1. Ndi ngani zwi tshi nga ri konḓela u thetshelesa?

 NAA nga tshiṅwe tshifhinga ni wana zwi tshi ni konḓela u thetshelesa? Khosi Davida na ene nga tshiṅwe tshifhinga o wana zwi tshi mu konḓela u thetshelesa, nga zwenezwo o rabela kha Yehova a ri: “Nṱuṱuwedze uri ndi ḓiimisele u u thetshelesa.” (Ps. 51:12) Davida o vha a tshi funa Yehova. Naho zwo ralo, nga zwiṅwe zwifhinga u tou fana na riṋe o wana zwi tshi mu konḓela u thetshelesa. Ndi ngani? Tsha u thoma, u sa ṱoḓa u thetshelesa ndi zwithu zwe ra tou bebwa nazwo. Tsha vhuvhili, Saṱhane u bvela phanḓa a tshi lingedza u ita uri ri vhe mashandukwa u fana nae. (2 Vhakor. 11:3) Tsha vhuraru, ro tangwa nga vhathu vhane vha sumbedza muya wa vhushandukwa, “muya une wa ṱuṱuwedza vha sa thetshelesi, une wa vhudzula hoṱhe-hoṱhe.” (Vhaef. 2:2) Ri tea u shuma nga maanḓa u itela u kunda dzema ḽa u ita tshivhi na u lwisana na mutsiko une Saṱhane na shango ḽawe vha ri itela wone wa uri ri sa thetshelese. Ri tea u shuma nga nungo dzoṱhe u itela u thetshelesa Yehova na u thetshelesa vhe a vha vhea uri vha range phanḓa.

2. Zwi amba mini u ‘ḓiimisela u thetshelesa’? (Yakobo 3:17)

² Vhalani Yakobo 3:17. Yakobo we a hevhedziwa o amba uri vhathu vho ṱalifhaho vha vha vho ‘ḓiimisela u thetshelesa.’ Humbulani uri zwenezwi zwi amba mini. Ri fanela u ḓiimisela u thetshelesa vhe Yehova a vha vhea uri vha range phanḓa. Zwi tou pfala uri Yehova ha lavheleli uri ri thetshelese muthu ane a ri humbela uri ri pfuke milayo yawe ye a ri vhetshela yone.—Mish. 4:18-20.

3. Ndi ngani zwi zwa ndeme kha Yehova uri ri thetshelese vhane vha ri ranga phanḓa?

³ Ri nga wana zwi tshi ri lelutshela u thetshelesa Yehova nṱhani ha u thetshelesa vhathu nga nṱhani ha uri Yehova u dzulela u ri ṋea vhulivhisi ho ri teaho. (Ps. 19:7) Fhedzi a zwo ngo ralo nga vhathu vhane vha ri ranga phanḓa. Naho zwo ralo, Khotsi ashu wa ṱaḓulu u a tendela vhabebi, vhashumeli vha muvhuso na vhahulwane vha tshi ri ranga phanḓa. (Mir. 6:20; 1 Vhathes. 5:12; 1 Pet. 2:13, 14) Musi ri tshi  vha thetshelesa, ri vha ri tshi khou thetshelesa Yehova. Kha ri haseledze nga ha uri ri nga thetshelesa hani vhathu vhe Yehova a vha tendela uri vha range phanḓa, naho nga tshiṅwe tshifhinga zwi tshi ri konḓela u tevhedza vhulivhisi havho.

4. Ndi ngani vhana vhanzhi vha sa thetshelesi vhabebi vhavho?

⁴ Vhaswa vho tangwa nga thangana ya murole wavho vhane a vha “thetshelesi vhabebi.” (2 Tim. 3:1, 2) Ndi ngani vhunzhi havho vha sa thetshelesi? Vhaṅwe vha pfa u nga vhabebi vhavho vha na muhoyo ngauri vha lavhelela uri vhana vhavho vha ite zwithu zwine vhone vhaṋe vha kundelwa u zwi ita. Vhaṅwe vha vhona u nga ngauri shango ḽi khou shanduka, nyeletshedzo ine vhabebi vhavho vha vha ṋea yone yo fhelelwa nga tshifhinga kana uri i na mikano minzhi-minzhi. Arali ni muswa, naa na inwi ni ḓipfa nga yeneyo nḓila? Vhanzhi vha wana zwi tshi vha konḓela u tevhedza mulayo wa Yehova une wa ri: “Thetshelesani vhabebi vhaṋu u tendelana na zwine Murena a zwi funa, ngauri zwo luga.” (Vhaef. 6:1) Ndi mini zwine zwa nga ni thusa uri ni kone u thetshelesa?

5. Ndi ngani Yesu e tsumbo yavhuḓi ya muswa we a thetshelesa vhabebi? (Luka 2:46-52)

⁵ Ni nga guda kha Yesu ane a vha tsumbo yavhuḓi ya u thetshelesa. (1 Pet. 2:21-24) O vha e muthu a si na tshivhi o bebiwaho nga vhabebi vha re na tshivhi. Fhedzi Yesu o ṱhonifha vhabebi vhawe na musi vha tshi ita vhukhakhi, vha sa mu pfesesi nga zwiṅwe zwifhinga. (Ek. 20:12) Ṱhogomelani zwo iteaho musi Yesu e na miṅwaha ya 12. (Vhalani Luka 2:46-52.) Yesu o ṱuwa na vhabebi vhawe Yerusalema, fhedzi musi vha tshi humela hayani a vho ngo zwi ṱhogomela uri o vha e si navho. Ho vha vhu vhuḓifhinduleli ha Yosefa na Maria uri vha ite vhungoho ha uri vhana vhavho vhoṱhe vho vha vhe kha tshigwada tshe tsha vha tshi tshi khou humela hayani u bva vhuṱamboni. Musi Yosefa na Maria vha tshi fhedzisela vho wana Yesu, Maria o vha o dinalea ngauri Yesu o vha remisa ṱhoho nga u sala Yerusalema. Yesu o vha a tshi nga kha ḓi vha o ḓiimelela nga u amba uri ene ho ngo ita tshithu tsho khakheaho. Fhedzi o fhindula vhabebi vhawe nga nḓila i pfalaho na nga ṱhonifho. Naho zwo ralo, Yosefa na Maria “a vho ngo pfesesa zwe a vha a tshi khou zwi amba.” Fhedzi Yesu o “dzula a tshi ḓiṱukufhadza khavho.”

6-7. Ndi mini zwine zwa nga thusa vhaswa u thetshelesa vhabebi vhavho?

⁶ Vhaswa, naa nga tshiṅwe tshifhinga ni wana zwi tshi ni konḓela u thetshelesa vhabebi vhaṋu nga nṱhani ha vhukhakhi vhune vha vhu ita kana nga nṱhani ha uri a vha ni pfesesi? Ndi mini zwine zwa nga ni thusa? Tsha u thoma, humbulani nga ha uri Yehova u ḓipfa hani. Bivhili i amba uri musi ni tshi thetshelesa vhabebi, “ndi zwine zwa takadza Murena.” (Vhakol. 3:20) Yehova u a zwi ḓivha uri tshiṅwe tshifhinga vhabebi vhaṋu vha a kundelwa u ni pfesesa kana uri tshiṅwe tshifhinga vha a ni vhetshela milayo ine zwa ni konḓela u i tevhedza. Naho zwo ralo, arali na nanga u vha thetshelesa, zwi ita uri Yehova a takale.

⁷ Tsha vhuvhili, humbulani nga ha uri vhabebi vhaṋu vha ḓo ḓipfa hani. Musi ni tshi thetshelesa vhabebi vhaṋu zwi ita uri vha takale na uri vha ni fhulufhele. (Mir. 23:22-25) Zwi ḓo dovha zwa ita uri ni vhe na vhushaka ha tsini navho. Muṅwe wahashu wa tshinnani ane a pfi Alexandre ane a bva Belgium o ri: “Musi ndi tshi thoma u ita zwe vhabebi vhanga vha vha vha tshi nkhumbela uri ndi zwi ite, zwo ita uri ri vhe na vhushaka ha tsini na uri ri takale.” b Tsha vhuraru, humbulani nga ha uri u thetshelesa zwi ḓo ni thusa hani tshifhingani tshi ḓaho. Muṅwe wahashu wa tshinnani ane a pfi Paulo ane a dzula ngei Brazil o ri: “U guda u thetshelesa vhabebi vhanga zwo nthusa uri ndi kone u thetshelesa Yehova na u thetshelesa vhaṅwe vhane vha ranga phanḓa.” Ipfi ḽa Mudzimu ḽi ni ṋea zwiitisi zwavhuḓi zwa u thetshelesa vhabebi vhaṋu. Ḽi  ri: “Uri zwi u tshimbilele, u tshile tshifhinga tshilapfu kha ḽifhasi.”​—Vhaef. 6:2, 3.

8. Ndi ngani vhaswa vhanzhi vha tshi nanga u thetshelesa vhabebi vhavho?

⁸ Vhaswa vhanzhi vho vhona nḓila ine zwithu zwa vha tshimbilela ngayo zwavhuḓi musi vha tshi thetshelesa. Luiza ane na ene a bva Brazil, mathomoni na ene zwo vha zwi tshi mu konḓela u pfesesa uri ndi ngani vhabebi vhawe vha sa tendi a tshi vha na founu. Zwo vha zwi tshi mu dina ngauri o vha a tshi vhona thangana dzawe dza murole dzi na founu. Fhedzi o zwi ṱhogomela uri vhabebi vhawe vho vha vha tshi khou mu tsireledza. Zwino u a zwi ḓivha uri musi a tshi thetshelesa vhabebi vhawe, ho ngo fanela u pfa u nga vha khou mu konḓisela vhutshilo, ngauri nyeletshedzo ine vha mu ṋea ndi yone ine a i ṱoḓa uri a kone u tshila zwavhuḓi. Wahashu Elizabeth ane a dzula ngei Amerika u kha ḓi wana zwi tshi mu konḓela u thetshelesa vhabebi vhawe nga zwiṅwe zwifhinga. U ri: “Musi ndi sa pfesesi uri ndi ngani vhabebi vhanga vho vhea miṅwe milayo, ndi humbula nga ha zwifhinga zwe milayo yavho ya ntsireledza.” Monica ane a dzula Armenia u amba uri zwithu zwi a mu tshimbilela zwavhuḓi musi a tshi thetshelesa vhabebi vhawe, fhedzi musi a sa vha thetshelesi a zwi mu tshimbileli zwavhuḓi.

9. Vhathu vhanzhi vha ḓipfa hani nga ha u tevhedza mulayo?

⁹ Vhathu vhanzhi vha a tenda uri ri tea u vha na mivhuso na uri ri tea u thetshelesa miṅwe ya milayo ine yeneyo “mivhuso” ya ri vhetshela yone. (Vharoma 13:1) Fhedzi vhenevho vhathu vha nga litsha u thetshelesa milayo ine vha sa i takalele kana ine vha pfa u nga a i pfali. Sa tsumbo, kha ri ambe nga ha u badelwa ha mithelo. Kha ḽiṅwe shango ngei Yuropa, vhathu vhanzhi vha tenda uri “a zwo ngo khakhea u sa badela mithelo arali ni tshi pfa u nga a i pfali.” Ndi ngazwo kha ḽeneḽo shango vhadzulapo vhaḽo vha sa badeli mithelo yo fhelelaho ine muvhuso wa i ṱoḓa.

10. Ndi ngani ri tshi thetshelesa na milayo ine ra pfa ri sa i funi?

¹⁰ Bivhili i a zwi khwaṱhisedza uri mivhuso ya vhathu i ita uri vhathu vha tambule, na uri i khou langwa nga Saṱhane nahone hu si kale i ḓo fheliswa. (Ps. 110:5, 6; Muh. 8:9; Luka 4:5, 6) I dovha ya ri vhudza uri “ane a lwa na muvhuso u khou lwa na ndugiselelo ya Mudzimu.” Zwa zwino Yehova u khou tendela mivhuso i tshi vhusa uri zwithu zwi dzudzanyee nahone u lavhelela uri riṋe ri thetshelese vhavhusi. Nga zwenezwo, ri tea u ‘ṋea vhoṱhe zwo vha fanelaho,’ zwenezwi zwi katela u badela mithelo, u vha ṱhonifha na u vha thetshelesa. (Vharoma 13:1-7) Ri nga vhona u nga muṅwe mulayo a wo ngo tea u vha hone, a u pfali kana uri zwi a ḓura u u tevhedza. Fhedzi ri thetshelesa vhenevho vhavhusi ngauri Yehova u ri vhudza uri ri vha thetshelese, tenda vha sa ri vhudzi uri ri ite zwithu zwi sa tendelani na milayo yawe.​—Mish. 5:29.

11-12. Samusi zwo sumbedzwa kha Luka 2:1-6, ndi mini zwe Yosefa na Maria vha zwi ita u itela u thetshelesa mulayo naho zwo vha zwi songo leluwa nahone ho vha na mvelelo dzifhio? (Sedzani zwifanyiso.)

¹¹ Ri nga guda kha tsumbo ya Yosefa na Maria, vhe vha vha vho ḓiimisela u thetshelesa vhavhusi  na kha zwiimo zwe zwa vha zwi tshi konḓa u ita nga u ralo. (Vhalani Luka 2:1-6.) Musi Maria o no fhedza miṅwedzi i ṱoḓaho u vha ṱahe o vhifha muvhilini, vhavhusi vho vha vha tshi ṱoḓa uri ene na Yosefa vha ite zwiṅwe zwithu zwe zwa vha zwi tshi ḓo vha konḓela. Augusto o vhea mulayo wa uri vhathu vhoṱhe vha re fhasi ha Muvhuso wa Vharoma vha tea u ḓiṅwalisa. Yosefa na Maria vho vha vha tshi tea u tshimbila lwendo lu ṱoḓaho u vha khilomithara dza 150 vha tshi khou tshimbila fhethu hu re na zwikwara vha tshi ya Betlehema. Lwonolwo lwendo lwo vha lu tshi ḓo vha lwendo lu songo leluwaho, zwihuluhulu kha Maria. Vha nga vha vho vha vha tshi khou vhilaela nga ha mutakalo wa Maria na wa ṅwana wavho a sa athu bebwaho. Ho vha hu tshi ḓo itea mini arali a tea u beba vhe nḓilani? Ṅwana we a vha o vhifha muvhilini ngae o vha a tshi ḓo vha Messia o fhulufhedziswaho. Naa zwenezwi zwo vha zwi tshi ḓo ita uri vha si thetshelese vhavhusi?

¹² Yosefa na Maria a vho ngo tendela dzenedzo mbilaelo dzi tshi ita uri vha si thetshelese mulayo. Yehova o vha fhaṱutshedza nge vha thetshelesa. Maria o swika Betlehema o tsireledzea, a beba ṅwana a re na mutakalo wavhuḓi nahone zwenezwo zwo ita uri zwo ṅwalwaho Bivhilini zwi itee.​—Mika 5:2.

13. U thetshelesa hashu hu nga kwama hani vhahashu?

¹³ Musi ri tshi thetshelesa vhavhusi zwi vhuyedza riṋe zwa dovha zwa vhuyedza na vhaṅwe. Nga nḓila-ḓe? Zwi ita uri ri sa sedzane na masiandoitwa a u sa thetshelesa mulayo. (Vharoma 13:4) Musi ri tshi thetshelesa vhavhusi, vha ḓo zwi vhona uri Ṱhanzi dza Yehova vha a thetshelesa na uri ndi vhadzulapo vhavhuḓi. Sa tsumbo, miṅwahani minzhi yo fhiraho ngei Nigeria, maswole vho dzhena Holoni ya Ṱhanzi dza Yehova nga tshifhinga tsha miṱangano, vha tshi khou ṱoḓa vhathu vhe vha vha vha tshi khou gwalaba nga nṱhani ha u sa ṱoḓa u badela muthelo. Fhedzi muhulwane wa maswole a vhudza vhenevho maswole uri vha ṱuwe, o ri: “Ṱhanzi dza Yehova vha a badela muthelo.” Tshifhinga tshoṱhe musi ni tshi thetshelesa mulayo, ni vha ni tshi khou ita uri Ṱhanzi dza Yehova vha dzule vhe na dzina ḽavhuḓi ḽine vha vha naḽo, ḽeneḽo dzina ḽavhuḓi ḽi nga tshidza na u tsireledza vhahashu ḽiṅwe ḓuvha.​—Mat. 5:16.

14. Ndi mini tsho thusaho muṅwe wahashu wa tshifumakadzini u ‘ḓiimisela u thetshelesa’ vhavhusi?

¹⁴ Nga zwiṅwe zwifhinga ri pfa ri sa ṱoḓi u  thetshelesa vhavhusi. Muṅwe wahashu wa tshifumakadzini ane a pfi Joanna wa ngei Amerika o ri: “Zwo vha zwi tshi nkonḓela u thetshelesa ngauri vhaṅwe muṱani wahashu vho vha vha songo farwa zwavhuḓi nga vhavhusi.” Fhedzi Joanna o ita vhuḓidini vhu tevhelaho uri a shandule nḓila ine a humbula ngayo. Tsha u thoma, o litsha u vhala zwithu zwe zwa vha zwi kha vhudavhidzani ha nnyi na nnyi zwe zwa vha tshi ita uri a vhe na maḓipfele a si avhuḓi nga ha vhavhusi. (Mir. 20:3) Tsha vhuvhili, o rabela kha Yehova uri a mu thuse uri a vhe na fhulufhelo khae nṱhani ha u fhulufhela uri hu ḓo vha na tshanduko kha muvhuso wa vhathu. (Ps. 9:9, 10) Tsha vhuraru, o vhala khandiso dzashu dzi ambaho nga ha u sa dzhia sia. (Yoh. 17:16) Zwino Joanna u amba uri u ṱhonifha vhavhusi na u vha thetshelesa zwo ita uri a vhe na “mulalo.”

15. Ndi ngani nga zwiṅwe zwifhinga zwi tshi nga ri konḓela u thetshelesa vhulivhisi vhu bvaho ndanguloni ya Yehova?

¹⁵ Yehova u ri humbela uri ri ‘thetshelese vhane vha ri ranga phanḓa’ tshivhidzoni. (Vhahev. 13:17) Naho Yesu Murangaphanḓa washu a si na tshivhi, vhathu vhane a vha shumisa u ri ranga phanḓa fhano kha ḽifhasi vha na tshivhi. Zwi nga ri konḓela u vha thetshelesa zwihuluhulu arali vha ri humbela uri ri ite zwiṅwe zwithu zwine ra sa ṱoḓe u zwi ita. Muapostola Petro na ene zwo vhuya zwa mu konḓela u thetshelesa. Musi muruṅwa a tshi mu vhudza uri a ḽe ṋama ya zwipuka zwe nga fhasi ha Mulayo wa Mushe zwa vha zwi songo kuna, Petro o hana, ho ngo hana luthihi fhedzi o hana luraru. (Mish. 10:9-16) Ndi ngani? Honovhu vhulivhisi vhuswa he a ṋewa, khae ho vha vhu sa pfali. Zwo vha zwi zwithu zwe a vha a sa athu vhuya a zwi ita vhutshiloni hawe hoṱhe. Arali Petro o wana zwi tshi mu konḓela u thetshelesa vhulivhisi vhu bvaho kha muruṅwa a si na tshivhi, a zwi mangadzi uri na riṋe nga tshiṅwe tshifhinga zwi nga ri konḓela u thetshelesa vhulivhisi vhune ha bva kha vhathu vha re na tshivhi.

16. Naho muapostola Paulo a tshi nga vha o humbula uri vhulivhisi he a ṋewa a vhu pfali, o ita mini? (Mishumo 21:23, 24, 26)

¹⁶ Muapostola Paulo o vha o ‘ḓiimisela u thetshelesa’ naho hu uri vhulivhisi he a vhu ṋewa o vha a tshi nga vha o pfa u nga a vhu pfali. Vhakriste vha Vhayuda vho pfa mavharivhari nga ha Paulo a uri Paulo o vha a tshi khou huwelela kha vhathu uri “vha songo tevhedza mulayo wa Mushe” na uri o vha a tshi khou nyadza wonoyo Mulayo. (Mish. 21:21) Vhakalaha vha Vhakriste vha ngei Yerusalema vho vhudza Paulo uri a dzhie vhanna vhaṋa a ṱuwe navho thembeleni u itela u ḓikunakisa nga lwa mulayo u itela u sumbedza uri u khou tevhedza Mulayo. Fhedzi Paulo o vha a tshi zwi ḓivha uri Vhakriste vho vha vha si tsha vha nga fhasi ha Mulayo. Nahone o vha songo ita tshithu tsho khakheaho. Naho zwo ralo, Paulo o ita zwe vha amba nga u ṱavhanya. “Nga ḓuvha ḽi tevhelaho Paulo a ṱuwa na vhenevho vhanna, a ya u ḓikunakisa nga lwa mulayo navho.” (Vhalani Mishumo 21:23, 24, 26.) Nga nṱhani ha uri Paulo o thetshelesa, o ita uri hu vhe na vhuthihi vhukati hawe na vhahawe.​—Vharoma 14:19, 21.

17. Ndi mini zwine ra zwi guda kha tshenzhelo ya Wahashu Stephanie?

¹⁷ Muṅwe wahashu wa tshifumakadzini ane a pfi Stephanie o wana zwi tshi mu konḓela u ṱanganedza phetho ye ya itwa nga vhahashu vha re na vhuḓifhinduleli shangoni ḽa hawe. Ene na mukalaha wawe vho vha vha tshi khou shuma vho takala kha tshigwada tsha luṅwe luambo. Ofisi ya davhi yo mbo ḓi vala tshenetsho tshigwada, vhenevho vhavhingani vha rumelwa murahu kha tshivhidzo tsha luambo lwa havho. Stephanie u ri: “Ndo vha ndi songo takala na luthihi, ndo vha ndi sa humbuli uri hu nga vha hu na ṱhoḓea kha tshivhidzo tsha luambo lwashu.” Naho zwo ralo, o dzhia phetho ya u tikedza honoho vhulivhisi vhuswa he vha ṋewa. U ri: “Nga u ya ha tshifhinga, ndo thoma u vhona uri yeneyo phetho yo vha i ya vhuṱali. Kha tshivhidzo tshashu tshiswa hu na vhathu vhanzhi vhane vha bva miṱani ya vhathu vhane vha si vhe Dziṱhanzi. Nga zwenezwo ri vhumba vhushaka ha tsini navho  na u vha ṱuṱuwedza. Ndi khou guda na muṅwe wahashu wa tshifumakadzini ane a kha ḓi bva u vhuyedzedzwa tshivhidzoni. Nahone zwino ndo no vha na tshifhinga tsho engedzeaho tsha u vha na ngudo ya muthu nga eṱhe.” O dovha a ri: “Ndi na luvalo lwo kunaho ngauri ndo ita zwoṱhe zwine nda nga kone u itela u thetshelesa.”

18. Ri vhuyelwa hani musi ri tshi thetshelesa?

¹⁸ Ri nga guda u thetshelesa. Yesu “o guda u pfa,” hu si e kha zwiimo zwavhuḓi, fhedzi “nga nṱhani ha u tambudzwa.” (Vhahev. 5:8) U fana na Yesu, kanzhi ri guda u thetshelesa musi ri kha zwiimo zwi si zwavhuḓi. Sa tsumbo, musi dziedzi ḽa COVID-19 ḽi tshi thoma, ro humbelwa uri ri ime u ya miṱanganoni Holoni ya Ṱhanzi Dza Yehova na u ima u ita mushumo wa u huwelela nnḓu nga nnḓu. Naa no wana zwi tshi ni konḓela u thetshelesa? Fhedzi u thetshelesa haṋu zwo ni tsireledza, zwa ita uri ni vhe na vhuthihi na vhahaṋu, zwa dovha zwa ita uri Yehova a takale. Zwa zwino roṱhe ro ḓilugiselela khwine u thetshelesa vhulivhisi vhune ra ḓo wana nga tshifhinga tsha maṱungu mahulu. U tshidzwa hashu hu ḓo ḓitika nga u thetshelesa honovhu vhulivhisi!​—Yobo 36:11.

19. Ndi ngani ni tshi ṱoḓa u thetshelesa?

¹⁹ Ro guda uri u thetshelesa zwi ḓisa phaṱhutshedzo nnzhi. Fhedzi ri thetshelesa Yehova ngauri ri a mu funa na uri ri ṱoḓa u mu takadza. (1 Yoh. 5:3) A hu na zwine ra nga lifhela Yehova ngazwo kha zwoṱhe zwe a ri itela zwone. (Ps. 116:12) Fhedzi ri nga mu thetshelesa na u thetshelesa vhe a vha vhea uri vha range phanḓa. Arali ra thetshelesa, ri ḓo vha ri tshi khou sumbedza uri ro ṱalifha. Nahone vho ṱalifhaho vha ita uri mbilu ya Yehova i takale.​—Mir. 27:11.