1. Itini nolitengan, midokoay ci Yihofaan a tamdaw samaanay milifok to ˈicel?

 O TANEKTEKAY ciˈicelay a tamdaw ko madimadiay midokoay to Kawas a tamdaw sanay ko Fangcalay Cudad, nikawrira malonayan nanay cangra nolatekay. Tinakoen, miharateng ko Hongti ci Tafiti to niyah, latekay sano ‘lotokay a tanektek,’ kawra nolatekay ‘matalaway a mamirmir.’ (ˈOlic 30:7) Ano matomes no fangcalay saocor ci Samson i, taˈangayay ko ˈicel, nikawrira mafanaˈay cingra, ano malahdaw ko fangcalay saocor i, ‘malecaday to romaroma tamdaw cowato ka taˈangay ko ˈicel.’ (Kakitaan 14:5, 6; 16:17) Ira ko ˈicel nonini a madimadiay sikawdan, samanen iraay ko sapadama ni Yihofa.

2. O malonayay ko niyah, kawra kamayan o ciˈicelay hano saan ko sowal no tarokos ci Pawlo hani? (2 Korinto 12:9, 10)

² Tarokos ci Pawlo mihayiay to misaaliay ko niyah to sapafeli ni Yihofa a ˈicel. (ˈOsien ko 2 Korinto 12:9, 10.) Malecaday cingra kitanan ciadadaay ko tireng. (Kalatiya 4:13, 14) Latekay pasangaray cingra midemak to matatodongay a demak. (Loma 7:18, 19) Latekay macariraway caka rihaday ko falocoˈ ningra. (2 Korinto 1:8, 9) Nikawrira, hacowa malonay ci Pawlo i, hacowaay ira ko ˈicel. Misamaanay hani? Samanen pafelian ni Yihofa ci Pawlo to misaalian a ˈicel, patanektek a paˈicel ci Pawloan.

3. Onini lalakaw papacaˈof to manan a salicay?

³ Mikiˈokay ci Yihofa to papafeli to ˈicel kitanan, patanektek a paˈicel kitanan. (1 Pitiro 5:10) Kawra sapilifokaw kita to sapafeli Ningra a ˈicel, cowa ko sasawad sa a midemak. Tinakoen, o incing micikelohay to paliding talaˈayaw romakat, kawra o parakatay a tamdaw o mamilipaˈ to padawdawan ngaˈ ngaˈay talaˈayaw. Malecaday, makahiay ci Yihofa pafeli kitanan to misaalian a  ˈicel, kawra mamidemak kita to matatodongay a demak ngaˈ milifok to sapadama Ningra. Pakaynian ni Yihofa i manan a pakayraan padama kitanan tanektek a ciˈicel hani? O mamidemak kita to manan ngaˈ milifok to sapafeli Ningra a ˈicel hani? Sakafanaˈaw to caˈof nonini tosa a salicay, nengnengen ita itini nolitengan samaanay ci Yihofa pafeli to ˈicel i pairasolay a Yonaan, wina ni Yis ci Mariyaan ato tarokos ci Pawloan. Maminengnengho kita samaanay ci Yihofa anini, tano malecaday a pakayraan pafeli to ˈicel i sikawdan Ningra.

4. Sasamaan kita mikitini ci Yihofaan milifok to ˈicel?

⁴ Sapilifokaw to sapafeli ni Yihofa a ˈicel, cecay pakayraan i, mitolon Cingranan. Papacaˈof ci Yihofa kitanan, pafeli kitanan to ‘kasapaan a ˈicel.’ (2 Korinto 4:7) Roma i, miasip kita to Fangcalay Cudad halo midotim to lalomaˈay a lalakaw, o mamilifok to ˈicel, samanen o Kimad no Kawas ‘o ciˈicelay.’ (Hipray 4:12; ˈOlic 86:11) Mitolon kiso ci Yihofaan ato mikingkiw to Kimad i Fangcalay Cudad o tatanektekto a ciˈicel, ngaˈay mihadidi to pasangaray, padadotoc a lipahak, milahci to pasangaray a ˈinorong. Nengnengen samaanay ci Yihofa patanektek ci Yonaan.

5. O pairasolay a Yona hano misaaliay to ˈicel hani?

⁵ Misaaliay ko pairasolay a Yona to ˈicel. Patorodan ni Yihofa ci Yona to cecay pasangaray a ˈinorong, kawra mikalicay ci Yona to tamina a milaliw, telocto pakayni i cecay taˈangayay faliyos mangata mapatay cingra, pairaayho to katalawan no romaroma tamdaw i tamina. Mafahkol ci Yona i riyar ikor, cecay taˈangayay foting mitaˈemoday cingranan. Toniya tatokian itiniay ci Yona i kafahalan a kitiraan, satoˈeman sanay ko taliyok. Samaanay ko harateng ni Yona hani? O mamapatayto ko niyah sanay cingra han? Mifalahanto ni Yihofa cingra sanay miharateng han? Maedeng matalaway a mamirmir ci Yona itiya.

6. Mikitini Yona 2:1, 2, 7, itini i tiyad no foting ci Yona samaanay milifok to ˈicel hani?

⁶ Itiniay toˈemanay a tiyad no foting ci Yona miliyasay toniya hekal, samanay cingra milifok to ˈicel hani? Mitolonay cingra. (ˈOsien ko Yona 2:1, 2, 7.) Soˈlin cowa pitengil cingra to sowal ni Yihofa isaˈayaw, nikawrira mikifalocoˈay cingra pasasiyor hanaca misapoeneray mitolon ci Yihofaan. Pakasoˈlinay cingra papacaˈof ci Yihofa cingranan. Roma i, midotimay ci Yona to sowal no Fangcalay Cudad, hano mafanaˈ kita hani? Itini Yona saka 2 fedengan maˈoningay ko satolon ningra, adihayay a sowal malecaday to sowal itini ˈOlic. (Tinakoen, palalinien ko Yona 2:2, 5 ato ˈOlic 69:1; 86:7.) Mahapinangay, mananamay ci Yona to sowal itini ˈOlic. Itini pasangaray tatokian midotim cingra tonini a sinael, pakasoˈlinay to papadamaen ni Yihofa cingra. Ikor, patikolay ci Yona i hadhad, hanaca maharekto misaday milahci to patorodan ni Yihofa cingranan a roma ˈinorong.—Yona 2:10–3:4.

7-8. Itini Taiwan a cecay faˈinayan salikaka samaanay milifok to ˈicel, ngaˈay miemem to sapalifet?

⁷ Ano tahalifa kita to masakenakenaay a sapalifet i, wa ngaˈay mikitini taˈarawan ni Yona milifok to sapakalalok. Nengnengen ko cecay tinakoan. Itiniay Taiwan faˈinayan salikaka ci Ciming b pakidemay ko adada no tireng, pakayniayho i pihakelongan micada to pisafelit no paro no lomaˈ, nikawrira mitolon ato mikingkiw paˈicelay cingranan. Sanay cingra: “Misiˈayaw to pasangaray, tada macariraway kako nolatekay, awaay ko pakayraan rihaday ko falocoˈ misongilaˈ mikingkiw.” Nikawrira caay ka pisawad ci Ciming. Sanay cingra: “Salakat, mitolonay kako ci Yihofaan, dotoc mitengilay kako to pahemeken romadiw ci Yihofa a radiw. Latekay, samadahan  ko ngihaˈ ako romadiw toniya radiw. Masayar ko falocoˈ ikor, misatapangay kako mikingkiw.”

⁸ Mikitini i notekedan a pikingkiw milifokay ci Ciming to taˈangayay a ˈicel. Kinacecayay midemakay cingra to cecay taˈangayay pitokad, ikor sanay ko kangkofo papacomoden to remes cingra, samanen o hongsipaw ningra cangoˈotayto. Kawra, itini ˈayaw no pitokad a dadaya mikingkiway ci Ciming to nalifetan no cecay fafahiyan salikaka. Oya fafahiyan salikaka midemakay to malecaday a pitokad, hanaca o hongsipaw ningra ikakaay ko kacangoˈot to ni Ciming, kawrira cowa ka pacomod to remes ko fafahiyan salikaka, hanaca salikor patikolayto a tanektek. Oniya nalifetan padamaay ci Cimingan misetek to falocoˈ madimadi ci Yihofaan.

9. Pakayni i pisiˈayaw to sapalifet ano calemcemay kiso, sasamaan ko pidemak? (Nengnengen ko coka.)

⁹ Ano tahalifa kiso to sapalifet i, nolatekay tada macariraway ko niyah saan kiso miharateng, mansa itini satolon awaay ko pakayraan misongilaˈ a somowal to harateng no niyah han? Anca awaay ko ˈicel no niyah mikingkiw saan kiso miharateng han? Haratengen, masongilaˈay ko kacipinang ni Yihofa to pasangaray iso. Mihaenay, soˈlin itini satolon kantangay aca somowal kiso to pina a sowal, wa ngaˈay kiso pakasoˈlin to papafelien ni Yihofa to kihcod misaalian iso. (Ifiso 3:20) Ano pakayni ka adada kiso, macariraw anca maroray pasangaray mikingkiw, ngaˈay mitengil to milokoingan a Fangcalay Cudad anca mitepangan a cudad, ngaˈayho mitengil to radiw no pakahemeken romadiw ci Yihofa, anca minengneng to jw.org wangcan a ika. Pasayra kiso ci Yihofaan mitolon, hanaca itini Fangcalay Cudad ato mitepangan a cudad mikilim micangacang to sapafeli ni Yihofa tisowanan a sakayat, papacaˈofen ni Yihofa kiso, patanektek a paˈicel tisowanan.

10. Sasamaan ko salikaka mitongal to ˈicel ita?

¹⁰ Misaka dademakay ci Yihofa to salikaka patongal to ˈicel ita. Pafeliay cangra to ‘taˈangayay a sahinom’ i kitanan, padama kitanan misiˈayaw to sapalifet ato pasangaray a ˈinorong. (Kolosay 4:10, 11) Ano tahalifa to pades i, misaaliay kita to sapadama no widang. (Taneng 17:17) Ano malonay kita i, o salikaka ngaˈay midimokos to saali no mita, mihinom kitanan, ato pakalalok kitanan padadotoc madimadi midoko ci Yihofaan. Dotoc, malacafay  kita minengneng to tinakoan no wina ni Yis ci Mariya.

11. Ci Mariya hano misaaliay to ˈicel?

¹¹ Misaaliay ci Mariya to ˈicel. O coyoh ci Kapriil pafeliay ci Mariyaan to pasangaray a ˈinorong, haratengen iso hakowaay ko taˈangay no saroero ni Mariya hani? Cowaho ka ciraramod cingra kawra cacipoyapoy mahofoc to wawa. Awaayho ko nalifetan ningra midimokos to wawa, ˈarawhan papalahad midimokos to cecay wawa, hanaca o noikoran a Misiya koniya wawa. Cowaho ka dadiˈi cingra to roma tamdaw kawra cipoyapoyayto, sasamaan cingra mitadtad to hafaˈinay ci Yosifan toniya demak hani?—Luka 1:26-33.

12. Mikitini Luka 1:39-45, samaanay ci Mariya milifok to misaalian a ˈicel?

¹² Samaanay ci Mariya milifok to ˈicel milahci toniya mikiriwiˈay a ˈinorong hani? Micangacangay cingra to sadama. Tinakoen, pakayni toniya ˈinorong, papitadtadan ningra ci Kapriil tonini a demak. (Luka 1:34) Cato ka halafin, malingaday cingra tayra i ‘lotok no Yuta’ milisoˈ to salawina ci Ilisapican. Mihaen eca ka rorayen cingra tada ciepocay. Pakahemekay ato pakalalokay ci Ilisapic ci Mariyaan, hanaca itini sakayat ni Yihofa somowalay to pakayniay itiyaday ni Mariya a wawa a sapairasol. (ˈOsien ko Luka 1:39-45.) Maharek mitengil toniya sowal ikor, pakahemekay ci Mariya ci Yihofaan, sowal sa ci Yihofa i, ‘tano ciˈicelay a patelaw midemak to kafahkaˈan’ sanay. (Luka 1:46-51) Pakaynian ci Kapriil aci Ilisapican, patongalan ni Yihofa to ˈicel ci Mariya.

13. Fafahiyan salikaka itini Polifia pasayraay i salikaka micangacang to sapadama, samanay ko teloc?

¹³ Malecad ci Mariyaan, wa ngaˈay kiso pakayni salikaka milifok to ˈicel. Mahaenay ko itiniay i Polifia a fafahiyan salikaka ci Tasoli. O wama ningra pakidemay ko adada, maminiwing, talaˈayaway ci Tasoli mitamorong to midimokosay to wama a ˈinorong. (1 Timoti 5:4) Mihaen to demak cowa ka dolo, sanay cingra: “Kinapinapinaay, caayto ka tomeseng kako saan ko harateng.” Kawra satapang cowa ka picangacang cingra to sapadama no salikaka. Sanay cingra: “Cowa ka ciharateng kako miafad to salikaka, samanen papadama ci Yihofa takowanan sanay kako miharateng. Ikor mahapinangay ako mihaen to demak o misiwatikay to niyah, o mitiˈeray to niyah misaysay to pasangaray.” (Taneng 18:1) Misaˈosiay ci Tasoli pasowal to pina widang to pakayraan no niyah, sanay cingra: “Taˈangayay ko sapadama no salikaka takowanan, ano hakowato ko sowal cowa ka ngaˈay paihkal to miakoˈiday a falocoˈ. Miˈorongay cangra to kakaenen tayni i paisingan, tano sinaelayho mihinom takowanan. Mafanaˈ to cowa ka cecay aca ko niyah miremo to pasangaray, mihaen ko harateng tada ngaˈayayto! Masalalomaˈ no paro no lomaˈ ni Yihofa kita, i lomaˈay a tamdaw makahiay padama tisowanan, malacafay tisowanan tomangic, malacafay misiˈayaw to pasangaray.”

14. Misamanay hano mamicada kita to sapadama no malohemay malitengay?

¹⁴ Pakayniayho ci Yihofa i malohemay malitengay patongal to ˈicel kitanan. Cangra i, o sapatelong ni Yihofa, ngaˈay pakalalok kitanan, miliyaw patanektek kitanan. (Isaya 32:1, 2) Mansa, ano macariraw kiso i, o kacalemceman a demak ngaˈayay pasowalen ko malohemay malitengay. Ano padama cangra tisowanan i, aka pinaˈay kiso, pairaen ko miakoˈiday a falocoˈ micada. Pakayni i malohemay malitengay, papatanektek a paˈicel ci Yihofa tisowanan.

15. Polong a Krisciyang mamisalimla to maanan hatokel?

¹⁵ O sapafeli no Fangcalay Cudad a hatokel o papaˈicel kitanan. (Loma 4:3, 18-20) Iraay ko hatokel ita itini fafekang no sera a lakoing anca itini kakarayan Hongti Kitakit milayap  to midaˈocay ˈorip. Pakayni toninian a kalimlaan hatokel, iraayto ko ˈicel ita miemem to sapalifet, padadotoc milasil to ngaˈayay lihaf, hanaca itini kasakopang mitamorong to masakenaay a ˈinorong. (1 Tisalonika 1:3) Onini a hatokel padamaay to tarokos ci Pawloan padadotoc a tanektek.

16. Hano misaaliay ko tarokos ci Pawlo to ˈicel hani?

¹⁶ Misaaliay ci Pawlo to ˈicel. O tikami ni Pawlo to Korintoay a Krisciyang, patinakoay to niyah to malonayay a kapowa. Sowal ningra to niyah ‘adihayay ko saroero,’ ‘cisasaay ko falocoˈ,’ ‘micadaay to sapalak,’ ‘mapolinay’ sanay. Latekay, iraay ko katalawan no ˈorip. (2 Korinto 4:8-10) Itiniay saka tolo miliwko a mitosil ci Pawlo mitilid tonini a sowal, itiya cowa ka fanaˈ cingra to cowaho ka hererek ko sapalifet no niyah. Ikor mikariˈangan no tamdaw cingra, milepetan no tamdaw, tahapadesay ko tamina, salikor malofoay i kapalitan.

17. Mikitini 2 Korinto 4:16-18, samaanay ci Pawlo milifok to ˈicel ngaˈay miemem to sapalifet hani?

¹⁷ Misamotekay ci Pawlo to kaˈayaway a hatokel, milifokay to ˈicel ngaˈay padotoc a mihadidi. (ˈOsien ko 2 Korinto 4:16-18.) Pasowalan ni Pawlo ko Korintoay a Krisciyang, soˈliˈlin o tireng ningra ‘palidlid sanay malonay,’ kawra cowa ko mamatoled ko falocoˈ ningra. O pamotekan ni Pawlo ono ikoran a demak, pakaynien cingranan, itini kakarayan milayap to midaˈocay ˈorip onini a kalimlaan a hatokel ‘awaay ko pakaliniay.’ Sapilifokaw to sapalifon, ano mananto a sapalifet ko miememan sahtoay o ciepocay sanay ko harateng ni Pawlo. Marariday ci Pawlo midotim tonini a hatokel, telocto miharateng cingra to ikemoday a tamdaw no niyah ‘masafaeloh masafaelohay.’

18. Hatokel noikor samaanay padama ci Tihomiean ato paro no lomaˈ milifok to ˈicel?

¹⁸ O hatokel noikor padamaay to faˈinayan salikaka ci Tihomie itini i Pawkaliya milifok to ˈicel. ˈAyaw no pina miheca, o safa ningra ci Citelafoke pakayniay i latiih a mapatay. Ikor nonini cecay liyad, padotocay a masomad ci Tihomie. Sapiremoaw to kasomad no falocoˈ, cingra ato paro no lomaˈ marariday miharateng ano patikol maˈorip ko safa wa samaan ko pakayraan. Sanay cingra: “Masasowalay kami wa  icowa masasoˈaraw ci Citelafokean noikor, ato misaday to maanan a kakaenen ningra, mamitahidang to cimanan mirienang to pilitemoh cingranan, ato pasowal cingranan o manan ko mifekaday a demak i salikoray romiˈad.” Sanay ci Tihomie, pamotek to hatokel noikor padamaay cingranan ato paro no lomaˈ padadotoc mihadidi, hanaca mihadidi a mitala to pipatikol ni Yihofa paˈorip ci Citelafokean noikor.

19. Samaan ko pidemak iso matongal ko pakasoˈlin to hatokel noikor hani? (Nengnengen ko coka.)

¹⁹ Samaan ko pidemak iso matongal ko pakasoˈlin to hatokel noikor hani? O hatokel iso ano aitini fafekang no sera milayap to midaˈocay ˈorip, ngaˈay kiso miˈosi to pakayniay i lakoing a lalakaw no Fangcalay Cudad, halo pisongilaˈ midotim samanay ko kaˈorip itini faelohay a hekal. (Isaya 25:8; 32:16-18) Haratengen itiniayto kiso i lakoing. Cima ko maˈaraway iso? Matengilay ko maanan a ngihaˈ? Samanay ko harateng? Sapikidataw to maharatengay, ngaˈayay nengnengen iso ko mitepangan niyam a cudad pakayniay i lakoing a coka, anca minengneng to Halamhamen ko Makapahay Lakoing, Itiniayto i Kaˈayaw, Haratengen ko Cecay Romiˈad sanay no radiw a ika. Paifalocoˈen iso o makapahay a hatokel i faelohay hekal, ano saan miharateng o malifaay no niyah a pasangaray o ‘cecayay a liyad o kahmaway.’ (2 Korinto 4:17) O sapafeli ni Yihofa tisowanan kalimlaan a hatokel papadama tisowanan padadotoc mihadidi i sapalifet.

20. Ano malonayen kita i, sasamaan milifok to ˈicel hani?

²⁰ Latekay, malonayen nanay kita, kawra ‘pakayni pitiˈer to Kawas, mamilifok kita to ˈicel.’ (ˈOlic 108:13) Sapadamaaw tisowanan milifok to ˈicel, maharekayto ci Yihofa mihadak to misaalian iso a kihcod. Mihaenay, ano misaaliay kiso to sapadama milahci to ˈinorong, miemem to sapalifet anca padadotoc lipahak i, mikitini i falocoˈ mitolon ci Yihofaan, hanaca pakayni notekedan a pikingkiw micangacang to sakayat Ningra. Cacadaenho iso ko sapakalalok no salikaka, hanaca mararid miharateng to makapahay hatokel noikor. Mihaen, ‘mamitoor kiso to kasapaan a ˈicel no Kawas, milifok to misaalian a ˈicel, ngaˈay tanektek a ciˈicel,’ hanaca ‘ira ko mihadidiay ato lipahakay, padadotoc miemem.’—Kolosay 1:11.