1. Con Yehova ubed umiyo tego nenedi ni jutic pare?

 WANG’ ma pol Lembe pa Mungu yero nia weg bedopwe gibino weg tego. Re saa moko gibed ginwang’u nia gi ng’ic. Ku lapor, nindo moko ubimo Daudi ubed unwang’u nia e tek ve “got,” re nindo mange lworo ubed unege. (Zab. 30:7) Kadok nwang’u Samson ubino tek lee nikum tego mi tipo pa Mungu de, re egam eng’eyo nia m’umbe tegone, eromo ‘doko ng’ic, man ebedo calu dhanu mange.’ (Pok. 14:5, 6; 16:17) Weg bedopwe maeno ceke gibino tek ndhu nikum tego ma Yehova umiyo igi en.

2. Pirang’o jakwenda Paulo uyero nia e ng’ic man e teki? (2 Jukorintho 12:9, 10)

² Jakwenda Paulo de ugam ung’eyo nia etie ku yeny mi tego m’uai i bang’ Yehova. (Som 2 Jukorintho 12:9, 10.) Calu ju dupa m’i kindwa, en de ebed enyego ku remokum. (Gal. 4:13, 14) Saa moko, ebed eii bende aia nitimo gin ma ber. (Rum. 7:18, 19) Saa mange ke ebed edieng’ lee man cwinye ubed uai kadok i kum kwo pare. (2 Kor. 1:8, 9) Re kinde m’e ng’ic, edoko tek. Nenedi? Yehova ubed umiyo ire tego m’ebino ku yenyne kara edok tek.

3. Wabidwoko wang’ penji ma kani i thiwiwec maeni?

³ Yehova ung’olo nia wan bende ebidwokowa tek. (1 Pet. 5:10) Ento wacopo nwang’u ngo tego maeno ka wakonjo cingwa jebele. Ku lapor, moter mi muthukari copo ketho eringo. Re mito jaring muthakarine re m’utuge. Kumeno bende, Yehova utie ayika nimiyo iwa tego ma  watie ku yenyne, re wacikara nitimo lembe moko kokoro pi ninwang’e. Dong’ ecopo miyo iwa tegone nikadhu kud i yo ma kanigi? Man ukwayu watim ang’o pi ninwang’e? Wabidwoko wang’ penji maeno kinde ma wabeweco iwi ayi m’emiyo ko tego ni Yona, ni Maria ma min Yesu man ni jakwenda Paulo. Wabineno bende ayi m’ebemedere ko nimiyo tego ni jutic pare mi rundi mwa eni.

4. Wacopo nwang’u tego m’uai i bang’ Yehova nenedi?

⁴ Yo acel ma wacopo nwang’u ko tego m’uai i bang’ Yehova utie nirwo. Pi nidwoko wang’ rwo mwane, Yehova copo miyo iwa “tego m’usagu ceke.” (2 Kor. 4:7) Wacopo nwang’u bende tego nwang’u wabesomo Lembe pare man wabenyamu iye. (Zab. 86:11) Lembe ma Yehova uyero iwa i Biblia ‘utie ku tego.’ (Ebr. 4:12) Pieno, kan iberwo i bang’e man ibesomo Lembene, ebimiyo iri tego m’itie ku yenyne pi niciro, pi nigwoko anyong’a peri kunoke pi nipong’o rwom ma pek ma jumiyo i kori. Dong’ wakewec iwi ayi m’emiyo ko tego ni jabila Yona.

5. Pirang’o jabila Yona ubino ku yeny mi tego?

⁵ Jabila Yona ubino ku yeny mi tego. Eringo tic ma tek ma Yehova ugam umiye. Eno uketho eyenyo bayu kwo pare saa ma wavuvu ma tek ubekoto i wigi, man eketho kadok kwo mi juwoth wagi de i ariti. Kinde ma jubole i pii, enwang’ere i kabedo ma col bii i cindi rec moko ma dit. Iparu nia ewinjere nenedi kuca? Nyo eparu nia dong’ ebecitho? Nyo ebino paru nia Yehova udaru wenje? M’umbe jiji, cwinye ung’abere lee mandha.

6. Nimakere ku Yona 2:1, 2, 7, ang’o m’umiyo tego i kum Yona saa m’ebino i cindi rec?

⁶ Yona utimo ang’o pi ninwang’u tego saa m’ebino kende liyo i cindi rec? I adundo, erwo. (Som Yona 2:1, 2, 7.) Kadok nwang’u egam ejai ni Yehova de, re cwinye ubino tek nia kan ejwigere man eloko cwinye, ebiwinjo rwo pare. Enyamu bende i lembe iwi Lembagora. Pirang’o wayero kumeno? I rwo pare m’ekiewo i Yona thek 2, etiyo ku wec dupa ma nwang’ere bende i Zaburi. (Ku lapor, nen lembe m’uyenyo rombo i kind Yona 2:2, 5 ku Zaburi 69:1; 86:7.) Ubenen kamaleng’ nia Yona ugam ung’eyo giragora maeno cuu. Saa m’enyamu igi kinde ma en’i peko, cwinye udoko tek nia Yehova bikonye. I ng’eye, enwang’ere iwi ng’om m’uthwo man ebino ayika niyiyo man nitimo tic ma judok jumiye i ng’eye.—Yon. 2:10–3:4.

7-8. Umego moko mi Taïwan unwang’u tego nenedi i saa mi peko?

⁷ Lapor pa Yona copo konyowa kinde ma wabekadhu kud i peko ma tung’ tung’. Ku lapor, umego moko ma nyinge Zhiming b mi ng’om mi Taïwan utwoyo twoyo ma pek. M’umedo maeno, eciro jai ma kwiny mi wedi pare pi yiyoyic pare. Ento Yehova umiyo ire tego nikadhu kud i rwo man ponji. Eyero kumae: “Saa moko ka peko uwok, cwinya ng’abere lee ma dong’ edoko ira tek nikwiyo kuma pi nitimo ponji para ma segi.” Re eweko ngo cwinye utur. Emedo kumae: “Ku kwong’a, arwo i bang’ Yehova. I ng’eye, aroyo ekuter (earphone) para i itha man awinjo wer mwa mi Ker. Saa moko, an de awotho wer ku dwanda ma  piny nitundo ma kuma poto, kan acaku ponjo piny.”

⁸ Ponji ma segi ukonyo Zhiming ninwang’u tego mi ciro peko i ayi m’ekeegeno de ngo. Ku lapor, kinde ma dong’ kume ubegony i ng’ey operasio moko ma pek m’ekadhu kud i iye, munganga acel uyero nia ukwayu judwok rimo i kume pilembe rimbe ujwik lee. Uthieno m’i wang’ operasio parene, egam esomo pi nyamego moko m’ukadhu kud i operasio ma rom eno. Rimb nyamegone ugam ujwik nisagu pare; re eyiyo ngo nia judwok rimo i kume man de asu edog ekey. Kpawa maeno ukonyo Zhiming nicungo ma tek.

9. Ka peko moko ubenuri lee, ukwayu itim ang’o? (Nen bende cal.)

⁹ Saa m’ibekadhu kud i peko, nyo cwinyi ng’abere akeca ma dong’ edoko iri tek nikoro lembe mir adundeni thwolo thwolo ni Yehova? Kunoke nyo ava ponji peri ma segi ai i kumi? Poy nia Yehova nyang’ cuu i lembe m’ibenweng’iri i iye. Pieno kadok nwang’u irwo i adundo kende de, cwinyi copo bedo tek nia ebimiyo iri gin ma tap m’itie ku yenyne. (Efe. 3:20) Ka remo peri uketho etie iri tek nisomo man niponjo piny, iromo ii niwinjo som mi Biblia kunoke mi girasoma mwa m’ujengere iwi Biblia ma jumaku. Iromo nwang’u bende nia etie ber niwinjo wer kunoke nineno video mwa moko ma nwang’ere i jw.org. Kan iberwo i bang’ Yehova man ibesayu wang’ rwo perine i girasoma ma tung’ tung’ m’emiyo, nyutho nia ibemito edwoki tek.

10. Umego ku nyimego mwa gicopo dwokowa tek nenedi?

¹⁰ Yehova copo tiyo kud umego ku nyimego mwa pi nidwokowa tek. Gicopo ‘konyowa man gitielo cwinywa lee’ kinde ma wan’i peko kunoke kinde m’etie iwa tek nipong’o rwom moko ma pek. (Kol. 4:10, 11) Andha, watie ku yeny mi jurimo asagene i nindo mi “can.” (Rie. 17:17) Ka wabenwang’u nia wa voc, juyic wadwa gicopo miyo iwa kony mi thenge mi kum  man mi thenge mi tipo. Dong’ wakewec iwi ayi ma jumange gikonyo ko Maria ma min Yesu.

11. Pirang’o Maria ubino ku yeny mi kony?

¹¹ Maria ubino ku yeny mi kony. Kepar pi kite ma cwinye ung’abere ko i ng’ey ma malaika Gabriel umiyo ire rwom ma pek ma nia ebinwang’u ic. Nwang’u fodi egamere ngo, kadi awiya de etungo ngo. Re ebecigwoko nyathin ma bidoko Masiya. Man calu ma fodi etimo ngo ribiri zoo de, ebikoro lembuno ceke nenedi ni Yosefu ma gibecinyomo kude?—Luka 1:26-33.

12. Nimakere ku Luka 1:39-45, Maria unwang’u tego m’ebino ku yenyne kani?

¹² Maria unwang’u tego m’ebino ku yenyne kani pi nipong’o rwon ma segi man ma pek maeno? Esayu kony i bang’ jumange. Ku lapor, ekwayu Gabriel ukor ire kite ma lembene bitimere ko. (Luka 1:34) Nyanok i ng’eye, ewotho “i ng’om gudi” mi Yuda pi niciliewo Elisabeti ma wat pare. Ebino liew ma pire tek lee. Elisabeti uwok uyunge man ku kony mi tipo pa Yehova eewo lembila ma tielo cwiny iwi nyathin pa Maria ma fodi unyolere ngo. (Som Luka 1:39-45.) Maria uyero nia Yehova ‘unyutho ire tego pare ku cinge.’ (Luka 1:46-51) Etiyo ku Gabriel man Elisabeti pi nidwoko Maria tek.

13. Nyamego moko mi Bolivie unwang’u bero ma kani kinde m’ekwayu kony mir umego ku nyimego?

¹³ Calu Maria, in bende icopo nwang’u tego i bang’ juyic wedu. Nyamego moko ma nyinge Dasuri mi ng’om mi Bolivie de ubino ku yeny mi kony ma kumeno. Kinde ma junwang’u nia won utie ku twoyo moko ma thum ungo man jucere i odiyath, emiyere pi nigwoke. (1 Tim. 5:4) Re ebino ire yot ungo saa ceke. Eyero kumae: “Wang’ ma pol abed anwang’u nia aromo medara ngo nigwoke.” Nyo ekwayu kony de? Ekeekwayu ngo. Ekoro kumae: “Abino mito ngo nia asend umego. Aparu nia Yehova re ma bimiyo ira kony m’atie ku yenyne. Re adog anyang’ nia kan akoyara ku jumange, nyutho nia amito adar peko para gira.” (Rie. 18:1) Dasuri umaku yub mi kiewo barua ni jurimbe man ekoro igi peko pare. I ng’eye, eyero kumae: “Akoso wec ma tap m’acopo tiyo ko pi nikoro kite ma juyic wada gitiela ko. Gibed gikelo iwa cam i odiyath man gitielo cwinya ku verse mi Biblia. Etie ber magwei ning’eyo nia watie ngo kendwa. Watie i kind juruot ma lac pa Yehova ma gitie ayika nikonyowa, niwak kudwa, man ninyego karacelo kudwa.”

14. Pirang’o ukwayu wajol kony mi judong cokiri?

¹⁴ Yo acel ma Yehova miyo ko iwa tego utie nikadhu kud i bang’ judong cokiri. Gitie giramiya m’etiyo ko pi nidwokowa tek man niketho wanwang’ yom. (Isa. 32:1, 2) Pieno ka cwinyi ung’abere, kor peko peri igi. Ka gimiyo iri kony, jole yot yot kum Yehova copo dwoki tek nikadhu kud i bang’gi.

15. Wa Jukristu watie ku genogen ma kani?

¹⁵ Genogen mwa m’ujengere iwi Biblia de copo dwokowa tek. (Rum. 4:3, 18-20) Wa Jukristu watie ku genogen ma yawe mbe mi kwo rondo ku rondo; nik’ebed iwi ng’om ma bidoko ni paradizo kunoke i polo. Genogenne miyo iwa tego mi ciro peko, mi rweyo lembanyong’a man mi pong’o rwom ma tung’ tung’ ma watie ko  i cokiri. (1 Thes. 1:3) Jakwenda Paulo de udoko tek nikum genogen.

16. Pirang’o jakwenda Paulo ubino ku yeny mi tego?

¹⁶ Paulo ubino ku yeny mi tego. I barua m’ekiewo ni Jukristu mi Korintho, eporere kud agulu ma ng’ic mir ulobo kum saa moko ebed enwang’ere nia ‘juride,’ ‘cwinye ng’abere,’ ‘jubenyayu ragedo i kume,’ man ‘juredhe thathara.’ Kadok kwo pare de ubino i ariti. (2 Kor. 4:8-10) Ekiewo wec maeno i saa mi woth pare mir adek mi tic mi misioner. Re i ng’eye enwang’ere ku peko ma lith nisagu. Udul dhanu ma ng’eicwiny uopo i igi uloy i wiye, jutwiye, eoy i pii, man jubole i kol.

17. Nimakere ku 2 Jukorintho 4:16-18, ang’o m’ukonyo Paulo niciro peko?

¹⁷ Pi niwang’u tego mi ciro peko maeno, Paulo uketho wiye i kum genogen pare. (Som 2 Jukorintho 4:16-18.) Eyero ni Jukristu mi Korintho nia kadok nwang’u kume ma yo woko “ubenyothere” de, ebiweko ngo lembuno utur cwinye. Eketho wiye i kum anyim pare. Genogen pare mi kwo rondo ku rondo i polo ubino gin “ma yawe mbe,” m’usagu amulaic moko ci m’ebino nwang’ere ko. Enyamu bende i lembe i wiye, uketho enwang’u nia ebedoko “nyen kubang’ rupiny kubang’ rupiny.”

18. Genogen mi nindo m’ubino ukonyo umego Tihomir ku juruot pare nenedi?

¹⁸ Umego moko ma nyinge Tihomir mi ng’om mi Bulgarie, unwang’u tego nikum genogen pare. I kind oro moko m’ukadhu ceng’ini eni, Zdravko m’umin ma nok utho ku aksida. I ng’eye, Tihomir ubino ku can ma lee i cwinye pi kare moko. Pi ninyego ku canne, en ku juruot pare giparu pi lembe ma bitimere i saa pa cer. Ekoro kumae: “Ku lapor, waweco iwi kaka ma wabirombo ku Zdravko i iye, iwi cam ma wabitedo pi nijole, dhanu ma wabilwong’o i nambune, man iwi lembe ma wabikoro ire iwi kajik ceng’.” Tihomir  uyero nia wigi ma giketho iwi genogen migi ukonyogi niciro man nikuro nindo ma Yehova bicero umin i iye.

19. Icopo timo ang’o kara genogen peri udok teki? (Nen bende cal.)

¹⁹ Icopo dwoko genogen peri tek nenedi? Ku lapor, kan itie ku genogen mi kwo rondo ku rondo iwi ng’om, som lembe ma Biblia ukoro iwi paradizo man nyam iye. (Isa. 25:8; 32:16-18) Par pi kite ma kwo bibedo ko i ng’om ma nyen. Kepar nia dong’ in i iye: Ibeneno ng’a? Ibewinjo ang’o? Ibewinjiri nenedi? Pi nineno ayi ma paradizo bibedo ko, nen cal m’ubenyutho kwo ma kuca kunoke video mi wer ma thiwiye tie Ng’om ma nyen m’ubebino, Eni ceng’ini, kunoke Kepar nia in’i Paradizo. Ka saa ceke wabeparu pi genogen mi kwo i ng’om ma nyen, peko mwa ‘bibedo pi saa moko kende man there de bibebo yot.’ (2 Kor. 4:17) Andha, Yehova bidwoki tek nikadhu kud i genogen m’emiyo iri.

20. Wacopo nwang’u tego kani kadok kinde ma wabewinjara nia wa tie ng’ic?

²⁰ ‘Nikum Mungu wabinwang’u kero’ kadok kinde ma wabewinjara nia wa tie ng’ic. (Zab. 108:13) Yehova udaru miyo piny m’itie ku yenyne pi ninwang’u kero m’uai i bang’e. Pieno, kan itie ku yeny mi kony pi nipong’o rwom moko, pi niciro peko, kunoke pi nigwoko anyong’a peri, rwo i bang’e kud adundeni ceke pi nicoro i vute man say telowic pare nikadhu kud i ponji peri ma segi. Jol tielocwiny mir umego ku nyimego peri. Par pi genogen peri, e ibinwang’u ‘kero lee nikum tego ma dwong’ pa [Mungu], kara ituc niciro lembe ceke ku twiyocwiny man kud anyong’a.’—Kol. 1:11.