. (Pis. 116:12) Asi isusu tingakwanisa kumuzwira uye kuzwira aya ano masimba. Kana tikaita izvona, tinonga tecipangidza kuti tino ungwaru. Munhu uno ungwaru unopfadza mwoyo wa Djehovha.—Zvie. 27:11.